प्रधानमंत्री-दौरा
प्रधानमंत्री नरेन्द्र मोदी परन दिन चौदह सितंबर के छत्तीसगढ़ के एकदिवसीय दउरा म रायगढ़ आवत हे। ए दउरान प्रधानमंत्री ह उहां राखे गे कारीकरम म आने-आने परियोजना समेत रेलमार्ग के लोकार्पण करही।
मिले खबर के मुताबिक श्री मोदी वायुसेना के विशेष विमान ले रायगढ़ के निजी हवाई पट्टी म उतरही। एखर बाद ओमन हेलीकॉप्टर ले रायगढ़ जिला के कोंडातराई पहुंचही, जिहां ऊर्जा, रेल, कोयला अउ स्वास्थ्य मंत्रालय के आने-आने विकास काम के लोकार्पण अउ सिलान्यास करही।
प्रधानमंत्री के कोंडातराई म प्रस्तावित कारीकरम ल देखत दू ठन मंच बनाय गेहे। पहिली मंच म सरकारी कार्यक्रम म श्री मोदी ह करीब एक घंटा तक मौजूद रइही। एखर बाद ओमन उही परिसर म दूसर मंच ले आमसभा ल संबोधित करही। कोंडातराई म आमसभा ल संबोधित करे के बाद प्रधानमंत्री दिल्ली लहुट जही।
राज्यपाल-संत विनोबा भावे
राज्यपाल विश्वभूषण हरिचंदन ह काली भुवनेश्वर म संत विनोबा भावे के एक सौ उनतीसवां जयंती समारोह के मउका म राखे गे परिचर्चा म सामिल होइन। ए मउका म राज्यपाल ह किहीन कि संत विनोबा भावे ह वंचित अउ बेघर मनके कल्याण बर अपन जिनगी समर्पित कर दीन। ओमन किहीन कि विनोबा भावे भूदान आंदोलन के महानायक अउ एक क्रांतिकारी रिहीन। राज्यपाल ह किहीन कि अभी के बेरा म संत विनोबा भावे असन गरीब अउ पीड़ित मनके अधिकार बर हर मनखे ल जागरूक होना चाही।
मुख्यमंत्री-आधारशिला
मुख्यमंत्री भूपेश बघेल ह आज नवा रईपुर म ‘कमर्शियल हब, एयरोसिटी अउ सहीद स्मारक‘ के आधारसिला राखीन। ए मउका म मुख्यमंत्री ह किहीन कि एक हजार तिरासी एकड़ क्षेत्र म आने-आने चरण म कमर्शियल हब ल तैयार करे जाही। एमा नवा रईपुर के सेक्टर-तेईस, चौबीस, चौंतीस, पैंतीस अउ चालीस म विकसित करे जाही। एखर पहिली चरण म बीस व्यवसाय के करीबन एक हजार थोक दुकान तैयार करे जाही। ए परियोजना म थोक व्यपार ले जुड़े जम्मों सुविधा उपलब्ध कराय जाही। ए मउका म मुख्यमंत्री ह किहीन कि कमर्शियल हब म पांच सौ चालीस रूपिया वर्गफीट के कीमत ले व्यवसायी मन ल भूखण्ड आवंटित करे जाही। उहें, दुकान मनके निर्माण म लगइया उपरहा रासि ल राज्य सरकार ह वहन करही।
उहें, तेरह एकड़ क्षेत्र म शहीद स्मारक के स्थापना करे जाही। ए परियोजना म करीबन सात एकड भूईंया म सत्ताईस सौ सहीद मनके नाम लिखे जाय बर दीवार के निर्माण करे जाही। उहें, छत्तीसगढ़ अमर जवान ज्योति स्मारक के निर्माण करीबन छह एकड़ क्षेत्र म करे जाही। शहीद स्मारक परिसर म संग्रहालय, परेड मैदान, दर्शक दीर्घा, बैरक अउ पार्किंग समेत आने-आने निर्माण काम घलो कराय जाही।
एखरे संगेसंग माना विमानतल ले लगे बरोदा अउ रमचण्डी गांव के करीबन दू सौ सत्रह एकड़ क्षेत्र म एयरोसिटी विकसित करे जाही। इहां यात्री सेवा ल बढ़ावा देके संगेसंग एयरपोर्ट क्षेत्र के वाणिज्यिक विकास अउ रोजगार सृजन बर जरूरी सुविधा उपलब्ध कराय जाही।
छत्तीसगढ़ कृषि भवन
नवा रईपुर के सेक्टर-उन्नीस म करीबन पचास करोड़ रूपिया के लागत ले छत्तीसगढ़ कृषि भवन बनाय जाही। ए भवन म कृषि के संगेसंग कृषि अभियांत्रिकी, उद्यानिकी, प्रक्षेत्र वानिकी, जलग्रहण प्रबंधन, पशुधन विकास अउ मछली पालन विभाग के संचालनालय के आफिस एक संघरा चलही। मुख्यमंत्री भूपेश बघेल ह आज ए भवन के आधारशिला राखीन। ए मउका म ओमन प्रदेस के समृद्धि अउ किसान मनके खुशहाली के कामना करीन। मुख्यमंत्री ह परिसर म स्वर्ण चम्पा के पौधा घलो लगईन। ए भवन के बने ले कृषि विकास के काम म गति आही अउ राज्य भर ले अवइया किसान मनके समस्या के निपटारा एके जघा हो पाही। भविष्य म एला कृषि विकास बर एक ठन समन्वित संसाधन केन्द्र के रूप घलो विकसित करे जाही।
उहें, मुख्यमंत्री ह आज नवा रईपुर म छत्तीसगढ़ राज्य कृषि विपणन बोर्ड के नवा मंडी भवन के लोकार्पण करीन। ए मउका म ओमन ए भवन के नाम सरदार वल्लभभाई पटेल के नाम म करे के घोसना करीन। नवा रईपुर के सेक्टर चौबीस म करीबन चालीस करोड़ रूपिया के लागत ले बनाय गे ए भवन म छत्तीसगढ़ राज्य बीज निगम के आफिस घलो चलाय जाही।
स्कूल-कामकाज बंद
प्रदेस के जम्मों प्राईवेट स्कूल मन ह अपन आने-आने मांग ल लेके चौदह सितंबर के कामकाज बंद रखही। छत्तीसगढ़ निजी विद्यालय संघ के अध्यक्ष राजीव गुप्ता ह बतईन कि प्राईवेट स्कूल ल शिक्षा के अधिकार कानून- आर.टी.ई. के तहत पाछु बारह बछर के दउरान होय एडमिशन के बदला म सरकार ले करीबन ढाई सौ करोड़ रूपिया के भुगतान होना बांचे हे। ओमन किहीन कि संघ ह आरटीई के बदला म मिलइया रासि ल बढ़ोतरी करे के मांग करे हे। संगेसंग प्राईवेट स्कूल म चलत बस मनके पात्रता बेरा ल बारह बछर ले बढ़ाके पन्द्रह बछर करे के मांग घलो करे जावत हे। श्री गुप्ता ह किहीन कि सरकारी स्कूल जइसन प्राईवेट स्कूल म पढ़ईया नोनी मन ल घलो सरस्वती साइकिल योजना के फायदा दे जाय।
राज्य स्तरीय सांस्कृतिक प्रतियोगिता
एकलव्य आदर्श आवासीय विद्यालय के राज्य स्तरीय सांस्कृतिक प्रतियोगिता म सरगुजा संभाग अउ साहित्यिक स्पर्धा म बिलासपुर संभाग ल ओव्हरऑल चैंपियन चुने गेहे। ए सफलता के आधार म सरगुजा अउ बिलासपुर संभाग ल अवइया तीन ले छह अक्टूबर तक देहरादून म राखे गे राष्ट्रीय प्रतियोगिता म सामिल होय के मउका मिलही।
रईपुर के निमोरा स्थित ठाकुर प्यारेलाल पंचायत अउ ग्रामीण विकास संस्थान म राखे गे ए प्रतियोगिता के सांस्कृतिक स्पर्धा म समूहगान, समूहनृत्य, चित्रकारी, रंगमंच, शास्त्रीय गायन अउ लोकगीत गायन समेत आने-आने स्पर्धा म सुघ्घर प्रदर्शन के आधार म सरगुजा संभाग ल ओव्हरऑल चैंपियन घोसित करे गीस। उहें, साहित्यिक स्पर्धा के तहत भासन, वाद-विवाद अउ काव्य पाठ म आने-आने स्कूल के प्रतिभागी मन अपन प्रतिभा दिखईन। एमा सुघ्घर प्रदर्शन बर बिलासपुर संभाग ल चैंपियन चुने गीस। आदिम जाति विकास मंत्री मोहन मरकाम ह विजेता टीम मन ल इनाम दीन।