प्रदेस म विधानसभा चुनाव के दूसरइया चरण बर प्रचार अभियान अब अपन आखिरी दौर म पहुंच गेहे। आने-आने राजनीतिक दल के नेता लगातार क्षेत्र मन म जनसभा अउ नुक्कड़ सभा के माध्यम ले अपन प्रत्याशी के पक्ष म समर्थन जुटावत हे। काली मंझनिया चुनाव प्रचार खतम हो जही। सत्तर सीट बर नौ सौ अंठावन उम्मीदवार चुनाव मैदान म हवय। दूसरे चरण म एक करोड़ तिरसठ लाख चौदह हजार चार सौ उनयासी मतदाता अपन मताधिकार के उपयोग कर सकही। प्रदेस म कुल अट्ठारह हजार आठ सौ तैंतीस मतदान केन्द्र बनाय गेहे।
भाजपा के वरिष्ठ नेता अउ केन्द्रीय सूचना प्रसारण मंत्री अनुराग ठाकुर ह आज रायपुर म प्रेसवार्ता म आरोप लगईन कि राज्य के कांग्रेस सरकार अपन पांच बछर के कामकाज ल बताय के बजाय नवा-नवा वादा करत हे। ओमन ह आरोप लगईन कि पाछु चुनाव के दउरान कांग्रेस ह जेन वादा करे रिहीन, ओमन ल ए पांच बछर म पूरा करे के बजाय ओखर सरकार ह भ्रष्टाचार ल बढ़ावा दीन। केन्द्रीय मंत्री अनुराग ठाकुर ह महादेव ऐप के जरिए पांच सौ आठ करोड़ रूपिया के भ्रष्टाचार के संग सराब घोटाला अउ पीएसएसी घोटाला के चर्चा घलो करीन।
उहें, सक्ती अउ जैजेपुर म केन्द्रीय मंत्री स्मृति ईरानी ह आज भाजपा प्रत्याशी के पक्ष म समर्थन मांगीन। ओमन ह कहिन कि प्रधानमंत्री नरेन्द्र मोदी ह जेन वादा करे हे ओला निश्चित रूप ले पूरा करे गेहे। केन्द्रीय मंत्री ह कांग्रेस उपर पाछु चुनाव के समय करे गे वादा ल पूरा नइ करे के आरोप घलो लगईन। ओमन ह राज्य के कांग्रेस सरकार उपर महादेव ऐप के माध्यम भ्रष्टाचार करे के आरोप घलो लगईन।
विस प्रचार-02
उहें, मुख्यमंत्री भूपेश बघेल ह आज बेमेतरा जिला के नवागढ़ विधानसभा क्षेत्र म पार्टी प्रत्याशी के पक्ष म आमसभा लीन। ए बेरा म श्री बघेल ह कहिन कि पाछु पांच बछर के दउरान कांग्रेस सरकार ह किसान, आदिवासी, महिला, युवा अउ बेरोजगार के संग सबो वर्ग के कल्याण बर योजना चलाय हे।
काली दूसरइया चरण के प्रचार अभियान के आखिरी दिन घलो कांग्रेस अउ भाजपा के कतकोन वरिष्ठ नेता प्रचार अभियान के समय खतम होवत तक आने-आने जगह म जनसभा अउ रैली के माध्यम ले अपन पार्टी प्रत्याशी के पक्ष म समर्थन जुटाय के प्रयास करही। एखर तहत काली बेमेतरा अउ कोरबा जिला म केन्द्रीय गृह मंत्री अमित शाह ह भाजपा प्रत्याशी के पक्ष म आमसभा लीहीं। उहें, कांग्रेस के पूर्व राष्ट्रीय अध्यक्ष राहुल गांधी घलो बेमेतरा म कांग्रेस प्रत्याशी आशीष छाबड़ा के पक्ष म आमसभा ल संबोधित करही। अइसने, बेमेतरा जिला के नवागढ़ म केन्द्रीय मंत्री अनुराग ठाकुर भाजपा प्रत्याशी दयालदास बघेल के पक्ष म चुनाव प्रचार करही।
मतदाता फोटो पहचान पत्र
प्रदेस म विधानसभा चुनाव के दूसरइया चरण बर चुनाव आयोग ह सबो मतदाता मनके फोटोयुक्त पहचान पत्र जारी कर देहे। राज्य के मुख्य निर्वाचन पदाधिकारी रीना बाबा साहेब कंगाले ह बतईन कि चुनाव म वोट डाले बर सबो मतदाता मन ल अपन निर्वाचक फोटो पहचान पत्र देखाना जरूरी होही। एखर अलावा बारह आने दस्तावेज ल देखाके घलो मतदाता अपन मताधिकार के प्रयोग कर सकही। ओमन ह कहिन कि सामान्य स्थिति म चुनाव आयोग के इही अपेक्षा रइही कि सबो मतदाता मतदान स्थल म अपन वोट डाले ले पहिली अपन पहिचान सुनिश्चित करे बर आयोग डहार ले जारी निर्वाचक फोटो पहिचान पत्र दिखाय।
मुख्य निर्वाचन पदाधिकारी ह किहीन कि यदि कोनो मतदाता फोटो पहिचान पत्र नइ दिखा पाथे, त अइसन स्थिति म ओह बारह आने दस्तावेज मन ले कोनों एक दस्तावेज ल देखाके घलो वोट डाल सकत हे। एखर बर आधार कार्ड, मनरेगा जॉब कार्ड, ड्राईविंग लाइसेंस, पैन कार्ड अउ भारत सरकार डहार ले जारी पासपोर्ट ल वैध दस्तावेज माने गेहे। एखर अलावा सरकारी अउ सार्वजनिक क्षेत्र के कंपनी डहार ले जारी करे गे सेवा पहिचान पत्र यानि आईकार्ड अउ बैंक अउ डाकघर ले जारी फोटोयुक्त पासबुक, स्वास्थ्य बीमा, स्मार्ट कार्ड अउ आने सरकारी पहिचान पत्र ल घलो मान्य करे गेहे।
गोवर्धन पूजा
राजधानी रायपुर के संग प्रदेसभर म आज गोवर्धन पूजा अउ अन्नकूट के तिहार उत्साह अउ उमंग के संग मनाय जावत हे। आज के दिन गौ-माता के पूजा करे जाथे अउ ओला भोग अर्पित करे जाथे। राजधानी रायपुर के प्राचीन दूधाधारी मठ म घलो अन्नकूट अउ गोवर्धन पूजा के कार्यक्रम आयोजित करे गीस। प्रदेस के आने जिला मन ले घलो अन्नकूट अउ गोवर्धन पूजा के परब मनाय के जानकारी मिले हे।
काली भाईदूज के परब मनाय जाही। राज्यपाल विश्वभूषण हरिचंदन ले आज राजभवन म ब्रम्हकुमारी बहिनी मन ह मिलके भाई-दूज के टीका लगईन अउ दीपावली के बधाई अउ सुभकामना दीन। राज्यपाल ह घलो ओमन ल सुभकामना दीन।
चुनाव आयोग-चुनावी बॉण्ड विवरण
निर्वाचन आयोग ह राजनीतिक दल मन ले ए बछर सितंबर तक ओमन मन ल मिले चुनावी बॉण्ड के विवरण सील बंद लिफाफा म जमा करे ल कहे हे। आयोग ह ए विवरण काली पन्द्रह नवंबर तक जमा करे के निरदेस देहे। सबो राजनीतिक दल के अध्यक्ष मन ल भेजे गे पत्र म आयोग ह कहिन कि जेन दल ह चुनावी बॉण्ड के रूप म कोनों भी चंदा लेहे, ओमन ल चंदा देवइया के बारे म जानकारी अउ रकम के सूचना के संगेसंग हर एक बॉण्ड के रूप म मिले पइसा के पूरा जानकारी देना होही।
भाजपा-निष्कासन
भारतीय जनता पार्टी ह रायगढ़ जिला के पार्टी कार्यकर्ता प्रमोद गुप्ता अउ गोपिका गुप्ता ल प्राथमिक सदस्यता ले छह बछर बर निष्कासित कर देहे। भाजपा के प्रदेस महामंत्री केदार कश्यप ह ए संबंध म सूचना जारी करत हुए बतईन कि गोपिका गुप्ता ह रायगढ़ विधानसभा क्षेत्र ले पार्टी के अधिकृत प्रत्याशी के खिलाफ चुनाव लड़े के कारण निष्कासित करे गेहे। उहें, प्रमोद गुप्ता ल रायगढ़ विधानसभा क्षेत्र के अधिकृत प्रत्यासी के विरूद्ध प्रचार करे के कारण पार्टी के सदस्यता ले निष्कासित कर दे गेहे।
सेना भर्ती
जांजगीर-चांपा जिला म अवइया पन्द्रह से तेईस दिसंबर तक सेना भर्ती रैली के आयोजन करे जाही। एखर तहत अग्निवीर सैनिक मनके भर्ती आने-आने पद बर करे जाही। एमा प्रदेस के सबो तैंतीस जिला के पुरूष उम्मीदवार भाग ले सकही। एखर अलावा छत्तीसगढ़ अउ मध्यप्रदेश के सबो जिला के उम्मीदवार मन बर हवलदार सर्वेक्षक अउ स्वचालित मानचित्रकार के पद म भर्ती बर घलो रैली के आयोजन करे जाही।
जानबा के मुताबिक भारतीय सेना डहार ले पाछु अप्रैल महीना म सेना म भर्ती बर सामान्य प्रवेश परीक्षा के ऑनलाइन तरीका ले आयोजन करे गे रिहीस। ए भर्ती रैली म ऑनलाइन परीक्षा म पास होवइया उम्मीदवार, शारीरिक दक्षता के संग आने भर्ती प्रक्रिया म भाग ले सकही। रैली म भाग लेवइया योग्य अभ्यर्थी के प्रवेस पत्र उंखर ई-मेल म भेज दे गेहे। रायपुर स्थित सेना भर्ती कार्यालय डहार ले बताय गेहे कि भर्ती रैली म सामिल होय बर अभ्यर्थी ल प्रवेस पत्र के संग आने सब्बो दस्तावेज अउ आधार कार्ड ले लिंक मोबाइल फोन ल संग ले जाना जरूरी हे।
विश्व मधुमेह दिवस
आज विश्व मधुमेह दिवस हे। ए बछर के बिसय हे – ‘‘डाइबिटीज यानि मधुमेह की सही देखभाल पर ध्यान देना‘‘। मधुमेह के इलाज म इंसुलिन ल सबले जरूरी माने जाथे। इही इंसुलिन के खोज करइया चिकित्सा वैज्ञानिक सर फ्रेडरिक बैन्टिन के जन्मदिन म विश्व मधुमेह दिवस मनाय जाथे। बछर दू हजार छह म एला आधिकारिक रूप ले संयुक्त राष्ट्र दिवस घोसित करे गे रिहीस।
अउ अब पेस हे मौसम के हाल…
प्रदेस के कतकोन इलाका म ए समय उत्तर दिसा के हवा नइ चले ले ठंड बाढ़े के संभावना नइ हे। मौसम विभाग के अनुसार बंगाल के खाड़ी अउ ओखर आसपास कम दबाव के क्षेत्र बने हुए हे। उहें, उपरी हवा म चक्रवाती घेरा बने के कारण प्रदेस के आसमान म बादल छाय हुए हे। ए वजह ले प्रदेस म फिलहाल ठंड बढ़े के आसार नइ हे। मौसम वैज्ञानिक मनके अनुसार काली ले हवा के दिसा बदले के संभावना हे, जेखर बाद आसमान खुले के बाद न्यूनतम तापमान म कमी के सिलसिला सुरू हो सकत हे।