आज दिनभर के खबर ल अपन गुरतुर छत्तीसगढ़ी भाखा म पढ़व

प्रदेस म विधानसभा चुनई के दूसरईया चरण के तहत 70 सीट बर काली मतदान होही। मुख्य निर्वाचन पदाधिकारी कार्यालय ह मतदान के सबो तियारी लगभग पूरा कर लेहे। मतदान दल मतदान के सामान पाय के बाद अपन निर्धारित मतदान केंद्र बर रवाना होगे हे। दूसरइया चरण बर बिहनिया 8 बजे ले संझा पांच बजे तक मदान होही। सिरिफ बिन्द्रानवागढ़ विधानसभा क्षेत्र के 9 ठिन मतदान केंद्र- कामरमौदी, आमामोरा, ओढ़, बड़े गोबरा, गंवरगांव, गरीबा, नागेश, सहबीनकछार अउ कोदोमाली म बिहनिया 7 बजे ले मंझनिया 3 बजे तक मतदान होही। एखर अलावा बिन्द्रानवागढ़ के बांचे मतदान केंद्र मन म बिहनिया 8 बजे ले संझा 5 बजे तक वोट डाले जाही।
दूसरईया चरण म नौ सौ अंठावन उम्मीदवार चुनाव मैदान म हे। एमा आठ सौ सत्ताईस पुरूष, एक सौ तीस महिला अउ एक तृतीय लिंग के उम्मीदवार शामिल हे। एमा प्रमुख रूप ले राज्य के मुख्यमंत्री भूपेश बघेल पाटन ले, विधानसभा अध्यक्ष डॅाक्टर चरणदास महंत सक्ति ले, उप मुख्यमंत्री टी.एस. सिंहदेव अंबिकापुर ले, गृहमंत्री ताम्रध्वज साहू दुर्ग ग्रामीण ले अउ रविंद्र चौबे साजा विधानसभा क्षेत्र ले उम्मीदवार हे । उंहे  भाजपा के प्रदेश अध्यक्ष अउ सांसद अरूण साव लोरमी ले, नेताप्रतिपक्ष नारायण चंदेल जांजगीर चांपा ले, केंद्रीय राज्य मंत्री रेणुका सिंह भरतपुर-सोनहत ले अउ सांसद गोमती साय पत्थलगांव ले उम्मीदवार हे। दूसर चरण म एक करोड़ तिरसठ लाख चौदा हजार चार सौ उन्यासी मतदाता अपन वोट डारही। दूसइरया चरण के मतदान बर प्रदेश म कुल अठारा हजार आठ सौ तैंतीस मतदान केंद्र बनाय गेहे।

दूसर चरण के चुनाव बर एक करोड़ तिरसठ लाख चौदा हजार चार सौ उन्यासी मतदाता अपन मत के प्रयोग करही। एमा इक्यासी लाख इकचालिस हजार छै सौ चौबीस पुरूष मतदाता, इक्यासी लाख बहत्तर हजार एक सौ इकहत्तर महिला मतदाता अउ छै सौ चौरासी तृतीय लिंग के मतदाता हे।
उंहे पांच लाख चौसंठ हजार नौ सौ अड़सठ मतदाता अठारा ले उन्नीस आयुवर्ग के हे। जबकि एक लाख तीस हजार नौ सौ नौ दिव्यांग मतदाता घलो काली अपन मताधिकार के प्रयोग करही । संगेसंग दू हजार एक सौ इकसठ अइसन मतदाता हे जेन सौ बछर के आयु पूरा कर चुके हे। उंहे सतरा एनआरआई, मतदाता अउ पंद्रह हजार तीन सौ बयानबे सेवा मतदाता घलो शामिल हे। एखर अलावा एक लाख अंठावन हजार दू सौ चौवन अस्सी बछर ले जादा आयुवर्ग के मतदाता घलो अपन मताधिकार के प्रयोग करही।

प्रदेश म दूसर चरण के सबो 70 विधानसभा क्षेत्र के मतदान केंद्र मन म शांतिपूर्ण अउ निष्पक्ष चुनाव संपन्न कराय बर सुरक्षा के व्यापक प्रबंध करे गेहे। राज्य म दूनो चरण म कुल एक सौ नौ संवेदनशील अउ एक हजार छै सौ सत्तर अतिसंवेदनशील मतदान केंद्र चिन्हांकित करे गे रीहिस, जेमा माइक्रो आब्जर्वर के व्यवस्था सुनिश्चित करे गेहे।
मुख्य निर्वाचन पदाधिकारी कार्यालय ले मिले जानकारी के अनुसार प्रदेश म दूसर चरण म चुनाव संपन्न कराय बर नब्बे हजार दू सौ बहत्तर कर्मी नियुक्त करे गेहे। एमा पचहत्तर हजार तीन सौ बत्तीस मतदान कर्मी अउ चौदा हजार नौ सौ चालीस रिजर्व कर्मी शामिल हे, जेन मतदान केंद्र म पहुंच गेहे। मतदान केंद्र मन म चुनाव बर मतदान दल के अलावा एक हजार नौ सौ बैंसठ सेक्टर  अधिकारी लगाय गेहे। जेन  हर दू घंटा म मतदान प्रतिशत के जानकारी अपन रिटर्निंग अधिकारी ल उपलब्ध कराही। उंहे हर मतदान केंद्र म बीएलओ, अल्फाबेटिकल मतदाता सूची के संग उपस्थित रीही अउ मतदाता मन ल उंखर नाम के संग सरल क्रमांक खोजे म मदद करही।
एखर पहिली काली मंझनियां राजधानी  रायपुर संग सबो सत्तर विधानसभा क्षेत्र मन म जिला पुलिस बल के संग केंद्रीय अर्धसैनिक बल मन ह फ्लैग मार्च करीन।

प्रदेस म विधानसभा चुनई के दूसरइया चरण बर चुनाव आयोग ह सबो मतदाता मनके फोटोयुक्त पहचान पत्र जारी कर देहे। राज्य के मुख्य निर्वाचन पदाधिकारी रीना बाबा साहेब कंगाले ह बतईन कि चुनाव म वोट डाले बर सबो मतदाता मन ल अपन निर्वाचक फोटो पहचान पत्र देखाना जरूरी होही। एखर अलावा बारह आने दस्तावेज ल देखाके घलो मतदाता अपन मताधिकार के प्रयोग कर सकही। ओमन ह कहिन कि सामान्य स्थिति म चुनाव आयोग के इही अपेक्षा रइही कि सबो मतदाता मतदान स्थल म अपन वोट डाले ले पहिली अपन पहिचान बताय बर आयोग डहार ले जारी निर्वाचक फोटो पहिचान पत्र दिखाय।
मुख्य निर्वाचन पदाधिकारी ह किहीन कि अगर कोनो मतदाता फोटो पहिचान पत्र नइ दिखा पाथे, त अइसन स्थिति म ओह 12 ठिन आने-आने दस्तावेज मन ले कोनों एक दस्तावेज ल देखाके घलो वोट डाल सकत हे। एखर बर आधार कार्ड, मनरेगा जॉब कार्ड, ड्राईविंग लाइसेंस, पैन कार्ड अउ भारत सरकार डहार ले जारी पासपोर्ट ल वैध दस्तावेज माने गेहे। एखर अलावा सरकारी अउ सार्वजनिक क्षेत्र के कंपनी डहार ले जारी करे गे सेवा पहिचान पत्र यानि आईकार्ड के संगेसंग बैंक अउ डाकघर ले जारी फोटोयुक्त पासबुक, स्वास्थ्य बीमा, स्मार्ट कार्ड अउ आने सरकारी पहिचान पत्र ल घलो मान्य करे गे हवय।

राज्य शासन डहार ले 17 नवंबर के मतदान के दिन 70 विधानसभा क्षेत्र  के जम्मों शासकीय कार्यालय अउ संस्थान मन म सामान्य छुट्टी घोषित करे गे हवय। एखर अलावा प्राइवेट संस्थान, औद्योगिक अउ व्यवसायिक प्रतिष्ठान मन म घलो अधिकारी-कर्मचारी मन ल सवैतनिक छुट्टी दे जाय के निरदेस जारी करीन हे। जारी करे गे आदेस के मुताबिक अइसन कारखाना जउन सप्ताह म सातों दिन काम बूता करथे, उहां पहिली अउ दूसर पाली के मजदूर मन ल मतदान के दिन दू-दू घंटा के अवकाश दे जाय अउ जउन कारखाना सरलग प्रक्रिया म आथे, ओमा काम करईया श्रमिक मन ल बारी-बारी ले मतदान करे के सुविधा देके निर्देश दे गेहे।

प्रदेश म होवत विधानसभा चुनाव म सबले जादा संगवारी बूथ अपन तरफ ध्यान खिचत हे। ये बूथ महिला मनके सहभागिता बढ़ाय अउ महिला सशक्तिकरण ल बढ़ावा देबर बनाय गेहे। प्रदेश म दूसरइया चरण के मतदान बर सात सौ सत्ताईस संगवारी बूथ बनाय गेहे। एमा सुरक्षा ल लेके मतदान कराय तक के जिम्मेदारी महिला मनके उपर हे। एमा बूथ म चुनाव बर महिल अधिकारी अउ कर्मचारी मन ल विशेष प्रशिक्षण दे गेहे। गुलाबी रंग ले बने ए बूथ महिला मन ल मतदान करे बर प्रोत्साहित घलो करत हे। राजधानी रायपुर के उत्तर अउ पश्चिम विधानसभा क्षेत्र म बनाय गे संगवारी मतदान केंद्र के जिम्मेदारी ए बार महिला मन ही संभालही।
एखर अलावा इकहत्तर दिव्यांग मतदान केंद्र अउ इकहत्तर युवा मतदान केंद्र बनाय गेहे। संगेसंग तीन सौ सैंतालिस मतदान केंद्र ल आदर्श मतदान केंद्र बनाय गेहे। दूसर चरण बर सत्तर विधानसभा क्षेत्र म चार हजार चार सौ सोला मतदाता जेन अस्सी बछर ले जादा आयुवर्ग के हे ओखर घर-घर जाके डाक मतपत्र के माध्यम ले मतदान कराय जा चुके हे। एखर अलावा चुनाव काम म लगे अधिकारी कर्मचारी मनके सुविधा केंद्र म इकहत्तर हजार चार सौ सत्ताईस डाक मतपत्र मिल चुके हे।

छत्तीसगढ़ विधानसभा चुनाव म निष्पक्ष अउ पादर्शिता ल लेके केंद्रीय चुनाव आयोग लगातार समीक्षा करत हे। आयोग ह एखर बर पचास फीसदी मतदान केंद्र मन म सीसीटीवी कैमरा लगाय हे, जेन सीधा जिला निर्वाचन कार्यालय ले जुड़ी रीही। एखर निगरानी बर एक टीम तैनात करे गेहे। कोनो भी बूथ म कोनो ेप्रकार के अप्रिय घटना होय म तुरते कार्रवाई करे जाही। रायगढ़ जिला के चार विधानसभा क्षेत्र लैलूंगा, रायगढ़, खरसिया अउ धरमजयगढ़ म एक हजार पच्यासी मतदान केंद्र बनाय गेहे। एमा ले पांच सौ तिरालिस केंद्र सीसीटीवी कैमरा के निगरानी म रीही।

आज राष्ट्रीय प्रेस दिवस हे। स्वतंत्र अउ जिम्मेदार प्रेस के याद म ये दिन हर बछर सोला नवंबर के मनाये जाथे। आज ही के दिन भारतीय प्रेस परिषद ह पत्रकारिता के मानक मनके निगरानी के काम संभाले रीहिन। बछर उन्नीस सौ संतानबे ले परिषद आने आने संगोष्ठी के माध्यम ले राष्ट्रीय प्रेस दिवस मनावत हे। ए बछर राष्ट्रीय प्रेस दिवस के विसय हे – कृत्रिम बुद्धिमता के युग मे   मीडिया