राष्ट्रपति-छत्तीसगढ़ प्रवास
राष्ट्रपति द्रौपदी मुर्मू काली 31 अगस्त ले अपन दू दिन के दउरा म छत्तीसगढ़ आवत हवय। श्रीमती मुर्मू अपन प्रवास के बेरा म रईपुर अउ बिलासपुर म आयोजित आने-आने कारीकरम म सामिल होही। ओमन 31 अगस्त के बिहनिया 11 बजे बिसेस विमान ले रईपुर के स्वामी विवेकानंद विमानतल पहुंचही। विमानतल म ओनला गार्ड ऑफ ऑनर दे जाही। एखर बाद श्रीमती मुर्मू जगन्नाथ मंदिर रईपुर के कारीकरम म सामिल होही। इंहा ले ओमन शांति सरोवर रिट्रीट सेंटर म जाही अउ प्रजापिता ब्रम्हाकुमारी ईश्वरीय विश्वविद्यालय डहार ले आयोजित राज्य स्तरीय कारीकरम ‘‘सकारात्मक परिवर्तन का वर्ष‘‘ के सुभारंभ करही। एखर बाद श्रीमती मुर्मू महंत घासीदास स्मारक संग्रहालय ल देखे के बाद ओमन राजभवन म वृक्षारोपण कारीकरम म घलो सामिल होही।
राष्ट्रपति एक सितंबर के बिलासपुर जाही। उंहा ले ओमन रतनपुर म महामाया मंदिर के दर्सन करे के बाद बिलासपुर के गुरू घासीदास केंद्रीय विश्वविद्यालय के दसवां दीक्षांत समारोह म सामिल होही। समारोह म 28 शोधार्थि मन ल पीएचडी के उपाधि अउ 76 प्रतिभाशाली पढ़ईया लइका मन ल स्वर्ण पदक ले सम्मानित करे जाही। फेर उंहा ले रईपुर आके संझा दिल्ली बर रवाना हो जाही।
ग्रामीण -दिहाड़ी
केंद्र सरकार ह दिहाड़ी भुगतान के ‘‘नेशनल ऑटोमेटेड क्लीयरिंग हाउस‘‘ अउ ‘‘आधार आधारित भुगतान प्रणाली-ए.बी.पी.एस.‘‘ के मिले जुले माध्यम के वैद्यता ए बछर 31 दिसंबर तक बढ़ा दे गे हवय। केंद्रीय ग्रामीण विकास मंत्रालय ह सबों राज्य ल बता दे हे कि काम-बूता खातिर अवईया हरेक मनखे ले आधार संख्या देवय के अनुरोध करे जाय, फेर ए आधार म कोनो भी मनखे ल काम दे के मनाही नइ करे जाना चाही। मंत्रालय ह किहीन हे कि अगर कोनो लाभार्थी काम के मांग नइ करत हवय त अइसन स्थिति म ए.बी.पी.एस. प्रणाली ले ओखर पात्रता प्रभावित नइ होही। मंत्रालय ह किहीन हे कि ए.बी.पी.एस. प्रणाली सही लाभार्थी मन ल उंखर बांचे भुगतान दिलाय म मदद करत हे, अउ फर्जी लाभार्थी मन ल बाहिर कर भ्रष्टाचार म रोक लगाय जावत हे।
रसोई गैस-भाजपा
रसोई गैस सिलेंडर के कीमत म कटौती करे जाय ले केन्द्र सरकार के फइसला ल छत्तीसगढ़ समेत देसभर म सुवागत करे गे हवय। पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह किहीन हे कि केन्द्र सरकार डहार ले रसोई गैस सिलेंडर के कीमत म कमी होय ले गरीबहा अउ मध्यम वर्ग ल बड़ राहत मिले हे। ओमन किहीन कि रक्षाबंधन के पहिली मिले ए राहत बहिनी मन खातिर एक ठिन उपहार हवय।
उहें, राज्यसभा सांसद सरोज पांडेय ह किहीन कि रसोई गैस सिलेंडर के दाम म कमी देस के माईलोगिन ल सम्मान देवय के संगेसंग ओमन ल सशक्त बनाय के परयास घलो हवय। ओमन किहीन कि केन्द्र सरकार माईलोगिन के विकास, उत्थान अउ कल्याण खातिर सरलग परयास करत हवय।
प्रदेस के पूर्व मंत्री लता उसेंडी ह किहीन कि हम बहिनी मन प्रधानमंत्री ल रक्षासूत्र राखी भेज के कामना करथन कि अवइया बेरा म ओमन अइसनेच माईलोगिन मन खातिर सुघ्घर परयास करत रइहीं।
बेरोजगारी भत्ता योजना
मुख्यमंत्री भूपेश बघेल ह आज बेरोजगारी भत्ता योजना के तहत हितग्राही मन ल रासि अंतरित करीन। रईपुर के अपन निवास कार्यालय म आयोजित कारीकरम म श्री बघेल ह 1 लाख 29 हजार ले जादा हितग्राही मन ल 34 करोड़ 55 लाख रूपिया ले जादा के रासि उंखर खाता म जमा करीन। संगेसंग आई.टी.आई. के प्रसिक्षित 82 अधिकारी मन ल नियुक्ति पत्र घलो सौंपिन।
जानबा के मुताबिक प्रदेस के युवा मन के मांग ले नवा ट्रेड म प्रसिक्षित करे खातिर टाटा टेक्नोलॉजिस के संग 36 आई.टी.आइ.र् के उन्नयन करे गे हवय। पहिली चरण म एमा ले 5 आई.टी.आई. के लोकार्पण सितम्बर महिना म करे जाही।
रक्षाबंधन
भाई-बहिनी के पवित्र प्रेम के प्रतीक रक्षाबंधन के तिहार आज छत्तीसगढ़ समेत जम्मों देस म बड़ उछाह अउ खुशी के संग मनाय जावत हे। राखी तिहार, बहिनी मनके खातिर भाई के प्यार के प्रतीक हवय। आज के दिन बहिनी मन अपन भाई के हाथ म रक्षासूत्र राखी बांधथे अउ मिठाई खवाथे। भाई मन घलो अपन बहिनी मनके रक्षा करे के बचन दे के उपहार देथे। राष्ट्रपति द्रौपदी मुर्मू, प्रधानमंत्री नरेंद्र मोदी, राज्यपाल विश्वभूषण हरिचंदन अउ मुख्यमंत्री भूपेश बघेल ह रक्षाबंधन के मउका म लोगन मन ल अपन बधाई दीन। उंहे, भाजपा के प्रदेस अध्यक्ष अरूण साव अउ नेता प्रतिपक्ष नारायण चंदेल ह घलो प्रदेस वासी मन ल रक्षाबंधन के सुभकामना दीन हवय।
राज्यपाल विश्वभूषण हरिचंदन ल आज प्रजापिता ब्रम्हाकुमारी ईश्वरीय विश्वविद्यालय रईपुर के बहिनी मन ल टीका लगाइन अउ राखी बांध के उंखर खातिर मंगलकामना करीन। राज्यपाल ह घलो बहिनी मन ल अपन आसीर्वाद दीन।
उंहे, बाल ग्राम अउ स्कूल के लइकी मन घलो राज्यपाल ल राखी बांधिन ए मउका म बाल ग्राम के लइकी मन ह मंडला आर्ट पेंटिंग अउ सेंट जेवियर्स स्कूल के पढ़ईया लइकी मन ह ग्रीटिंग कार्ड अउ आम के पौधा राज्यपाल ल भेंट करीन।
ऐति राजनांदगांव म ब्रम्हाकुमारी खैरागढ़ के बहिनी मन ह मलैदा कैंप पहुंच के आइ.टी. बी.पी. के जवान मन ल राखी बांधिन। अउ भिलाई के यूथ रेडक्रॉस कमेटी के संगेसंग कॉमर्स अउ मैनेजमेंट डिपार्टमेंट ह बी.एस.एफ. जवान मन के संग रक्षाबंधन के तिहार मनाईन।
भाजपा महिला मोर्चा-स्नेह यात्रा
इंही बीच, भाजपा महिला मोर्चा के प्रदेस इकाई डहार ले रक्षाबंधन तिहार ल स्नेह यात्रा के रूप म मनाय जावत हे। ए दउरान महिला मोर्चा के सदस्य काली 31 अगस्त तक रिक्शा, ऑटो चालक के संगेसंग डिलीवरी बॉयज, अउ गैस सिलेंडर बटईयां लोगन मन ल राखी बांधत हवय।
इंही कड़ी म आज कांकेर म महिला मोर्चा के प्रदेस अध्यक्ष शालिनी राजपूत ह ऑटो चालाक अउ गैस सिलेंडर बंटईया लोगन मन ल राखी बांध के ओखर मनके जिनगी खातिर मंगलकामना करीन।
रायगढ़ स्टेडियम
राष्ट्रीय खेल दिवस के मउका म काली प्रदेस के खेल मंत्री उमेश पटेल ह रायगढ़ स्टेडियम म ढ़ाई करोड़ रूपिया ले जादा के लागत ले तइयार करे गे, सुविधा के सौगात दीन। ए मउका म खेल मंत्री ह किहीन कि रायगढ़ स्टेडियम ल अउ सुघ्घर बनाय ले खिलाड़ी मन ल जम्मों अत्याधुनिक सुविधा मिलही। खेल मंत्री ह किहीन कि अभी के बेरा म प्रदेस म 24 एक्सीलेंस सेंटर, 9 ठिन बोर्डिंग अउ रेसीडेशिंयल एकेडमी हवय। उंहे, 7 ठिन आने आने अउ बनत हवय। श्री पटेल ह किहीन कि गुजरे 4 साल म 40 ठिन एकेडमी बन चुके हवय। ए मउका म रायगढ़ जिला के सिथरा गांव निवासी, अंतर्राष्ट्रीय हॉकी खिलाड़ी ‘‘विसेन्ट लकड़ा‘‘ ल सम्मानित घलो करे गिस।
आवव अब सुनथन मौसम के हाल..
राजधानी रईपुर समेत प्रदेस के कुछू-कुछू भाग म आज हल्का ले मध्यम बरसा होईस। मौसम विभाग ले मिले जानबा के मुताबिक काली 31 अगस्त ले प्रदेस के कुछू-कुछू जघा मन म हल्का ले मध्यम बरसा होय अउ गरज-चमक के संग छींटा पड़े के संभावना हवय। उंहे, दू अउ तीन सितंबर के एक-दू जघा भारी बरसा होय के आसार हवय।
अउ अब थोरकुन समाचार सार म-
– भारतीय अंतरिक्ष अनुसंधान संगठन- इसरो ह किहीन हे कि प्रज्ञान रोवर ह चंद्रमा के दक्षिणी ध्रुव म सल्फर याने गंधक के उपस्थिति के पुष्टि करीस हे। संगठन ह किहीन हे कि रोवर के ‘‘स्पेक्ट्रोस्कोप‘‘ ह आशा के अनुरूप एल्यूमीनियम, कैल्शियम, आयरन, क्रोमियम, टाइटेनियम, मैंगनीज, सिलिकॉन अउ ऑक्सीजन के पता घलो लगाय हवय।
– राष्ट्रीय विधिक सेवा प्राधिकरण डहार ले अवइया 9 सितंबर के नेशनल लोक अदालत के आयोजन करे जाही।
अउ
– शिक्षक भर्ती परीक्षा म सहायक शिक्षक पद बर अभ्यर्थी मन के ऑनलाइन काउंसिलिंग अब 7 सितंबर के संझा 5 बजे तक होही।