भारतीय अंतरिक्ष अनुसंधान संगठन- इसरो ह आज श्री हरिकोटा ले चन्द्रयान-तीन मिसन ल सफलता पूर्वक प्रक्षेपित करीस। एला, छै सौ बियालीस टन के वजनी प्रक्षेपन यान-एन.वी.एम.-तीन ले भेजे गीस। दिन के दू बज के पैंतीस मिनट अउ सत्रह सेकेण्ड म सतीश धवन अंतरिक्ष केन्द्र ले छोड़े गीस।
चंद्रयान-तीन मिशन म इसरो के लगभग पच्चीस महिला इंजीनियर अउ वैज्ञानिक एमा सीधा जुडे़ रीहिन। चंद्रयान-तीन के मिशन निदेशक मोहन कुमार अउ रॉकेट निदेशक बीजू सी थॉमस अउ प्रक्षेपण यान निदेशक डॅाक्टर पी. वीरामुथुवेल हवय।
राष्ट्रपति द्रौपदी मुर्मू, प्रधानमंत्री नरेंद्र मोदी अउ छत्तीसगढ़ के मुख्यमंत्री भूपेश बघेल ह चंद्रयान-तीन के सफल प्रक्षेपण बर वैज्ञानिक अउ इसरो के पूरा टीम ल बधाई देहे। राष्ट्रपति ह कहिन कि ये अंतरिक्ष क्षेत्र म भारत बर एक ठिन अउ महत्वपूर्ण उपलब्धि हरय। प्रधानमंत्री नरेंद्र मोदी ह कहिन कि चंद्रयान-तीन भारत के अंतरिक्ष यात्रा म एक नवा अध्याय हरय। एक ट्वीट म ओमन कहिन कि ए ह हर भारतीय के सपना अउ महत्वाकांक्षा मन ल उपर उठावत उंचा उड़ान भरने वाला कदम हरय। श्री मोदी ह कहिन कि महत्वपूर्ण उपलब्धि भारतीय वैज्ञानिक मनके अथक समर्पण के प्रमाण हरय।
उंहे मुख्यमंत्री भूपेश बघेल ह अपन बधाई संदेश म कहिन कि चंद्रयान-तीन के सफल प्रक्षेपण हमर वैज्ञानिक मनके मेहनत, समर्पण अउ भारत के शक्ति के प्रमाण हरय। ओमन कहिन कि हमर वैज्ञानिक मन हम सबके सिर गर्व ले उंचा करे हे।
मोहन मरकाम-शपथ
कोंडागांव विधायक मोहन मरकाम ह आज मंत्री पद के शपथ लीन हे। राज्यपाल विश्वभूषण हरिचंदन ह राजभवन म आयोजित समारोह श्री मरकाम ल शपथ दिलाइन। श्री मरकाम ह हिंदी म पद अउ गोपनीयता के शपथ लीन।
ए मउका म विधानसभा अध्यक्ष डॉक्टर चरणदास महंत, गृहमंत्री ताम्रध्वज साहू, कृषि मंत्री रविन्द्र चौबे समेतव मंत्री मंडल के सदस्य संसदीय सचिव, विधायक, निगम मंडल के अध्यक्ष अउ दूसर जन प्रतिनिधि मौजूद रिहीन।
बतादन, कि मोहन मरकाम के जनम कोंडागांव के टेंडमूंडा गांव म पन्द्रह सितम्बर उन्नीस सौ सड़सठ के होईस। ओमन स्नातकोत्तर तक के पढ़ाई करे हे। श्री मरकाम बछर दू हजार तेरह म पहिली घांव विधायक बनीन। ओखर बाद बछर दू हजार अठ्ठारा म होय विधानसभा चुनाव म घलो जीत हासिल करीन। उहें, दू हजार अठ्ठारा के विधानसभा चुनाव म छत्तीसगढ़ म कांग्रेस के तत्कालीन प्रदेस अध्यक्ष भूपेश बघेल ल मुख्यमंत्री बनाय जाय के बाद मोहन मरकाम ल प्रदेश अध्यक्ष बनाय गे रिहीस।
बारा जुलाई के कांग्रेस हाईकमान ह एक आदेस जारी करके श्री मरकाम के जघा बस्तर सांसद दीपक बैज ल कांग्रेस के नवाब प्रदेस अध्यक्ष के रूप म नियुक्त करे हे। इंही, बीच काली राज्य के स्कूल सिक्षा मंत्री डॉक्टर प्रेमसाय सिंह ह इस्तीफा दे दीन। डॉक्टर प्रेमसाय सिंह के जघा अब मोहन मरकाम ल राज्य मंत्रीमंडल के सदस्य बनाय गेहे।
वाय-20 बैठक
भारत के अध्यक्षता म होवत जी-ट्वेंटी बइठका के तहत जांजगीर-चांपा जिला के अकलतरा म आज ले दू दिन के वाय-ट्वेंटी बइठका के आयोजन करे जात हे। एमा अठ्ठारा संस्थान के छै सौ प्रतिभागी हिस्सा लेवत हे। बइठका ल संबोधित करत आईआईएम के प्रोफेसर संजीव पाराशर ह किहीन कि अवइया समय भारत के हे। प्रोफेसर पाराशर ह प्रधानमंत्री के आह्वान ल आत्मसात करे के अपील करत जम्मों झन ल वसुधैव कुटुम्बकम के भाव ल अपनाय के आग्रह करीन हे। उहें, अकलतरा विधायक सौरभ कुमार सिंह ह किहीन कि अकलतरा जइसे जघा म वाय-ट्वेंटी के आयोजन के मूल उद्देस्य इंहा के युवा मन ल दुनिया के जानकारी ले अवगत कराना।
उद्घाटन सत्र म जी-ट्वेंटी यूथ के परमुख अउ स्टूडो मैट्रिक्स के फलित सिजारिया ह वाय-ट्वेंटी के उद्देस्य मनके जानकारी दीन। ओमन किहीन कि भारत करा अवइया समय म युवा मन के सबले जादा संख्या होही। अइसन म सक्षम युवा ही समर्थ भारत के निर्माण करही। उहें, रूस ले आय विश्व युवा संगठन के सदस्य आंद्रे नेवेस्की ह बताइन कि कइसे रूस के छोटा गांव ले होवत ओमन अपन पसंदीदा बिषय म विशेषज्ञता पाईन।
बतादन के वाय-ट्वेंटी जी-ट्वेंटी के युवा विभाग हरय जेखर तहत दुनिया भरके विशेषज्ञ भारतीय युवा मन ल नेतृत्व क्षमता के प्रसिक्षण देबर देस के आने-आने जघा मन म आयोजन करे जात हे।
बातों-बातों-में
प्रादेसिक समाचार एकांस के समसामयिक बिषय म आधारित कारीकरम ‘‘बातों-बातों-में‘‘ ए बखत मानसून के मौसम म होवइया बीमारी के कारण अउ बचाव उपर केन्द्रित रिही। ए बारे म संचालक महामारी नियंत्रण डॅाक्टर सुभाष मिश्रा ले लेगे भेंटवार्ता के प्रसारण काली पंद्रह जुलाई के बिहनिया साढ़े दस बजे ले करे जाही। एला छत्तीसगढ़ स्थित आकाशवाणी के जम्मों केन्द्र रिले करही।
स्वामी आत्मानंद भर्ती
प्रदेश म स्वामी आत्मानंद हिंदी माध्यम के तीन सौ अठारा स्कूल मन म नौ हजार एक सौ सतरा पद म भर्ती करे जाही। एखर प्रक्रिया शुरू कर देहे। स्कूल शिक्षा विभाग डहार ले आत्मानंद स्कूल म आने आने पद के भर्ती बर नियमावली जारी कर दे गेहे। जम्मों पद स्कूल शिक्षा विभाग ले प्रतिनियुक्ति म ही करे जाही। हरएक स्कूल बर कलेक्टर के अध्यक्षता म एक सोसायटी के गठन करे गेहे। ए स्कूल के संचालन बर गठित सोसायटी ल भर्ती अउ स्कूल संचालन के अधिकार हस्तांतरित करे गेहे।
व्याख्याता-शिक्षक भर्ती
छत्तीसगढ़ उच्चन्यायलय ह प्रदेस म चौदह हजार शिक्षक अउ व्याख्याता मन के भरती प्रक्रिया म लगे रोक ल हटा देहे। ऐखरे संग कोर्ट ह पांच झिन याचिकाकर्ता मन बर पांच पद आरक्षित रखे के निरदेस दीन हे।
बतादन कि याचिकाकर्ता मन उच्चन्यायलय म ए पद म नियुक्ति ल चुनौती दे रिहीन। ओमन, तर्क दे रिहीन कि राज्य शासन ह बिषयवार पद के जानकारी नइ दे रिहीस। संघरा अतिथि सिक्षक मन ल बोनस अंक दे जाय ल घलो नियम विरूध्द बताय रिहीन। उच्चन्यायलय म पिछला सुनवाई म निरदेस दे रिहीन कि राज्य सासन भरती प्रक्रिया जारी रख सकत हे, फेर नियुक्ति उच्चन्यायलय के अनुमति के बिना न करय जाय।
उहें, काली राज्यशासन कोति ले महाधिवक्ता सतीश चंद्र वर्मा ह न्यायलय ल बताइन कि राज्य सरकार ह नियम म संसोधन के बादे भरती प्रक्रिया सुरू करीन हे। ओखर बाद उच्चन्यायलय ह भरती प्रक्रिया म लगे रोक ल हटा देहे।
तीजन बाई-स्वास्थ्य
जानी मानी पंडवानी गायिका पद्मविभूषण डॅाक्टर तीजनबाई के तबियत कुछ दिन पहिली खराब होगे रीहिस। ओमन ल भिलाई के सेक्टर-नौ अस्पताल म भर्ती कराय गे रीहिस। आज तीजनबाई ल अस्पताल ले घर ले आय गेहे। सोशल मीडिया के माध्यम ले खबर मिले के बाद मुख्यमंत्री भूपेश बघेल के निर्देश म दुर्ग जिला प्रशासन ह डॅाक्टर मनके एक टीम गनियारी गांव स्थित तीजनबाई के निवास भेजीन, जिहां डॅाक्टर मन तीजनबाई के स्वास्थ्य के जांच करीन। डॅाक्टर मनके अनुसार तीजनबाई के स्वास्थ्य के स्थिति फिलहाल स्थिर हरय। ओमन अपन गृहग्राम गनियारी म स्वास्थ्य लाभ लेवत हे। स्वास्थ्य विभाग डहार ले नियुक्त हेल्थ एंड वेलनेस सेंटर के टीम ओखर सेहत म सरलग निगरानी राखे हें अउ बेरा-बेरा म उंखर स्वास्थ्य जांच करे जात हे। इही बीच दुर्ग सांसद विजय बघेल ह तीजनबाई के निवास पहुंच के ओखर ले मुलाकात करीन अउ ओखर स्वास्थ्य के बारे म जानकारी लीन।
टॉपर्स टॉक
रायपुर जिला प्रशासन डहार ले प्रतियोगी परीक्षा के तियारी करइया युवा मनके मार्गदर्शन बर इक्कीस जुलाई के दीनदयाल उपाध्याय ऑडिटोरियम म टॉपर्स टॉक के आयोजन करे जाही। एमा यूपीएससी के सिविल सेवा परीक्षा म पहिली तीन स्थान पाने वाले युवा मन स्थानीय प्रतिभागी मन ल टिप्स दीही।