छत्तीसगढ़ म विधानसभा चुनाव के दूसरा चरण के तहत सत्तर विधानसभा क्षेत्र म आज कुछएक छुटपुट घटना ल छोड़के मतदान शांतिपूर्ण अउ निष्पक्ष संपन्न होइस। ताजा जानकारी के अनुसार संझा पांच बजे तक करीबन अड़सठ प्रतिशत मतदान दर्ज करे गेहे। सबले जादा बयासी प्रतिशत मतदान कुरूद म अउ सबले कम बावन प्रतिशत रायपुर दक्षिण म दर्ज करे गेहे। एमन अनंतिम आकडंा हरय, एमा बदलाव हो सकत हे।
दूसर चरण म एक सौ तीस महिला अउ एक तृतीय लिंग समेत कुल नौ सौ अंठावन उम्मीदवार चुनाव मैदान म हे। एमा प्रमुख रूप ले राज्य के मुख्यमंत्री भूपेश बघेल पाटन ले, विधानसभा अध्यक्ष डॅाक्टर चरणदास महंत सक्ति ले, उप मुख्यमंत्री टी.एस. सिंहदेव अंबिकापुर ले, गृहमंत्री ताम्रध्वज साहू दुर्ग ग्रामीण ले अउ रविंद्र चौबे साजा विधानसभा क्षेत्र ले उम्मीदवार हे । उंहे भाजपा के प्रदेश अध्यक्ष अउ सांसद अरूण साव लोरमी ले, नेता प्रतिपक्ष नारायण चंदेल जांजगीर चंापा ले, केंद्रीय राज्य मंत्री रेणुका सिंह भरतपुर-सोनहत ले, सांसद गोमती साय पत्थलगांव ले, अउ पाटन ले सांसद विजय बघेल घलो शामिल हे। ए जम्मों के भाग्य आज ईवीएम म बंद होगे।
दूसरा-चरण मतदान 02
दूसरइया चरण बर बिहनिया 8 बजे ले संझा पांच बजे तक मतदान होइस। सिरिफ बिन्द्रानवागढ़ विधानसभा क्षेत्र के 9 ठिन मतदान केंद्र- कामरभौदी, आमामोरा, ओढ़, बड़े गोबरा, गंवरगांव, गरीबा, नागेश, सहबीनकछार अउ कोदोमाली म बिहनिया 7 बजे ले मंझनिया 3 बजे तक मतदान करे गीस। एखर अलावा बिन्द्रानवागढ़ के बांचे मतदान केंद्र मन म बिहनिया 8 बजे ले संझा 5 बजे तक वोट डाले गीस।
मतदान ल लेके आज युवा वर्ग ले लेके सियान अउ महिला मन म जोरदरहा उछाह देखे गीस। मतदान केंद्र मन म बीहनिया ले लोगन मनके लंबा लाइन लगे रीहिस।
दूसरइया चरण बर आज होय मतदान के दउरान राज्यपाल विश्वभूषण हरिचंदन अउ प्रथम महिला सुप्रभा हरिचंदन ह सिविल लाइन्स के सिहावा भवन म बनाये गे आदर्श मतदान केंद्र पहुंचके अपन मताधिकार के प्रयोग करीन। मतदान के बाद राज्यपाल ह सेल्फी जोन म फोटो घलो लीन।
उंहे मुख्य निर्वाचन पदाधिकारी रीना बाबा साहेब कंगाले ह रायपुर के धरमपुरा पूर्व माध्यमिक शाला स्थित मतदान केंद्र म मतदान करीन। ओमन आम मतदाता मन जइसे लाईन म लगके अपन परिवार सहित मतदान करीन। ओमन इंहा बनाय गे दूनो मतदान कंेद्र म होवत मतदान के अवलोकन घलो करीन।
उंहे मुख्यमंत्री भूपेश बघेल ह पाटन विधानसभा क्षेत्र के कुरूदडीह म बनाए गे मतदान केंद्र म मतदान करीन।
अइसने सांसद विजय बघेल ह भिलाई सेक्टर पांच स्थ्ति स्कूल म बनाये गे मतदान केंद्र म अपन मताधिकार ल बउरीन।
दूसरा-चरण मतदान 03
धमतरी जिला के सिहावा विधानसभा क्षेत्र म बिलभदर ग्राम पंचायत म बनाये गे मतदान केंद्र म विशेष पिछड़ी जनजाति कमार वर्ग के लोगन मन मतदान करीन। कमार जनजाति के मनखे मन पारंपरिक औजार अउ सामान जइसे तीर-धनुष, टुकनी, सुपा लेके मतदान करे बर पहुंचीन। उंहे मतदान के बाद मतदाता मन सेल्फी जोन म सेल्फी घलो लीन।
ओति रायगढ़ म पुसौर के ग्राम लोहाखान निवासी एक सौ सात साल के माधव मेहर ह मतदान केंद्र पहुंचके अपन वोट दीन।
अइसने महासमुंद के खल्लारी विधानसभा क्षेत्र म एक सौ एक बछर के महिला केशर जैन ह मतदान केंद्र पहुंचके मतदान करीस।
एति बालोद जिला मुख्यालय के आमापारा म बनाये गे मतदान केंद्र म मतदान बर पहुंचे मतदाता पेमेश्वरी साहू अउ नवा युवा मतदाता आर्यन यदु के तिलक लगाके स्वागत करे गीस। एमन मतदान के बाद सेल्फी घलो लीन।
उंहे राज्य म नवा युवा मतदाता मन म मतदान ल लेके बड़ उछाह देखे गीस। ओमन हेप्पी वोटिंग करके सेल्फी घलो लीन।
प्रदेश म दूसरइया चरण के जम्मों सत्तर विधानसभा क्षेत्र के मतदान केंद्र मन म शांतिपूर्ण अउ निष्पक्ष चुनाव संपन्न कराय बर सुरक्षा के सबो इंतजाम करे गे रीहिस। मतदान बर राज्य म अठारा हजार आठ सौ तैंतीस मतदान केंद्र बनाय गे रीहिस। एमा सात सौ सत्ताईस संगवारी मतदान केंद्र, इकहत्तर दिव्यांग, अउ इकहत्तर युवा मतदान केंद्र शामिल रीहिस। एमा ले तीन सौ सैंतालिस मतदान केंद्र ल आदर्श मतदान केंद्र बनाय गे रीहिस।
आज होय मतदान के दउरान नौ हजार चार सौ चौबीस मतदान केंद्र मन म वेबकॉस्टिंग कराय गीस। उंहे चुनाव संपन्न कराय बर नब्बे हजार दू सौ बहत्तर कर्मी मनके ड्यूटी लगाय गे रीहिस।
दूसरा-चरण मतदान
प्रदेश म दूसर चरण म सत्तर सीट बर मतदान के संघरा राज्य के सबो 90 विधानसभा सीट बर मतदान के काम पूरा होगे हे। मतगणना तीन दिसंबर के होही, मतदान पूरा होय के संघरा राजनीतिक क्षेत्र म चुनाव परिणाम ल लेके कयासबाजी शुरू होगे हे। हमर संवाददाता के मुताबिक राज्य म आज गरियाबंद म छुटपुट घटना ल छोड़के मतदान शांतिपूर्ण संपन्न होइस।
हमर गरियाबंद संवाददाता के मुताबिक नक्सली हमला म आईटीबीपी के एक झिन जवान के गंभीर रूप ले घायल होय के समाचार हे। इही बीच राज्य के आने आने जगा म मतदान शांतिपूर्ण सिराइस।
दुर्घटना
राजनांदगांव जिला के छुईखदान थाना क्षेत्र म होय एक सड़क दुर्घटना म पिता-पुत्री समेत तीन मनख्ेा मनके मउत होगे, उंहे चार झिन दूसर मनखे मन घायल होगे।
मिले जानकारी के अनुसार काली संझा राजनंादगांव के लखोली निवासी एक परिवार पारिवारिक कार्यक्रम म सामिल होय बर ग्राम खैरा नर्मदा गे रीहिस, उंहा ले लहुटत बेरा ग्राम माहाराटोला मोड़ करा तेज रप्तार कार ह ओमन के मोटर सायकिल के संगेसंग एक ठिन दूसर बाईक ल टक्कर मार दीस। ए दुर्घटना म मोटर सायकिल सवार पिता अउ बेटी के मउकाच म मउत होगे। उंहे ओखर पत्नि अउ एक झिन दूसर बेटी गंभीर रूप ले घायल होगे। एखरे संग दूसर मोटर सायकिल के चालक मुडियामोहारा निवासी एक युवक के घलो मउत होगे। जबकि दू झिन दूसर मनखे मन घायल होगे।
उंहे इही जिला के सोमनी थाना क्षेत्र म मोटर सायकिल सवार तीन युवक सड़क किनारे खड़े ट्रक ले टकरागे । ए दुर्घटना म एक युवक के मउकाच म मउत होगे। उंहे दू झिन दूसर युवक घायल होगे जेला इलाज बर मेडिकल कॉलेज अस्पताल म भर्ती कराय गेहे।
केशकाल भारी वाहन प्रतिबंध
कोंडागांव जिला के राष्ट्रीय राजमार्ग क्रमांक तीस म स्थित केशकाल घाट म काली अठारा नवंबर ले सड़क मनके मरम्मत करे जाही। एखर सेती केशकाल घाटी रद्दा म अवइया तीस नवंबर तक यात्री बस अउ छोटे चारपहिया वाहन मन ल छोड़के मालवाहक के अवई जवई प्रतिबंधित रीही। मालवाहक रायपुर आय बर केशकाल के विश्रामपुरी चौक ले होवत विश्रामपुर, बोराई, सिहावा नगरी, धमतरी मार्ग के इस्तेमाल कर सकत हे। उंहे कोंडागंाव अउ जगदलपुर जाय बर कंाकेर जिला के माकड़ी ढाबा करा परिवर्तित मार्ग बनाय गेहे, जिहंा ले भानुप्रतापपुर, अंतागढ़ अउ नाराणपुर के रस्ता ले कोंडागंाव पहुंचे जा सकत हे।
मतदान सौ प्रतिशत
इही बीच कोरिया जिला के भरतपुर-सोनहत विधानसभा क्षेत्र के तीन ठिन मतदान केंद्र मन म शत प्रतिशत मतदान होय के जानकारी मिले हे। हमर संवाददाता के अनुसार सोनहत विकासखंड के ग्राम शेहराडांड, कांटों अउ रवला मतदान केंद्र के सबो मतदाता मन अपन मतदान केंद्र जाके मतदान करीन।