छत्तीसगढ़ म संचालित एकलव्य आदर्श आवासीय विद्यालय के चालीस विद्यार्थी मन आज नई दिल्ली म राष्ट्रपति द्रौपदी मुर्मू ले भेंट करीन। ए मउका म कंेद्रीय जनजातीय कार्य मंत्री अर्जुन मुंडा अउ केंद्रीय जनजातीय राज्यमंत्री रेणुका सिंह घलो मौजूद रीहिन।
राष्ट्रपति ए लईका मनले भेंट के दउरान जनजातीय विकास, जनजातीय गौरव दिवस अउ उंखर शैक्षणिक विकास उपर गोठबात करीन। ए मउका म राष्ट्रपति ह छत्तीसगढ़ के अलावा झारखंड, ओडिशा, मध्यप्रदेश, उत्तराखंड अउ राजस्थान के आदिवासी विद्यार्थी मनले घलो भेंट करीन। ए जम्मों विद्यार्थी मन ल राष्ट्रपति भवन अउ अमृत उद्यान म घुमाय गीस।
मुख्यमंत्री भूपेश बघेल ह आज अपन अंबिकापुर प्रवास के दउरान आने-आने विकास काम के घोषणा करीन। ओमन रायपुर के इंडोर स्टेडियम के जइसे अंबिकापुर म घलो इंडोर स्टेडियम बनाय के ऐलान करीन। एखर बर सौ करोड़ रूपिया दे जाही। राजधानी रायपुर के नालंदा परिसर के जइसन अंबिकापुर म घलो एक डिजिटल लाइब्रेरी बनाए जाही।
मुख्यमंत्री ह सरगुजा जिला म मूक बघिर लईका मन बर एक आवासीय महाविद्यालय खोले के संगेसंग सरगुजा संभाग के जम्मों जिला म शासकीय बीएड कॉलेज खोले के घोषणा करीन। ओमन सूरजपुर म युसु खेल अकादमी अउ मनेन्द्रगढ़-चिरमिरी-भरतपुर जिला म विधि महाविद्यालय शुरू करे जाय के घलो घोषणा करीन।
प्रदेश के पारंपरिक अखाड़ा के संरक्षण अउ संवर्धन के संगे पहलवान मनके प्रतिभा ल निखारे बर बजरंगबली अखाड़ा प्रोत्साहन योजना शुरू करे जाही। एखरे संग राजधानी रायपुर म राज्य स्तरीय कुश्ती अकादमी स्थापित करे जाही। राज्य म कुश्ती ल प्रोत्साहन देबर मुख्यमंत्री भूपेश बघेल ह ये दू बड़का घोषणा काली नागपंचमी के मउका म करीन। एखर पहिली राज्य म मल्लखंभ जइसे पारंपरिक खेल ल प्रोत्साहित करे बर अकादमी शुरू करे के घोषणा करे गेहे।
मुख्यमंत्री ह कहिन कि बजरंगबली अखाड़ा प्रोत्साहन योजना के माध्यम ले छत्तीसगढ़ म कुश्ती जइसे पारंपरिक खेल बर एक घांव फेर ले अनुकूल वातावरण तैयार करे के उद्देश्य हे। संगेसंग प्रदेश म कुश्ती के प्रतिभा ल राष्ट्रीय अउ अंतराष्ट्रीय मंच म उपलब्ध कराय के मंशा घलो शामिल हे।
प्रदेश म सतनामी समाज के गुरू बालदास समेत गुरू खुशवन्त दास, गुरू आसंभ दास, गुरू द्वारिका दास अउ गुरू सौरभ दास ह आज भारतीय जनता पार्टी म प्रवेश करीन। खबर के मुताबिक बछर दू हजार अठारा म विधानसभा चुनाव ले पहिली गुरू बालदास कंाग्रेस म शामिल होगे रीहिन।
आज राजधानी रायपुर के कुशाभाउ ठाकरे परिसर के प्रदेश भाजपा कार्यालय म पार्टी के प्रदेश प्रभारी ओम माथुर, प्रदेश अध्यक्ष अरूण साव, प्रदेश के पूर्व मुख्यमंत्री अउ राष्ट्रीय उपाध्यक्ष डॅाक्टर रमन सिंह अउ सांसद सुनील सोनी के संगेसग पार्टी विधायक मनके मौजूदगी म ए जम्मों झिन ल भाजपा के प्राथमिक सदस्यता देवाय गीस। ए मउका म कुछएक स्थानीय निकाय अउ जनपद पंचायत के पदाधिकारी मन ह घलो भाजपा म प्रवेश करीन।
बीजापुर जिला के कुटरू इलाकाले अगवा करे गे पूर्व सरपंच महेश गोटा ल माओवादी मन ह काली रतिहा रिहा कर दीस। पुलिस के मुताबिक महेश गोटा के शरीर म हथियार ले हमला करे के निशान मिले हे। ओला घायल अवस्था म सोमनपल्ली के तीर रद्दा म छोड़ देगे रीहिस हे। स्थानीय गांव वाले मन पुलिस ल एखर जानकारी दीन। एखर बाद पुलिस ह ओमन ल बीजापुर म प्राथमिक इलाज के बाद जगदलपुर के मेडिकल कॉलेज अस्पताल म भर्ती कराय हे।
इही बीच बीजापुर जिला के परसेगढ़ इलाका ले माओवादी मन ह पाछू रतिहा करीबन पचास झिन गांव वाले मन ल अगवा कर ले रीहिस हे। फेर ए गांव के परिवार मनके अपील म ओमन ल रिहा घलो कर दीस।
महात्मा गांधी के संदेश ल आम मनखे तक पहुंचाय बर साइकिल ले भारत भ्रमण म निकले सामाजिक कार्यकर्ता पद्मश्री डॅाकटर किरण सेठ ह आज रायपुर म मुख्यमंत्री भेपूश बघेल ले सौजन्य भेंट करीन। डॅाक्टर सेठ संगीत म आधारित संास्कृतिक संस्था- स्पिक मैके – के संस्थापक हरय। डॅाक्टर सेठ ह पंद्रह अगस्त दू हजार बाईस के लद्दाख ले अपन साइकिल यात्रा शुरू करे रीहिन।
सौजन्य भेंट के दउरान डॅाक्टर सेठ ह छत्तीसगढ़ म गरीब लईका मन बर अंग्रेजी माध्यम ले शिक्षा देवाय बर स्वामी आत्मानंद उत्कृष्ट विद्यालय के स्थापना ल एक अच्छा पहल बताइन । ए भेंट के दउरान बस्तर बैंड ल पूरा दुनिया म चिन्हारी देवइया पद्मश्री अपूनरंजन पांडे घलो मौजूद रीहिन।
राजनंादगंाव जिला म युवा मतदाता मन ल मताधिकार के जानकारी देबर जागरूकता रैली के आयोजन करे गीस। शासकीय कमलादेवी राठी महिला महाविद्यालय ले ए रैली म छात्रा मनके संग एनसीसी कैडेट घलो शामिल होइन। रैली के बेरा प्रतिभागी मन ह आम लोगन मन ल मतदान के महत्व ल बताइन। स्वीप कार्यक्रम के तहत आयोजित ए रैली म कलेक्टर अउ जिला निर्वाचन अधिकारी डोमन सिंह घलो शामिल होइन।
रायपुर के इंदिरा गांधी कृषि विश्वविद्यालय के अंतर्गत संचालित उनचालीस शासकीय अउ निजी महाविद्यालय म वर्तमान शिक्षा सत्र बर बीएससी कृषि-ऑनर्स कृषि अभियांत्रिकी अउ खाद्य प्रौद्योगिकी म बीटेक स्नातक पाठ्यक्रम म प्रवेश के प्रक्रिया शुरू होगे हे। एखर बर कृषि विश्वविद्यालय के वेबसाइट के माध्यम ले बीस अगस्त ले ऑनलाईन आवेदन मंजूर करे जात हे। आवेदन जमा करे के आखरी तारीख तीन सितंबर हरय। ग्यारह सितंबर ले काउंसिलिंग शुरू होही।
काउंसिलिंग म पात्र अभ्यर्थी मन ल प्रदेश के कृषि अभियांत्रिकी अउ खाद्य प्रौद्योगिकी अउ कृषि महाविद्यालय के स्नातक पाठ्यक्रम म प्रवेश दे जाही। ए सत्र म प्रतापपुर, शंकरगढ़ अउ पखांजूर म शुरू होय तीन नवा कृषि महाविद्यालय मन म घलो प्रवेश के प्रक्रिया शामिल हे। ए संबंध म अउ जादा जानकारी बर कृषि विश्वविद्यालय के वेबसाइट ल देखे जा सकत हे।
जांजगीर के विशेष अदालत ह आय ले जादा संपत्ति के मामला म सहकारी विपणन संघ के पूर्व प्रबंधक रामरतन पांडेय ल पांच बछर के सजा सुनाय हे। अदालत ह ओखर उपार पांच लाख रूपिया के जुर्माना घलो लगाय हे। अदालत के आदेश म रामरतन पांडेय ल जेल भेज दे गेहे।
खबर के मुताबिक बछर दू हजार सोला म एंटी करप्शन ब्यूरो ह ओखर खिलाफ कार्रवाई करे रीहिस हे, जेमा बैंसठ लाख रूपिया के संपत्ति के खुलासा होय रीहिस हे ।
कोंडागंाव पुलिस ह प्रदेश के आने आने जिला म एक निजी मोबाइल कंपनी के टॉवर ले बैटरी चोरी करइया अंतर्राज्यीय चोर गिरोह के पर्दाफाश करत आठ झिन सदस्य मन ल गिरप्तार करे हे। जिला के अनुविभागीय पुलिस अधिकारी निमितेश सिंह ह बताइन कि एमा ले सात आरोपी उत्तर प्रदेश अउ एक आरोपी कोंडागंव के रहइया हरय। पुलिस ह इंखर तीर ले बत्तीस नग बैटरी अउ चोरी म बउरे गे दू ठिन गाड़ी ल जब्त करे हे, जेखर कुल कीमत करीबन उनसठ लाख रूपिया बताय गेहे। आरोपी मन ह ये बैटरी ल बेचे बर दिल्ली लेगत रीहिन।
दुर्ग जिला के अंडा थाना क्षेत्र के अंतर्गत तिरगा गांव के तीर आज बीहनिया लईका मन ल स्कूल लेगत बेरा ई-रिक्शा के पलटे ले एमा बइठे ग्यारा ले नौ झिन लईका मन घायल होगे। अंडा थाना के प्रभारी अंबिका प्रसाद ध्रुव ह बताइन कि ये दुर्घटना तिरगा अउ खुर्सीपार के बीच मुख्य रद्दा म होइस। जम्मों घायल लईका मन ल दुर्ग के जिला अस्पताल म भर्ती कराय गेहे, जिहंा उंखर हालत खतरा ले बाहिर बताय गेहे। घटना के सूचना मिलतेच लईका मनके माता-पिता मन तुरते अस्पताल पहुंच गे।