प्रधानमंत्री नरेंद्र मोदी ह कीहिन कि पंचायती राज संस्थान भारत ल एक विकसित राष्ट्र बनाये म महत्वपूर्ण भूमिका निभा सकत हे। वीडियो कॉन्फ्रेंस के माध्यम ले दादरा अउ नागर हवेली अउ दमन अउ दीव म क्षेत्रीय पंचायती राज परिषद के एक बइठका ल संबोधित करत श्री मोदी ह कीहिन कि पंचायत लोकतंत्र के स्तंभ हरय। ओमन के सरकार पंचायती राज संस्थान ल अउ सशक्त बनाय बर प्रतिबद्ध हवय।
श्री मोदी ह भाजपा के जिला पंचायत सदस्य मनले आने-आने विकास पहलू ल जन आंदोलन बनाय के दिशा म काम करे के घलो आग्रह करीन। ओमन भारत ल दू हजार सैंतालिस तक एक विकसित राष्ट्र बनाय खातिर हरएक गांव, तहसील अउ जिला म विकास के दिया जलाय के आह्वान करीन। ओमन जिला पंचायत के सदस्य मनले हरएक साल प्राथमिकता के आधार म तीन ठिन परियोजना बर बइठका करे बर कीहिन । श्री मोदी ह यहू कीहिन कि स्थानीय निकाय मन बर कोष कई गुना बढ़ाय गेहे अउ एमा संसाधन के कोनो बाधा नइ हे। प्रधानमंत्री ह परिसंपत्ति सृजन बर मनरेगा बजट के हिस्सा ल बउरे के घलो बात कीहिन।
छत्तीसगढ़ म अवइया विधानसभा चुनाव बर कांग्रेस ह चुनाव घोषणा पत्र समिति के गठन कर देहे। वनमंत्री मोहम्मद अकबर ल समिति के अध्यक्ष बनाय गेहे। उंहे समिति म केबिनेट मंत्री रविंद्र चौबे, डॅाक्टर शिवकुमार डहरिया, अमरजीत भगत, उमेश पटेल अउ फूलोदेवी नेताम समेत तेईस सदस्य शामिल करे गेहे। एखरे संग चुनाव प्रबंधन समिति के घलो घोषणा करे गेहे। नगरीय प्रशासन मंत्री शिवकुमार डहरिया ल एखर अध्यक्ष बनाय गेहे। एमा रामगोपाल अग्रवाल, गिरीश देवांगन अउ गजराज पगारिया समेत सात लोगन मन ल शामिल करे गेहे।
एति भारतीय जनता पार्टी डहार ले चुनाव घोषणा पत्र तियार करे बर प्रदेश के नागरिक मनले सुझाव ले जात हे। रायपुर के भाजपा कार्यालय म पत्रकार मनले चर्चा करत प्रदेश चुनाव घोषणा पत्र समिति के सह संयोजक अमर अग्रवाल ह बताइन कि अब तक लगभग पचास हजार सुझाव पार्टी ल मिल चुके हे।
श्री अग्रवाल ह बताइन कि पार्टी कार्यकर्ता सुझाव पेटी के संग विधानसभा स्तर तक गांव-गांव अउ घर-घर जाके लोगन मनले सुझाव लेवत हे। ओमन बताइन कि व्यक्तिगत भेंट करके सुझाव लेके संगेसंग पार्टी मोबाइल नंबर अउ ई-मेल आई डी के माध्यम ले घलो सुझाव लेत हे।
भारतीय जनता पार्टी के प्रदेश अध्यक्ष अरूण साव ह कीहिन हे कि विश्वकर्मा योजना शिल्पकार अउ पारंपरिक कलाकार मनके जीवन म परिवर्तन लाय म कारगर होही। ओमन कीहिन कि ए योजना बर तेरा हजार करोड़ रूपिया के बजट आत्मनिर्भर भारत के दिशा म एक बड़का कदम हे।
श्री साव ह प्रधानमंत्री के आभार व्यक्त करत जम्मों शिल्पकार अउ पारंपरिक कलाकार मनले आग्रह करीन हे कि ओमन ए योजना के लाभ लेके आत्मनिर्भर भारत के निर्माण म अपन महती भूमिका के निर्वहन करंय। बतादन कि प्रधानमंत्री नरेंद्र मोदी ह पंद्रह अगस्त के ये योजना ल शुरू करे के घोषणा करे रीहिन।
अवइया शिक्षा सत्र ले प्रदेश के स्कूल मन म कक्षा पहिली ले पांचवी तक छत्तीसगढ़ी भाषा के संगेसंग आदिवासी क्षेत्र मन म स्थानीय बोली ल पाठ्यक्रम म शामिल करे जाही। मुख्यमंत्री डहार ले ए संबंध म करे गे घोषणा के बाद स्कूल शिक्षा विभाग ह एखर क्रियान्वयन के प्रक्रिया शुरू कर देहे।
राज्य शैक्षिक अनुसंधान अउ प्रशिक्षण परिषद- एससीईआरटी के संचालक राजेश सिंह राणा ह बइठका लेके जम्मों अशासकीय संगठन मनले बहुभाषा शिक्षण के क्षेत्र म ओमन कोति ले करे गे काम अउ अनुभव के संक्षिप्त जानकारी लीन। बइठका म श्री राणा ह कक्षा पहिली ले पांचवी तक छत्तीसगढ़ी भाषा के संग स्थानीय भाषा- सरगुजिहा, हल्बी, गोंडी, सादरी अउ कुडुख म पंद्रह सितंबर तक प्रथम पांडुलिपि तियार करके प्रस्तुत करे बर कीहिन हे। एला स्थानीय भाषा मन बर पहिली तियार करे गे समिति मनके बीच पंद्रह सितंबर के चर्चा बर प्रस्तुत करे जाही।
मतदाता सूची म नाम जुड़वाय बर काली अउ परनदीन यानि उन्नीस अउ बीस अगस्त के मतदान केंद्र म विशेष शिविर के आयोजन करे जाही। जउन मनखे मनके नाम अब तक मतदाता सूची म दरज नइ हे, ओमन ए विशेष शिविर म जाके आवेदन प्रस्तुत कर सकत हे। संघरा जेन मतदाता मनके नाम या पता गलत दरज होय हे, वहू मन ए शिविर म ओला सुधरवा सकत हे। संघरा ये विशेष शिविर म आधार नंबर ल मतदाता परिचय पत्र ले घलो जोड़े जाही।
प्रधानमंत्री ग्राम सड़क योजना के निर्माणाधीन कार्य मनके गुणवत्ता परीक्षण बर आजले अठाईस अगस्त तक राष्ट्रीय गुणवत्ता समीक्षक छत्तीसगढ़ के दउरा म पहुंचीन। ये अधिकारी दंतेवाड़ा बालोद, गरियाबंद, बीजापुर, कांकेर अउ राजनांदगांव जिला के दउरा करके उंहा निर्माणाधीन सड़क मनके परीक्षण करहीं। कोनो भी स्थानीय नागरिक ए अधिकारी मनले उंखर मोबाइल नंबर म संपर्क करके निर्माणाधीन सड़क के गुणवत्ता के संबंध म शिकायत या दूसर जानकारी साझा कर सकत हे। एखर बर राष्ट्रीय गुणवत्ता समीक्षक योगेश प्रभुदास पाठक मोबाइल नंबर – नौ चार दू छै चार आठ चार तीन शून्य पांच म उपलब्ध रीही।
मौसम विभाग ह अवइया बारा घंटा के दउरान प्रदेश के कांकेर, बीजापुर अउ नारायणपुर जिला बर ऑरेंज अलर्ट जारी करके एक-दू जगा म भारी बरसा होय के चेतावनी घलो देहे। उंहे विभाग ह गरियाबंद, धमतरी, दुर्ग, बालोद, राजनांदगांव, बस्तर, कोंडागांव, दंतेवाड़ा अउ सुकमा जिला बर यलो अलर्ट जारी करत एक दू जगा मन म भारी बरसा होय के संभावना जताय हे।
– मुख्यमंत्री भूपेश बघेल ह हिमाचल प्रदेश के आपदा पीड़ित मन बर सहायता राशि के रूप म ग्यारा करोड़ रूपिया देके घोषणा करीन हे।
– लोक सेवा आयोग ह चिकित्सा शिक्षा आयुष विभाग के अंतर्गत व्याख्याता के साक्षात्कार म प्राप्त अंक के मेरिट क्रम के आधार म वर्गवार चयन सूची जारी कर देहे।
अउ
– कोरिया वनमंडल के टीम ह ग्राम सलवा करा अवैध रूप ले परिवहन करे जात उनहत्तर हजार रूपिया के ग्यारा नग सागौन लकड़ी के लट्ठा मन ल जब्त करे हे। एखरे संग परिवहन बर बउरे जात वाहन उपर घलो जब्ती के कार्रवाई करे गेहे।