महिला आरक्षण विधेयक-पारित
इंही बीच, प्रधानमंत्री नरेंद्र मोदी ह किहीन कि महिला आरक्षण विधेयक या नारी शक्ति वंदन अधिनियम एक साधारण कानून नइ हे, बल्कि नवा भारत के नवा लोकतांत्रिक प्रतिबध्दता के घोषणा हे। नई दिल्ली के भाजपा मुख्यालय म नारी शक्ति वंदन अभिनन्दन कारीकरम ल संबोधित करत प्रधानमंत्री ह संसद म ए विधेयक के पारित होय म देस के जम्मों महिला मन ल बधाई दिन हे।
प्रधानमंत्री ह ए ऐतिहासिक विधेयक ल पूरा उछाह के संग पारित करवाय बर दूनों सदन, जम्मों राजनीतिक पार्टी अउ सांसद मन ल धन्यवाद घलो दीन। प्रधानमंत्री ह किहीन कि एखर पहिली ए विधेयक ल पारित कराय बर कोनो प्रयास नइ करे गिस। प्रधानमंत्री किहीन कि ए विधेयक के पारित होना ए बात के संकेत हे कि देस ल आगू ले जाय बर पूर्ण बहुमत के एक ससक्त अउ निर्णायक सरकार के जरूरत हे।
राज्यपाल-युवा महोत्सव
राज्यपाल विश्वभूषण हरिचंदन ह सीआईआई अउ यंग इंडियन डहार ले राखे गे कार्यक्रम ल संबोधित करत कीहिन कि युवा देश के भविष्य हवंय अउ ओमन ल राष्ट्र निर्माण बर आगू आना चाही। राज्यपाल ह कहिन कि प्रधानमंत्री नरेंद्र मोदी के अगवई म भारत दुनिया ल शांति के संदेश देवत हे। उंहे हाले म होय जी-20 सम्मेलन म भारत के समृद्ध विरासत अउ प्रजातांत्रिक व्यवस्था ह वैश्विक स्तर म अपन छाप छोड़े हे। ओमन कीहिन कि जी-20 देश के सम्मेलन के सफल आयोजन म हमर देश के साख बढ़ाय हे।
भाजपा-परिवर्तन यात्रा
भारतीय जनता पार्टी डहार ले सुरू करे गे दूसरा परिवर्तन यात्रा आज कोरबा पहुंचिस। प्रेसवार्ता म उत्तर प्रदेस के उप मुख्यमंत्री बृजेश पाठक सामिल होइन। ए दउरान सभा ल संबोधित करत राज्य के कांग्रेस सरकार उपर वादा खिलाफी के आरोप लगइन। ओमन किहीन कि कांग्रेस ह पाछू विधानसभा चुनाव म सराबबंदी, महिला मन ल मासिक पेंशन, चार ठिन मुफ्त गैस सिलेण्डर देके संगेसंग कतकोन वादा करे रिहीस फेर ओमन ल पूरा नइ करीस। श्री पाठक ह किहीन कि केंद्र सरकार के सहयोग ले उत्तर प्रदेस म छियालिस लाख पचास हजार लोगन मन ल मकान दे गिस फेर छत्तीसगढ़ म सोला लाख जरूरत मंद अपन मकान के इंतजार करत हे।
ओमन किहीन कि केंद्र छत्तीसगढ़ ल पूरा पइसा देत हे, लेकिन इंहा के सरकार लोगन मन तक पहुंचे नइ देवत हे। एखरे संग ओमन प्रदेस सरकार उपर आने-आने योजना के माध्यम ले भ्रष्टाचार करे के घलो आरोप लगइन। बतादन कि जशपुर ले निकले दूसरा परिवर्तन यात्रा आज कोरबा जिला के उरगा अउ भैस्मा पहुंचिस, जिहां बारिस के बीच कार्यकर्ता मन स्वागत करीन। उहें, करतला म पूर्व विधानसभा अध्यक्ष धरमलाल कौशिक ह जनसभा ल संबोधित करीन। ए दउरान पूर्व गृह मंत्री ननकीराम कंवर, अनुराग सिंहदेव, मोतिलाल साहू अउ नवीन मारकंडे समेत अनेक नेता सामिल होइन। उंहे दंतेवाड़ा ले निकले पहिली परिवर्तन यात्रा आज धमतरी पहुंचीस पहुंुचीस। एमा विधायक बृजमोहन अग्रवाल, अजय चंद्राकर, शिवरतन शर्मा, विधायक रंजना साहू समेत अनेक भाजपा नेता अउ कार्यकर्ता मौजूद रिहीन।
उहें, कुरूद म राखे गे आम सभा म भाजपा विधायक अजय चंद्राकर ह प्रदेस के लोगन मन संग छल करे के आरोप लगइन। ओमन किहीन कि प्रदेस म कानून व्यवस्था के स्थिति बहुत खराब होगे हे।
मेरी माटी-मेरा देश
नेहरू युवा केंद्र बिलासपुर अउ युवा कारीकरम अउ खेल मंत्रालय के संयुक्त तत्वावधान म मुंगेली म ‘‘मेरी माटी-मेरा देश‘‘ कारीकरम के आयोजन करे गिस। ए दउरान मेडिकल ट्रेनिंग एकेडमी के छात्र-छात्रा मन हाथ म माटी अउ कलस लेके पंच प्रण के सपथ लिन। उहंे, विद्यार्थी मन कलस म माटी इकट्ठा करके देसभक्ति के प्रति लोगन मन ल जागरूक करीन।
जवान घायल
बीजापुर जिला म आज माओवादी मन डहार ले करे गे आईईडी विस्फोट म एक झिन जवान घायल होगे। घायल जवान ल बेहतर उपचार बर जिला अस्पताल म भर्ती कराय गेहे।
मिले जानकारी के अनुसार जिला के डिस्ट्रिक्ट रिजर्व गार्ड-डीआरजी के टीम सर्चिंग बर थाना जांगला अउ नैमेड़ के सीमावर्ती गांव कैका, दुरधा, मोसला कोति निकले रीहिस। इही बीच दुरधा के जंगल म प्रेशर आईईडी के चपेट म आय ले एक जवान घायल होगे।
बातों-बातों-में
छत्तीसगढ़िया ओलंपिक
राज्य स्तरीय छत्तीसगढ़िया ओलंपिक के आयोजन 25 ले 27 सितंबर तक राजधानी रईपुर म करे जाही। खेल अउ युवा कल्याण विभाग के सचिव ह ए संबंध म जम्मों कलेक्टर मन ल जिला के प्रतिभागी मन ल सम्मिलित कराय बर दिसा-निरदेस दीन हे। संबंधित अधिकारी मन ल कहे गे हे कि जिला के खिलाड़ी मन ल 24 सितंबर के संझा छै बजे तक अनिवार्य रूप ले अपन उपस्थिति सुनिश्चित करे जाय। उहें, तियारी ल लेके 24 सितंबर के रईपुर स्थित इंडोर स्टेडियम म जम्मों जिला के दल मैनेजर अउ खेल अधिकारी मन के बइठका आयोजित करे गे हे।
महिला सम्मेलन
आज राजधानी रायपुर स्थित मुख्यमंत्री निवास म तीजा-पोरा तिहार अउ राज्य स्तरीय महिला सम्मेलन के आयोजन करे गीस। ए मउका म आने आने जिला ले पहुंचे महिला मन ल संबोधित करत मुख्यमंत्री भूपेश बघेल ह कहिन कि तीजा-पोरा माइलोगिन अउ बहिनी मनके खुशी अउ छत्तीसगढ़ के महत्वपूर्ण पारंपरिक तिहार हे।
श्री बघेल ह कहिन कि समाज म महिला मनके महत्वपूर्ण स्थान होथे। छत्तीसगढ़ म हमन शुरूआत ले महिला मनके मान-सम्मान ल बढ़ाय के काम सरलग करथ हन। ओमन कीहिन कि महिला मन ल आर्थिक अउ सामाजिक रूप ले संपन्न बनाय बर हर संभव पहल करे जात हे अउ एखर बर कई ठिन नवा-नवा योजना बनाके कार्यक्रम के संचालन करे जाथे।
दुर्घटना
बिलासपुर जिला के तखतपुर म एक स्कूली वाहन म आगी लगे ले तीन झिन नोनी मन झूलस गे। घायल मन ल उपचार बर तखतपुर स्वास्थय केंद्र म भर्ती कराय गे हे।
मिले जानकारी के अनुसार छै झिन नोनी मन वेन म सवार होके तखतपुर स्थित स्वामी आत्मानंद स्कूल जात रिहीन इही बीच, अचानक वैन म आगी लग गे। ओति आगी लगे के बाद चालक गाड़ी छोड़के तुरते फरार होगे। उहें, आस-पास के लोगन मन ह वैन म पानी डाल के आगी बुझाय के कोसिस करीन, अउ लइका मन ल बाहिर निकालीन ए दउरान तीन झिन नोनी लइका झुलस गे, जउन मन ल उपचार बर तखतपुर स्वास्थ्य केंद्र ले जाय गिस। थाना प्रभारी एसआर साहू बतइन कि स्कूल वाहन म सार्ट सर्किट ले आगी लगे होही।
ओति जांजगीर-चांपा जिला के खरौद मुख्य मार्ग म एक यात्री बस के टक्कर ले बाइक सवार लोगन मन के घटनास्थल म ही मौत होगे, उहें, एक झिन दूसर मनखे गंभीर रूप ले घायल होगे। घायल मनखे ल खरौद अस्पताल म भेजे गेहे।
मौसम
राजधानी रायपुर समेत प्रदेश के आने आने जिला मन म पाछू दू दिन ले होवत बारिश के सेती कई ठिन नदी नाला उफान म हे। उंहे कई जगा मन म जनजीवन प्रभावित होय हे। आज घलो कई ठिन जिला म बीहनिया ले बारिश होवत हे।
इही बीच मौसम विभाग ह अवइया चौबीस घंटा के दौरान प्रदेश के सरगुजा,सूरजपुर, बलरामपुर, मुंगेली, बिलासपुर अउ गौरेला-पेण्ड्रा-मरवाही म भारी बरसा होय के संग गाज गिरे के चेतावनी देहे। उंहे रायपुर, बालोद, बलौदाबाजार, दुर्ग, जांजगीर-चंापा-कबीरधाम, कोबरा, महासमुंद, राजनंादगांव म गरज चमक के संग हल्का ले मध्यम बरसा होय के संभावना जताय गेहे।