जगदलपुर म आमसभा म बोलत श्री शाह किहीन कि छत्तीसगढ़ के पहिचान इहां के आदिवासी मन ले हे। ओमन छत्तीसगढ़ के रक्षा करइया शहीद वीरनारायण सिंह, वीर गुंडाधूर अउ बस्तर के महाराजा प्रवीरचंद भंजदेव ल बिसेस रूप ले सुरता करीन। केन्द्रीय गृहमंत्री ह किहीन कि छत्तीसगढ़ म भाजपा के सरकार बने म प्रदेस ल नक्सल समस्या ले छूटकारा देवाय के बिसेस परयास करे जाही। ओमन किहीन कि ए समस्या के सेती हर स्थिति म आदिवासी वरग ल नकसान उठाय बर पड़थे। ओमन स्पष्ट करीन कि नगरनार इस्पात संयंत्र के निजीकरण नइ करे जाही। काबर कि ए संयंत्र बस्तर के जनता बर हवय।
केन्द्रीय मंत्री ह किहीन कि पाछु नौ बछर म केन्द्र के एनडीए सरकार ह जनजातीय वर्ग के विकास बर एक लाख बत्तीस हजार करोड़ रूपिया खरच करे हे। उहें, एखर पहिली केन्द्र म कांग्रेस के सरकार ह दस बछर म आदिवासी मनके विकास बर सिरिफ उनतीस हजार करोड़ रूपिया खरच करे रिहीस। श्री शाह किहीन कि जिला खनिज न्यास ले आने-आने जिला के विकास बर करीबन पचहत्तर हजार करोड़ रूपिया दे गेहे। ओमन बतईन कि बछर दू हजार सैंतालीस तक देस ल सिकल सेल ले मुक्त कराय खातिर केन्द्र सरकार ह एक बिसेस अभियान सुरू करे हे। ओमन छत्तीसगढ़ सरकार उपर गोबर बिसाय म गड़बड़ी के आरोप लगईन। श्री शाह ह आने-आने योजना म हितग्राही मन ल कथित तौर म फायदा नइ मिले बर राज्य सरकार उपर वादाखिलाफी के आरोप घलो लगईन।
नामांकन-प्रक्रिया
प्रदेस म सात नवंबर के होवइया पहिली चरण के विधानसभा चुनाव बर नामांकन भरे के काली आखिरी दिन हे। मुख्य निर्वाचन पदाधिकारी कार्यालय के मुताबिक काली अट्ठाहर अक्टूबर के चौंसठ ठिन नामांकन पत्र जमा होइस।
खबर के मुताबिक प्रदेस म पहिली चरण म बीस सीट म होवइया चुनाव खातिर काली नामांकन जमा करे के काम पूरा होय के बाद इक्कीस अक्टूबर के नामांकन पत्र के जांच करे जाही। उहें, तेईस अक्टूबर तक उम्मीदवार अपन नाव वापस ले सकही।
भाजपा-स्टार प्रचारक
भारतीय जनता पार्टी ह प्रदेस म विधानसभा चुनाव बर चालीस झिन स्टार प्रचारक के सूची जारी कर देहे। पार्टी के राष्ट्रीय महासचिव अरूण सिंह ह चुनाव आयोग ल भेजे गे चिट्ठी म ए स्टार प्रचारक मनके जानकारी साझा करे हे।
ए चिट्ठी के मुताबिक पार्टी के स्टार प्रचारक म प्रधानमंत्री नरेन्द्र मोदी अउ पार्टी के राष्ट्रीय अध्यक्ष जगत प्रकाश नड्डा के संगेसंग केन्द्रीय मंत्री अमित शाह, राजनाथ सिंह, नितिन गडकरी, मनसुख मांडविया, अनुराग सिंह ठाकुर, स्मृति ईरानी, धर्मेन्द्र प्रधान, ज्योतिरादित्य सिंधिया, रविशंकर प्रसाद, बिश्वेश्वर टुडू अउ रामेश्वर तेली सामिल हे।
एखर संगेसंग उत्तरप्रदेश के मुख्यमंत्री योगी आदित्यनाथ, मध्यप्रदेश के मुख्यमंत्री शिवराज सिंह चौहान, महाराष्ट्र के उप मुख्यमंत्री देवेन्द्र फड़नवीस, झारखंड के पूर्व मुख्यमंत्री बाबूलाल मंराडी अउ अर्जुन मुंडा ल ए सूची म सामिल करे गेहे। उहें, तेलंगाना म भाजपा के प्रदेस अध्यक्ष संजय कुमार, पार्टी के प्रदेस प्रभारी ओम माथुर, सह प्रभारी नितिन नबीन, संगठन महामंत्री अजय जामवाल, सतपाल महाराज, मनोज तिवारी, नित्यानंद राय, रविकिशन अउ केशव प्रसाद मौर्य के संगेसंग छत्तीसगढ़ के पूर्व मुख्यमंत्री डॉक्टर रमन सिंह राज्यसभा सांसद सरोज पांडेय, प्रदेस भाजपा अध्यक्ष अरूण साव, नेता प्रतिपक्ष नारायण चंदेल समेत, प्रदेस भाजपा के बड़का नेता मन ल स्टार प्रचारक के रूप म आने-आने सीट म जनसभा लेके जिम्मेवारी सौंपे गेहे।
विस चुनाव-आचार संहिता
प्रदेस म विधानसभा चुनई बर आदर्श आचार संहिता लागू होय के बाद ले अभी तक जांच एजेंसी मन कोति ले स्वतंत्र अउ निष्पक्ष चुनाव कराय बर गाड़ी ले लेगइया अवैध धन राशि अउ आने कमती जिनीस म निगरानी राखे जात हे। पाछु नौ अक्टूबर के आचार संहिता लगे के बाद ले अभी तक प्रदेस के आने-आने जघा म जांच के दउरान करीबन डेढ़ करोड़ नगद रकम के संग साढ़े छह करोड़ रूपिया ले जादा के सामान जब्त करे गेहे।
मुख्य निर्वाचन पदाधिकारी कार्यालय ले मिले जानकारी के मुताबिक जांच एजेंसी ह अभी तक प्रदेसभर म साढ़े तेरह हजार लीटर ले जादा अवैध सराब जब्त करे हे, जेखर कीमत इकचालीस लाख अड़सठ हजार रूपिया बताय गेहे। उहें, करीबन सत्तर लाख रूपिया के दू हजार किलोग्राम नसीला जिनीस जब्त करे गेहे। संगेसंग एक करोड़ बयासी लाख रूपिया के जेवर घलो जब्त होय हे।
निर्वाचन आयोग-मोबाइल ऐप
चुनाव आयोग ह आपराधिक पृष्टभूमि वाले उम्मीदवार मनके रिकॉर्ड जाने बर एक नवा मोबाइल ऐप्लीकेशन जारी करे हे। ‘उम्मीदवार को जाने-के.वाई.सी‘ नाव के ए मोबाइल ऐप्लीकेशन म उम्मीदवार कोति ले दे गे सूचना सामिल करे गेहे। ए एप्लीकेशन नागरिक मन ल आपराधिक पृष्टभूमि वाले उम्मीदवार या फेर आने उम्मीदवार के बिसय म जानकारी दीहीं। ए एप्लीकेशन एंड्रायड अउ आई.ओ.एस. दूनों प्लेटफॉर्म म मिलही। ए एला चुनाव आयोग के वेबसाइट म दे गे लिंक ले डाउनलोड करे जा सकत हे।
भाजपा चुनाव संचालक
भारतीय जनता पार्टी ह प्रदेस म विधानसभा चुनाव के पहिली चरण के बीस सीट बर चुनाव संचालक मनके घोसना कर देहे। पार्टी के प्रदेस अध्यक्ष अरूण साव ह सूची जारी करत बतईन कि राजनांदगांव सीट बर पूर्व सांसद मधुसूदन यादव ल चुनाव संचालक बनाय गेहे। उहें, डोंगरगढ़ सीट ले खूबचंद पारख अउ खैरागढ़ बर सचिन बघेल चुनाव संचालक होही। अइसने, बस्तर सीट बर विद्याशरण तिवारी अउ कोंडागांव बर बालकुंवर प्रधान ल चुनाव संचालक के जिम्मेवारी दे गेहे।
उहें, डोंगरगांव बर नीलू शर्मा, मोहला-मानपुर ले ललन मिश्रा ल, खुज्जी बर कोमल जंघेल, पंडरिया ले योगेश अग्रवाल, कवर्धा बर डॉक्टर सियाराम साहू, अंतागढ़ ले असीम राय, भानूप्रतापपुर बर टिकम टांडिया, कांकेर बर महेश जैन अउ नारायपुर बर नारायण मरकाम चुनाव संचालक होही। अइसने, जगलदपुर ले श्रीनिवास राव, चित्रकोट बर बैदूराम कश्यप, दंतेवाड़ा ले अभिमन्यु सोनी, बीजापुर बर श्रीनिवास मुदलियार, केशकाल ले तरूण साना अउ कोंटा ले सुधीर पांडेय ल चुनाव संचालक बनाय गेहे।
क्रीडा-प्रतियोगिता
कोंडागांव म राखे गे तेईसवां राज्य स्तरीय शालेय क्रीडा प्रतियोगिता म बस्तर क्षेत्र ह ओव्हर ऑल चैंपियन के खिताब पाय हे। काली कोंडागांव के विकास नगर स्टेडियम म ए प्रतियोगिता के रंगारंग समापन होइस। चार दिन तक चलइया ए प्रतियोगिता म मलखंभ, फुटबॉल अउ तीरंदाजी के मुकाबला होइस। समापन समारोह म कोंडागांव के कलेक्टर दीपक सोनी ह विजेता अउ उप विजेता टीम ल इनाम दीन। ए बेरा म सांस्कृतिक कारीकरम घलो होइस।
नवरात्र-पंचमी
शारदेय नवरात्र परब के तहत आज पंचमी हवय। आज के दिन स्कंद माता के पूजा-पाठ करे जाथे। ए मउका म प्रदेस के जम्मों देवी मंदिर मन म श्रद्धालु मनके बिहनिया ले ही भीड़ लगे हे। नवरात्रि के बेरा म मंदिर अउ दुर्गा पंडाल म जसगीत अउ जगराता के आयोजन घलो होवत हे।
मौसम
दक्षिण-पश्चिम मानसून के आज देशभर ले बिदाई होगे। मौसम विभाग के मुताबिक अब देस के सबो हिस्सा म काली ले मौसम सुष्क रइही। उहें, छत्तीसगढ़ म घलो मौसम सुष्क रेहे के संभावना हवय।
इही बीच, उत्तर-भारत म होवत बर्फबारी के सेती छत्तीसगढ़ म थोरिक जाड़ जनाही। मौसम विभाग के मुताबिक आज ले तापमान म गिरावट सुरू होगे हे। मौसम वैज्ञानिक मनके कहना हे कि एसो प्रदेस म बने बरसा होय हे, त जाड़ घलो बने पड़े के संभावना हवय।