भारतीय जनता पार्टी अल्पसंख्यक मोर्चा के राष्ट्रीय अध्यक्ष जमाल सिद्दीकी ह किहीन हे कि मोर्चा ह अब प्रदेस म अल्पसंख्यक समुदाय मन म सद्भाव संवाद के माध्यम ले संपर्क अभियान चलाही अउ समाज के जम्मों वर्ग के लोगन मन ल मोदी मित्र कारीकरम ले जोड़े के काम करही। आज रईपुर म होय अल्पसंख्यक सम्मेलन म ओमन पत्रकारवार्ता ल संबोधित करत किहीन कि प्रधानमंत्री ह अल्पसंख्यक समुदाय मन बर कतकोन कल्याणकारी योजना सुरू करे हे, जेखर फायदा लोगन मन ल मिलत हे।
रईपुर म होय कारीकरम म प्रदेसभर के भाजपा पदाधिकारी अउ कार्यकर्ता मन सामिल होइन अउ अवइया विधानसभा चुनई के संगेसंग कतकोन बिसय उपर गोठबात करे गीस।
प्रधानमंत्री-साक्षात्कार
दिल्ली म नौ सितंबर ले सुरू होवइया जी-टवेंटी शिखर सम्मेलन के पहिली प्रधानमंत्री नरेन्द्र मोदी ह आज भू-राजनैतिक अनिश्चितता, विश्वसनीय वैश्विक संस्थान मनके जरूरत अउ वित्तीय रूप ले गैर जिम्मेदराना नीति मनके सेती आगू आय खतरा ले जुझत विश्व म भारत के योगदान उपर अपन विचार राखीन। एक ठिन मीडिया संगठन ल दे साक्षात्कार म प्रधानमंत्री ह किहीन कि सरकार ह पाछु नौ साल म ‘सबका साथ, सबका विकास, सबका विश्वास अउ सबका प्रयास‘ ल आगू लाय के काम करत हे।
हादसा
दुरूग जिला म स्थित शिवनाथ नदियां म पाछु रतिहा एक ठिन कार के गिरे ले चार झिन लोगन के मउत होगे। उहें, एक झिन आने लइका के खोज करे जात हे।
पुलगांव थाना प्रभारी ले मिले जानबा के मुताबिक काली रतिहा कार म पांच झिन लोगन मन राजनांदगांव ले दुरूग आवत रिहीन। इही दउरान छोटे पुलिया ल पार करत बेरा कार ह अनते-तनते होके नंदियां म गिर गे। घटना के जानबा मिलतेच आज बिहनिया एस.डी.आर.एफ. अउ गोताखोर मनके टीम ह खोजबीन सुरू करीन। करीबन चार घंटा के बाद गाड़ी अउ ओमा फंसे दू झिन लइका के संगेसंग चार झिन लोगन मनके सव बरामद कर ले गीस। उहें, एक झिन आने लइका के खोज करे जात हे।
ऐति, सक्ती जिला के कनईडीह-नगझर के नरवा म नहावत बेरा काली दू मनखे मन बुड़ गे, उंखर मनके सव बरामद कर ले गेहे।
प्रधानमंत्री-जल जीवन मिशन
प्रधानमंत्री नरेन्द्र मोदी ह सिरिफ चार साल म नल के माध्यम ले जल कनेक्शन के संख्या ह तीन करोड़ बाढ़के तेरह करोड़ होय उपर लोगन मन ल बधाई दे हवय। एक ठिन सोशल मीडिया पोस्ट म ओमन किहीन कि जल जीवन मिशन ले लोगन मन ल साफ पानी देवाय अउ उंखर जिनगी मन ल सार्वजनिक स्वास्थ्य ठीक-ठाक करे म मील के पत्थर साबित होवत हे।
जशपुर-दुष्कर्म मामला
जशपुर जिला के बगीचा थाना क्षेत्र के दनगरी वाटरफॉल म घुमे बर आय एक झिन महिला सिक्षक के संग दुष्कर्म के मामला आगू आय हे। ए मामला म दू झिन आरोपी मनके खिलाफ पंडरापाठ पुलिस चौकी म मामला दरज करे गेहे। पुलिस ह आरोपी मनके तलास सुरू कर देहे। ए दूनो मनखे बलरामपुर जिला के कुसमी इलाका के हरय।
ए मामला म भाजपा विधायक अउ प्रदेस प्रवक्ता रंजना साहू ह कांग्रेस सरकार उपर माईलोगिन मनके सुरक्षा बने ढंग ले नइ करे के आरोप लगाय हे। ओमन किहीन कि मुख्यमंत्री के ए मामला म अब तक कोनों प्रकार के बयान नइ आय हे। ओमन किहीन कि पुलिस उपर आरोपी मनके खिलाफ कार्रवाई नइ करे के दबाव बनाय जात हे।
त उहें, सांसद गोमती साय अउ जशपुर जिला पंचायत अध्यक्ष रायमुनी भगत ह ए घटना के निंदा करत आरोपी मन ल जल्दी गिरफ्तार करे के मांग करे हे।
आईटीआई-काउंसिलिंग
व्यावसायिक परीक्षा मंडल डहार ले प्रदेस के शासकीय औद्योगिक प्रशिक्षण संस्था मन म छात्रावास अधीक्षक अउ छात्रावास अधीक्षिका के होय परीक्षा के परिणाम घोषित कर दे गेहे। ए पद मन नियुक्ति ऑनलाइन करे जाही। अभ्यर्थी मन आज ले नौ सितंबर तक संचालनालय के वेबसाइट म जाके ऑनलाइन काउंसलिंग म सामिल हो सकथे।
उहें, राज्य के सासकीय औद्योगिक प्रशिक्षण संस्था मन म प्रशिक्षण अधिकारी मनके खाली पद बर भर्ती करे जात हे। एखर बर उम्मीदवार मनके दस्तावेज के सत्यापन के बाद ऑनलाइन काउंसलिंग के काम नौ सितंबर तक करे जाही।
जन्माष्टमी
भगवान श्रीकृष्ण के जनम के परब जन्माष्टमी आज देस के कतकोन जघा म मनाय जात हे। उहें, प्रदेस म घलो कोनों-कोनों जगह म आज श्रीकृष्ण जन्माष्टमी मनाय जात हे। ए मउका म राजधानी रईपुर के संगेसंग प्रदेस के जम्मों कृष्ण मंदिर मन ल बिसेस ढंग ले सजाय गेहे अउ संगेसंग रतिहा म बिसेस पूजापाठ के बाद भजन-कीर्तन के कारीकरम रातभर चलही। श्रीकृष्ण जन्माष्टमी मनाय के दूसर दिन दही लूट के कारीकरम घलो बिसेस ढंग ले करे जाथे अउ एखर तियारी राजधानी के संगेसंग जम्मों जिला मन म चलत हे।
शराब मौत-आरोपी गिरफ्तार
जांजगीर-चांपा जिला के गांव परसाहीबाना म पाछु चार सितंबर के सराब पीये ले दू झिन भाई के संगेसंग तीन झिन लोगन के मउत होय रिहीस। ए मामला म पुलिस ह एक झिन माईलोगिन के संग दू झन लोगन मन ल गिरफ्तार कर लेहे। पुलिस के मुताबिक एमन सराब म जहरीला जिनीस मिलाय रिहीन, जेखर पीये ले ए तीनों मनखे के मउत होगे।
आईएएस अधिकारी-प्रभार
राज्य सरकार ह दू आईएएस अधिकारी मनके प्रभार म बदलाव करे हे। दुरूग संभाग के आयुक्त महादेव कावरे ल आवास अउ पर्यावरण विभाग के बिसेस सचिव के संगेसंग आबकारी आयुक्त के उपरहा प्रभार सौंपे गेहे। त उहें, जनक प्रसाद पाठक ल दुरूग संभाग के आयुक्त बनाय गेहे।
जांजगीर-लूट
जांजगीर-चांपा जिला के अकलतरा म एक झिन व्यापारी ले लूट के मामला आगू आय हे। पुलिस ले मिले जानबा के मुताबिक फटफटी म बइठे दू झिन नकाबपोस मनखे मन व्यापारी के आफिस म घुस के लूटमार करीन। ए मनखे मन व्यापारी ल कट्टा दिखाके अउ उंखर तीर रखे करीबन साढ़े छह लाख रूपिया ल लूट के भाग गे। पुलिस ह मामला दरज करके आरोपी मनके तलास सुरू कर देहे।
अग्निवीर भर्ती-रैली
जांजगीर-चांपा जिला के पुलिस लाइन खोखरा म पन्द्रह ले तेईस दिसंबर तक अग्निवीर भर्ती रैली राखे गेहे। ए बारे म कलेक्टर ऋचा प्रकाश चौधरी अउ कर्नल एन सेमल टी. ह आज रैली स्थल के निरीक्षण करके जरूरी दिसा-निरदेस दीन। ओमन रैली म भाग लेबर आने जिला ले अवइया अभ्यर्थी मनके सुविधा बर रेलवे अउ बस स्टैंड ले भर्ती वाले जगह तक जाय बर चिन्हारी लगाय अउ रेहे के बेवस्था करे के निरदेस दीन।
अउ अब पेस हे मौसम के हाल..
मौसम विभाग ह काली बिहनिया तक बर प्रदेस के पांच ठिन जिला – राजनांदगांव, कांकेर, नारायणपुर, बीजापुर अउ सुकमा जिला म भारी बरसा होय के अलर्ट जारी करे हे।
उहें, प्रदेस म अवइया चौबीस घंटा के दउरान गरज-चमक के संग कतकोन जघा म हल्का ले मध्यम बरसा होय के संभावना हे। मौसम विभाग ले मिले जानबा के मुताबिक एक ठिन द्रोणिका, बीकानेर, रईपुर कलिंगपटनम अउ ओखर तीर-तखार के क्षेत्र म फइले हे, जेखर सेती प्रदेस म काली एक-दू जघा म बरसा के संग गाज गिरे के संभावना घलो बताय गेहे।
अउ अब थोरकुन समाचार सार म-
– पद्म पुरस्कार बर नामांकन जमा करे के आखिरी तारीख पन्द्रह सितंबर हे। पुरस्कार के घोसना गणतंत्र दिवस के मउका म करे जाही।
– जी-टवेंटी के तहत आकाशवाणी केन्द्र रईपुर कोति ले आज संझा रंगमंदिर सभागार म काव्य संध्या के आयोजन करे जात हे, जेमा हिन्दी, उर्दू अउ छत्तीसगढ़ी कवि मन अपन कविता प्रस्तुत करही।
– छत्तीसगढ़ योग आयोग के अध्यक्ष ज्ञानेश शर्मा ह आज रईपुर के सड्डू स्थित कुशाभाऊ ठाकरे वार्ड म चवालीसवां निःशुल्क योग कक्षा के सुभारंभ करीन।
– रायगढ़ जिला के पुसौर अउ तमनार विकासखंड म काली सिक्षक सम्मान समारोह राखे गीस। एमा पचास झिन सिक्षक मन ल सम्मानित करे गीस।
– त ऐति, सिक्षक दिवस के मउका म काली नगर निगम रईपुर कोति ले पचहत्तर झिन सिक्षक मनके सम्मान करे गीस।
अउ
– शासकीय औद्योगिक प्रशिक्षण संस्था राजनांदगांव म अवइया ग्यारह सितंबर के रोजगार मेला के आयोजन करे जाही।