भारत निर्वाचन आयोग के मुख्य निर्वाचन आयुक्त राजीव कुमार ह स्वतंत्र निष्पक्ष अउ पारदर्शी चुनाव बर जरूरी तियारी करे के निर्देश दीन हे। एखरे संग ओमन अवइया विधानसभा चुनाव म मतदाता प्रलोभन के मामला आय म कड़ा कार्रवाई करे बर कीहिन। ए बात ओमन एंफोर्समेंट एजेंसी के बइठका म अवइया विधानसभा निर्वाचन के तियारी के समीक्षा बइठका के दउरान कहिन। मुख्य निर्वाचन आयुक्त ह कीहिन कि भारत निर्वाचन आयोग के जम्मों दिशा-निर्देश के कड़ाई ले पालन सुनिश्चित करंय।
उंहे श्री कुमार ह चुनाव के दउरान आने वाला बाधा ल दूर करे के संघरा धन-बल के दुरूपयोग रोके बर विशेष सतर्कता बरते के निर्देश घलो दीन। बइठका के दउरान छत्तीसगढ़ के मुख्य निर्वाचन पदाधिकारी रीना बाबासाहेब कंगाले ह अवइया विधानसभा चुनाव के तियारी के संबंध म विस्तार ले जानकारी दीन।
चंद्रयान-तीन
भारतीय अंतरिक्ष अनुसंधान संगठन-इसरो ह कीहिस हे कि चंद्रयान-तीन के रोवर प्रज्ञान चंद्रमा के सतह म भ्रमण करत हे। संगठन ह कहिन कि यान के सबो प्रणाली सामान्य रूप ले काम करत हे। इसरो के अध्यक्ष एस.सोमनाथ ह बताइन कि लैंडर मॉडयूल पेलोड चालू कर दे गेहे। ओमन कहिन कि लैंडर अउ रोवर म लगे उपकरण अब चंद्रमा के खनिज संरचना अउ ओखर वातावरण म भूकंपीय गतिविधि मनके अध्ययन करही।
सूचना प्रसारण मंत्रालय परामर्श
केंद्रीय सूचना अउ प्रसारण मंत्रालय ह मीडिया संस्था, ऑनलाईन विज्ञापन मध्यस्थ अउ सोशल मीडिया प्लेटफार्म समेत जम्मों हितधारक मन ल कोनो भी रूप म सट्टेबाजी अउ जुआ म विज्ञापन अउ प्रचार सामग्री नइ दिखाय के परामर्श जारी करे हे। मंत्रालय ह एक बयान म कहे हे कि एखर पालन नइ करइया वाला मन उपर आने आने कानून के तहत उचित कार्रवाई करे जाही।
भोजन सहाय दर वृद्धि
राज्य सरकार ह अनुसूचित जाति अउ जनजाति विकास विभाग अंतर्गत संचालित करे जाने वाला छात्रावास मन म छात्र भोजन सहाय दर ल बढ़ाय हे। एखर अनुसार ए योजना के संचालन बर वित्त विभाग ह सत्यासी लाख रूपिया स्वीकृत करे हे।
बांध सुरक्षा पद सृजन
प्रदेश म बांध मनके सुरक्षा अउ रखरखाव बर पचास ठिन नवा पद सृजित करे गेहे। जल संसाधन विभाग अंतर्गत राज्य बांध सुरक्षा संगठन बर पचास ठिन पद के सृजन के अनुशंसा करे हे। एखर तहत मुख्य अभियंता के एक पद अउ अधीक्षण अभियंता के तीन ठिन पद शामिल हे। उंहे कार्यपालन अभियंता के तीन, कार्यपालिक अभियंता के दू, भू विज्ञानी के एक, सहायक अभियंता के नौ, निज सहायक के एक अउ सहायक मान चित्रकार के आठ पद के संग दूसर पद मनके सृजन के अनुशंसा करे गेहे।
संस्कृत सप्ताह
छत्तीसगढ़ संस्कृत विद्यामंडलम् डहार ले अवइया सत्ताईस अगस्त के संस्कृत सप्ताह के आयोजन करे जाही। ए हप्ता के दउरान संस्कृत विद्यालय अउ महाविद्यालय मन म संस्कृत उपर केंद्रित कार्यक्रम मनके आयोजन करे जाही। ए दउरान मुख्यमंत्री के संदेश के वाचन करे जाही।
छत्तीसगढ़ संस्कृत विद्यामंडलम् के अध्यक्ष डॅाक्टर सुरेश कुमार शर्मा सत्ताईस अगस्त के दुर्ग जिला के पहडोर पचपेढ़ी स्थित श्री एम. गुरूकुलम् संस्कृत विद्यापीठ आश्रम म संस्कृत सप्ताह के शुभारंभ करहीं।
ई-गवर्नेंस अवार्ड
केंद्रीय प्रशासनिक सुधार अउ लोक शिकायत विभाग ह उत्कृष्ट ई-गवर्नेंस पहल बर रायपुर स्मार्ट सिटी लिमिटेड के मोर रायपुर ऐप ल राष्ट्रीय ई-गवर्नेंस पुरस्कार दू हजार तेईस स्वर्ण प्रदान करे हे। मोर रायपुर ऐप के प्रणाली ल उत्कृष्ट नवाचार बर ए पुरस्कार दे गेहे। उंहे रायपुर स्मार्ट सिटी कोति ले तियार करे गे ऑक्सी रीडिंग जोन लाइब्रेरी नालंदा परिसर ल बेस्ट इनोवेटिव आईडिया अवार्ड दे गेहे। एखरे संग सामाजिक दृष्टिकोण ले करे गे उत्कृष्ट कार्य के श्रेणी म शाला उन्नयन कार्यक्रम के तहत बी.पी. पुजारी स्कूल के भवन जीर्णोद्धार अउ अधोसरंचना निर्माण ल राष्ट्रीय स्तर म जगा मिले हे।
माओवादी कैंप ध्वस्त
दंतेवाड़ा अउ सुकमा जिला के सीमा म सुरक्षा बल मनके संयुक्त दल ह पाछू चौबीस घंटा के दउरान माओवाद विरोधी अभियान चलाइन। ए अभियान म डिस्ट्रिक्ट रिजर्व गार्ड, बस्तर फाईटर, स्पेशल टास्क फोर्स अउ सीआरपीएफ के जवान शामिल रीहिन। ये अभियान गोगुंडा, सिमेल अउ गट्टापाल के पहाड़ी म चलाये गीस। ए दउरान सुरक्षा बल ह पहाड़ म स्थित माओवादी मनके दू ठिन कैंप ध्वस्त कर दीन अउ मउका ले बड़ मात्रा म नक्सल सामग्री घलो बरामद करे हे। सुरक्षा बल मन ल पहाड़ कोति आवत देख माओवादी मन जंगल कोति भाग गे।
प्रयास विद्यालय-प्रवेश
प्रदेश म प्रयास आवासीय विद्यालय मन म बछर दू हजार तेइस-चोबीस म प्रवेश बर आयोजित परीक्षा परिणाम घोषित कर दे गेहे। उंहे परीक्षा म शामिल कुछएक परीक्षार्थी मनके अभिभावक ले संपर्क करके ओमन के लईका मनके प्रयास आवासीय विद्यालय मन म प्रवेश कराय के नाम म राशि ले जाय के शिकायत घलो आगू आवत हे। ए संबंध म आदिम जाति अउ अनुसूचित जाति विकास विभाग के आयुक्त शम्मी आबिदी ह पालक मन ल सतर्क रेहे के सलाह दीन हे। ओमन कीहिन कि विभाग डहार ले प्रवेश के प्रक्रिया बर पारदर्शी अउ स्वच्छ प्रक्रिया अपनाय गेहे।
एखरे सेती फोन म दे जाय अइसे कोनो भी गलत सूचना ध्यान झन देवय ओमन कीहिन कि अइसे लोगन मनके झांसा म आके ओमन ल राशि झन देवय अउ अइसने धोखाधड़ी करइया मनके खिलाफ पास के थाना म एफआईआर दरज करावय। श्रीमती आबिदी ह कहिन कि कोनो तरह के आशंका होय म विभाग के फोन नंबर शून्य सात सात एक दू दू छै तीन सात शून्य आठ म संपर्क कर सकत हे।
शिक्षक दस्तावेज सत्यापन
शिक्षक सीधी भर्ती बर अभ्यर्थी मनके दस्तावेज के सत्यापन अब रायपुर के जयस्तंभ चौक स्थित दक्ष कमांड एंड कंट्रोल सेंटर म करे जाही। पहिली दस्तावेज सत्यापन बर रायपुर शंकर नगर स्थित डाईट परिसर ल चुने गे रीहिस। लोक शिक्षण संचालनालय ले मिले जानकारी के अनुसार शिक्षक पद के अभ्यर्थी मनके दस्तावेज सत्यापन तीस अगस्त तक करे जाही।
दुर्घटना
बिलासपुर जिला के मस्तूरी थाना क्षेत्र म आज होय दू ठिन अलग-अलग सड़क दुर्घटना म चार मनखे मनके मउत होगे। उंहे एक दूसर मनखे घायल होगेहे। मस्तूरी थाना प्रभारी ले मिले जानकारी के अनुसार आज बीहनिया ग्राम लावर करा तेज रप्तार माल वाहक एक ट्रेलर ले टकरा गीस। ये दुर्घटना म दू मनखे मनके मउत होगे।
उंहे इही थाना क्षेत्र के ग्राम टीकारी म एक चार पहिया वाहन अउ मोटर सायकिल के बीच होय टक्कर म दू झिन लइका के मउत होगे।
बातों-बातों-में
सुनइया मन ल बतादन कि प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत चंद्रयान-तीन मिशन म पंडित रविंशकर शुक्ल विश्वविद्यालय रायपुर के पूर्व कुलपति प्रोफेसर शिवकुमार पांडेय ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली छब्बीस अगस्त के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
विशेष स्वास्थ्य शिविर
राज्य के जनजाति बहुल क्षेत्र मन म विशेष स्वास्थ्य शिविर लगाय जाही। ए संबंध म प्रशिक्षण बर अठाईस अगस्त के नवा रायपुर, अटल नगर स्थित आदिम जाति अनुसंधान अउ प्रशिक्षण संस्थान म एक कार्यशाला के आयोजन करे जाही। एमा संबंधित जिला मनके स्वास्थ्य विभाग के जिला अउ विकासखंड स्तरीय अधिकारी शामिल होही।
बतादन कि ए शिविर म कमार अउ बैगा विशेष पिछड़ी जनजाति मनके महिला मन म होवइया कैंसर समेत दूसर स्त्री रोग अउ कोयला उत्पादक क्षेत्र के लोगन मन म स्वास्थ्य संबंधी समस्या के पहचान करे बर जांच करे जाही।