रेल मंत्रालय ह घोषणा करीन कि ए.सी. चेयर कार, वंदे भारत के संग सबो ट्रेन मन के एक्जीक्यूटिव क्लास के किराया म पच्चीस प्रतिसत के कमी करे जाही। पाछू तीस दिन के दउरान ए ट्रेन म पचास प्रतिसत ले कम यात्री के संख्या होय ले ए निर्णय ले गेहे। रेलगाडी़ मन म जादा ले जादा यात्री मन बर जघा उपलब्ध कराय के उद्देश्य ले मंत्रालय ह किहीन कि ओखर मन ले ए.सी. बोगी मन म यात्री मन के संख्या बढ़ाय अउ किराया म छूट दे के योजना ल लागू करे के जिम्मेदारी जोनल रेलवे ल देके निर्णय ले हे। ए योजना अनुभूति अउ विस्टाडम कोचेज के संग ए.सी. सुविधा अउ ए.सी. चेयर कार के संग एक्जिक्यूटिव क्लास के सब्बों गाड़ी मन म लागू होही। छूट के पैसा, बुनियादी किराया के अधिकतम पच्चीस प्रतिसत होही। आरक्षण सुल्क, सुपर फॉस्ट सुल्क, जीएसटी सुल्क अलग ले लगही। यात्री मन के संख्या ल देखत हुए कोनो या सब्बों दर्जा म छूट दे जा सकत हे। मंत्रालय ह किहीन कि छूट देके ए घोषणा तुरते लागू होही।
मुख्यमंत्री-लोकार्पण
मुख्यमंत्री भूपेश बघेल ह आज वर्चुवल माध्यम ले अंबिकापुर म तीन सौ चौहत्तर करोड़ रूपिया के लागत ले बने राजमाता देवेन्द्र कुमारी सिंहदेव शासकीय चिकित्सा महाविद्यालय भवन अउ माता राजमोहनी देवी स्मृति चिकित्सालय के निर्माण काम के लोकार्पण करीन। एखरे संग मुख्यमंत्री ह महात्मा गांधी स्टेडियम के अंतर्गत खेलों इंडिया मल्टीपरपस हॉल अउ आने-आने निर्माण काम के सिलान्यास अउ लोकार्पण घलो करीन। ए मउका म मुख्यमंत्री ह किहीन कि प्रदेस म खेल अउ शिक्षा ल बढ़ावा दे बर ए क्षेत्र म लगातार सुविधा के विस्तार करे जात हे, ओमन ह किहीन कि अंबिकापुर कॉलेज भवन म आठ विभाग के संचालन होही। उहें, कतकोन प्रकार के अत्याधुनिक जांच सुविधा उपलब्ध होही। अत्याधुनिक सुविधा ले लैस ए मेडिकल कॉलेज अउ अस्पताल के अधोसंरचना के काम पूरा होय ले सरगुजा संभाग ल लाभ मिलही।
रोका-छेका अभियान
प्रदेस म खुला म चराई करत पशु मनके नियंत्रण अउ ओखर मन ले खरीफ फसल के सुरक्षा बर ए बछर घलो रोका-छेका अभियान चलाय जाही। ए दउरान गांव मन म रोका-छेका अभियान अउ सभा के आयोजन होही। संगेसंग खुला म चराई करत पशु मन के व्यवस्थापन अउ गोधन सुरक्षा के व्यवस्था करे जाही। कृषि विभाग ह सबो कलेक्टर अउ जिला पंचायत के मुख्यकार्यपालन अधिकारी मन ल गांव म सत्रह जुलाई तक स्थानीय परिस्थिति ल देखत हुए रोका-छेका अभियान चलाय के दिसा-निरदेस जारी करे हे।
रोका-छेका अभियान के तहत गांव मन म बइठका आयोजित करे बर कहे गेहे। जेमा ‘‘रोका-छेका‘‘ प्रथा के अनुरूप पशु मन ले फसल बचाव के निर्णय ग्राम सरपंच, पंच, जनप्रतिनिधि अउ ग्रामीण मन डहार ले जाही। प्रत्येक गौठान ग्राम म मुनादी कराय अउ गौठान म पशु चिकित्सा अउ स्वास्थ्य सिविर के आयोजन के निरदेस घलो दे गेहे।
भाजपा-चुनाव प्रभारी
छत्तीसगढ़ के चुनाव प्रभारी अउ सहप्रभारी बनाय जाए म ओम प्रकाश माथुर अउ मनसुख मंडाविया ल भाजपा के प्रदेस अध्यक्ष अरूण साव, पूर्व मुख्यमंत्री डॉक्टर रमन सिंह, सह संगठन प्रभारी नितिन नबीन, पूर्व विधानसभा अध्यक्ष धरमलाल कौशिक, प्रदेस महामंत्री विजय शर्मा अउ ओ.पी. चौधरी के संग वरिष्ठ नेता मन ह बधाई दीन।
अरूण साव-कार्यकर्ता मुलाकात
बिलासपुर के गांव बेलतरा तीर काली होय एक सड़क दुर्घटना म गंभीर रूप ले घायल भाजपा कार्यकर्ता विश्वम्भर यादव के बेहतर ईलाज बर आज चकरभांठा एयरपोर्ट ले एयर एंबुलेंस डहार ले दिल्ली के एम्स अस्पताल भेंजे गेहे। भाजपा के प्रदेस अध्यक्ष अरूण साव, पूर्व मंत्री अमर अग्रवाल अउ जिला भाजपा अध्यक्ष रामदेव कुमावत ह बिलासपुर के अपोलो अस्पताल पहुंचके घायल कार्यकर्ता के स्वास्थ्य के बारे म जानकारी दीन अउ ओला तुरते एंबुलेंस ले चकरभांठा एयरपोर्ट बर रवाना करीन।
जानबा के मुताबिक गांव बेलतरा तीर काली होय सड़क दुर्घटना म तीन लोगन के मउत होगे। फेर आने छै लोगन घायल होगे रिहीस। ए सबो झन प्रधानमंत्री के सभा म सामिल होय बर रायपुर आवत रिहीन।
राज्य स्तरीय शालेय क्रीडा प्रतियोगिता
प्रदेस के स्कूल मन म पढ़ईया विद्यार्थी मन बर अवईया अगस्त माह के पहिली सप्ताह म तेइसवा राज्य स्तरीय शालेय क्रीडा प्रतियोगिता के आयोजन करे जाही। स्कूल सिक्षा विभाग डहार ले एखर सुरूआती तइयारी चालू कर दे गेहे। संचालक लोकसिक्षण ह बस्तर, बिलासपुर, दुर्ग, रायपुर अउ सरगुजा संभाग के सिक्षा अधिकारी मन ल ए संबंध म जरूरी निरदेस दे हे। ए आयोजन म बीस खेल के प्रतियोगिता होही। एमा हॉकी, भारोत्तलन, योगासन, खो-खो, कबड्डी, शतरंज, लॉन टेनिस, हैण्डबॉल, तैराकी, कुश्ती, एथलेटिक्स, टेबल टेनिस, बॉलीबॉल अउ फुटबॉल प्रमुख रूप ले सामिल हे।
शिक्षक-भर्ती ऑनलाइन काउंसलिंग
बस्तर अउ सरगुजा संभाग म रिक्त सहायक सिक्षक, सिक्षक अउ व्याख्याता के बारह हजार चार सौ नवासी पद के भर्ती बर ऑनलाइन काउंसलिंग के माध्यम ले अभ्यर्थी मन ल स्कूल के आवंटन करे जाही। ऑनलाइन काउंसलिंग सुरू होय के सूचना स्कूल विभाग के वेबसाइट अउ समाचार पत्र के माध्यम ले दे जाही। एखरे संग ऑनलाइन काउंसलिंग बर व्यवसायिक परीक्षा मंडल के मेरिट अनुसार सूची घलो विभाग के वेबसाइट म जारी करे जाही। चिप्स डहार ले संबंधित के मोबाइल नंबर म एसएमएस के माध्यम ले एखर सूचना दे जाही।
ऑनलाइन काउंसलिंग म भाग ले बर कॉउंसलिंग के पहिली सबो अभ्यर्थी ल व्यापम पोर्टल म बनाय गे अपन प्रोफाइल के आधार म वेरीफिकेशन कराना जरूरी होही। अभ्यर्थी व्यापम पोर्टल म बनाय के अपन आईडी, पासवर्ड ले लोक सिक्षण संचालनालय के ऑनलाइन काउंसलिंग पोर्टल म लॉगिन कर सकही।
बॉडीबिल्डिंग चैंपियनशिप
मालदीव के राजधानी माले म पाछू पांच ले आठ जुलाई तक आयोजित तेरहवा साउथ एशिया बॉडीबिल्डिंग चैंपियनशिप म बिलासपुर जिला के पी. आनंद रॉव ह भारत के प्रतिनिधित्व करत हुए अस्सी किलो ग्राम वजन वर्ग म पांचवा स्थान पाए हे। ए प्रतियोगिता म भारतीय दल ह सबले जादा पदक पाके टीम चैंपियनशिप के खिताब घलो अपन नाम करीन। ए प्रतियोगिता म चैंपियन ऑफ चैंपियन के खिताब घलो भारत के सरवानन मनी ह जीतिस।
जिले की चिट्ठी
प्रादेशिक समाचार एकांश, आकाशवाणी रायपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छह बज के पांच मिनट ले छह बज के दस मिनट तक प्रसारित करे जाही। ए कारीकरम ल छत्तीसगढ़ स्थित आकाशवाणी के सब्बों केन्द्र रिले करही। ए बार के अंक म ‘‘दुर्ग‘‘ जिला के गतिविधि के बारे म जानकारी दे जाही।
काली रविवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनो बुलेटिन आकाशवाणी केन्द्र जगदलपुर ले प्रसारित करे जाही। एला बस्तर संभाग म सुने जा सकत हे। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन साम साढ़े छे बजे ले प्रसारित करे जाही।
प्रदेस म अवइया चौबीस घंटा के दउरान राजधानी रायपुर के संग कतकोन इलाका म हल्का ले मध्यम बरसा होय के संभावना हे, उहें, एक-दू जघा म गरज-चमक के संग आकासीय बिजली गिरे के घलो चेतावनी दे गेहे।
मौसम विभाग के अनुसार मानसून द्रोणिका जैसलमेर ले उत्तर-पश्चिम बंगाल के खाड़ी तक बने हुए हे। एखर प्रभाव ले पाछू चौबीस घंटा के दउरान रायपुर के संग प्रदेस म कतकोन जघा म हल्का ले मध्यम बरसा दर्ज करे गेहे। इंही, बीच मौसम विभाग ह बस्तर अउ सरगुजा संभाग म तेज बरसा होय के संभावना घलो जताय हे।
अउ अब थोरकुन समाचार सार म-
– उद्योग संवर्धन अउ आंतरिक व्यापार विभाग ह राष्ट्रीय पुरस्कार पोर्टल म एक जिला-एक उत्पात पुरस्कार दे के घोषणा करे हे। ए पुरस्कार बर इकतीस जुलाई तक आवेदन करे जा सकथे।
अउ
– कोंडागांव जिला के केसकाल थाना क्षेत्र म जंगली सुअर के सिकार करे बर गे एक झिन मनखे डहार ले भरमार बंदूक ले फायर करे जाय ले ओखर एक झिन संगवारी के मउत होगे।