केंद्र सरकार ह किसान मन बर तीन लाख सत्तर हजार करोड़ रूपिया ले जादा के बड़ अकन नवा लाभकारी योजना के घोषणा करे हे। केंद्रीय मंत्रिमंडल के आर्थिक मामला मनके समिति की बइठका म ए योजना ल मंजूरी दे गीस। चालू वित्त बछर बर गन्ना के कीमत दस रूपिया बढ़ाके तीन सौ पंद्रह रूपिया हरेक क्विंटल पाछू कर दे गेहे। एखर ले गन्ना उत्पादक किसान अउ चीनी मिल ले जुड़े करीबन पांच लाख मजदूर मन ल फायदा मिलही। बइठका के बाद सूचना अउ प्रसारण मंत्री अनुराग सिंह ठाकुर ह पत्रकार मन ल बताइन हे कि मंत्रिमंडल ह किसान मन ल पैंतालीस किलो के यूरिया म दू सौ बियालिस रूपिया के सब्सिडी ल आगू घलो जारी राखे के फैसला करे हे।
मंत्रिमंडल के ए फैसला म केंद्रीय रसायन अउ उर्वरक मंत्री मनसुख मांडविया ह किहीन कि एखर ले किसान के आय म बढ़ोत्तरी होही। संगेसंग जैविक खेती ल प्रोत्साहन मिलही अउ मिट्टी के उर्वरता घलो बाढ़ही।
सिंहदेव-उप मुख्यमंत्री
प्रदेस म विधानसभा चुनाव ले पहिली कांग्रेस ह एक बड़का कदम उठावत स्वास्थ्य मंत्री टी.एस. सिंहदेव ल उप मुख्यमंत्री बनाय जाय के प्रस्ताव ल मंजूर कर ले हे। काली नई दिल्ली स्थित पार्टी मुख्यालय म कांग्रेस के राष्ट्रीय अध्यक्ष मल्लिकार्जुन खड़गे, पूर्व अध्यक्ष राहुल गांधी, कांग्रेस के प्रदेस प्रभारी कुमारी सैलजा, मुख्यमंत्री भूपेश बघेल अउ विधानसभा अध्यक्ष डॉक्टर चरणदास महंत समेत आने आने पदाधिकारी मन के बइठका म ए प्रस्ताव ल मंजूर करे गीस। बइठक के बाद पार्टी के प्रभारी महासचिव के.सी. वेणुगोपाल ह मीडिया ल ए फैसला के जानकारी दीन। श्री सिंहदेव ल जल्दीच उप मुख्यमंत्री पद के सपथ देवाय जाही।
उप मुख्यमंत्री बनाय जाय के प्रस्ताव ल मंजूरी मिले के बाद पत्रकार मन ले गोठबात करत स्वास्थ्य मंत्री टी.एस. सिंहदेव ह किहीन हे कि कांग्रेस के जम्मों नेता पहिली घलो एक संग मिलकर काम करत रिही से। अब ओमन ल नवा जिम्मेदारी मिले के बाद एक नवा स्वरूप म सबो झन एकजुट होके अपन-अपन भूमिका निभाना हे।
मुख्यमंत्री भूपेश बघेल ह टी.एस. सिंहदेव ल उप मुख्यमंत्री बनाय जाय म बधाई दीन। ओमन ह उम्मीद जताइन हे कि श्री सिंहदेव अपन नवा जिम्मेदारी ल सफलता पूर्वक निभाही।
इंही बीच, श्री सिंहदेव ह आज रइपुर स्थित मुख्यमंत्री ले निवास कार्यालय म ले सौजन्य भेंट करीन। मुख्यमंत्री ह श्री सिंहदेव ल मिठई खवाके बधाई दीन। ए मउका म कांग्रेस के प्रदेस प्रभारी कुमारी सैलजा ह मउजूद रिहीन।
नंदकुमार साय-सीएसआईडीसी अध्यक्ष
राज्य सरकार ह पाछु दिन कांग्रेस म सामिल होय आदिवासी नेता नंदकुमार साय ल छत्तीसगढ़ राज्य औद्योगिक विकास निगम-सीएसआईडीसी के अध्यक्ष नियुक्त करे हे। ए आदेस के तहत श्री साय ल कैबिनेट मंत्री के दर्जा दे गेहे।
मुख्यमंत्री भूपेश बघेल ह श्री साय ल ए नवा जिम्मेदारी बर बधाई अउ सुभकामना दीन हे। सीएसआईडीसी के अध्यक्ष बनाय जाय के बाद श्री साय ह मुख्यमंत्री भूपेश बघेल ले उंखर रईपुर के निवास कार्यालय म भेंट करीन।
उहें, प्रदेस के पूर्व मुख्यमंत्री डॉॅक्टर रमन सिंह ह श्री साय के नियुक्ति म ओमन ल बधाई देवत किहीन कि श्री साय ह भाजपा म महत्व नइ दे जाय के आरोप लगाके पार्टी छोड़ दे रिहीन। जबकि, भाजपा ह ओमन ल राष्ट्रीय अनुसूचित जनजाति आयोग के अध्यक्ष बनाय रिहीन।
जेपी नड्डा-बिलासपुर
भारतीय जनता पार्टी के राष्ट्रीय अध्यक्ष जगत प्रकाश नड्डा काली बिलासपुर के रेलवे मैदान म एक आमसभा ल संबोधित करही। भाजपा के प्रदेस अध्यक्ष अरूण साव ह बताइन हे कि ए आयोजन म पार्टी के स्थानीय इकाई के पदाधिकारी अउ कार्यकर्ता मन आज तइयारी ल आखरी रूप दे बर जुटे हे।
कांग्रेस/भाजपा-अभियान
प्रदेस म अवइया विधानसभा चुनाव ल लेके राजनीतिक गतिविधि तेज होगे हे। कांग्रेस अउ भाजपा के पदाधिकारी अउ कार्यकर्ता मन सरलग बइठका लेके चुनावी रणनीति बनावत हे। संगेसंग मतदाता मन ले संपर्क करे बर घलो आने-आने कारीकरम करे जावत हे।
इही कड़ी म कांग्रेस ह प्रदेसव्यापी बूथ चलो अभियान सुरू करे हे। पार्टी के प्रदेस अध्यक्ष मोहन मरकाम ह आज बालोद म कार्यकर्ता मन ले चर्चा करीन।
उहें, पार्टी के वरिष्ठ नेता अउ स्वास्थ्य मंत्री टी.एस. सिंहदेव ह पाटन क्षेत्र म बूथ चलो अभियान के तहत कार्यकर्ता मन ल संबोधित करीन।
इही बीच, प्रधानमंत्री नरेन्द्र मोदी के अगुवई म केन्द्र सरकार के नौ बछर पूरा होय के उपलक्ष्य म भाजपा डहार ले प्रदेसव्यापी जनसंपर्क अभियान चलाय जावत हे। इही कड़ी म काली मुंगेली म ‘‘सेवा, सुसासन अउ गरीब कल्याण‘‘ कारीकरम के तहत प्रदेस भाजपा अध्यक्ष अरूण साव अउ क्षेत्रीय विधायक पुन्नूलाल मोहले ह कार्यकर्ता मनके संग प्रबुद्ध नागरिक मनके घर जाके जनसंपर्क करीन अउ ओमन ल केन्द्र सरकार के उपलब्धि के जानकारी दीन।
उहें, जांजगीर-चांपा जिला के अकलतरा म घलो जनसंपर्क अभियान के तहत कार्यकर्ता मनके सम्मान करे गीस। ए कारीकरम म क्षेत्रीय विधायक सौरभ सिंह घलो सामिल होइन।
माओवादी-ग्रामीण हत्या
सुकमा जिला के ताड़मेटला इलाका म माओवादी मन उप सरपंच समेत दू ग्रामीण मनके हत्या कर देहे। पुलिस के मुताबिक दस दिन पहिली ताड़मेटला ग्राम पंचायत के उप सरपंच माड़वी गंगा अउ सिक्षादूत कवासी सुक्का समेत पन्द्रह लोगन ल माओवादी मन ह अगवा कर ले रिहीन।
इही बीच, सर्व आदिवासी समाज ह ए जम्मों के रिहाई बर माओवादी मन ले अपील करे रिहीन। एखर बाद कुछेक ग्रामीण मन ल रिहा घलो कर दे गीस। फेर उप सरपंच अउ एक आने गांव वाले के माओवादी मन ह जन अदालत म काली हत्या कर दीन।
पुलिस के मुताबिक उप सरपंच माड़वी गंगा ह सासन के जन-कल्याणकारी योजना के जानकारी गांव वाले मन ल देवत रिहीस अउ योजना के लाभ ले बर सरलग जागरूक घलो करे रिहीन। अइसने, शिक्षादूत कवासी सुक्का ताड़मेटला इलाका म लइका मन ल सिक्षित करे के काम करत रिहीन। दूनों गांव वाले के हत्या के बाद पुलिस ह घटना म सामिल माओवादी मनके तलास सुरू कर देहे।
इही बीच, गांव वाले मनके हत्या के बाद सर्व आदिवासी समाज के पदाधिकारी मन ह ताड़मेटला पहुंचके उहां के ग्रामीण मन ले चर्चा करीन अउ माओवादी मन डहार ले करे गे हत्या ले बने उहां के परिस्थिति उपर विचार-विमर्स करीन।
ईद-उल-अजहा
ईद-उल-अजहा के तिहार आज छत्तीसगढ़ समेत देसभर म धार्मिक श्रध्दा के संग मनाय जावत हे। त्याग अउ बलिदान के ए तिहार म लोगन मन ईदगाह अउ मस्जिद म नमाज पढ़त हे। राजधानी रइपुर समेत प्रदेस के आने आने जिला मन म मुस्लिम समाज के लोगन मन ह ईद के नमाज अदा करीन।
राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेन्द्र मोदी ह देस अउ विदेस मन म रहवइया भारतीय मन ल बकरीद के सुभकामना दीन हे।
उहें, छत्तीसगढ़ के राज्यपाल विश्वभूषण हरिचंदन, मुख्यमंत्री भूपेश बघेल अउ राज्य हज कमेटी के चेयरमैन मोहम्मद असलम खान ह घलो बकरीद म मुस्लिम समुदाय के लोगन मन ल बधाई दीन हे।
जल जीवन मिशन
जल जीवन मिशन के तहत प्रदेस म अब तक पच्चीस लाख ले जादा ग्रामीण परिवार मन ल साफ पीये के पानी उपलब्ध कराय बर घरेलू नल कनेक्सन दे जा चुके हे। लोक स्वास्थ्य यांत्रिकी मंत्री गुरू रूदकुमार ह बतइन कि ए योजना म पाछु एक पखवाड़ा म सवा लाख ले जादा घर मन म नल कनेक्शन दे गेहे। ओमन कहिन कि अवइया दिन म जल जीवन मिशन के काम म अउ तेजी लाय जाही।
इही बीच, नारायणपुर जिला ह जल जीवन सर्वेक्षण म देस के तिरालीस आकांक्षी जिला म दूसर स्थान पाय हे। ए योजना ल जल्दीच लागू करे बर नारायणपुर जिला ल ए रैंकिंग दे गेहे। मुख्यमंत्री भूपेश बघेल अउ लोक स्वास्थ्य यांत्रिकी मंत्री गुरू रूद्रकुमार ह जिला के ए उपलब्धि बर विभागीय अधिकारी अउ कर्मचारी मन ल बधाई दीन हे।
दुर्ग-लूट
दुरूग म पांच झिन लोगन ह खुद ल प्रवर्तन निदेशालय-ईडी के अधिकारी बताके एक करोबारी ले दू करोड़ रूपिया लूट लीन। जिला के पुलिस अधीक्षक शलभ सिन्हा ह बतईन कि दिनदहाड़े होय ए घटना के विवरण सीसीटीवी कैमरा के मदद ले उजागर होय हे। ए मामला म पीड़ित कारोबारी के सिकायत के बाद पुलिस ह संदेह के आधार म आने-आने टीम बनाके आरोपी मनके तलास सुरू कर देहे।