राज्य विधानसभा चुनई के दूसरइया चरण खातिर चुनाव प्रचार आखिरी चरण म हवय। भारतीय जनता पार्टी के बड़का नेता अउ प्रधानमंत्री नरेंद्र मोदी ह आज मुंगेली अउ महासमुंद म चुनावी रैली मन ल संबोधित करीन। कांग्रेस के राष्ट्रीय नेता कुमारी सैलजा ह आज रईपुर म प्रेस कान्फ्रेंस कर राज्य के कांग्रेस सरकार के उपलब्धि के जानकारी दीन।
ओति, आने-आने राजनीतिक दल के बड़का नेता मन घलो चुनाव प्रचार प्रसार म जोरदरहा लगे हे। प्रदेस के 70 सीट मन खातिर अवईया 17 नवंबर के मतदान होही।
विस प्रचार-01
प्रधानमंत्री नरेंद्र मोदी ह किहीन हे कि छत्तीसगढ़ म सत्ता मिले के बाद भारतीय जनता पार्टी के सरकार ऊंचा कीमत म जादा धान खरीदी करही। आज छत्तीसगढ़ के मुंगेली जिला के ग्राम जमकुही म चुनावी रैली ल संबोधित करत श्री मोदी ह किसान मन ल उंखर उत्पाद म बोनस देके वादा घलो करीन। श्री मोदी राज्य म विधानसभा चुनई के दूसरईया अउ आखिरी चरण के चलत भाजपा उम्मीदवार मन खातिर प्रचार करत रिहीन। ओमन आजादी के बहुत अकन दसक बाद घलो अनुसूचित जाति, अनुसूचित जनजाति अउ आने-आने पिछड़ा वर्ग के पिछड़ा होय खातिर कांग्रेस ल जिम्मेदार बताइन। प्रधानमंत्री ह किहीन कि कांग्रेस पार्टी वोट बैंक के राजनीति अउ तुष्टीकरण खातिर कोनो हद तक नीचे जा सकथे। श्री मोदी ह किहीन कि, ओ ह राज्य म भारतीय जनता पार्टी डहार ले करे गे जम्मों वादा ल समय के भीतर पूरा करहीं। प्रधानमंत्री ह लोगन मन ले राज्य म डबल इंजन सरकार याने केंद्र अउ राज्य दूनों जघा म भाजपा सरकार लाय के अपील करीन।
प्रधानमंत्री ह महादेव ऐप घोटाला के मुद्दा ल घलो उठाइन अउ कांग्रेस पार्टी के संगेसंग मुख्यमंत्री भूपेश बघेल उपर बड़का पैमाना म भ्रष्टाचार म सामिल होय के आरोप लगाइन। श्री मोदी ह किहीन कि कांग्रेस ल ए बताना चाही कि मुख्यमंत्री ल ए घोटाला म कतका धन मिलिस, अउ ऐमा ले कतका धन पार्टी हाई-कमान ल भेजे गीस।
विस प्रचार-02
श्री मोदी ह किहीन हे कि स्वास्थ्य क्षेत्र म केंद्र के भाजपा सरकार दवाई म 80 प्रतिसत तक के छूट मुहईया करावत हवय, अउ आयुष्मान योजना के जरिया गरीबहा मन खातिर बिना पइसा के ईलाज कराय जावत हे। प्रधानमंत्री ह किहीन कि केंद्र सरकार उर्वरक सब्सिडी उपर लाखों रूपिया खर्चा करत हवय। श्री मोदी ह किहीन कि ‘‘महतारी वंदन योजना छत्तीसगढ़‘‘ म माईलोगिन मन ल मदद करही। राज्य म हस्तशिल्प उद्योग ल बढ़ावा देवय के योजना मनके बारे म बतावत ओमन किहीन कि केंद्र सरकार ह राज्य के स्थानीय उत्पाद खातिर अंतर्राष्ट्रीय बाजार उपलब्ध कराय के दिसा म काम बूता करत हवय। श्री मोदी ह किहीन कि राज्य म भाजपा सरकार के सत्ता म आय के बाद तीर्थ स्थान मन ल विकसित करे जाही।
उहें, महासमुंद जिला के बेमचा भाठा म जनसभा ल संबोधित करत प्रधानमंत्री ह किहीन कि राज्य म भाजपा के सरकार बने के बाद गरीबहा मन खातिर मकान बनाय के काम-बूता तेजी ले सुरू करे जाही। ओमन कांग्रेस उपर निसाना साधत किहीन कि छत्तीसगढ़ म कांग्रेस के साशनकाल म अपराध अउ हिंसा के मामला घलो बाढे़ हवय।
दूसर कोति, कांग्रेस के बड़का नेता अउ मुख्यमंत्री भूपेश बघेल ह रायगढ़ जिला के पुसौर अउ सारंगढ़-बिलाईगढ़ जिला के बरमकेला म चुनावी सभा ल संबोधित करीन। ओमन किहीन कि कांग्रेस ह शासन के योजना मनके लाभ लोगन मन तक पहुंचाय हे। फेर पूर्ववर्ती भाजपा सरकार ह सिराइस 15 बछर म जनता खातिर कुछू नइ करीस हे। श्री बघेल ह केंद्र के भाजपा सरकार उपर भेदभाव करे के आरोप लगाइन।
मतदान दल-प्रशिक्षण
प्रदेस म दूसरइया चरण के चुनई खातिर मतदान दल ल प्रसिक्षण देवय के काम-बूता चलत हवय। इही बीच रईपुर जिला के अइसन अधिकारी-कर्मचारी जउन मन 8 अउ 9 के होइस प्रसिक्षण म उपस्थित नइ हो सके रिहीन। ओमन 15 नवंबर के पंडित रविशंकर शुक्ल विश्वविद्यालय म होवईया बिसेस प्रसिक्षण सिविर म सामिल होही। प्रसिक्षण सिविर बिहनिया साढ़े 9 बजे ले सुरू होही।
गोवर्धन-पूजा
गोवर्धन-पूजा अउ अन्नकूट के तिहार काली मनाय जाही। अब तक लक्ष्मी पूजा के दूसरईया दिन गोवर्धन पूजा अउ अन्नकूट के तिहार मनाय के परंपरा रिहीस। फेर ए दरी ए तिहार लक्ष्मी पूजा होय के एक दिन के बाद मनाय जाही। मुख्यमंत्री भूपेश बघेल ह परंपरा के चलत आज दुरूग जिला के ग्राम जंजगीरी म गौरा-गौरी के पूजा अर्चना कर प्रदेसवासी मन के खातिर सुख अउ समृध्दि के कामना करीन। ए मउका म मुख्यमंत्री ह सोटा खाय के परंपरा घलो निभाइन, अउ लोगन मन ल देवारी तिहार के अपन सुभकामना दीन।
मीडिया प्रमाणन
भारत निर्वाचन आयोग ह विधानसभा चुनई बर इलेक्ट्रानिक अउ सोशल मीडिया के संगेसंग प्रिंट मीडिया म विज्ञापन के प्रकाशन संबंधी दिसा-निरदेस जारी करीन हे। एखर तहत मतदान दिवस अउ उंखर एक दिन पहिली पिं्रट मीडिया म प्रकाशित होवईया राजनीतिक विज्ञापन मन ल प्रकाशन ले पहिली प्रमाणित कराना जरूरी होही। ए संबंध म मुख्य निर्वाचन पदाधिकारी रीना बाबासाहेब कंगाले ह बताइन कि 16 अउ 17 नवंबर के प्रकाशित होवईया विज्ञापन ल पहिली, जिला या फेर राज्य स्तरीय मीडिया प्रमाणन समिति ले प्रमाणन सर्टिफिकेट लेना जरूरी होही। श्रीमती कंगाले ह बताइन कि मतदान होय के पहिली दिन अउ मतदान तिथि के प्रिंट मीडिया म कोनो भ्रम पेैदा करइया विज्ञापन प्रकासित होथे, त अइसन राजनीतिक दल अउ प्रत्यासी, जउन एखर ले प्रभावित होथे, उंखर तीर कोनो तरह के खंडन करे के अवसर नइ होथे। अइसन म स्वतंत्र, निष्पक्ष अउ पारदर्सी चुनई खातिर विज्ञापन मन ल पहिली ले प्रमाणन कराना जरूरी हे।
विस-दूसरा चरण मतदान
छत्तीसगढ़ म विधानसभा चुनई के दूसरइया चरण म 17 नवंबर के 70 ठिन विधानसभा क्षेत्र म वोट डाले जाही। एखर बर बिहनिया 8 बजे ले संझा 5 बजे तक के समय राखे गेहे। सिरिफ बिन्द्रानवागढ़ विधानसभा क्षेत्र के 9 ठिन मतदान केंद्र कामरमौदी, आमामोरा, ओढ़, बड़े गोबरा, गंवर गांव, गरीबा, नागेश , सहबीनकछार अउ कोदोमाली म बिहनिया 7 बजे ले मंझनिया 3 बजे तक मतदान होही। एखर अलावा बिन्द्रानवागढ़ के बांचे मतदान केंद्र म आने-आने उनहत्तर ठिन विधानसभा क्षेत्र जइसन बिहनिया 8 बजे ले संझा 5 बजे तक वोट डाले जाही।
राज्य म विधानसभा चुनई के दूसरइया चरण म मतदान वाला 70 ठिन विधानसभा क्षेत्र मन म कुल 958 झिन उम्मीदवार मैदान म हवय। दूसरइया चरण म राज्य के कुल 1 करोड़ 63 लाख 14 हजार 4 सौ उनयासी मतदाता मन अपन मताधिकार के इस्तेमाल करही। जेमा 81 लाख 41 हजार ले जादा पुरूष मतदाता अउ 81 लाख 72 हजार ले जादा महिला मतदाता के अलावा 684 तृतीय लिंग के मतदाता मन सामिल हवय।
अउ अब थोरकुन समाचार सार म –
– दुरूग जिला के संतरा बाड़ी स्थित एक ठिन बड़का भवन म आग लगे ले उंहा रखे तकरीबन 50 लाख रूपिया के जिनिस मन जल के राख होय के खबर हवय।
– सूरजपुर विधानसभ क्षेत्र के प्रत्यासी भूलन सिंह मरावी ल रिटर्निंग ऑफिसर ह आदर्स आचार संहिता के उल्लंघन के मामला म नोटिस जारी करीन हे।
– बलरामपुर जिला म खाद्य विभाग के निगरानी दल ह अवैध रूप ले जमा कर राखे गे 60 ठिन धान के बोरी बरामद करीन हे।
अउ
– खैरागढ़-छुईखदान-गंडई जिला के बुंदेली सहकारी समिति के प्रबंधक ल धान खरीदी के मामला म अनियमितता बरते के आरोप म कलेक्टर ह निलंबित कर दीन हवय।