भारतीय जनता पार्टी ह आज प्रदेश के जउन इक्कीस विधानसभा क्षेत्र बर उम्मीदवार मनके घोषणा करे हे ओमा ले दस सीट अनुसूचित जनजाति बर आरक्षित हे अउ एक सीट अनुसूचित जाति बर आरक्षित करे गेहे। आज पार्टी ह सरगुजा रायपुर अउ दुर्ग संभाग के पांच-पांच सीट संग बिलासपुर संभाग के चार अउ बस्तर संभाग के दू सीट बर उम्मीदवार मनके घोषणा कर देहे। आज घोषित इक्कीस उम्मीदवार मन म पांच महिला मनके नाव सामिल हवय।
पार्टी के केंद्रीय चुनाव समिति के काली नई दिल्ली म होय बइठका म ये जम्मों नाम म अंतिम फैसला ले गीस। बइठका म छत्तीसगढ़ के संगेसंग मध्यप्रदेश, राजस्थान, तेलंगाना अउ मिजोरम म होवइया विधानसभा चुनाव के रणनीति म गोठबात करे गीस। ये बइठका म प्रधानमंत्री नरेंद्र मोदी के संगेसंग केंद्रीय मंत्री अमित शाह अउ राजनाथ सिंह, पार्टी के अध्यक्ष जगत प्रकाश नड्डा समेत संबंधित राज्य के प्रभारी घलो शामिल हेइन।
कांग्रेस बैठक
अवइया विधानसभा चुनाव ल देखत प्रदेश म राजनीतिक हलचल तेज होगे हे। भाजपा के केंद्रीय चुनाव समिति कोति ले इक्कीस उम्मीदवार के घोषणा होय के बाद आजले कांग्रेस घलो विधानसभा चुनाव लड़े खातिर इच्छुक कार्यकर्ता मनले ब्लॉक स्तर म अर्जी लेना शुरू कर देहे। ये अर्जी बाईस अगस्त तक मंजूर करे जाही।
एखर बाद ब्लॉक कांग्रेस अध्यक्ष कोति ले दावेदार मनके सूची जिला कांग्रेस समिति ल भेजे जाही। आज जांजगीर म होय बइठका म पार्टी के प्रदेश पदाधिकारी मन ह चुनाव रणनीति म गोठबात करीन। ये बइठका म कांग्रेस के प्रदेश प्रभारी कुमारी सैलजा के संग विधानसभा अध्यक्ष डॅाक्टर चरणदास महंत, राजस्व मंत्री जयिंसंह अग्रवाल अउ चंद्रपुर विधायक राजकुमार यादव समेत आने पदाधिकारी अउ कार्यकर्ता सामिल होइन।
मुख्यमंत्री बस्तर प्रवास
मुख्यमंत्री भूपेश बघेल ह युवा मन ले आह्वान करे हे कि ओमन शारीरिक, मानसिक कमजोरी या कोनो किसम के आने बाधा के सेती अपन लक्ष्य ले पाछू झन हटय। भलुक आत्मविश्वास राखत सफलता खातिर आखरी बेरा तक प्रयास करना चाही। काली जगदलपुर म एक प्रायवेट टीवी चैनल कोति ले राखे गे पंख कार्यक्रम म मुख्यमंत्री ह प्रदेश के खिलाड़ी मन ल सम्मानित करीन।
ओमन प्रदेश के युवा शक्ति के सदुपयोग करके ओमन ल खेलकूद, संस्कृति, तिज-तिहार ले जोड़े खातिर राजीव युवा मितान क्लब के गठन ल एक सुघ्घर पहल बताइन। ये कार्यक्रम म बस्तर के सांसद अउ प्रदेश कांग्रेस अध्यक्ष दीपक बैज समेत स्थानीय जन प्रतिनिधि मौजूद रीहिन।
लीलाराम भोजवानी-निधन
भारतीय जनता पार्टी के वरिष्ठ नेता, समाजसेवी अउ अविभाजित मध्यप्रदेश म पूर्ववर्ती भाजपा सरकार के मंत्री रहे लीलाराम भोजवानी के काली रतिहा निधन होगे। बंयासी बछर के श्री भोजवानी पाछू कुछएक दिन ले बीमार रीहिन अउ रायपुर के एक अस्पताल म उंखर इलाज चलत रीहिस हे। काली उंखर तबियत जादा बिगड़े के बाद वेंटिलेटर के सहारा ले राजनांदगांव ले जाय जात रीहिस, फेर रद्दा म ही उंखर निधन होगे। श्री भोजवानी के पार्थिव शरीर ल आज मंझनियां राजनांदगांव म अंतिम संस्कार करे गीस।
राज्यपाल विश्वभूषण हरिचंदन अउ मुख्यमंत्री भूपेश बघेल समेत प्रदेश के आने आने नेता मन ह श्री भोजवानी के निधन म शोक जताइन हे। राज्यपाल ह श्रद्धांजलि देवत कीहिन कि श्री भोजवानी ह अपन पूरा जीवन राष्ट्र अउ समाज के सेवा म समर्पित कर दीन। युवा पीढ़ी उंखर काम ले हमेशा प्रेरणा लेत रीही।
उंहे मुख्यमंत्री ह अपन शोक संदेश म कीहिन कि श्री भोजवानी ह जीवनभर आम जनता खातिर समर्पित होके काम करीन। प्रदेश भाजपाअध्यक्ष अरूण साव, प्रदेश के पूर्व मुख्यमंत्री रमनसिंह समेत भाजपा के कतकोन नेता अउ पदाधिकारी मन ह श्री भोजवानी के निधन म श्रद्धांजलि देवत उंखर राजनीतिक अउ सामाजिक जीवन म योगदान ल सुरता करीन।
हिमाचल-त्रासदी
मुख्यमंत्री भूपेश बघेल ह आज हिमाचल प्रदेश के मुख्यमंत्री सुखविंदर सिंह सुक्खू ले फोन म गोठबात करके उंहा के त्रासदी के संबंध म करे जात राहत काम के जानकारी लीन। गोठबात के बेरा श्री बघेल ह कीहिन कि हिमाचल प्रदेश अभी प्राकृतिक आपदा के कठिन दौर ले गुजरत हे। ओमन हिमाचल प्रदेश के मुख्यमंत्री ल भरोसा देवइन कि ये मुश्किल बेरा म छत्तीसगढ़ समेत देशभर के लोगन हिमाचल प्रदेश के संग हे अउ उंखर मदद खातिर प्रयास करत हे।
पशु-सड़क दुर्घटना
राज्य म मवेशी मनके सेती होवइया रद्दा दुर्घटना ल रोके के उपाय म गोठबात बर आज राज्य स्तरीय समीक्षा बइठका म यातायात पुलिस के अधिकारी मन ह सुझाव दीन। अतिरिक्त पुलिस महानिदेशक प्रदीप गुप्ता के अगवई म होय ये बइठका म हाइवे पेट्रोलिंग के संगेसंग मवेशी मन ल रद्दा ले हटाके सुरक्षित जगा म पहुंचाय के संबंध म गोठबात होइस।
वीडियो कॉन्फ्रेसिंग ले होय ये बइठका म श्री गुप्ता ह सबो जिला के यातायात प्रभारी अधिकारी मनले कीहिन कि ओमन मुख्य रद्दा ले मवेशी मन ल हटाय बर पशुविहिन सड़क अभियान चलाय बर पड़ही। ओमन कीहिन कि विशेष रूप ले राष्ट्रीय राजमार्ग म मवेशी मनके रहे के जानकारी मिलतेच एखर सूचना टोल फ्री नंबर – एक शून्य तीन तीन- म दे जाही। उंहे मवेशी मनले टकराके होवइया दुर्घटना के प्रकरण के समीक्षा करके अइसन घटना ल रोके खातिर संवेदनशील जगा म सीसीटीवी कैमरा के मदद ले सरलग निगरानी राखे जाय।
छत्तीसगढ़िया ओलंपिक
छत्तीसगढ़िया ओलंपिक के तीसर पारी काली ले शुरू होही। एमा विकासखंड अउ नगरीय संकुल स्तर के प्रतियोगिता होही। एमा दूसर चरण के जोन स्तरीय विजेता प्रतिभागी अउ टीम के बीच मुकाबला होही। तीसर चरण तेईस अगस्त के सिराही। ये प्रतियोगिता म गिल्ली-डंडा, पिट्ठूल, संखली, लंगड़ी दौड़, कबड्डी, खो-खो, रस्साखींच अउ बांटी जइसन खेल विधा सामिल करे गेहे।
उंहे एकल खेल म बिल्लस, फुगड़ी, गेड़ी दौड़, भंवरा, सौ मीटर दौड़, लंबी कूद, रस्सी कूद अउ कुश्ती जइसन प्रतियोगिता होही। तीसर चरण के बाद जिला स्तर म अवइया सत्ताईस अगस्त ले चार सितंबर तक चौथा चरण के आयोजन होही। उंहे पांचवा अउ आखरी पारी के मुकाबला दस ले सत्ताईस सितंबर तक राखे गेहे।
दोहरा हत्याकांड-आजीवन कारावास
बेमेतरा के जिला अदालत ह दोहरा हत्याकांड के आरोपी ल आजीवन कारावास के सजा सुनाय हे। जिला के देवकर गांव म पाछू चौबीस मार्च के विनोद यादव अउ सुरेश ध्रुव उपर आरोपी बद्री यादव ह जानलेवा हमला करे रीहिस। ये दूनो मनखे क अस्पताल म मौत होगे रीहिस हे। ये मामला म प्रथम अतिरिक्त सत्र न्यायालय के न्यायाधीश पंकज कुमार सिन्हा ह आरोपी ल दू घांव आजीवन कारावास के संगेसंग दू-दू हजार के अर्थदंड के सजा सुनाय हे।
मौसम
प्रदेस के रायपुर दुर्ग अउ बस्तर संभाग म अवइया चौबीस घंटा म कुछएक जगा म भारी बरसा होय के संभावना हे। मौसम विभाग के मुताबिक बंगाल के खाड़ी ले लेके झारखंड के उपरी हवा म ए बखत मानसून के द्रोणिका बने हे। उंहे एक चक्रीय चक्रवाती घेरा घलो सक्रिय हे। जेखर प्रभाव ले बस्तर संभाग के आने आने जिला म भारी बरसा होय के चेतावनी दे गेहे ।