प्रधानमंत्री-दुर्ग
भारतीय जनता पार्टी के बड़े नेता अउ प्रधानमंत्री नरेंद्र मोदी ह आज दुरूग म एक ठन चुनावी सभा म किहीन कि प्रधानमंत्री गरीब कल्याण अन्न योजना ल अवईया पांच बछर बर अउ बढ़ाय जाही। ए योजना म देसभर म करीबन अस्सी करोड़ गरीब लोगन ल हर महिना पांच किलो मुफ्त अनाज दे जाथेे। योजना ए बछर दिसंबर म खतम होवत रिहीस। जेला आज प्रधानमंत्री ह अवईया पांच बछर बर बढ़ाय के ऐलान करीन हे। प्रधानमंत्री ह किहीन कि केंद्र के भाजपा सरकार के सबले बड़े प्राथमिकता गरीब कल्याण हे। ओमन किहीन कि उंखर बर देस म सबले बड़े जाति गरीब हे।
श्री मोदी ह आरोप लगाइन कि विपक्षी दल गरीब मनके बीच जातिवाद के जहर घोलके उंखर एकता ल तोड़ना चाहत हे। छत्तीसगढ़ म अभी ईडी डहार ले करे गे कार्रवाई के बारे म बतावत ओमन किहीन कि छत्तीसगढ़ के कांग्रेस सरकार अउ मुख्यमंत्री ल ए बताना चाही कि महादेव ऐप सट्टा घोटाला के दुबई म बइठे आरोपी मन संग उंखर मनके का रिश्ता हे। ओमन किहीन कि छत्तीसगढ़ के कांग्रेस सरकार ह पाछू पांच बछर म करोड़ो रूपिया के घोटाला करे हे अउ राज्य के जनता ह कांग्रेस सरकार के भ्रष्टाचार ले त्रस्त हे।
विस चुनाव-प्रचार
प्रदेस म विधानसभा चुनाव के प्रचार चरम म हवय। कांग्रेस अउ भाजपा संघरा दूसर राजनीतिक दल मनके नेता अउ उम्मीदवार मन ह प्रचार म जुट हवय। इही कड़ी म कांग्रेस के बड़े नेता अउ सांसद राहुल गांधी ह आज जगदलपुर म चुनावी सभा लीन। ए मउका म श्री गांधी ह किहीन कि कांग्रेस ह आदिवासी मन ले करे हरेक वादा ल निभाय हे। उहें, प्रदेस के किसान मनके कर्जा माफी संघरा ओमन ल धान के सबले जादा कीमत देगे हवय।
अइसने मुख्यमंत्री भूपेश बघेल ह काली राजनांदगांव जिला के सुकूल दैहान, मोतीपुर अउ मोहारा क्षेत्र म पार्टी प्रत्यासी मनके कक्ष म प्रचार करही।
इही बीच, उत्तर प्रदेस के मुख्यमंत्री योगी आदित्यनाथ ह आज कांकेर जिला के भानुप्रतापपुर अउ कबीरधाम जिला के कवर्धा म भाजपा प्रत्यासी मनके पक्ष म चुनावी सभा लीन।
दूसर कोति, आम आदमी पार्टी के संयोजक अउ दिल्ली के मुख्यमंत्री अरविंद केजरीवाल अउ पंजाब के मुख्यमंत्री भगवंत मान ह आज कवर्धा म पार्टी प्रत्यासी के पक्ष म प्रचार करीन।
पहला चरण-मतदान
प्रदेस म विधानसभा चुनाव के पहिली चरण म बीस ठन विधानसभा क्षेत्र म सात नवंबर के मतदान होही। भारत निर्वाचन आयोग ह मतदान के सबो तैयारी पूरा कर लेहे। पहिली चरण के दस ठन विधानसभा क्षेत्र- मोहला-मानपूर, अंतागढ़, भानूप्रतापपुर, कांकेर, केशकाल, कोंडागांव, नारायणपुर, दंतेवाड़ा, बीजापुर अउ कोंटा म बिहनिया सात बजे ले मंझनिया तीन बजे तक वोट डारे जाही। उहें, दूसर दस विधानसभा क्षेत्र- पंडरिया, कवर्धा, खैरागढ़, डोंगरगढ़, राजनांदगांव, डोंगरगांव, खुज्जी, बस्तर, जगदलपुर अउ चित्रकोट म बिहनिया आठ बजे ले संझा पांच बजे तक मतदान होही। पहिली चरण म पांच हजार तीन सौ चार मतदान केंद्र बनाय गे हवय।
इही, बीच पहिली चरण के मतदान बर माओवाद प्रभावित क्षेत्र म मतदान दल के रवानगी सुरू होगे हवय। सुकमा जिला म आज कोनो‘-कोनो मतदान दल ल हेलीकाप्टर ले भेजे गीस। जिला के अंदरूनी इलाका के मतदान केंद्र तक अवईया दू दिन म बयालीस ठन मतदान दल ल हेलीकाप्टर ले भेजे जाही। उहें, बीजापुर जिला के संवेदनसील इलाका म घलो कुछेक मतदान दल ल आज हेलीकाप्टर ले रवाना करे गीस। जिला म चौंतीस ठन मतदान दल ल हेलीकाप्टर के मदद ले मतदान केंद्र तक पहुंचाय गे हवय।
मतदान-अवकाश
प्रदेस म विधानसभा चुनाव म दू चरण म सात अउ सत्रह नवंबर के मतदान के दिन संबंधित क्षेत्र म सामान्य अवकाश घोषित करे गेहे। ए संबंध म राज्य सरकार के सामान्य प्रशासन विभाग डहार ले आदेस जारी करे दे गेहे। आदेस के मुताबिक पहिली चरण बर सात नवंबर के सत्तर विधानसभा क्षेत्र म सब्बों शासकीय कार्यालय अउ संस्थान म सामान्य अवकाश घोषित करे गेहे। एखरे संग निजी संस्थान, औद्योगिक अउ बेवसायिक प्रतिष्ठान म अधिकारी अउ कर्मचारी मन ल सवैतनिक अवकाश दे जाय के निरदेस घलो देगे हवय।
मतदाता जागरूकता
प्रदेस म विधानसभा चुनाव म मतदाता मन ल जादा ले जादा संख्या म भाग लेबर निर्वाचन आयोग डहार ले सरलग जागरूकता कारीकरम कराय जावत हे। इही कड़ी म कोंडागांव जिला के कोकोड़ा-जुगानार म लोगन ल मतदान बर जागरूक करे बर दौड़ प्रतियोगिता कराय गीस। ए मउका म ग्रामीण मन ह ‘‘मतदान हमारा अधिकार हैं‘‘ के नारा लगावत दौड़ लगाइन।
उहें, राजनांदगांव जिला म शिवनाथ नदी के तट म मतदाता जागरूकता बर दीपोत्सव मनाय गीस। ए दौरान रंगोली बनाके अउ दीया जलाके लोगन ल मतदान बर जागरूक करे गीस।
धान खरीदी नियंत्रण कक्ष
प्रदेस म किसान मनले समर्थन मूल्य म धान खरीदी एक नवंबर ले सुरू होगे हे। तीन दिन भीतर प्रदेस म किसान मनले लगभग नब्बे हजार मीट्रिक टन खरीदी करे जा चुके हे।
मार्कफेड के मुख्यालय म समर्थन मूल्य म धान खरीदी बर राज्य स्तरीय नियंत्रण कक्ष बनाय गे हवय। नियंत्रण कक्ष के टेलीफोन नंबर- शून्य सात सात एक-दू चार दू पांच चार पांच शून्य अउ दू चार दू पांच चार छै तीन हवय। नियंत्रण कक्ष म पदस्थ अधिकारी-कर्मचारी मन ह लोगन ले मिले सिकायत, समस्या अउ सुझाव ल लिखके विपणन कक्ष के प्रमुख अधिकारी मनके आगू प्रस्तुत करही।
जिले की चिट्ठी
प्रोदेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले कि चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के आकाशवाणी के सब्बो केंद्र मन ह एक्के संघरा रिले करही। ए बखत के अंक म ‘‘दंतेवाड़ा‘‘ जिला के गतिविधि के बारे म जानकारी दे जाही।
हल्बी/गोण्डी-समाचार बुलेटिन
काली ईतवार के ‘‘हल्बी अउ गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन ल आकाशवाणी केंद्र, जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे ले प्रसारित करे जाही।
अउ अब पेस हे मौसम के हाल..
प्रदेस म अब जाड़ बाढ़त हे। उत्तर दिसा ले आवत ठण्डा अउ सुष्क हवा के सेति अवईया तीन दिन के दौरान प्रदेस के न्यूनतम तापमान म तीन ले चार डिग्री सेल्सियस तक गिरावट हो सकत हे। संगेसंग दिन के तापमान म घलो एक ले दू डिग्री सेल्सियस त क गिरावट दर्ज करे जा सकत हे। इही बीच, मौसम विभाग ह बस्तर संभाग ल छोड़के प्रदेस के दूसर जघा म मौसम के सुष्क रेहे के संभावना जताय हे।
उहें, प्रदेस के उत्तरी भाग म बिहनिया कोहरा छाय के घलोक आसार हे।
अउ अब थोरकुन समाचार सार म –
– बीजापुर विधानसभा क्षेत्र म जनता कांग्रेस छत्तीसगढ़ के तीस अउ कांग्रेस के बीस कार्यकर्ता मन ह भाजपा प्रत्यासी महेश गागड़ा के आगू भाजपा म प्रवेश करीन।
– कोलिया कलेक्टर अउ जिला निर्वाचन अधिकारी विनय कुमार लंगेह ह हाईस्कूल करजी के स्वामी आत्मानंद उत्कृष्ट विद्यालय पटना के प्राचार्य ल आचार संहिता उल्लंघन के मामला म निलंबित कर देहे।
– इही जिला के बैकुंठपुर विधानसभा क्षेत्र के रिटर्निंग ऑफिसर अंकिता सोम ह कांग्रेस प्रत्यासी अंबिका सिंहदेव ल आदर्स आचार संहिता के उल्लंघन करे म कारण बताओ नोटिस जारी करीन हे।
– बीजापुर जिला के गंगालूर थाना क्षेत्र के ग्राम बुरजी म सुरक्षा बल ह तीन किलो के आईडी बरामद करीस, जेला मउकच म निष्क्रिय कर दे गीस।
– बिलासपुर जिला के आने-आने थाना क्षेत्र म फ्लाइंग स्क्वॉड के टीम ह जांच के दौरान पंद्रह लाख रूपिया नगदी अउ एक किलो चांदी बरामद करे हे। उहें, रायगढ़ जिला म घलो करीबन तीन लाख रूपिया के नगद रासि बरामद करे गेहे।
अउ
– सुकमा पुलिस ह मल्कानगिरी रद्दा म गाड़ी मनके जांच के दौरान दू कुंटल गांजा बरामद करे हे, जेखर कीमत करीबन बीस लाख रूपिया बताय गे हवय।