मुख्यमंत्री भूपेश बघेल ह प्रदेस के युवा मन ले संभाग स्तर म सोझे गोठबात करही। ए आयोजन के दउरान ओमन ह युवा मन ले उंखर मुद्दा अउ उपलब्धि उपर बात करही। संगेसंग ओमन ह युवा मनके सवाल के जुवाब घलो दीहीं। संभाग स्तरीय आयोजन म युवा मन ह अपन अनुभव साझा करही, जेखर ले उंखर अनुभव के फायदा दूसर लोगन उठा सकय। कार्यक्रम म सबो वर्ग के युवा मन ह हिस्सा ले सकत हे।
मितानिन-मानदेय
राज्य म मितानिन मनके मानदेय म बढ़ोतरी कर दे गेहे। ए संबंध म मंत्रालय ले जारी आदेस के अनुसार मितानिन मन ल पहिली ले दे जावत प्रोत्साहन रासि के अलावा मितानिन कल्याण योजना म बाईस सौ रूपिया के रासि हर महीना दे जाही। राज्य सरकार ह ए बछर एक अप्रैल ले मितानिन मनके मानदेय म बढ़ोतरी करे के मंजूरी देहे।
नशामुक्ति जागरूकता अभियान
छत्तीसगढ़ म नशामुक्ति बर बड़े स्तर म जन जागरूकता अभियान चलाय जाही। समाज कल्याण विभाग ह एखर बर तैयारी सुरू कर देहे। नशामुक्ति अभियान बर तैयार प्रारूप म संसोधन अउ सुझाव बर आज रईपुर म एक ठिन बइठका होइस, जेमा मौजूद प्रतिनिधि मन ह नशामुक्ति अभियान बर सरकारी अउ गैर सरकारी, स्वयंसेवी अउ सामाजिक संस्था मन ले मदद ले बर जोर दीन। संगेसंग स्कूल-कॉलेज अउ पारा मोहल्ला म घलो अभियान चलाय बर कविता, लेखन, भासन जइसे प्रतियोगिता अउ सेमिनार कराय के फइसला ले गीस।
आरएसएस-बैठक
राष्ट्रीय स्वयंसेवक संघ-आर.एस.एस. के अखिल भारतीय प्रांत प्रचारक मनके तीन दिवसीय बइठका अवइया तेरह जुलाई ले तमिलनाडु के उटी म होवइया हे। ए वार्षिक बइठका मुख्य रूप ले संगठनात्मक बिसय उपर चर्चा करे बर हर बछर होथे। बइठका म आर.एस.एस. के सर संघचालक डॉक्टर मोहन भागवत, सर कार्यवाह दत्तात्रेय होसबाले के अलावा सबो राज्य के प्रांत संचालक, सह प्रांत संचालक, क्षेत्र संचालक के संग सबो कार्य विभाग के अखिल भारतीय अधिकारी मन मौजूद रइही। बइठका म अवइया कार्यक्रम के योजना अउ वर्तमान परिस्थित के बारे म गोठबात होही।
जनसंख्या स्थिरीकरण पखवाड़ा
परिवार नियोजन बर लोगन ल जागरूक करे खातिर स्वास्थ्य विभाग डहार ले आज ले जनसंख्या स्थिरीकरण पखवाड़ा सुरू करे गेहे। चौबीस जुलाई तक चलइया ए पखवाड़ा के दउरान ग्राम स्तर ले लेके जिला स्तर तक बिसेस अभियान चलाके नसबंदी बर फैले अज्ञानता अउ भ्रांति ल दूर करे जाही। पखवाड़ा के दउरान ए.एन.एम. अउ मितानिन मन ह घर-घर जाके चिन्हांकित हितग्राही मन ल परिवार नियोजना के स्थायी अउ अस्थायी साधन के बारे म बताही। ए दउरान हितग्राही मन ल जरूरी परामर्स अउ परिवार नियोजन के सेवा घलो दे जाही।
छत्तीसगढ़ पुलिस-लघु फिल्म
छत्तीसगढ़ पुलिस डहार ले चलत सड़क सुरक्षा अभियान म अब लघु फिल्म के माध्यम ले घलो जन-जागरूकता के प्रयास करे जाही। एखर बर लोगन ले राष्ट्रीय सड़क सुरक्षा लघु फिल्म महोत्सव म सड़क सुरक्षा उपर लघु फिल्म बनाय बर अरजी मंगाय गे हवय। ए लघु फिल्म मन ल आने-आने श्रेणी म राज्य सरकार डहार ले पुरस्कार दे जाही। प्रतियोगिता म भाग ले बर इच्छुक प्रतिभागी मन ह छब्बीस जुलाई तक ऑनलाइन आवेदन कर सकत हे। ए संबंध म जादा जानकारी छत्तीसगढ़ पुलिस के वेबसाइट ले जा सकत हे।
लघु फिल्म छत्तीसगढ़ी, गोंडी, हल्बी, धुर्वा, भतरी, दोरली, संबलपुरी, कुडुख, सादरी बैगानी, कमारी, ओरिया, सरगुजिया, भुजिया आदि म हिन्दी उच्चारण के संग होना चाहिए। फिल्म के अवधि दू मिनट निर्धारित करे गेहे। सर्वश्रेष्ठ चुने गे फिलिम ल अस्सी हजार रूपिया अउ सर्वश्रेष्ठ कहानी, सिनेमेटोग्राफी अउ सर्वश्रेष्ठ कलाकार ल पच्चीस-पच्चीस हजार रूपिया पुरस्कार के रूप म दे जाही।
माओवादी कैम्प-ध्वस्त
सुकमा जिला के डीआरजी, एसटीएफ, कोबरा बटालियन अउ दंतेवाड़ा जिला के डीआरजी के टीम ह एक ठन संयुक्त ऑपरेशन म सिमेल अउ गोगुंडा क्षेत्र म दू ठन बड़े माओवादी कैम्प ल ध्वस्त करे हे। संगेसंग माओवादी मन डहार ले लगाय गे चार ठन आईईडी, भारी संख्या म माओवादी सामान अउ साहित्य बरामद करीन हे।
सुकमा जिला के पुलिस अधीक्षक किरण चव्हाण ह बतईन कि ए संयुक्त ऑपरेशन ल गोगुंडा, सिमेल, तुम्मापाड़, गट्टापाड़ अउ तोयापार के पहाड़ी म चलाय गीस। ए दउरान माओवादी मन संग सुरक्षा बल के मुठभेड़ घलो होइस। जवाबी कार्रवाई के बाद माओवादी मन ह जंगल के फायदा उठाके उहां ले भाग गीन।
चंदेल-मानसून सत्र बयान
छत्तीसगढ़ विधानसभा के मानसून सत्र अट्ठारह ले इक्कीस जुलाई के बीच प्रस्तावित हे। ए सत्र म प्रमुख विपक्षी भारतीय जनता पार्टी ह आने-आने मुद्दा ल लेके सरकार ल घेरे के तैयारी करत हे। नेता प्रतिपक्ष नारायण चंदेल ह आज एक ठन बयान जारी करके किहीन कि ए दुर्भाग्य के बात हे कि जब ले राज्य म कांग्रेस के सरकार बने हे, तब ले विधानसभा के कोनो भी सत्र अपन अवधि ल पूरा नइ कर पाय हे। निर्धारित अवधि के पहिलीच सत्र के समापन हो जथे। एखर से पता चलथे कि कांग्रेस सरकार के विधायिका उपर भरोसा नइ हे। ओमन आरोप लगईन कि सरकार ह सदन म चर्चा ले बचना चाहथे। श्री चंदेल ह किहीन कि विधायिका म विपक्ष ह सवाल पूछबे करही अउ एखर जुवाब सरकार ल देना पड़ही।
पौधा तुंहर द्वार
साफ वातावरण अउ वृक्षारोपण बर लोगन ल प्रेरित करे के उद्देश्य ले वन विभाग डहार ले ए बखत राज्यभर म ‘‘पौधा तुंहर द्वार‘‘ योजना चलाय जावत हे। ए योजना म रईपुर जिला म घलो नगर निगम डहार ले घर-घर जाके निःशुल्क पौधा दे जाही। एखर बर वाट्सअप नंबर – सात पांच आठ सात शून्य एक सात छह एक चार घलो जारी करे गेहे, जेखर माध्यम ले लोगन मैसेज भेजके कोनों भी प्रजाति के पांच ठन पौधा अपन घर, कार्यालय या फेर फैक्ट्री के पता म मंगवा सकत हे। नगर निगम के टीम ह दू ले तीन दिन के भीतर ए पौधा मन ल उंखर घर म जाके निःशुल्क पहुंचाही।
ट्रेन परिचालन
दक्षिण पूर्व मध्य रेलवे रईपुर मंडल म अवइया दुरूग-भिलाई नगर के बीच सुधार काम होय के सेती पन्द्रह ले उन्नीस जुलाई के बीच कोनों-कोनों गाड़ी मनके अवई-जवई ह प्रभावित रइही। ए दउरान रईपुर-दुरूग मेमू पैसेंजर, डोंगरगढ़-रईपुर मेमू पैसेंजर स्पेशल, गेवरारोड-इतवारी एक्सप्रेस, टाटानगर-इतवारी एक्सप्रेस, इतवारी-बिलासपुर एक्सप्रेस, इतवारी-टाटानगर एक्सप्रेस अउ रईपुर-डोंगरगढ़ मेमू पैसेंजर स्पेशल रद्द रइही। एखर अलावा आठ ठन गाड़ी मन ह देरी ले निकलही। संगेसंग गोंदिया-बरौनी एक्सप्रेस बदले रद्दा नैनपुर-जबलपुर अउ कटनी होके चलही।
उहें, रईपुर रेलमंडल म अवइया सरोना-कुम्हारी स्टेसन के बीच परसदा फाटक म मरत्तत काम के सेती काली संझा आठ बजे ले चौदह जुलाई के संझा आठ बजे तक सड़क यातायात बंद रइही।
हाथी-अलर्ट
राजनांदगांव जिला म पाछु चार दिन तक डोंगरगांव अउ खुज्जी वन परिक्षेत्र म घूमे के बाद एक दंतैल हाथी शिवनाथ नदी पार करके अम्बागढ़ चौकी आतर गांव पहुंच गे हवय। वन विभाग के टीम ह ग्रामीण मन ल दंतैल हाथी ले दूर रेहे के अउ जंगल कोति नइ जाय के समझाइस दे हवय। संगेसंग वन विभाग ह आसपास के गांव म मुनादी करा के अलर्ट जारी कर देहे।
स्वीप कोर समिति-बैठक
राज्य के मुख्य निर्वाचन पदाधिकारी रीना बाबासाहेब कंगाले के अगुवई म अवइया चौदह जुलाई के रईपुर म राज्य स्तरीय स्वीप कोर समिति के बइठका होही। बइठका म राज्य म ए बछर प्रस्तावित विधानसभा चुनाव म मतदान प्रतिसत ल बढ़ाय बर मतदाता जागरूकता ले जुड़े आने-आने स्वीप कार्यक्रम के बारे म गोठबात करे जाही।
अउ अब पेस हे मौसम के हाल..
प्रदेस म ए बेरा रूक-रूक के बरसा होवत हे। फेर, मौसम विभाग ह अवइया बारह घंटा के दउरान राजनांदगांव, कांकेर, बीजापुर अउ नारायणपुर जिला म एक-दू जघा म मध्यम ले भारी बरसा होय के चेतावनी दीन हे।
इही बीच, राजनांदगांव जिला के जंगली इलाका म होवत बरसा के सेती नंदियां-नरवा मनके जलस्तर बाढ़ गे हवय। प्रसासन ह मोंगरा बैराज के गेट खोल दे हवय अउ इहां ले करीबन दू हजार क्यूसेक पानी छोड़े जावत हे। उहें, साखानाला, घुमरिया नाला अउ खातूटोला बैराज ले घलो पानी छोड़े जावत हे, जेखर ले शिवनाथ नदी के जलस्तर बाढ़ गे हवय।