राज्य सरकार ह प्रदेस के तीन सौ अट्ठारह स्कूल मन ल स्वामी आत्मानंद हिन्दी माध्यम उत्कृष्ट विद्यालय के रूप म बढ़ाय के फइसला ले हवय। ए स्कूल मन बर कलेक्टर के अगुवई म एक ठन सोसायटी बनाय जाही, जउन ह स्कूल म बेवस्था चलाही। ए स्कूल मन म अभी सबो स्वीकृत पद स्कूल ल चलाय बर गठित सोसायटी ल हस्तांतरित करे जाही।
स्कूल सिक्षा विभाग डहार ले जारी आदेस के अनुसार स्कूल मन ल चलाय बर पंजीकृत सोसायटी ल राज्य सरकार डहार ले अनुदान दे जाही। संगेसंग सोसायटी दूसर स्त्रोत ले घलो पइसा जुटा सकही। उहें, स्कूल ल चलाय बर जरूरी पद ल सासन के अनुमति ले समिति डहार ले मंजूर करे जा सकही। ए पद मन ल सोसायटी सिरिफ राज्य सासन के स्कूल सिक्षा विभाग ले प्रतिनियुक्ति म ही भर सकही। सोसायटी डहार ले सीधा भर्ती या संविदा नियुक्ति नइ करे जा सकही। आदेस म यहू घलो केहे गे हवय कि स्कूल म वर्तमान म पदस्थ कर्मचारी मन ल प्रतिनियुक्ति म लेना सोसायटी बर जरूरी नइ होही।
आबकारी-कार्रवाई
प्रदेस म सराब के अवैध निकासी अउ रिश्वत मामला म आबकारी विभाग ह राज्य के तीन प्रमुख देशी सराब बनइया कंपनी अउ आबकारी विभाग के चार झन अधिकारी मन ल नोटिस जारी करके जवाब मांगे हे। नोटिस म भ्रष्टाचार, रिश्वत के लेनदेन अउ अवैध बिक्री म अधिकारी अउ सराब बनइया कंपनी मनके बीच मिलीभगत के आरोप लगाय गेहे।
आबकारी आयुक्त जनक प्रसाद पाठक ह किहीन हे कि आबकारी सुल्क अउ दूसर कर के भुगतान करे बिना सराब के निकासी अउ रिश्वत के सिकायत के आधार म नोटिस जारी करे गेहे। एमा वेलकम डिस्टलरी बिलासपुर, भाटिस वाइन मर्चेंट प्राइवेट लिमिटेड मुंगेली अउ छत्तीसगढ़ डिस्टलरी लिमेटड कुम्हारी ल अवैध सराब के निकासी के बारे म नोटिस जारी करे गेहे। उहें, आबकारी उपायुक्त नीतू नोतानी, सहायक आबकारी आयुक्त विकास कुमार गोस्वामी, जिला आबकारी अधिकारी इकबाल अहमद खान अउ अशोक कुमार सिंह ल घलो नोटिस जारी करे गेहे।
राज्यपाल-ओडिशा प्रवास
छत्तीसगढ़ के राज्यपाल विश्वभूषण हरिचंदन ह अपन ओडिशा प्रवास के दउरान आज पुरी के श्री मंदिर म भगवान जगन्नाथ के दर्सन करके पूजापाठ करीन अउ लोगन के खुसहाली के कामना करीन। उंखर संग राज्य के प्रथम महिला सुप्रभा हरिचंदन घलो मौजूद रिहीन। उहें, राज्यपाल ह साक्षी गोपाल म पंचसाखा के पुष्पांजलि अर्पित करीन।
मुख्यमंत्री-बालोद प्रवास
मुख्यमंत्री भूपेश बघेल ह आज बालोद जिला के ग्राम भरदा-टटेंगा म माता बिंदेश्वरी बघेल के नाव ले बने बिंदेश्वरी पार्क के लोकार्पण करीन। ए मउका म श्री बघेल ह माता बिंदेश्वरी पार्क के सौंदर्यीकरण अउ सामुदायिक भवन निर्माण बर पचास-पचास लाख रूपिया देके घोसना करीन। अइसने, ओमन खरखरा नदी ले मेन रोड टटेंगा तक साढ़े तीन किलोमीटर सड़क निर्माण बर पैंसठ लाख रूपिया के रासि मंजूर करीन।
एखर पहिली, मुख्यमंत्री ह शिव मंदिर म पूजापाठ करके लोगन के खुसहाली के कामना करीन।
छत्तीसगढ़िया ओलंपिक
छत्तीसगढ़िया ओलंपिक के सुरूवात ए बछर हरेली तिहार म सत्रह जुलाई ले होही। करीबन दू महीना दस दिन तक चलइया ए प्रतियोगिता छह चरण म होही। एमा लइका ले लेके सियान तक भाग ले सकही। प्रतियोगिता म दलीय अउ एकल श्रेणी म सोलह प्रकार के पारंपरिक खेल मन ल सामिल करे गेहे। ए बखत के ओलंपिक म एकल श्रेणी म रस्सी कूद अउ कुश्ती ल घलो जोड़े गे हवय। प्रतियोगिता के समापन सत्ताईस सितंबर के होही।
अधिकारी मन ह बतईन कि छत्तीसगढ़िया ओलंपिक के आयोजन सबले पहिली गंवई अउ नगरीय क्षेत्र म राजीव युवा मितान क्लब स्तर म अवइया सत्रह ले बाईस जुलाई तक नॉकआउट पद्धति ले होही। उहें, जोर स्तर म ए प्रतियोगिता छब्बीस ले इकतीस जुलाई तक होही। विकाखंड अउ नगरीय स्तर म ए आयोजन सात ले इक्कीस अगस्त तक होही। फेर, जिला स्तर म ए प्रतियोगिता पच्चीस अगस्त ले सात सितंबर तक अउ संभाग स्तर म दस सितंबर ले बीस सितंबर तक आयोजित करे जाही। उहें, राज्य स्तर के खेल प्रतियोगिता पच्चीस सितंबर ले सत्ताईस सितंबर तक होही।
भाजपा-आरोप पत्र
भारतीय जनता पार्टी ह चुनाव घोषणा पत्र समिति के बाद अब आरोप पत्र समिति बनाय हे। वरिष्ठ विधायक अजय चंद्राकर ल ए समिति के संयोजक बनाय गे हवय। उहें, पूर्व विधानसभा अध्यक्ष प्रेमप्रकाश पांडेय अउ वरिष्ठ नेता ओ.पी. चौधरी समिति के सदस्य होही।
एथेनॉल प्लांट
कोंडागांव कलेक्टर दीपक सोनी ह कलेक्ट्रेट सभा कक्ष म राखे गे बइठका म एथेनॉल प्लांट म चलत काम के समीक्षा करीन। बइठका म ओमन ह एथेनॉल प्लांट लगाय ले जुड़े एजेंसी अउ अधिकारी मन ले बॉयलर, टरबाइन, वॉटर ट्रीटमेंट संघरा हरेक सेक्सन के निर्माण काम के जानकारी लीन। संगेसंग ओमन ह प्लांट के काम ल जल्दी ले जल्दी पूरा करे बर किहीन। ए मउका म ओमन ह प्लांट म लोगन के भर्ती म स्थानीय लोगन ल प्राथमिकता दे जाय के निरदेस दीन।
राजनांदगांव-सी मार्ट
राजनांदगांव जिला के सी-मार्ट ह उत्पाद के बिक्री म प्रदेस म दूसर स्थान म हवय। ए केन्द्र ले अभी तक दू करोड़ पन्द्रह लाख रूपिया के जिनीस बेचा गेहे। सी-मार्ट म बने पैकेजिंग के संग परंपरागत अउ दूसर जिनीस के बिक्री करे जावत हे, जेखर ले लोगन के रूझान बढ़े हे।
मोर चिन्हारी छत्तीसगढ़ी मंच-पदयात्रा
छत्तीसगढ़ी साहित्यकार अउ मोर चिन्हारी छत्तीसगढ़ी मंच के अध्यक्ष नंदकिशोर शुक्ल ह छत्तीसगढ़ी ल राजकाज के भाखा बनाय खातिर जांजगीर ले चांपा तक पदयात्रा करीन। ए मउका म श्री शुक्ल ह कहिन कि स्कूल अउ सरकारी कामकाज म छत्तीसगढ़ी भाखा के उपयोग नइ होवत हे, तेखरे सेती ए मुद्दा ल लेके पदयात्रा निकाले गीस, जेखर उद्देश्य लोगन ल छत्तीसगढ़ी भाखा बर जागरूक करना हे।
सावन-सोमवार
आज सावन के पहिली सम्मार हे। ए मउका म राजधानी रईपुर के शिव मंदिर म भक्त मनके अब्बड़ भीड़ उमड़े रिहीस। श्रद्धालु मन ह भगवन शिव के जल अउ दूध ले अभिषेक करीन। रईपुर म कांवड़िया मन ह महादेव घाट के हटकेश्वर महादेव म जल चढ़ईन। उहें, बूढ़ेश्वर महादेव संघरा दूसर शिव मंदिर मन म घलो आज बिहनिया ले भक्त मनके भीड़ लगे रिहीस।
ओति, कबीरधाम जिला के भोरमदेव मंदिर म जल अभिषेक करे बर आज कवर्धा ले भोरमदेव तक पद यात्रा निकाले गीस, जेमा कावड़िया मन संघरा बड़े संख्या म लोगन सामिल होइन। राजिम के कुलेश्वर महादेव, चंपारण्य के चंपेश्वर महादेव, बम्हनी के ब्रम्हेश्वर महादेव, सिरपुर के गंधेश्वर महादेव अउ जांजगीर-चांपा जिला के खरौद के लक्ष्मणेश्वर महादेव मंदिर संघरा प्रदेस के प्राचीन शिव मंदिर मन म घलो आज अब्बड़ पूजापाठ करे गीस।
उहें, जगदलपुर के इंद्रावती के तट म बने महादेव मंदिर, झाड़ेश्वर मंदिर, बोधघाट कॉलोनी के शिव मंदिर संघरा दूसर मंदिर मन म घलो लोगन के भीड़ देखे गीस।
अउ अब पेस हे मौसम के हाल..
मौसम विभाग ह अवइया चौबीस घंटा के दउरान प्रदेस के एक-दू जघा म गरज-चमक के संग आकाशीय बिजली गिरे के चेतावनी देहे। मौसम विभाग के अनुसार उत्तर-पूर्व राजस्थान म एक निम्न दाब के केन्द्र बने हे, जेखर असर ले प्रदेस म काली कोनो-कोनो जघा म हल्का ले मध्यम बरसा होय के या गरज-चमक के संग छींटा पड़े के संभावना हे। उहें, प्रदेस म अधिकतम तापमान म परिवर्तन होय के संभावना नइ हे। फेर, उतार-चढ़ाव के स्थिति बने रइही।
अउ अब थोरकुन समाचार सार म-
– राष्ट्रीय महिला आयोग के सदस्य ममता कुमारी ह जिला मुख्यालय बैकुंठपुर म महिला अउ बाल विकास विभाग के तहत चलत सखी वन स्टॉप सेंटर के निरीक्षण करीन। ए दउरान ओमन ह सेंटर म प्राप्त प्रकरण के जानकारी घलो लीन।
– मोहला-मानपुर अंबागढ़ चौकी जिला म चलत दू ठन नया अउ तीन ठन पहिली के चलत स्वामी आत्मानंद शासकीय उत्कृष्ट अंग्रेजी माध्यम विद्यालय म अंग्रेजी माध्यम के आने-आने खाली पद म संविदा नियुक्ति बर भर्ती प्रक्रिया जारी हे। एखर बर अवइया पन्द्रह जुलाई के वाइ इन इंटरव्यू कराय जाही।
अउ
– जनपद पंचायत मोहला-मानपुर अंबागढ़ चौकी म अवइया चौदह जुलाई के रोजगार शिविर लगाय जाही। सिविर म कतकोन जाने-माने कंपनी मन सामिल होही। जिला प्रशासन ह युवा मन ले जादा ले जादा संख्या म सामिल होके ए रोजगार सिविर के फायदा लेके अपील करीन हे।