विस-प्रचार
प्रदेस म विधानसभा चुनाव के दूसरा चरण के प्रचार अभियान तेज होगे हे। भाजपा के वरिष्ठ नेता अउ प्रधानमंत्री नरेंद्र मोदी अवईया तरेह नवंबर के छत्तीसगढ़ के एक दिन के प्रवास म मुंगेली आवत हे। ए दौरान श्री मोदी मुंगेली म एक जनसभा ल संबोधित करही।
ओति, कांग्रेस के प्रदेस अध्यक्ष दीपक बैज काली सूरजपूर जिला के प्रवास म रइही। ए दौरान ओमन प्रतापपुर, भटगांव अउ प्रेमनगर विधानसभा क्षेत्र म अयोजित सभा ल संबोधित करही।
भाजपा/कांग्रेस प्रेसवार्ता
भाजपा के वरिष्ठ नेता अउ पूर्व केंद्रीय मंत्री रविशंकर प्रसाद ह किहीन कि पार्टी ह जउन घोषणा पत्र जारी करे हे, ओमा महिला, किसान अउ युवा मनके संगेसंग जम्मों वर्ग मन ले जउन वादा करे गेहे, ओमन ल जरूर पूरा करे जाही। रईपुर स्थित भाजपा कार्यालय म आयोजित पत्रकार वार्ता ल संबोधित करत पूर्व केंद्रीय मंत्री ह किहीन कि भाजपा डहार ले जारी घोषणा पत्र मोदी जी के गारंटी हे, जेला भाजपा के सरकार बने उपर पूरा करे जाही। ओमन प्रदेस सरकार उपर भ्रष्टाचार करे के आरोप लगावत किहीन कि भारतीय जनता पार्टी के सरकार बने ले भ्रष्टचारी मन उपर कड़ा कार्रवाई करे जाही।
इही बीच, कांग्रेस नेता अउ राज्यसभा सांसद राजीव शुक्ला ह किहीन कि कांग्रेस ह घोषणा पत्र म जउन वादा करे हे, ओमन ल पूरा करही। श्री शुक्ला ह आज रईपुर म आयोजित पत्रकारवार्ता म किहीन कि कांग्रेस ह बछर दू हजार अठ्ठारा म किसान मनके कर्ज माफी के वादा करे रिहीस जेला सरकार बने के बाद पूरा करे गीस। उहें, कांग्रेस ह अपन दूसर वादा मन ल घलो पूरा करे हे।
कांग्रेस/भाजपा-निष्कासन
कांग्रेस ह बिलासपुर नगर पालिक निगम के महापौर रामशरण यादव ल पार्टी के प्राथमिक सदस्यता ले निलंबित कर देहे। प्रदेस कांग्रेस कमेटी के अध्यक्ष दीपक बैज के आदेस म ए कार्रवाई करे गेहे। जारी आदेस के अनुसार श्री यादव उपर पार्टी विरोधी गतिविधि म सामिल होय के आरोप हे।
उहें, कोंडागांव के मनीष श्रीवास्तव, शिशिर श्रीवास्तव अउ सुरेश पाटले ल घलो पार्टी विरोधी गतिविधि म संलिप्त होय के सेति कांग्रेस के प्राथमिक सदस्यता ले छै साल बर निष्कासित कर दे गेहे।
बतादन के कांग्रेस ह काली घलो पार्टी विरोधी गतिविधि म सामिल पन्द्रह सदस्य मन ल निष्कासित करे हे।
ओति, भारतीय जनता पार्टी ह सूरजपुर महिला मोर्चा के जिला उपाध्यक्ष रामबाई देवांगन ल पार्टी के अधिकृत प्रत्यासी के विरूध्द चुनाव लड़े के सेति पार्टी के प्राथमिक सदस्यता ले छै साल बर निष्कासित कर देहे। अइसने रईपुर भाजपा के पूर्व जिला मंत्री सावित्री जगत, बालोद जिला के गुण्डरदेही मंडल के पदाधिकारी मुरली साहू, मिथिलेश साहू, पूर्व पार्षद भगवती साहू अउ सहकारिता प्रकोष्ठ के जिला संयोजक खेदूराम साहू ल घलो पार्टी के प्राथमिक सदस्यता ले छै साल बर निष्कासित कर देहे।
डाक मतपत्र
भारत निर्वाचन आयोग के निरदेस म चुनाव ड्यूटी म संलग्न मतदाता मन ल डाक मतपत्र के माध्यम ले मतदान के सुविधा प्रदान करे गेहे। इही कड़ी म रायगढ़ जिला के चारो विधानसभा क्षेत्र मनले दू हजार इंक्यावन मतदाता मन डाक मतपत्र के माध्यम ले अपन मताधिकार के प्रयोग करीन। ए मतदान कर्मी मन सहर म बनाय गे सुविधा केंद्र म पोस्टल बैलेट के माध्यम ले मतदान करीन।
अइसने रायगढ़ जिला म अस्सी साल ले जादा आयु के सियान अउ दिव्यांग मन बर ओमन के निवास स्थल म ही मतदान करे के सुविधा प्रदान करे गे रिहीस। एखर तहत ए सौ निनान्बे मतदाता मन डाक मतपत्र के माध्यम ले घर बइठे मतदान करीन।
उहें, मुंगेली जिला म घलो ए सुविधा के अंतर्गत इकसठ सियान अउ दिव्यांग मतदाता मन अपन मताधिकार के प्रयोग करीन।
धनतेरस
छत्तीसगढ़ समेत देसभर म धनतेरस के तिहार आज पारंपरिक उछाह के संग मनाय जात हे। धनतेरस के संगेच आजे ले पांच दिन तक चलईया देवारी के परब सुरू होगे हे। आजे कि दिन धन वृध्दि बर कुबेर अउ स्वस्थ्य रेहे खातिर आयुर्वेद के देवता धनवंतरी के पूजा करे जाथे। धनतेरस के परब कार्तिक महिना के अंधियारी पाख के त्रयोदसी के दिन मनाय जाथे। आज देसभर के बाजार मन म अच्छा खासा रौनक देखे जाथे।
राज्यपाल विश्व भूषण हरिचंदन, मुख्यमंत्री भूपेश बघेल अउ पूर्व मुख्यमंत्री डॉक्टर रमन सिंह ह प्रदेसवासी मन ल धनतेरस परब के बधाई अउ सुभकामना दीन हे।
विस-सामग्री जब्त
राज्य म विधानसभा चुनाव बर आदर्स आचार संहिता के प्रभावी होय के बाद ले आठ नवंबर तक के स्थिति म छियासठ करोड़ तैंतीस लाख रूपिया के अवैध धनरासि अउ वस्तु जब्ती करे गेहे। एमा सत्तरा करोड़ अठानबे लाख रूपिया के नगद रासि सामिल हे।
मुख्य निर्वाचन पदाधिकारी कार्यालय ले मिले जानकारी के अनुसार प्रवर्तन एजेंसी डहार ले निगरानी के दौरान आठ नवंबर तक सैंतालीस हजार तीन सौ इकहत्तर लीटर अवैध सराब जब्ती करे गेहे, जेखर कीमत एक करोड़ पैंतीस लाख रूपिया हे। संघरा तीन करोड़ निनान्वे लाख रूपिया कीमत के दूसर नसीली वस्तु घलो जब्त करे गेहे। जांच अभियान के दौरान बीस करोड़ छत्तीस लाख रूपिया कीमत के चार सौ चौरासी किलो ग्राम गहना अउ रत्न घलो जब्ती करे गेहे। एखर अतिरिक्त बाईस करोड़ बैंसठ लाख रूपिया के दूसर सामान घलो जब्त करे गेहे।
मतदाता जागरूकता
प्रदेस म विधानसभा चुनाव के तहत सत-प्रतिसत मतदान सुनिश्चित करे बर स्वीप कारीकरम के तहत आने-आने जागरूकता कारीकरम के आयोजन करे जात हे। इही कड़ी म धमतरी जिला प्रशासन डहार ले मतदाता जागरूकता रैली निकाले गीस। जिला स्वीप नोडल अधिकारी रोक्तिमा यादव ह ए मतदाता जागरूकता रैली ल हरा झंडा दिखाके रवाना करीन। रैली म जिला के पचास ले जादा स्कूल मनके छै हजार ले जादा विद्यार्थी सामिल होइन। छात्र-छात्रा मन लोगन मन ल मतदान करे बर प्रेरित करीन।
इही बीच, उच्चतम न्यायालय के न्यायाधीश प्रशांत कुमार मिश्रा ह मतदाता जागरूकता कारीकरम के तहत वीडियो संदेस जारी करके रायगढ़ जिला के जम्मों मतदाता मनले सत्तरा नवंबर के अनिवार्य रूप ले मतदान करे के अपील करीन हे।
बातों-बातों में
प्रादेशिक समाचार एकांश समसामयिक बिषय म आधारित कारीकरम बातों-बातों में म ए बखत छत्तीसगढ़ म होवत विधानसभा चुनाव संपन्न कराय बर करे गे उपाय उपर राज्य के मुख्य निर्वाचन पदाधिकारी रीना बाबासाहेब कंगाले ले लेगे भेंटवार्ता प्रसारित करे जाही। एखर दूसरईया कड़ी के प्रसारण आकाशवाणी केंद्र रईपुर ले काली ग्यारा नवंबर के बिहनिया साढ़े दस बजे ले करे जाही। ऐला छत्तीसगढ़ स्थित आकाशवाणी के जम्मों केंद्र प्रसारित करही।
ईडी-पूछताछ
प्रवर्तन निदेशालय ईडी ह महादेव सट्टा ऐप के मामला म आज दू जिला कवर्धा अउ रईपुर के पुलिस अधीक्षक मनले पूछताछ करीन। मिले जानकारी के अनुसार ईडी ह गुरूवार के कवर्धा के पुलिस अधीक्षक डॉक्टर अभिषेक पल्लव ले पूछताछ करीन। डॉक्टर पल्लव ले दुरूग म पदस्थापना के दौरान महादेव सट्टा ऐप के खिलाफ करे गे कार्रवाई मनके जानकारी ले गीस।
उहें, ईडी ह आज बिहनिया रईपुर के वरिष्ठ पुलिस अधीक्षक प्रशांत अग्रवाल ले घलो पूछताछ करीस।
अउ अब थोरकुन समाचार सार म –
– जांजगीर-चांपा जिला के कोटमी-सोनार रेलवे स्टेसन म ट्रेन ले गिरे ले दू झन यात्री घायल होगे। जेमन ल अकलतरा के अस्पताल म भर्ती कराय गेहे।
– रायगढ़-खरसिया राष्ट्रीय राजमार्ग म एक मालवाहक के टक्कर ले मोटर साइकिल सवार दू युवक मनके मउत होगे।
– खैरागढ़-छुईखदान-गंडई जिला के खैरागढ़-धमधा रद्दा उपर एक ट्रक ह बाईक सवार ल टक्कर मार दीस। ए सड़क दुर्घटना म एक युवक के मउत होगे। फेर एक झन दूसर युवक घायल होगे।
अउ
– राजनांदगांव पुलिस ह रिहायसी क्षेत्र म फटाका दुकान लगाय ल लेके कार्रवाई करे हे। पुलिस ह बिना लाइसेंस बेचावत फटाका जब्त करके दुकान संचालक के खिलाफ अपराध पंजीबध्द करे हे। जब्त फटाका के कीमत दू लाख रूपिया बताय जात हे।