छत्तीसगढ़ के पांचवां विधानसभा के मानसून सत्र काली ले सुरू होवत हे। जेन ह इक्कीस जुलाई तक चलही। सत्र के हंगामेदार होय के संभावना हे। सत्र के दउरान राज्य सरकार ह तीन हजार करोड़ रूपिया के अनुपूरक बजट पेस करही। संगेसंग सरकार डहार ले बछर दू हजार बाईस-तेईस बर महालेखाकार के रिपोर्ट पेस करे जाही।
उंहे विपक्ष डहार ले अविश्वास प्रस्ताव लाये के सूचना दे गेहे। सत्र के पहिलइया दिन भाजपा के विधायक विद्यारतन भसीन ल श्रद्धांजलि दे जाही। गौरतलब हे कि राज्य म ए बछर के आखरी म विधानसभा चुनाव होही, ये लिहाज ले सत्र ल महत्वपूर्ण माने जात हे।
छत्तीसगढ़ के लोकपर्व हरेली आज प्रदेशभर म पारंपरिक उल्लास के संग मनाये जात हे। सावन माह के अमावस्या के मनाये जाने वाला तिहार हरेली म किसान मन अपन कुलदेवता अउ खेती म उपयोग होवइया औजार मनके पूजा करीन। संगेसंग लइका अउ जवान मन गेड़ी चढ़े के मजा लीन। रायपुर स्थित मुख्यमंत्री निवास कार्यालय म घलो हरेली तिहार के आयोजन करे गीस। ए मउका म मुख्यमंत्री भूपेश बघेल ह कीहिन कि हरेली केवल गेड़ी चढ़े के तिहार नो हय, ए ह जीवन के उल्लास के तिहार आय। ओमन प्रदेशवासी मन ल शुभकामना देत अच्छा फसल अउ किसान मनके समृद्धि के कामना करीन। समारोह म पशुधन विकास विभाग डहार ले अलग-अलग गेड़ी उत्पाद अउ पशु आहार उपर आधारित प्रदर्शनी लगाय गेहे। संगेसंग कृषि उपकरण मनके स्टॉल घलो लगाय गेहे। ए अवसर म लोक कलाकार मन डहार ले राउत नाचा अउ गेड़ी नाचा के प्रस्तुती दे गीस।
प्रदेस म आज ले छत्तीसगढ़िया ओलंपिक सुरू होगे हे। मुख्यमंत्री भूपेश बघेल ह रइपुर जिला के अभनपुर स्थित नवागांव म गेड़ी दौड़ ल हरी झंडी दिखा के छत्तीसगढ़िया ओलंपिक खेल मन के सुभारंभ करीन। ए दउरान मुख्यमंत्री ह खिलाड़ी मन ल खेल सामग्री के वितरण घलो करीन।
पहलइया दिन ग्रामीण अउ नगरीय क्षेत्र म राजीव युवा मितान क्लब स्तर म नॉकआउट पध्दति ले प्रतियोगिता सुरू होइस। एमा लइका अउ सियान सबो झन हिस्सा लेवत हे। पहलइया चरण के प्रतियोगिता बाईस जुलाई तक चलही। ए बखत ओलंपिक म एकल श्रेणी म रस्सी कूद अउ कुस्ती ल घलो जोड़े गेहे। छत्तीसगढ़िया ओलंपिक खेल म दलीय श्रेणी म गिल्ली डण्डा, पिठ्ठुल,संखली, लंगड़ी दौड, कबड्डी, खो-खो, रस्साकसी अउ बांटी जइसे खेल विधा मन ल सामिल करे गेहे। उहें, एकल श्रेणी म बिल्लस, फुगड़ी, गेड़ी दौड़, भंवरा, सौ मीटर दौड़, लंबी कूद, रस्सी कूद अउ कुस्ती ल सामिल करे गेहे। ए प्रतियोगिता ल छै चरण म आयोजित करे जाही।
विश्व प्रसिध्द बस्तर दशहरा परब के सुरूवात आज ले होगे हे। ए मउका म मां दंतेश्वरी के आगु पाटजात्रा के रसम अदा करे गीस। बस्तर दशहरा बर रथ निर्माण के पहिली लकड़ी ल स्थानीय बोली म तुरलु घोटला अउ टीका पाटा कहे जाथे।
ए लकड़ी ल बैरौली के जंगल ले जगदलपुर के दंतेश्वरी मंदिर लाय गीस। ए दउरान गांव के पुजारी ह रथ निर्माण म प्रयोग होवइया पहिली लकड़ी के परंपरा अनुसार पूजा-अर्चना करीन। ए पूजा म रथ निर्माण करइया कारीगर अउ ग्रामीण मन संग मांझी चालकी घलो सामिल होईन। गौरतलब हे कि ए बछर दशहरा के परब पछहत्तर दीन के नही बल्कि एक सौ सात दिन के होही।
राजनांदगांव जिला के छुईखदान म भारत-तिब्बत सीमा पुलिस बल आईटीबीपी डहार ले वृहद वृक्षारोपण अभियान चलाये जात हे। ए कड़ी म आईटीबीपी के जवान मन ह स्कूल, ग्राम पंचायत, सरकारी अउ गैर सरकारी संस्थान म पांच हजार ले जादा पौधा के रोपण करीन। आईटीबीपी डहार ले तीस हजार ले जादा पौधा रोपे के लक्ष्य राखे गेहे।
बच्ची मौत
बिलासपुर के अरपा नदी म नहाय बर गे तीन झन नोनी मनके आज बीहनिया बूडे ले मउत होगे। घटना ले नाराज स्थानीय लोगन मन नदी म उत्खनन के आरोप लगावत हुए कोनी-सेन्द्री मार्ग म चक्का जाम कर विरोध प्रदर्शन करीन।
बिलासपुर के अतिरिक्त पुलिस अधीक्षक राजेंद्र जायसवाल ह बताइन कि आज बीहनिया पांच झन नोनी मन नहाय बर अरपा नदी गे रीहिन। नहाय के दौरान पानी के बहाव अचानक तेज होगे, जेखर ले सबो नोनी मन डूबे लगीन। कोनो तरह ले दू झन मन तौरके नदी ले बाहिर होगे, बाकी तीन झन नोनी नदी म बूड़ गे। सूचना मिलते ही पुलिस अउ एसडीआरएफ के टीम मउका म पहुंचीन अउ लापता लईका मनके खोजबीन शुरू करीन। कुछ ही देर म गोताखोर मनके मदद ले तीनो झन लइका के शव बरामद करे गीस।
मुख्यमंत्री भूपेश बघेल ह अरपा नदी म तीन झन नोनी मनके बूडे ले होय मउत उपर दुख व्यक्त करीन। ओमन जिला प्रशासन ल पीड़ित परिवार ल हरसंभव सहायता करे के निर्देश दीन।
राजनांदगांव जिला के छुरिया इलाका म आज होय एक सड़क दुर्घटना म चार झन युवक मनके मउत होगे। मिले जानकारी के अनुसार जिला के छुरिया-डोंगरगांव मार्ग म स्थित बोइरडीह पुल म दू ठन मोटरसाईकल क बीच टक्कर होगे। ए हादसा म चार झन युवक मनके मउका म ही मउत होगे। उंहे, एक झन युवक घायल होगे। पुलिस मामला के जांच करत हे, पुलिस के कहना हे कि तेज रफ्तार के कारण ये हादसा होय हे।
मुख्यमंत्री भूपेश बघेल ह दुर्घटना म चार झन युवक मनके मउत उपर गहरा दुख व्यक्त करे हे। ओमन घायल युवक के शाघ्र स्वस्थ होय के कामना करत हुए प्रशासन ल उचित इलाज के निरदेस देहे।
कबीरधाम जिला के कलेक्टर जन्मेजय महोबे ह आज जिला कार्यालय परिसर म ईवीएम प्रदर्शन केंद्र के उद्घाटन करीन। ए केंद्र म जिला के नागरिक ईवीएम अउ वीवीपैट के संबंध म जानकारी लेके संगेसंग एमा हैंड्स ऑन घलो कर सकही। उंहे कलेक्टर ह ईवीएम प्रदर्शन वैन ल घलो हरी झंडी देखाके रवाना करीन। ये वैन के जरिया जिला के दूनो विधानसभा क्षेत्र पंढरिया अउ कवर्धा के मतदान केंद्र म जन जागरूकता अभियान चलाये जाही। ये अभियान तीन महीना तक चलही।
रेलवे प्रशासन डहार ले यात्री मनके सुविधा के लगातार विस्तार करे जात हे। एखर तहत ओडिशा के बेलपहाड़ स्टेशन म चार ठन एक्सप्रेस गाड़ी मनके ठहराव के लोकार्पण करे गीस। एमा टाटा-बिलासपुर, टाटा-इतवारी, हावड़ा-मुंबई मेल अउ दुर्ग-राजेंद्र नगर साउथ बिहार एक्सप्रेस सामिल हे ।
वंदेभारत एक्सप्रेस म पत्थरबाजी करइया तीन झन नबालिग मन ल रेलवे पुलिस ह गिरफ्तार करे हे। तीनों नबालिग ल रेलवे सुरक्षा बल पोस्ट राजनांदगांव म धारा एक सौ तिरपन रेल अधिनियम के तहत कार्रवाई करत हुए, किशोर न्याय बोर्ड के समक्ष परिजन मन के समक्ष उपस्थित करे गीस, जीहां अग्रिम कार्रवाई करे जात हे। रेलवे सुरक्षा बल राजनांदगांव के निरीक्षक ह बताइन कि पत्थरबाजी के घटना के रोकथाम बर रेलवे लाइन के तीरे-तीर बस्ती म जन-जागरूकता अभियान चलाय जात हे।
प्रदेस म मानसून पूरा सक्रिय होगे हे। मौसम विभाग ह आगामी चौबीस घंटा के दौरान एक-दू जगा म भारी बरसा होय के चेतावनी देहे ।
मौसम विभाग के अनुसार एक ठन द्रोणिका दक्षिण पूर्व डहार मध्य बंगाल के खाड़ी उपर बने हुए हे। संगेसंग उपरी हवा म एक चक्रीय चक्रवाती घेरा दक्षिण झारखंड अउ ओखर आसपास विस्तारित हे। एखर प्रभाव ले प्रदेश म अच्छा बरसा होवत हे। आज राजधानी रायपुर सहित कई ठन जिला म बरसा होय के खबर हे।