राज्य के मुख्य निर्वाचन पदाधिकारी रीना बाबा साहेब कंगाले ह काली रईपुर म प्रदेस के मान्यता प्राप्त राजनीतिक दल मनके प्रतिनिधि मनके बइठका लीन। बइठका म राजनीतिक दल के प्रतिनिधि मन ल आदर्श आचरण संहिता अउ निर्वाचन व्यय अनुवीक्षण के संबंध म विस्तार ले जानकारी दे गीस। चुनाव बेरा गाड़ी अउ रैली के मंजूरी के प्रक्रिया अउ ए संबंध म भारत निर्वाचन आयोग के दिसा-निरदेस के घलो जानकारी दे गेहे। बइठका म विधानसभा चुनाव के बेरा उम्मीदवार मन कोति ले नामांकन पत्र दाखिल करे के प्रक्रिया के संबंध म जानकारी दे गीस। बइठका म राजनीतिक दल ल अनुपस्थित श्रेणी के मतदाता जेमा अस्सी बछर ले जादा आयु वरग के लोगन अउ चालीस प्रतिसत ले जादा दिव्यांगता वाले मतदाता मन बर डाक मतपत्र ले घर-घर जाके कोन किसम ले मतदान करना हे ए बताय गीस।
विस चुनाव आचार संहिता उल्लंघन
आदर्श आचार संहिता के पालन कराय बर प्रदेस के आने-आने जिला म जरूरी कार्रवाई करे जात हे। कोंडागांव जिला म नौ हजार ले जादा जघा म राजनीतिक होर्डिंग्स, पोस्टर अउ बैनर हटाय के कार्रवाई करे गीस। एखर संगेसंग निर्माण, शिलालेख अउ आने पट्टिका ल ढाके जात हे। उहें, चुनाव आयोग के निरदेस के मुताबिक विधानसभा चुनाव लड़इया उम्मीदवार या फेर राजनीतिक दल कोति ले छपवाय प्रचार सामग्री म प्रकासक के नाव अउ पता जरूरी हे, एखर पालन करे बर राजनांदगांव जिला म प्रिंटिग प्रेस के मेसर्स, स्वामी अउ प्रबंधक मन ल आदेस जारी करे गेहे।
एखर संगेसंग ए बखत आचार संहिता लागू होय के सेती नवरात्रि परब के मउका म रतिहा दस बजे के बाद कोनों भी किसम के आयोजन म रोक लगा दे गेहे। अतेकेच नइ गरबा समेत आने आयोजन स्थल म राजनीतिक पार्टी प्रचार-प्रसार घलो नइ कर पाही।
मतदाता जागरूकता
प्रदेश म शत प्रतिशत मतदान कराय बर स्वीप कार्यक्रम म कतकोन जागरूकता कार्यक्रम कराये जात हे। एमा जांजगीर-चंापा जिला म जिला निर्वाचन अधिकारी रिचा प्रकाश चौधरी के निर्देश म जागरूकता अभियान ले सियान, दिव्यांग, युवा ह तृतीय लिंग अउ महिला समेत आने मतदाता मन ल मतदान बर प्रेरित करे जात हे। एमा कोसा, कंासा, कंचन वोट करेगा जन जन के थीम म स्वीप मलखंभ के आयोजन पामगढ़ के संत शिरोमणि गुरू घासीदास महाविद्यालय म करे गीस। ए बेरा म मलखंभ खिलाड़ी मन ह किसम किसम के करतब दिखाके मतदाता जागरूकता के संदेश लोगन ल दीन। संगेसंग वोट मानव श्रृंखला बनाके मताधिकार के उपयोग करे के संदेश लोगन ल दे गीस।
डीडी-कार्यक्रम
कार्यक्रम म भाग लेवत राज्य के पूर्व मुख्यमंत्र अउ भाजपा के राष्ट्रीय उपाध्यक्ष डॅाक्टर रमनसिंह ह कहिन कि भारतीय जनता पार्टी छत्तीसगढ़ के ये विधानसभा चुनाव सामूहिक नेतृत्व म लड़त हे। एक सवाल के जवाब म ओमन कीहिन कि अभी तक घोषित पच्यासी उम्मीदवार मन म चार झिन सांसद ल टिकट देना ये बात के परिचायक हरय कि भाजपा एसो चुनाव ल कतका गंभीरता ले लेवत हे। ओमना आरोप लगाइन कि पाछू पांच बछर म छत्तीसगढ़ के पहिचान देशभर म भ्रष्टाचार अउ घोटाला के प्रदेश के रूप म बने हे। अउ ये पांच बछर कंाग्रेस के कुशासन के सेती जाने जाही।
उंहे भाजपा के प्रदेश अध्यक्ष अरूण साव ह कहिन कि कंाग्रेस ह छत्तीसगढ़ ल पाछू पांच बछर म भ्रष्टाचार, अपराध, अउ नशा के गढ़ बना देहे। ओमन कहिन कि चुनाव के बाद राज्य म भाजपा के सरकार बनही त राज्य लोक सेवा आयोग पीएससी के घोटाला के जांच करे जाही अउ दोषी मनके खिलाफ कड़ा कार्रवाई करे जाही।
कार्यक्रम म शामिल होत कंाग्रेस के राष्ट्रीय प्रवक्ता राधिका खेड़ा ह पाछू पांच बछर के दौरान राज्य म कंाग्रेस सरकार के उपलब्धि ल गिनावत कहिन कि पाछू पांच बछर म छत्तीसगढ़ म माइलोगन के खिलाफ अपराध कमती होय हे। ओमन कहिन कि कंाग्रेस सरकार ह छत्तीसगढ़ के विकास बर बहुत काम करे हे। संगेसंग ओमन आरोप लगाइन कि केंद्र सरकार ह छत्तीसगढ़ संग भेदभाव करे हे।
केंद्र सुरक्षा
केंद्र सरकार ह बस्तर के माओवाद प्रभावित बीजापुर, दंतेवाड़ा, सुकमा, कोंडागांव, अउ कंाकेर जिला म भारतीय जनता पार्टी के चौबीस पदाधिकारी मन ल एक्स श्रेणी के सुरक्षा दे गेहे। उंहे जनता कंाग्रेस छत्तीसगढ़ के अध्यक्ष अमित जोगी ल जेड श्रेणी के सुरखा दे गेहे। केंद्र सरकार के निर्देश म ये जन प्रतिनिधि मन ल सीआरपीएफ सुरक्षा दीही। ए संबंध म राज्य सरकार ल चिट्ठी भेजे गेहे। पुलिस अधिकारी मनके मुताबिक ए संबंध म आदेश मिलतेच जम्मों संबंधित मन ल श्रेणी के मुताबिक सुरक्षा दे गेहे।
तेजस्वी सूर्या-पीएससी मामला
भारतीय जनता युवा मोर्चा के राष्ट्रीय अध्यक्ष तेजस्वी सूर्या छत्तीसगढ़ पीएससी मामला म छत्तीसगढ़ उच्च न्यायालय के फैसला ल बहुत अहम अउ सुधार के दिशा म ठोस सार्थक पहल के शुरूआत बताइन हे। भाजयुमो प्रदेश इकाई के परिवर्तन उद्घोष कार्यक्रम म शामिल होय बर आज बीहनिया रायपुर पहुंचे म श्री सूर्या ह पत्रकार मनले गोठबात करत कीहिन कि छत्तीसगढ़ पीएससी म कथित रूप ले होय घोटाला के मुद्दा ल भाजयुमो के प्रदेश इकाई ह जोरशोर ले उठाइस अउ न्याय मांगे के काम करीस। एखर सेती छत्तीसगढ़ उच्च न्यायालय ले न्याय मिलिस अउ पीएससी म होय अठारा नियुक्ति ल उच्च न्यायालय ह रोक लगा देहे।
अंशकालिक संवाददाता-आवेदन
आकाशवाणी समाचार रईपुर कोति ले छत्तीसगढ़ के सात ठिन जिला रइपुर, सक्ति, सारंगढ-बिलाईगढ़, मोहला-मानपुर-अंबागढ़ चौकी, मनेन्द्रगढ़-चिरमिरी-भरतपुर, खैरागढ़-छुईखदान-गंडई अउ गौरेला-पेण्ड्रा-मरवाही म अनुबंध के आधार ले अंशकालिक संवाददाता बर अर्जी मंगाय जात हे। आवेदन प्रपत्र समाचार सेवा प्रभाग के वेबसाइट- डब्ल्यू डब्ल्यू डब्ल्यू डॉट न्यूज ऑन एआईआर डॉट जीओवी डॉट इन के वैकेेंसी सेक्शन अउ आकाशवाणी समाचार रइपुर के ट्विटर हैंडल-सीजी एआईआर न्यूज ले घलो डाउनलोड करे जा सकत हे। अर्जी ल पूरा भर के काली बारह अक्टूबर तक रजिस्टर्ड पोस्ट या फेर स्पीड पोस्ट ले रइपुर के सिविल लाइन स्थित आकाशवाणी केंद्र उप महानिदेशक सह केन्द्राध्यक्ष के नांव ले भेजे जा सकत हे।
अर्जी देवइया के उम्र चौबीस ले पैंतालीस साल के बीच होना चाही अउ पत्रकारिता या जनसंचार म स्नात्तकोत्तर डिग्री या फेर डिप्लोमा के संगेसंग कोनो भी बिषय म स्नातक के संग पत्रकारिता के क्षेत्र म दू साल के अनुभव होना जरूरी हे। एखर अलावा अर्जी करइया मन ल जिला के मुख्यालय या नगर -निगम के सीमा के दस किलोमीटर के भीतरी के निवासी होना चाही। कम्प्यूटर अउ इंटरनेट के जानकारी होना चाही। केंद्र सरकार, राज्य सरकार या सार्वजनिक क्षेत्र के कर्मचारी अउ राजनीतिक दल के सदस्य मन ह एमा अर्जी नइ कर सकय।
माशिमं परीक्षा फार्म
छत्तीसगढ़ माध्यमिक शिक्षा मंडल कोति ले हाईस्कूल अउ हायर सेकण्डरी मुख्य, अवसर परीक्षा बर फार्म भरे के काम शुरू होगे हे। सामान्य शुल्क के संग परीक्षार्थी इकतीस अक्टूबर तक फार्म भर सकत हे। मंडल के सचिव प्रोफेसर वी.के. गोयल ह बताइन कि परीक्षार्थी विलंब शुल्क के संग एक ले पंद्रह नवंबर तक अउ विशेष विलंब शुल्क संग सोला ले इकतीस नवंबर तक परीक्षा फार्म भर सकत हे। ओमन बताइन कि स्वाध्यायी मुख्य अउ अवसर परीक्षा ले जुड़े परीक्षार्थी ऑनलाईन परीक्षा फार्म भर सकत हे।
उंहे मंडल कोति ले चलाये जात डी.एल.एड. पूरक परीक्षा बर विशेष विलंब शुल्क संग ऑनलाईन परीक्षा फार्म भरे के आखरी तारीख बीस अक्टूबर तक बढ़ा दे गेहे।
रावतपुरा विवि-दीक्षंात समारोह
रायपुर स्थित श्री रावतपुरा सरकार विश्वविद्यालय के दूसर दीक्षांत समारोह म आज राज्यपाल विश्वभूषण हरिचंदन वर्चुअल तरीका ले संघरीन। ओमन डिग्री मिले विद्यार्थी मन ल शुभकामना देत कीहिन कि राष्ट्रहित ल मानत काम करंय अउ समाज अउ राष्ट्र के सरलग सेवा करंय। समारोह म तीन प्रख्यात मनखे डॅाक्टर वी.के. सारस्वत, जे.एस. राजपूत अउ आशुतोष राणा ल मानद उपाधि दे गीस।
उंहे इकतीस झिन विद्यार्थी मन ल डॅाक्टरेट, छत्तीस झन ल स्वर्ण पदक अउ दू हजार छै सौ चौंसठ विद्यार्थी मन ल स्नातक, स्नातकोत्तर के उपाधि दे गीस।