प्रदेस म विधानसभा चुनई के तहत दूसरइया चरण बर बारह सौ उन्नीस झन अभ्यर्थी मन ह एक हजार नौ सौ पच्यासी नामांकन पत्र दाखिल करे हे। नामांकन पत्र दाखिल करे के आखिरी दिन काली एक हजार दू सौ पैंतालीस ठन नामांकन पत्र दाखिल करे गीस। आज ए नामांकन पत्र मनके जांच करे गीस। दूसइया चरण के तहत अभ्यर्थी मन ह दू नवंबर तक अपन नाम ल वापस ले सकत हे।
खबर के मुताबिक विधानसभा चुनई के तहत दूसरइया चरण म रईपुर, बिलासपुर, दुरूग अउ सरगुजा संभाग के कुल सत्तर ठन विधानसभा क्षेत्र मन म सत्रह नवंबर के दिन मतदान डारे जाही। ए चरण बर एक करोड़ तिरसठ लाख चौदह हजार चार सौ उनयासी झन मतदाता मन ह अपन मत के परयोग करही।
डाक मतपत्र-मतदान
चुनाव आयोग डहार ले अस्सी बछर ले जादा उमर के मतदाता मन बर एसो डाक मतपत्र के सुविधा देवाय गेहे। काली नारायणपुर विधानसभा क्षेत्र के इंक्यानवे बछर के विजयादेवी सुराना ह डाक मतपत्र के माध्यम से अपन वोट के प्रयोग करीन। उहें, खड़कागांव के दिव्यांग मतदाता खोड़ी ह घलो डाक मतपत्र के माध्यम से मतदान करीन।
ओति, कोंडागांव जिला के सिदावंड गांव म फुलकुंबर अउ बड़ेकनेरा के बयासी बछर के पीते पोयाम ह घलो डाक मतपत्र के प्रयोग करीन। जिला म डाक मतपत्र ले वोट डरवाय बर बारह ठन दल बनाय गेहे।
दिव्यांग मतदाता-संगोष्ठी
चुनाव आयोग डहार ले राज्य म होवइया विधानसभा चुनई म दिव्यांग अउ सियान मतदाता मन ल सुविधा देवाय खातिर बढ़िया व्यवस्था करे जात हे। दिव्यांग मतदाता मन ल घर बइठे डाक मतपत्र के माध्यम ले मतदान करे के सुविधा दे गेहे। ए संबंध म काली रईपुर म दिव्यांग मतदाता मन बर सुगम मतदान बिसय उपर राज्य स्तरीय संगोष्ठी के कारीकरम करे गीस। कार्यक्रम म बोलत राज्य के मुख्य निर्वाचन पदाधिकारी रीना बाबा साहेब कंगाले ह बतईन कि कहूं दिव्यांग मतदाता मन ल पोलिंग बूथ म जाके वोट डारे म परेसानी होही, त उंखर मन बर गाड़ी के सुविधा घलो चुनाव आयोग डहार ले देवाय जाही। ए सुविधा के फायदा ले बर मतदाता मन ल पहिली अपन पंजीयन कराना पड़ही। ओमन बतईन कि मतदान के दिन दिव्यांग अउ सियान मनखे मनके सहयोग करे खातिर एन.एस.एस., एनसीसी अउ स्काउट गाइड मनके स्वयंसेवक मनके ड्यूटी लगाय जाही।
भाजपा-प्रवेश
कांग्रेस विधायक चिंतामणी महराज ह आज भारतीय जनता पार्टी म सामिल होगे। मिले खबर के मुताबिक अंबिकापुर म भाजपा के प्रदेस प्रभारी ओम माथुर के मौजूदगी म ओमन ह पार्टी के सदस्यता ग्रहण करीन। चिंतामणी महराज ह सामरी विधानसभा क्षेत्र ले विधायक हवय। बछर दू हजार अट्ठारह म होय विधानसभा चुनाव म ओमन सामरी सीट ले चुनाव लड़ीन अउ जीत दरज करीन। उहें, ए दारी कांग्रेस पार्टी डहार ले ओमन ल टिकिट नइ दे गेहे।
विस-प्रचार
प्रदेस म विधानसभा चुनई के पहिली चरण के मतदान ह अब सिरिफ छै दिन बांचे हे। मतदान के तारीख ह लकठातेच कांग्रेस, भाजपा के संगेसंग कई ठिन पार्टी के नेता मन ह अपन-अपन चुनाव प्रचार ल तेज कर देहे। प्रधानमंत्री नरेन्द्र मोदी ह दू नवंबर के छत्तीसगढ़ के दउरा म आवत हे। ए दउरान ओमन कांकेर म चुनाव सभा ल संबोधित करही। एखर बाद श्री मोदी ह चार नवंबर के ुदुरूग म एक ठिन आमसभा म सामिल होही।
उहें, उत्तरप्रदेश के मुख्यमंत्री योगी आदित्यनाथ के चार अउ पांच नवंबर के छत्तीसगढ़ दउरा प्रस्तावित हे। ए दउरान ओमन चार नवंबर के कवर्धा म डोंगरगढ़ म जनसभा ल संबोधित करही। संगेसंग भिलाई म भाजपा प्रत्याशी प्रेमप्रकाश पांडेय के संग रोड-शो म सामिल होही। उहें, पांच नवंबर के राजनांदगांव म पूर्व मुख्यमंत्री डॉक्टर रमन सिंह के संग रोड-शो म संघरही।
धान खरीदी
प्रदेस म काली एक नवंबर ले समर्थन कीमत म धान अउ मक्का के खरीदी सुरू करे जाही। धान बिसाय के काम ल अवइया बछर इकतीस जनवरी तक अउ मक्का बिसय के काम ल अट्ठाईस फरवरी तक करे जाही। ए धान बिसाय के काम ल बिना बायोमेट्रिक के करे जाही। ए संबंध म राज्य के खाद्य सचिव ह कलेक्टर मन ल पत्र जारी कर देहे। राज्य सरकार ह एसो पंजीयन कराय किसान मन ले हरेक एकड़ के हिसाब ले बीस कुंटल धान बिसाही। एसो किसान मन ले एक सौ पच्चीस लाख मीटरिक टन धान बिसाय के लक्ष्य राखे गेहे।
विस चुनाव-प्रवर्तन एजेंसी कार्रवाई
छत्तीसगढ़ म विधानसभा चुनई बर आदर्श आचार संहिता लागू होय के बाद अब तक प्रवर्तन एजेंसी मन डहार ले अड़तीस करोड़ चौंतीस लाख रूपिया ले जादा के अवैध पइसा अउ जिनीस जब्ती करे गेहे। एमा दस करोड़ ग्यारह लाख रूपिया के नगदी राशि घलो सामिल हे। मुख्य निर्वाचन पदाधिकारी कार्यालय ले मिले खबर के मुताबिक प्रवर्तन एजेंसी मनके निगरानी के दउरान करीबन इंक्यानवे लाख रूपिया कीमत के करीबन इकतीस हजार लीटर अवैध दारू जब्ती करे गेहे। उहें, चौदह करोड़ बयासी लाख रूपिया ले जादा कीमत के करीबन एक सौ पच्यासी किलो जेवर-गहना जब्ती करे गेहे।
विधानसभा चुनाव मतदान दल
राज्य म विधानसभा चुनाव के दूसरइया चरण म ए दारी हेलीकॉप्टर के सुविधा देवाय जाही। चुनाव आयोग डहार ले एखर पहिली प्रदेस के नक्सल प्रभावित विधानसभा क्षेत्र मन म ए सुविधा देवत रिहीन हे। सात नवंबर के प्रदेस के बीस ठन विधानसभा सीट म होवइया पहिली चरण के चुनाव म बस्तर संभाग म एक सौ छब्बीस ठन नवा मतदान केन्द्र बनाय गेहे, जउन ह क्षेत्र के दूर-दराज अउ नक्सल प्रभावित क्षेत्र म आथे। ए केन्द्र ल मिलाके कुल एक सौ अंठावन मतदान केन्द्र बर घलो हेलीकॉप्टर ले मतदान दल ल भेजे जाही।
राज्य के मुख्य निर्वाचन पदाधिकारी रीना बाबा साहेब कंगाले ह बतईन कि बस्तर क्षेत्र म सड़क निर्माण अउ फोर्स कैम्प के संख्या ल बढ़ाय के सेती हेलीकॉप्टर ले भेजइया मतदान दल के संख्या ह ए दारी कम होय हे।
राज्य स्थापना दिवस
छत्तीसगढ़ राज्य के काली स्थापना दिवस हरय। काली छत्तीसगढ़ ल तेईस बछर हो जही। ए मउका म राज्यपाल विश्वभूषण हरिचंदन ह प्रदेसवासी मन ल बधाई अउ सुभकामना दीन हे। ओमन किहीन कि छत्तीसगढ़ राज्य बने के बाद हरेक बछर ए राज्य म नवा-नवा विकास के काम होवत हे। ओमन किहीन कि जउन सपना इहां के मनखे मन देखे रिहीन, ओ सपना ह पूरा होवत हे अउ जम्मों झन प्रदेसवासी मन मिलके ए राज्य के विकास म अपन योगदान देवय।
राज्य स्थापना दिवस के मउका म काली रतिहा जम्मांं जिला मुख्यालय अउ नवा रईपुर के सरकारी भवन मन म रोसनी करे जाही।
वल्लभभाई पटेल-जयंती
देस ह आज लौह पुरूष सरदार वल्लभ भाई पटेल के जयंती मनावत हे। ए मउका म ओमन ल श्रद्धांजलि अर्पित करे गीस। आज के दिन ल राष्ट्रीय एकता दिवस के रूप म मनाय जाथे। छत्तीसगढ़ के राज्यपाल विश्वभूषण हरिचंदन ह आज राजभवन म सरदार पटेल के फोटू म फूलमाला अर्पित करीन। ए मउका म राज्यपाल ह अधिकारी अउ कर्मचारी मन ल राष्ट्र के एकता अउ अखंडता के संगेसंग सुरक्षा ल बनाय के सपथ देवईन। ए मउका म राज्यपाल ह किहीन कि अखंड भारत के निर्माण म सरदार पटेल के योगदान ल भुलाय नइ जा सकय।
उहें, राष्ट्रीय एकता दिवस के मउका म आज छत्तीसगढ़ राज्य सूचना आयोग के आयुक्त मनोज त्रिवेदी ह अधिकारी अउ कर्मचारी मन ल राष्ट्रीय एकता अउ अखंडता के सपथ देवईन।
राष्ट्रीय एकता दिवस के मउका म भिलाई स्टील प्लांट डहार ले आज रन फॉर यूनिटी, स्वच्छ भारत अउ सौ प्रतिसत मतदान के संदेस देवत सतर्कता जागरूकता सप्ताह सुरू करे गीस। ए दउरान कारखाना के अधिकारी मन ह भ्रष्टाचार के विरोध करे अउ राष्ट्र बर समर्पण भाव ले काम करे के संकलप लीन।