अइसने अंतागढ़ अउ जगदलपुर म अठहत्तर, भानुप्रतापपुर म अस्सी, कंाकेर म उन्यासी, केशकाल अउ कोंडागंाव म इक्यासी, नारायणपुर म तिहत्तर, चित्रकोट म अस्सी, दंतेवाड़ा म सड़सठ, अउ कोंटा विधानसभा क्षेत्र म इकसठ प्रतिशत ले जादा वोट डारे गीस।
राज्य के मुख्य निर्वाचन पदाधिकारी रीना बाबासाहेब कंगाले ह आज रायपुर म राखे गे पत्रकार वार्ता म बताइन कि पहिली चरण म मतदान कराय बर पच्चीस हजार चार सौ ले जादा मतदान कर्मचारी नियुक्त करे गे रीहिस। ओमन बताइन कि जम्मों मतदान दल लहुट गेहे। संवेदनशील जगा म एक सौ छप्पन मतदान दल ल हेलिकॉप्टर ले भेजे गे रीहिस, जउन मन लहुट आय हे। ओमन बताइन कि मतदान के बेरा तकनीकी समस्या के सेती कुल बांसठ बैलेट यूनिट, चौवन कंट्रोल यूनिट अउ एक सौ तेईस वीवीपैट बदले गीस।
ओमन कीहिन कि पहिली पारी के मतदान बर मतदाता मन म गजब के उछाह रीहिस। माओवाद प्रभावित बस्तर संभाग के बारा विधानसभा क्षेत्र म ये बखत एक सौ छब्बीस नवा मतदान केंद्र बनाय गे रीहिस। उंहा घलो मतदाता मन म उछाह रीहिस। मुख्य निर्वाचन पदाधिकारी ह बताइन कि माओवाद प्रभावित क्षेत्र म छुटपुट घटना म कुछएक पुलिस कर्मचारी घायल होय हे, जेखर इलाज कराय गेहे अउ कुछएक पुलिस कर्मचारी मनके इलाज चलत हे। ओमन खुद घायल जवान मनले भेंट करके स्वास्थ्य के संबंध म जानकारी लीन।
दूसरा चरण प्रचार
प्रदेस म विधानसभा चुनई के पहिली चरण के मतदान के बाद अब दूसर पारी खातिर प्रचार अभियान जोरदरहा होवत हे। कांग्रेेस के बड़का नेता अउ सांसद राहूल गांधी ह आज जशपुर जिला के गांव सन्ना म चुनावी सभा ल संबोधित करीन। ए मउका म श्री गांधी ह किहीन कि छत्तीसगढ़ के कांग्रेस सरकार ह जनता के संग करे गे हरेक वादा ल पूरा करे हे।
उहें, भाजपा के बड़का नेता अउ केंद्रीय गृहमंत्री अमित शाह काली सक्ति जिला के दउरा करही। ए दौरान ओमन चंद्रपुर विधानसभा क्षेत्र म भाजपा प्रत्यासी के पक्ष म रोड-शो करही। उंहे जशपुर, कुनकुरी, पत्थलगांव अउ रायगढ़ के कार्यक्रम म संघरहीं। ओति बहुजन समाज पार्टी के राष्ट्रीय अध्यक्ष मायावती घलो काली सक्ति जिला के दौरा करही। ए बेरा म ओमन जैैजेपुर विधानसभा क्षेत्र के हसौद म चुनावी सभा लिही।
दुर्घटना
कोंडागांव जिला म चुनाव के ड्यूटी ले लहुटत तीन झन शिक्षक के रद्दा दुर्घटना म मउत होगे। खबर के मुताबिक चुनाव ड्यूटी करे के बाद ये तीनो शिक्षक चौपहिया गाड़ी म बइठके कोंडागंाव ले केशकाल कोति आवत रीहिन, इही बेरा बहिगांव थाना क्षेत्र म राष्ट्रीय राजमार्ग क्रमांक तीस म तेज रप्तार टरक ह उंखर गाड़ी ल टक्कर मार दीस। जेखर ले ओमा बइठे दू झन शिक्षक के मउकाच म मउत होगे अउ एक आने शिक्षक के इलाज के बेरा मउत होगे।
जवान शहीद
कंाकेर जिला के छोटेबेठिया थाना क्षेत्र के रेंगावाही म दू दिन पहिली होय बम विस्फोट म घायल बीएसएफ के जवान प्रकाशचंद के आज रायपुर म इलाज के बेरा मउत होगे।
खबर के मुताबिक ये जवान मतदान दल के सुरक्षा म तैनात रीहिस। इही बेरा पाछू सोमवार के माओवादी मन कोति ले करे गे विस्फोट के चपेट म आय ले ओ ह गंभीर रूप ले घायल होगे रीहिस। शहीद जवान मारबेड़ा के बीएसएफ के चौरानबे बटालियन म तैनात रीहिस। वो ह ओडिशा के बालेश्वर के रहइया रीहिस।
केंद सोशल मीडिया परामर्श
केंद्र सरकार ह गुमराह करईया अउ डीप-फेक वीडियो के पहिचान करे के संबंध म सोसल मीडिया कंपनी बर परामर्श जारी करे हे। सरकार ह सोसल मीडिया कंपनी ले ए तय करे बर केहे हे कि गुमराह करईया अउ डीप-फेक वीडियो के पहिचान बर तुरते परयास करे जाय।
केंद्रीय इलेक्ट्रानिकी अउ सूचना प्रौद्योगिकी मंत्रालय ह केहे हे कि अइसन किसन के मामला म सूचना प्रौद्योगिकी मामला दू हजार इक्कीस म तय समय सीमा म तुरते कार्रवाई करे जाना चाही। परामर्स म केहे गेहे कि अइसन कीसम के सामग्री ल पोस्ट करे के छत्तीस घंटा के भीतरी हटा देना चाही। कंपनी ल यहू सुरता देवाय गेहे कि सूचना प्रौद्योगिकी अधिनियम अउ नियम ले जुड़े प्रावधान म कार्रवाई करे म विफल रेहे म सूचना प्रौद्योगिकी नियम दू हजार इक्कीस के नियम सात के तहत ओखर खिलाफ कार्रवाई करे जा सकत हे।
भाजपा प्रवेश
प्रदेश म विधानसभा चुनाव के दूसर पारी बर राजनीतिक दल अउ प्रत्याशी मनके प्रचार अभियान सरलग चलत हे। इही बीच कंाग्रेस नेता पिनाल उपवेजा समेत पांच सौ ले जादा कार्यकर्ता मन ह आज भारतीय जनता पार्टी म प्रवेश करीन। पूर्व मंत्री अमर अग्रवाल ह सबो कार्यकर्ता मनके सुआगत करत भाजपा म प्रवेश करइन। एमा ले जादा करके कार्यकर्ता बेलतरा अउ बिलासपुर विधानसभा क्षेत्र के हरय।
उंहे कबीरधाम विधानसभा क्षेत्र ले कंाग्रेस प्रत्याशी के खिलाफ अउ पार्टी विरोधी गतिविधि म शामिल होय के सेती पूर्व विधायक योगेश्वर राज सिंह ल प्रदेश कंाग्रेस कमेटी ह कंाग्रेस के प्राथमिक सदस्यता ले छै बछर बर निष्कासित कर देहे।
आतंकी गिरप्तार
दुर्ग, भिलाई के स्मृति नगर के एसबीआई कॉलोनी ले एक संदेही आतंकी वजीहउद्दीन ल उत्तर प्रदेश एटीएस के टीम ह गिरप्तार करे हे।
खबर के मुताबिक एटीएस के टीम ल भिलाई म संदेही आतंकी के होय के सूचना मिले रीहिस। पाछू दू दिन ले एटीएस के टीम भिलाई के स्मृति नगर म पहुंचे रीहिस। काली दुर्ग पुलिस के मदद ले आरोपी ल पकड़े गीस। ये टीम ह आरोपी ल अपन संग ले गेहे। आरोपी उत्तर प्रदेश के अलीगढ़ म पढ़त रीहिस हे। फेर पाछू कुछ समय ले ओ ह भिलाई के स्मृति नगर के एसबीआई के कॉलोनी म किराया के मकान म रीहिस।
महिला अग्निवीर भर्ती रैली
सेना भर्ती कार्यालय जबलपुर कोति ले अग्निवीर सैन्य पुलिस म महिला उम्मीदवार मन बर उनतीस नवंबर के भर्ती रैली राखे जाही। मध्यप्रदेश अउ छत्तीसगढ़ के युवती दू हजार तेईस – चौबीस के भर्ती चक्र म सैन्य पुलिस बल म सामिल होय खातिर प्रतियोगिता करहीं।
भर्ती रैली बीहनिया सात बजे ले जबलपुर के रानी दुर्गावती विश्वविद्यालय शारीरिक शिक्षा विभाग के मैदान म राखे जाही। उम्मीदवार ल एयरपोर्ट रोड जबलपुर के प्रवेश द्वार म बीहनिया पांच बजे तक रिपोर्ट करे बर पड़ही। रैली म शामिल होय बर पात्र आठ सौ पांच उम्मीदवार ल एडमिट कार्ड भेजे गेहे। ये उम्मीदवार पाछू अप्रैल महीना म होय परीक्षा पास करके मेरिट म जगा बनाय हे। एमा छत्तीसगढ़ ले एक सौ तीन अउ मध्यप्रदेश ले सात सौ दू उम्मीदवार शामिल हे।