प्रदेस म सात नवंबर के होवइया पहिली चरण के विधानसभा चुनई बर नामांकन भरे के प्रक्रिया तेज होगे हे। कांकेर जिला के तीनों विधानसभा सीट बर कांग्रेस प्रत्यासी मन ह आज नामांकन दाखिल कर देहे। कांग्रेस ह कांकेर ले शंकर धुर्वा, भानुप्रतापपुर ले सावित्री मंडावी अउ अंतागढ़ ले रूपसिंह पोटई ल प्रत्यासी बनाय हे। ए तीनों प्रत्यासी रैली निकालत हुए कलेक्टरेट पहुंचके नामांकन पर्चा भरीन। ए रैली म मुख्यमंत्री भूपेश बघेल, प्रदेस कांग्रेस अध्यक्ष दीपक बैज अउ विधानसभा अध्यक्ष डॉक्टर चरणदास महंत ह घलो मौजूद रिहीन। एखर ले पहिली कांकेर म एक आमसभा होइस जेला पार्टी के वरिष्ठ नेता ह संबोधित करीन।
उहें, राजनांदगांव म कांग्रेस प्रत्यासी गिरीश देवांगन ह आज मुख्यमंत्री भूेपश बघेल के संग अपन दूसर नामांकन पत्र दाखिल करीन। अइसने डोंगरगढ़ विधानसभा क्षेत्र ले कांग्रेस प्रत्यासी हर्षिता बघेल, डोंगरगांव विधानसभा क्षेत्र ले दलेश्वर साहू अउ खुज्जी विधानसभा क्षेत्र ले भोलाराम साहू ह अपन-अपन नामांकन दाखिल करीन।
दूसर कोति कवर्धा विधानसभा ले भाजपा उम्मीद्वार विजय शर्मा समेत तीन झिन आने प्रत्यासी मन ह आज अपन नामांकन भरीन। कवर्धा ले कांग्रेस प्रत्यासी मोहम्मद अकबर ह काली अपन नामांकन जमा कर चुके हे। जानबा के अनुसार पहिली चरण म नामांकन भरे के आखिरी तारीख बीस अक्टूबर हरय। पहिली चरण म बीस विधानसभा सीट म मतदान होही।
भाजपा-प्रत्याशी घोषित
भारतीय जनता पार्टी के केंद्रीय चुनाव समिति ह छत्तीसगढ़ म होवइया विधानसभा चुनई बर एक अउ नांव उपर अपन सहमति देहे। पार्टी ह पंडरिया सीट ले भावना बोहरा ल अपन प्रत्यासी बनाय हे। एखरे संग भाजपा डहार ले पहिली चरण म बीस सीट म होवइया चुनई बर सब्बों प्रत्यासी के घोषणा होगे हे। एला मिला के अभू तक छियासी झिन प्रत्यासी मन के नांव के घोषणा हो चुके हे। पार्टी ह चार ठिन सीट अंबिकापुर, बेलतरा, कसडोल अउ बेमेतरा बर प्रत्यासी के नांव के खुलासा नइ करे हे। दूसर डहार कांग्रेस ह अभू तक सिरिफ तीस ठिन सीट बर अपन प्रत्यासी घोषित करे हे। जानबा के अनुसार पार्टी ह आज देर संझा तीस झिन अउ प्रत्यासी मनके नांव के घोषणा कर सकत हे।
रमन सिंह-चुनाव आयोग
प्रदेस के मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह निर्वाचन आयोग ले छत्तीसगढ़ म दूसर चरण के तहत सत्रह नवंबर के होवइया मतदान के तारीख ल आगू बढ़ाय बर आग्रह करीन। ओमन ह सोसल मीडिया म एक ठिन पोस्ट लिखे हे कि दूसर चरण के छठ पूजा के परब होय ले बड़का संख्या म मतदाता मन वोट नइ कर पाही। एला ध्यान म राखत हुए मतदान के तारीख ल आगू बढ़ाय के जरूरत हे। ताकि जादा ले जादा मतदाता मन ए चुनई के हिस्सा बन सकय।
भाजपा-विधानसभा स्तरीय सम्मेलन
जांजगीर-चांपा म आज भारतीय जनता पार्टी के विधानसभा स्तरीय सम्मेलन आयोजित करे गीस। ऐमा बिहार के सांसद डॉक्टर संजय जायसवाल, नेता प्रतिपक्ष नारायण चंदेल, महासमुंद के पूर्व संासद चंदूलाल साहू अउ सांसद गुहाराम अजगले मौजूद रिहीन। ए बेरा म करीबन साढ़े तीन सौ लोगन मन ह भाजपा के सदस्यता लीन। एमा दू सौ लोगन मन भिम आर्मी के हवय।
गोंडवाना गणतंत्र पार्टी-सूची
छत्तीसगढ़ म गोंडवाना गणतंत्र पार्टी ह अपन प्रत्यासी के पहिली सूची जारी करे देहे। ए सूची म उन्नीस झिन के नांव सामिल हे। ए विधानसभा चुनई म गोंडवाना गणतंत्र पार्टी ह बहुजन समाज पार्टी के संग चुनई गठबंधन करे हे। एखर अनुसार गोंडवाना गणतंत्र पार्टी ह सैंतीस सीट बर अउ बहुजन समाज पार्टी ह तिरपन सीट बर चुनई लड़ही। गोंडवाना गणतंत्र पार्टी के राष्ट्रीय अध्यक्ष तुलेश्वर सिंह मरकाम पाली-तानाखात ले पार्टी के प्रत्यासी होही।
विस चुनाव-वाहन अधिग्रहण
प्रदेस म विधानसभा चुनई बर गाड़ी के अधिग्रहण सुरू हो गेहे। राजनांदगांव जिला म परिवहन अधिकारी विरेंद्र सिंह ह बतइन कि सुरूआत म हल्का गाड़ी के अधिग्रहण होवत हे। ओखर बाद बस, ट्रक अउ आने-आने बड़का गाड़ी ल अधिग्रहित करे जाही। जिला म ए महिना के आखिरी तक एक हजार ले जादा गाड़ी के अधिग्रहण कर ले जाही।
हाईकोट-याचिका
सरगुजा जिला के सीतापुर विधानसभा क्षेत्र ले भाजपा प्रत्यासी बनाए गे रामकुमार टोप्पो के जाति प्रमाण पत्र ल लेके छत्तीसगढ़ उच्च न्यायालय म एक याचिका दायर होय हे। बिहारी लाल तिर्की ह श्री टोप्पो के जाति प्रमाण पत्र ल फर्जी बतात हुए ए याचिका दायर करे हे। श्री तिर्की ह ए मामला म राज्य सरका रायगढ़ कलेक्टर, लैलूंगा एसडीएम, भाजपा प्रत्यासी रामकुमार टोप्पो समेत आने लोगन मन ल पार्टी बनाय हे। जानबा के अनुसार रामकुमार टोप्पो जशपुर म सीमा सुरक्षा बल के पूर्व सैनिक रह चुके हे, अउ हाले म अपन सैकड़ो समर्थक मन के संग भाजपा म सामिल होय रिहीस।
मतदाता-जागरूकता
प्रदेस म सत-प्रतिसत मतदान बर सरलग जागरूकता अभियान चलाय जात हे। इही कड़ी म राजनांदगांव जिला के बसेली गांव म माईलोगिन मन ल मतदान करे बर सपथ दिलाय गीस। उहें, कॉलेज के लइका मन ल घलो मतदान करे बर प्रेरित करे गीस। ए बेरा म लइका मन ह लोगन मन ल मतदान के प्रक्रिया के महत्व ल बतइन।
उहें, कोरिया जिला म स्वीप कारीकरम के तहत बैकुंठपुर म जिला प्रशासन कोति ले मोटर साइकिल रैली निकाल के मतदाता मन ल जागरूक करे गीस। एमा बड़का संख्या म लोगन मन सामिल होइन। ए बेरा म ‘‘संगवारी चला वोट डाले बर‘‘ थीम के चलत मतदान घेरा घलो बनाय गीस। संगेसंग मतदान करे बर सपथ घलो करे गीस।
माओवादी-आत्मसमर्पण
बीजापुर जिला म आज एक माओवादी दंपत्ति ह आत्मसमर्पण कर देहे। ऐमा ले पुरूष माओवादी उपर पांच लाख रूपिया के ईनाम घोषित रिहीस। ए माओवादी सिलगेर के टेकलूगुड़ाम म होय माओवादी हमला म सामिल रिहीस। ए हमला म बाईस झिन जवान के सहीद होगे रिहीन। ए करीबन पच्चीस बछर ले कतकोन माओवादी गतिविधि म सामिल रिहीस। दूनों माओवादी मन ह पुलिस अधीक्षक आंजनेय वार्ष्णेय के आगू आत्मसमर्पण करीन। पुलिस अधीक्षक ह बतइन कि आत्मसमर्पित महिला माओवादी ह बछर दू हजार दस ले गोरना बाल संगम सदस्य के रूप म काम करत रिहीस। ए माओवादी ल राज्य सरकार के पुर्नवास नीति के तहत पच्चीस-पच्चीस हजार रूपिया के प्रोत्साहन रासि घलो दे गीस।
इसरो-गगनयान परीक्षण अभियान
भारतीय अंतरिक्ष अनुसंधान संगठन-इसरो ह इक्कीस अक्टूबर के बिहनिया सात ले नौ बजे के बीच गगनयान परीक्षण अभियान के सुरूआत करही। पहिली बिकास उड़ान परीक्षण वाहन या फेर संक्षेप म टी.वी.-डी-वन के नांव ले ए वाहन निरस्त मिसन के परीक्षण करे बर एक ठिन प्रक्षेपन हे, अउ एमा ऐखर अलग होय के प्रणाली के संग चालक दल मॉड्यूल सामिल हे।
महासमुंद-हत्या
महासमुंद जिला के कोमाखान क्षेत्र म दोहरे हत्याकांड के मामला आगू आय हे। जानबा के अनुसार एक झिन जवान लइका ह अपन भउजी अउ भतीजा के पाछू रतिहा हत्या कर दीस अउ मउका ले भाग गे रिहीस। ए घटना पतेरा पाली गांव के हवय। जिहां पुलिस ह ए मामला के जांच सुरू कर देहे।
हत्या-आजीवन कारावास
बेमेतरा जिला अउ सत्र न्यायालय ह हत्या के एक झिन आरोपी ल आजीवन कारावास के सजा सुनाईन। अतिरिक्त लोक अभियोजक सूरज मिश्रा ह बतइन कि जिला के परपोड़ी थाना क्षेत्र के गोड़मर्रा गांव म एक झिन जवान लइका ल गांव के ही रहइया एक सियनहा ह मोबाइल म गेम खेले ले मना करीस, त गुस्साय युवक ह ओला मार के भाग गे रिहीस। ऐति सियनहा के कुछू देर बाद मउत होगे। एखर बाद पुलिस ह आरोपी युवक ल गिरफ्तार करके जिला न्यायालय म पेस करीन। जिहां ले ओला जेल भेज दे गीस।
उहें, बेमेतरा प्रथम अतिरिक्त सत्र न्यायालय ह पति के हत्या के आरोप म एक महिला ल आजीवन कारावास के सजा सुनाए हे।