केंद्र सरकार ह उज्जवला योजना के फायदा पवइया मन बर एलपीजी सब्सिडी गैस सिलेंडर के भाव म सौ रूपिया के कमती करे हे। केंद्रीय मंत्री मंडल के बइठका के बाद सूचना अउ प्रसारण मंत्री अनुराग सिंह ठाकुर ह बतइन कि उज्जवला योजना के लाभार्थी मन बर एलपीजी सब्सिडी म प्रति सिलेंडर एक सौ रूपिया के बढ़ोत्तरी हो जही। अब गैस सिलेंडर म सब्सिडी तीन सौ रूपिया मिलही।
ऐति, केंद्रीय संस्कृति अउ पर्यटन मंत्री जी. किशन रेड्डी ह बतइन कि केंद्र सरकार ह राष्ट्रीय हल्दी बोर्ड के स्थापना ल अधिसूचित करे हे। ओमन किहीन कि राष्ट्रीय हल्दी बोर्ड, हल्दी के बारे म जागरूकता के संगेसंग खपत अउ निर्यात बढ़ाय बर बाजार विकसित करे म बड़का भूमिका निभाही।
मतदाता सूची अंतिम प्रकाशन
प्रदेश म निर्वाचक नामावली के द्वितीय विशेष संक्षिप्त पुनरीक्षण के बाद आज जम्मों मतदान केंद्र म आज मतदाता सूची के आखरी प्रकाशन कर दे गेहे। राज्य के मुख्य निर्वाचन पदाधिकारी रीना बाबा साहेब कंगाले ह रायपुर म राखे गे एक ठिन पत्रकार वार्ता म बताइन कि प्रकाशित सूची के मुताबिक राज्य म करीबन दू करोड़ तीन लाख साठ हजार दो सौ चालीस मतदाता हवय। जेमा ले एक करोड़ एक लाख बीस हजार आठ सौ तीस पुरूष, एक करोड़ दो लाख उनचालीस हजार चार सौ दस माइलोगिन के संगेसंग सात सौ नब्बे झिन तृतीय लिंग के मतदाता शामिल हवय। ओमन बताइन कि निर्वाचक नामावली के दूसर विशेष संक्षिप्त पुनरीक्षण के बाद राज्य म सात लाख उन्नीस हजार आठ सौ पच्चीस मतदाता बाढ़े हे।
राज्य म ए बेरा अठ्ठारा ले बीस साल उमन के करीबन अठ्ठारा लाख अड़सठ हजार मतदाता हवय, जउन मन ऐसो होवइया विधानसभा चुनई म पहिली घांव वोट डारहीं, त उहें, राज्य म अस्सी साल ले जादा उमर वाले मतदाता मनके संख्या करीबन एक लाख छियासी हजार हवय। आज जारी मतदाता सूची ह अवईया विधानसभा चुनई बर काम करहीं। फेर नवा मतदाता मनके नांव जोड़े के काम चलत रइही। मुख्य निर्वाचन पदाधिकारी ह बतइन कि चुनाव कारीकरम घोषित होय के बाद नामांकन दाखिल करे के आखिरी तिथि के दस दिन पहिली तक मतदाता सूची म नवा नांव जोड़े जइसन अर्जी करे जा सकही।
राज्य स्तरीय-युवा उत्सव
केंद्रीय सूचना प्रसारण अउ युवा मामला खेल मंत्री अनुराग सिंह ठाकुर ह एक दिन के दउरा म काली रइपुर आवत हे। केंद्रीय मंत्री ह रइपुर म नेहरू युवा केंद्र संगठन डहार ले राखे गे दू दिन के राज्य स्तरीय युवा उत्सव के सुभारंभ करहीं।
ए युवा उत्सव रावतपुरा विश्वविद्यालय परिसर म राखे गेहे। पांच अउ छै अक्टूबर के होवइया युवा उत्सव म छत्तीसगढ़ के अठाईस जिला ले करीबन पांच सौ युवा मन भाग लीही। युवा उत्सव के दउरान चित्रकला, कविता, मोबाइल फोटोग्राफी, भाषण अउ सामूहिक नृत्य प्रतियोगिता के कार्यक्रम होही। राज्य स्तरीय प्रतियोगिता के जितइया प्रतिभागी मन ल राष्ट्रीय युवा उत्सव म शामिल होय के मउका मिलही। ए कार्यक्रम प्रधानमंत्री नरेंद्र मोदी के अमृतकाल के पंचप्रण- विकसित भारत, गुलामी के सोच से मुक्ति, विरासत पर गर्व, एकजुटता, अउ नागरिक कर्त्तव्य उपर आधारित होही।
केंद्रीय मंत्री श्री ठाकुर ह काली अपन रइपुर प्रवास के दउरान एक ठिन आने कारीकरम म मीडिया ऐप्स के लोकार्पण घलो करही।
सहायक शिक्षक-दस्तावेज सत्यापन
प्रदेस म ए बेरा सहायक शिक्षक मन के भर्ती के काम चलत हे। आरक्षित वर्ग म नियुक्ति पवईया अभ्यर्थी मनके दस्तावेज सत्यापन के बाद पात्र उम्मीद्वार मन ल नियुक्ति पत्र दे जात हे। नियुक्ति पत्र मेरिट के आधार म जारी करे गेहे। शिक्षा विभाग के अधिकारी मन बतइन कि कोनो भी प्रकार के गलती होही, त अभ्यर्थी मन संचालक लोक शिक्षण संचालनालय के तीर अर्जी कर सकथे।
ऐति शिक्षक मन के सीधी भर्ती म तीसर चरण के ऑनलाइन काउंसिलिंग के बाद अभ्यर्थी मनके दस्तावेज के सत्यापन काली पांच अक्टूबर के नवा रइपुर स्थित इन्द्रावती भवन म करे जाही।
आने कारीकरम म मीडिया ऐप्स के लोकार्पण घलो करही।
कांग्रेस-भरोसे का सम्मेलन
रायगढ़ के कोड़ातराई म आज कांग्रेस डहार ले भरोसे का सम्मेलन राखे गीस। ए सम्मेलन म राज्यसभा म नेता प्रतिपक्ष मल्लिकार्जुन खड़गे अउ मुख्यमंत्री भूपेश बघेल ह सामिल होइन। ए मउका म ओमन राज्य सासन के आने-आने योजना मनके तीन हजार ले जादा हितग्राही मन ल नौ करोड़ रूपिया ले जादा के सहायता रासि अउ जीनिस बांटिन। संगेसंग बियासी ठिन चुने गे विकासख्ंाड मन म बनइया जैतखाम के सिलान्यास करीन। कारीकरम म उप मुख्यमंत्री टी.एस. सिंहदेव, पूर्व केंद्रीय मंत्री कुमारी शैलजा, विधानसभा अध्यक्ष डॉक्टर चरण दास महंत के संगेसंग पार्टी के बड़का पदाधिकारी अउ कार्यकर्ता मन सामिल होइन।
भाजपा-प्रेसवार्ता
भारतीय जनता पार्टी के प्रदेस अध्यक्ष अरूण साव ह किहीन हे कि प्रदेस म भाजपा डहार ले निकाले गे परिवर्तन यात्रा ल जनता मन कोति ले बने सपोर्ट मिले हे। एखर ले राज्य सरकार ह घबरा गेहे। आज रइपुर म राखे गे पत्रकार वार्ता म ओमन किहीन कि प्रधानमंत्री के जगदलपुर प्रवास के दउरान राज्य सरकार ह बस्तर बंद करके लोगन म ल ओखर सभा म जाय ले रोके के प्रयास करीन।
श्री साव ह कांग्रेस पार्टी उपर अराजकता अउ अलगाव वाद फैलाय के आरोप लगाय हे। नगरनार संयंत्र के जिकर करत ओमन किहीन कि ए संयंत्र के चालू होय ले राज्य के पचास हजार ले जादा लोगन मन ल रोजगार मिलही। श्री साव ह आज भाजपा डहार ले सोसल मीडिया के माध्यम ले सुरू करे गे डिजीटल अभियान के सुरूआत करीन। ए मउका म ओमन डिजीटल योध्दा अभियान के पोस्टर के विमोचन घलो करीन।
मुख्यमंत्री-पीएससी
मुख्यमंत्री भूपेश बघेल ह छत्तीसगढ़ लोक सेवा आयोग-पीएससी के परीक्षा के उत्तर पुस्तिका के संगेसंग आने कागजात मन दू साल तक ऑफिस म राखे के प्रस्ताव भेजे हे। जानबा के मुताबिक पीएससी परीक्षा के उत्तर पुस्तिका अउ आने दस्तावेज मन ल जल्दी ऑफिस ले हटाये जाय के नियम ल बदले के पहल करे जात हे।
जवान अपहरण
बीजापुर पुलिस लाईन म पदस्थ बस्तरिया बटालियन के जवान शंकर कुडियम के अपहरण के मामला आगू आय हे। हमर संवाददाता ले मिले जानबा के मुताबिक ए जवान उनतीस सितंबर के भैरमगढ़ थाना क्षेत्र के उसपरी गांव के तीर ड्यूटी म रीहिस अउ इही दिन ले ए जवान के पता नइ चल पात हे। परिवार वाले मन अउ सर्व आदिवासी समाज के लोगन मन ह जवान के अपरहण के संशो जताय हे। ओमन माओवादी संगठन मनले अपील करे हे कि जवान ल जल्दी ले जल्दी छोड़ देवंय। ए जवान गांव एरमनार के रहइया हरय।
तीरंदाजी प्रतियोगिता
रइपुर के बूढ़ापारा स्थित आउटडोर स्टेडियम म ए बेरा सीनियर राज्य स्तरीय तीरंदाजी प्रतियोगिता चलत हे। ए प्रतियोगिता म प्रदेस के बारह ठिन जिला मनके एक सौ पचास खिलाड़ी सामिल होवत हे। स्पर्धा के विजेता खिलाड़ी नवंबर म अयोध्या म होवइया राष्ट्रीय स्पर्धा म छत्तीसगढ़ के अगुवई करही। ए प्रतियोगिता म पहली घांव ओलंपिक खेल म सामिल रिकर्व, कंपाउंड अउ इंडियन राउंड गु्रप के स्पर्धा होइस जेमा अस्सी खिलाड़ी मन सामिल होइन।
संक्षिप्त समाचार
– वीरांगना रानी दुर्गावती के काली जयंती हरय। ए मउका म मुख्यमंत्री ह ओमन ल नमन करत गोंडवाना साम्राज्य के रानी दुर्गावती ल भारतीय नारी के दृढ़ इच्छा सक्ति वाले बतइन।
– कोंडागांव जिला म होय ग्राम सभा मन म आयुष्मान भव कारीकरम के बारे म लोगन मन ल जागरूक करे गीस।
– इंही, जिला म प्रसासन डहार ले राखे गे स्वच्छता पखवाड़ा के तहत लोगन मन ल मतदाता जागरूक अभियान के बारे म जानबा दे गीस।
– संसदीय सचिव विकास उपाध्याय ह आज रइपुर के दीनदयाल उपाध्याय नगर म नवीन प्राथमिक स्वास्थ्य केंद्र भवन के लोकार्पण करीन।
– छत्तीसगढ़ योग आयोग डहार ले आज रइपुर के शंकर नगर स्थित, बाला जी उद्यान म अड़तालीसवां निःशुल्क योगाभ्यास केंद्र के सुभारंभ करीन।
अउ
– जिला रोजगार अउ स्वरोजगार मार्गदर्सन केंद्र रइपुर म छै अक्टूबर के बिहनिया ग्यारा बजे ले मंझनिया तीन बजे तक जॉब फेयर के आयोजन करे जाही।