प्रदेस म विधानसभा चुनई के दूसर पारी खातिर प्रचार अभियान जोरदरहा होवत हे। भारतीय जनता पार्टी के बड़का नेता अउ केंद्रीय गृहमंत्री अमित शाह आज जशपुर जिला के आने आने विधानसभा क्षेत्र म रोड शो करे के बाद बगीचा म भाजपा प्रत्याशी मनके पक्ष म आमसभा ल संबोधित करीन। ये बेरा म श्री साह ह कहिन कि छत्तीसगढ़ म भाजपा के सरकार बने म पांच बछर के भीतरी माओवाद समस्या के समाधान कर ले जाही। ओमन राज्य सरकार उपर भ्रष्टाचार के आरोप लगाइन ।
उंहे कंाग्रेस के राष्ट्रीय अध्यक्ष मल्लिकार्जुन खड़गे ह आज कोरिया जिला म बैकुण्ठपुर विधानसभा क्षेत्र के चर्चा कालरी म एक आमसभा म बोलत कीहिन कि राज्य के कंाग्रेस सरकार वादा पूरा करइया सरकार हे। ओमन दावा करीन कि राज्य म एक घांव फेर कंाग्रेस के सरकार बनही।
दूसर कोति बहुजन समाज पार्टी के राष्ट्रीय अध्यक्ष मायावती ह सक्ती जिला के हसौद म पार्टी प्रत्याशी के समर्थन म चुनावी सभा लीन। ओमन कीहिन कि बहुजन समाज पार्टी अउ गोंडवाना गणतंत्र पार्टी मिलके चुनाव लड़त हे। ओमन यहू कहिन कि कंाग्रेस अउ भाजपा दूनो पार्टी के सरकार ह मजदूर, किसान आदिवासी अउ माइलोगन के उपेक्षा करे हे।
विस चुनाव एक्जिट पोल
छत्तीसगढ़ समेत पांच राज्य म विधानसभा चुनाव ल देखत चुनाव आयोग ह तीस नवंबर तक कोनो भी किसम के एक्जिट पोल के आयोजन अउ प्रसारण म प्रतिबंध लगा देहे। ए बेरा म विधानसभा चुनाव के संबंध म कोनो भी किसम के एक्जिट पोल के आयोजन करे अउ प्रिंट या इलेक्ट्रॅानिक मीडिया डहार ले एखर परिणाम के प्रसारण अउ प्रकाशन म रोक रीही।
आयोग डहार ले जारी अधिसूचना म केहे गेहे कि पांच राज्य मन म चुनाव के बेरा मतदान क्षेत्र म मतदान सिराय के बाद अड़तालिस घंटा के दउरान कोनो भी इलेक्ट्रानिक मीडिया म ओपिनियन पोल या कोनो आने मतदान सर्वेक्षण के नतीजा के प्रदर्शन म घलो प्रतिबंध रीही।
डाक मतपत्र
चुनाव आयोग ह विधानसभा चुनई म अस्सी बछर ले जादा के सियान मतदाता अउ चालीस प्रतिशत ले जादा दिव्यांग मतदाता मन बर मतदान के घर पहुंच सुविधा शुरू करे हे। एमा काली आठ नवंबर के धमतरी जिला के सत्यासी बछर के सियान अउ दिव्यांग मतदाता ह घरे म वोट डारीस। ग्राम पंचायत भटगांव के रहइया जामवती बाई घर ले मतदान करइया अस्सी बछर ले जादा के पहिली मतदाता बनीस। अपन अनुभव बतात ओमन बताइन कि कभू सोचे नइ रहेआंे कि घरे म बइठके वोट डारे के मउका मिलही।
उंहे दिव्यांग मतदाता केसरबाई ह निर्वाचन आयोग के ये कदम ल सुघ्घर बतात कीहिन कि अब बदलाव के बयार चलत हे। जेखर फायदा सियान मन ल मिलत हे।
मतदाता जागरूकता
प्रदेश म विधानसभा चुनाव म शत प्रतिशत मतदान सुनिश्चित करे खातिर स्वीप कार्यक्रम म कतकोन जागरूकता कार्यक्रम चलावत हे। एमा बैकुण्ठपुर के महिला कॉलेज के छात्रा मन ह मतदान खातिर जन जागरण अभियान चलाइन। संगेसंग मतदान करबो-मतदान कराबो के शपथ घलो लीन।
कॉलेज के प्राचार्या रंजना निलिमा ह कहिन कि कॉलेज कोति ले कतकोन जागरूकता कार्यक्रम करके मतदान करे बर लोगन ल जागरूक करे जात हे। ओति महासमुंद जिला के बागबहरा रहइया डॅाक्टर विश्वनाथ पाणिग्रही ह शत प्रतिशत मतदान के बीड़ा उठाय हे। ओमन समाज म स्वच्छता, पर्यावरण अउ मतदाता जागरूकता कार्यक्रम के कतकोन बेरा ले आयोजन करत हे । उंखर काम ल देखत बछर दू हजार तेरा-चौदा के चुनाव म ओमन ल विशेष रूप ले स्वीप कार्यक्रम के बा्रण्ड एम्बेसडर बनाय गे रीहिस। ए बखत ओमन ल महासमुंद जिला के आईकॉन नियुक्त करे गेहे।
फटाके निर्देश
एसो देवारी म सिरिफ हरित फटाका ल बउरे के मंजूरी दे गेहे। राष्ट्रीय हरित न्यायाधिकरण के मुताबिक छत्तीसगढ़ म पर्यावरण के सुरक्षा बर ये निर्देश जारी करे गेहे। एमा सिरिफ दू घंटा ही फटाका चलाय के मंजूरी दे गेहे। ये निर्देश देवारी के संगेसंग छठपूजा, गुरूपर्व, अउ नवा बछर क्रिसमस बर घलो लागू रीही। उच्चतम न्यायालय अउ राष्ट्रीय हरित न्यायाधिकरण के आदेश के मुताबिक जिला प्रशासन ल एखर कड़ाई ले पालन कराय बर केहे गेहे।
अदालत के निर्देश के मुताबिक देवारी अउ गुरूपर्व बर रतिहा आठ ले दस बजे तक छठपूजा म बीहनिया छै बजे ले आठ बजे तक, क्रिसमस अउ नवा बछर बर रतिहा ग्यारा बजके पचपन मिनट ले साढ़े बारा बजे तक के बेरा तय करे गेहे। उच्च्तम न्यायालय कोति ले बछर दू हजार अठारा म जारी करे गे आदेश के मुताबिक सिरिफ उही फटाका ल बउरे अउ बाजार म बेचे जा सकही, जेमा आवाज के स्तर तय सीमा के भीतरी होवय।
धनतेरस
छत्तीसगढ़ समेत देशभर म धनतेरस के तिहार काली उछाह के संग मनाय जाही। धनतेरस के संगेसंग पांच दिन तक चलइया देवारी तिहार शुरू हो जाही । धनतेरस के दिन भगवान कुबेर अउ बने स्वास्थ बर आयुर्वेद के देवता धनवंतरी के पूजा करे जाथे। धनतेरस के परब कार्तिक कृष्णपक्ष के त्रयोदशी के दिन मनाये जाथे। देवारी तिहार ल लेके राजधानी रायपुर समेत प्रदेशभर म बजार हाट म भीड़भाड़ अउ लोगन म उछाह देखे जात हे।
राज्यपाल विश्वभूषण हरिचंदन ह प्रदेशवासी मन ल धनतेरस, नरक चौदस, देवारी, गोवर्धन पूजा अउ भाईदूज के बधाई अउ शुभकामना दीन हे। ओमन कीहिन कि देवारी के तिहार हमर समृद्ध वैभवशाली परंपरा के अंग हरय।
उंहे देवारी के मउका म आज राजभवन म दीपावली मिलन समारोह के आयोजन करे गीस। ए मउका म राज्यपाल विश्वभूषण हरिचंदन अउ राज्य के प्रथम महिला सुप्रभा हरिचंदन ह राजभवन के जम्मों अधिकारी अउ कर्मचारी मन ल देवारी के शुभकामना दीन हे।
वाहन चेकिंग कार्रवाई
प्रदेश म चुनाव आयोग के निर्देश म विधानसभा चुनाव ल देखत पुलिस कोति ले सरलग गाड़ी के जांच होवत करे जात हे। एमा आज रायगढ़ जिला के ढीमरापुर चौक म एक कार ले आठ लाख रूपिया नकदी बरामद करे गीस। उंहे बिलासपुर के चकरभाठा पुलिस ह एक ठिन फटफटी ले करीबन साढ़े छै लाख रूपिया बरामद करे हे।
उंहे रतनपुर पुलिस ह गाड़ी चेकिंग के बेरा नौ किलोग्राम ले जादा के चंादी अउ एक लाख रूपिया नकदी जब्त करे हे।
केंद निर्देश
केंद्र सरकार ह ट्रेवल एजेंसी मनले कोरोना महामारी के सेती रद्द यात्रा कार्यक्रम के लंबित भुगतान ग्राहक मन ल नवंबर के तीसर हप्ता तक जारी करे बर कहे हे। केंद्रीय उपभोक्ता मामला के विभाग ह उपभोक्ता ले जुड़े मुद्दा म गोठबात बर ऑनलाईन ट्रेवल एजेंसी मन संग बइठका करीन।
एमा मेक माई ट्रिप, यात्रा, क्लियर ट्रिप जइसन ट्रेवल एजेंसी के प्रतिनिधि मौजूद रीहिन। सरकार ह कोविड लॉकडाउन बेरा के सेती रद्द करे गे टिकट बुकिंग रकम नही लहुटाय के मुद्दा म गोठबात करीन। विभाग ह बताइस कि उच्चतम न्यायालय के अक्टूबर दू हजार बीस के आदेश के बावजूद भुगतान अभी घलो लंबित हवय। अदालत के आदेश के अनुपालन नइ करे म ये ट्रेवल एजेंसी मनके खिलाफ अवमानना के कार्रवाई हो सकत हे ।
महादेव सट्टा ऐप नोटिस
मुख्यमंत्री भूपेश बघेल के राजनीतिक सलाहकार विनोद वर्मा ह महादेव सट्टा ऐप मामला ल लेके भाजपा के तीन झिन नेता उपर मानहानि के कानूनी नोटिस भेजे हे। प्रदेश कंाग्रेस मुख्यालय रायपुर म राखे गे एक पत्रकार वार्ता म श्री वर्मा ह बताइन कि ओमन भाजपा के राष्ट्रीय प्रवक्ता सिद्धार्थनाथ ंिसंह, केदार गुप्ता, अउ अनुराग अग्रवाल ल नोटिस भेजे हे ।