इही कड़ी म आज कांकेर जिला के भानुप्रतापपुर म चुनावी सभा ल संबोधित करत कांग्रेस के पूर्व राष्ट्रीय अध्यक्ष राहुल गांधी ह छत्तीसगढ़ म फेर ले कांग्रेस के सरकार ह बनही त जम्मों शिक्षण संस्थान मन म प्रायमरी ले लेके स्नातकोत्तर तक के शिक्षा निःसुल्क देके घोषणा करे हे। ओमन तेंदूपत्ता संग्राहक मन ल चार हजार रूपिया प्रोत्साहन रासि हरेक बछर देबर अउ लघु वनोपज के न्यूनतम समर्थन मूल्य उपर दस रूपिया उपराहा दे जाय के ऐलान घलो करे हे।
सभा ल संबोधित करत श्री गांधी ह किहीन हे कि राज्य सरकार बस्तर के आदिवासी मन के हित म सरलग काम करत हे। ओमन किहीन हे कि सरकार ह आदिवासी मन ल न सिरिफ मालिकाना हक देहे, बल्कि ओखर आर्थिक स्थिति ल मजबूत बनाय बर घलो काम करे हे।
मांडविया-चुनाव आयोग शिकायत
केंद्रीय स्वास्थ्य मंत्री अउ भाजपा के चुनाव सह प्रभारी मनसुख मांडविया के अगुवई म भाजपा प्रतिनिधिमंडल ह आज मुख्य निर्वाचन पदाधिकारी कार्यालय जाके राज्य प्रशासन के सिकायत करे हे। केंद्रीय मंत्री ह किहीन कि राज्य के अधिकारी कांग्रेस के एजेंट असन काम करत हे अउ चुनाव ल प्रभावित करे के कोसिस करत हे। श्री मांडविया ह किहीन कि भाजपा कार्यकर्ता मन ल प्रताड़ित करे जावत हे। संगेसंग पार्टी केे प्रचार सामग्री ल लेके जवइया गाड़ी मन ल बेमतलब रोकत हे। जेखर ले पार्टी के चुनाव प्रचार म असर पड़त हे।
केंद्रीय मंत्री ह किहीन कि भाजपा नेता अउ कार्यकर्ता मन ल डरा के आपराधिक घटना ल अंजाम दे जावत हे। ओमन किहीन कि भाजपा कार्यकर्ता के हत्या होय के बाद घलो पुलिस प्रशासन डहार कार्रवाई के नाम म सिरिफ खानापूर्ति करे जावत हे। श्री मांडविया ह दंतेवाड़ा नारायणपुर अउ बीजापुर विधानसभा क्षेत्र मन म कांग्रेस पार्टी डहार ले आदर्श आचार संहिता के उल्लंघन करे के आरोप घलो लगाय हे। ओमन चुनाव आयोग ले भाजपा डहार करे गे सिकायत म तुरते कार्रवाई करे के मांग करे हे। ओमन ह सिकायत म कार्रवाई नइ करे जाय के दसा म केंद्रीय निर्वाचन आयोग म सिकायत करे के बात किहीन हे।
विस चुनाव-आबकारी विभाग कार्रवाई
प्रदेस म आदर्श आचार संहिता लागू होय के बाद आबकारी विभाग ह करीबन दू करोड़ रूपिया कीमत के सराब, गांजा अउ महुआ लाहन जब्त करे हे। अधिकारी जानकारी के मुताबिक विभाग डहार ले अवैध सराब के रोकथाम बर बड़े रूप म सघन अभियान चला के कार्रवाई करे के संगेसंग विभाग डहार ले अंतराज्यीय सीमावर्ती क्षेत्र मन म इकतीस चेकपोस्ट बनाके गाड़ी मन के जांच करे जावत हे। एखरे संग राज्य के सीमावर्ती क्षेत्र मन म तलासी अभियान घलो चलाय जावत हे। संगेसंग रेलव पुलिस अउ राज्य पुलिस के संग मिलके रेलवे स्टेसन, टेªन, बस अड्डा अउ बस के घलो जांच करे जावत हे। आबकारी विभाग डहार ले टोल फ्री नंबर -एक चार चार शून्य पांच के संचालन करे जावत हे। जेमा अवैध सराब बिक्री या तस्करी ले संबंधित सूचना दे जा सकही।
बीजापुर जिला म सुरक्षा बल मन ह दू झन माओवादी मन ल गिरफ्तार करे हे। मिले खबर के मुताबिक जिला म चलाय जावत माओवादी विरोधी अभियान के तहत बीजापुर थाना ले डीआरजी अउ बस्तर फाइटर के समलात टीम पेट्रोलिंग म निकले रिहीस। इही दौरान गोरना-मनकेली कोति जवईया सड़क ल घेराबंदी करके दू झिन माओवादी मन ल गिरफ्तार करे गेहे। उहें, एक झिन माओवादी भागे म कामयाब होगे हे। गिरफ्तार माओवादी मनके कब्जा ले पंद्रह माओवादी पर्चा अउ बैनर पोस्टर बरामद करे गेहे।
ई-डाक मतपत्र
प्रदेस म होवइया विधानसभा चुनाव के पहिली चरण बर चार हजार पांच सौ पंद्रह सेवा मतदाता मन ल इलेक्ट्रानिक डाक मतपत्र जारी कर दे गेहे। निर्वाचन आयोग के अनुसार पहिली चरण के चुनाव के नाम वापस लेके बाद ले ठीक चौबीस घंटा तक ई-डाक मतपत्र जारी करे जाथे अउ आगू सात दिन तक ओला डाउनलोड करे जा सकथे। संबंधित सेवा मतदाता ओला डाउनलोड कर अपन वोट दरज करथे अउ ओला डाक के माध्यम ले रिटर्निंग अधिकारी ल भेजथे। प्रदेस म चौबीस अक्टूबर ले ई-डाक मतपत्र ल डाउनलोड करे के प्रक्रिया सुरू हो गेहे, जउन ह इकतीस अक्टूबर तक चलही। तीन दिसंबर के बिहनिया सात बजके उनसठ मिनट म नामांकित ई-डाक मतपत्र ल प्राप्त करे के समय निर्धारित करे गेहे।
हल्बी/गोण्डी-समाचार बुलेटिन
सुनईया मन ल बतादन काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढे़ छै बजे ले प्रसारित करे जाही।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए बखत के अंक म ‘‘बलौदाबाजार-भाटापाारा‘‘ जिला के गतिविधि के बारे म जानकारी दे जाही।
राष्ट्रीय खेल प्रतियोगिता
गोवा म खेले जावत सैंतीसवां राष्ट्रीय खेल प्रतियोगिता म छत्तीसगढ़ के मलखंभ खिलाड़ी मन ह कांस्य पदक हासिल करे हे। ए टीम म नारायणपुर के अबूझमाड़ मलखंभ एकेडमी के मंगड़ू पोड़ियाम, संतोष सोरी, मानु धु्रव, संताय पोटाई, सरिता पोयाम, दुर्गेस्वरी कुमेटी, मोनिका पोटाई, डिम्पी सिंह सिदार अउ शिक्षा दिनकर सामिल रिहीन।
चंद्रग्रहण
आज आंशिक चंद्रग्रहण होही अउ ए पूरा देस म दिखाय दीही। मौसम विज्ञान विभाग ह किहीन हे कि चंद्रग्रहण अध रतिहा के बाद एक बजके पांच मिनट म सुरू होही अउ दू बजके चौबीस मिनट तक रइही। चंद्रग्रहण के बेरा एक घंटा उन्नीस मिनट के होही। चंद्रग्रहण एशिया, यूरोप, अफ्रीका, पूर्व-दक्षिण अमरीका अउ ऑस्ट्रेलिया म घलो दिखाई दीही।
बस्तर दशहरा
विश्व प्रसिद्व बस्तर दशहरा अवईया इकतीस अक्टूबर के सिराही। ए दिन मावली माता के डोली अउ छत्र ल दंतेवाड़ा बर रवाना करे जाही। एखर पहिली काली सत्ताईस अक्टूबर के कुटुम्ब जात्रा के रसम अदा करे गीस। ए रसम म बस्तर दशहरा म सामिल होय बर आए बस्तर के जम्मों देवी-देवता मन के विधि-विधान ले पूजा अर्चना करे गीस। ए रसम के बाद देवी-देवता मनके विदाई सुरू होगे हे।