छत्तीसगढ़ म एसो होवइया विधानसभा चुनई ल लेके राजनीतिक गतिविधि सरलग तेज होत जात हे। छत्तीसगढ़ कांग्रेस के बइठक आज नई दिल्ली म राष्ट्रीय अध्यक्ष मल्लिकार्जुन खड़गे अउ वरिष्ठ नेता राहुल गांधी के मौजूदगी म होय रीहिस। जेमा प्रदेश म होय वाले अवइया विधानसभा चुनई के तियारी ल लेके विचार विमर्श करे गीस।
बइठक म प्रदेश प्रभारी कुमारी शैलजा, मुख्यमंत्री भूपेश बघेल, प्रदेश अध्यक्ष मोहन मरकाम समेत कतकोन पदाधिकारी मन सामिल होइन। बइठक के बाद राष्ट्रीय अध्यक्ष श्री खड़गे ह ट्वीट करत कीहिन कि जनता के भरपूर विस्वास हे। कांग्रेस पार्टी ह लोगन मन संग मिलके काम करही।
उंहे भारतीय जनता पार्टी डहार ले काली उनतीस जून के रायपुर के पंडित दीनदयाल ऑडिटोरियम म लाभार्थी सम्मेलन के आयोजन होही। कार्यक्रम म मुख्य अतिथि के रूप म भाजपा के राष्ट्रीय उपाध्यक्ष, अउ पूर्व मुख्यमंत्री डॅाक्टर रमन सिंह ह मौजूद रीहिन।
प्रधानमंत्री नरेंद्र मोदी के नेतृत्व म केंद्र के एनडीए सरकार के नौ बछर पूरा होय म नया भारत उत्सव के अंतर्गत युवा संसद कार्यक्रम के आयोजन आज राष्ट्रीय प्रौद्योगिकी संस्थान-एनआईटी रायपुर म करे गीस।
कार्यक्रम म सांसद सुनील सोनी ह एनआईटी के लईका मनले गोठ करीन। लईका मन ह घलो सांसद ले केंद्र सरकार के आने आने योजना, कार्यक्रम, नीति अउ उपलब्धि के बारे म सवाल करीन। सांसद ह पढ़ईया लइका मनके सवाल के जवाब देत कीहिन कि पाछू नौ बछर म भारत के प्रतिष्ठा ह विदेश म बाढ़े हे। केंद्र सरकार ह स्वच्छ भारत मिशन, प्रधानमंत्री आवास योजना, जल जीवन मिशन जइसे योजना ले देश के ग्रामीण क्षेत्र म बदलाव लाय हे।
छत्तीसगढ़ उच्च न्यायालय ह रायपुर के कृषि उपज मंडी परिसर म जेम्स एंड ज्वेलरी पार्क के स्थापना ल लेके दायर याचिका ल निराधार मानत हुए खारिज कर देहे। राज्य सरकार कोति ले रायपुर के पंडरीतराई म लगभग दस लाख वर्गफीट म जेम्स एंड ज्वेलरी पार्क के स्थापना करे जाना हे। इंहा लगभग दू हजार दुकान बनही।
जानबा के अनुसार बछर दू हजार बीस म पूर्व विधायक देवजी भाई पटेल डहार ले एक ठिन याचिका बिलासपुर हाईकोर्ट म दायर करे गे रीहिस। उंहे हाईकोर्ट ह रायपुर के अनुपम गार्डन करा यूथ ह ग्रीन कॉरिडोर अउ वेडिंग जोन उपर रोक लगाय बर दायर करे गे जनहित याचिका ल घलो खारिज कर देहे। ए याचिका ल पूर्व मंत्री राजेश मूणत ह दायर करे रीहिन।
सुकमा जिला म ग्राम पंचायत बुरकापाल के उप सरपंच माड़वी गंगा के माओवादी मन ह अपहरण कर लीस । मिले खबर के मुताबिक पाछू रतिहा माओवादी ताड़मेटला के उप सरपंच के घर पहुंचीन अउ ओमन ल अपन संग ले गीन।
खबर के मुताबिक माओवादी मन ह उपसरपंच के संग ताड़मेटला इलाका ले चौदा झिन अउ मनखे मन ल अगवा करे हे। जेखर बाद सर्व आदिवासी समाज के संगेसंग आने आने सामाजिक संगठन ह सबो झिन के सकुशल रिहाई के मांग माओवादी मनले करीन हे।
छत्तीसगढ़ म अवइया विधानसभा चुनई के प्रशासनिक तैयारी जोरशोर ले चलत हे। ए घांव घलो चुनई म एम-थ्री मॉडल के ईवीएम अउ वीवीपैट मशीन बउरे जाही। प्रदेश म पाछू कुछएक चुनाव म घलो ए मॉडल के मशीन के प्रयोग करे जा चुके हे।
भारत निर्वाचन आयोग के निर्देशानुसार राज्य म स्वतंत्र, निष्पक्ष अउ पारदर्शी चुनई बर सबो जिला मन म ईवीएम अउ वीवीपैट मशीन के प्रथम स्तरीय जांच, मान्यता प्राप्त राजनीतिक दल के प्रतिनिधि मनके मौजूदगी म होवत हे। आयोग के प्रोटोकॉल के पालन करत मशीन के साफ-सफई, प्रामाणिकता अउ मशीन के शुद्धता के जांच के कार्यवाही करे जावत हे।
छत्तीसगढ़ अनुसूचित जाति सलाहकार परिषद के पहिली बइठका मुख्यमंत्री भूपेश बघेल के अध्यक्षता म रायपुर म होइस। बइठका म मुख्यमंत्री ह कहिन कि राज्य सरकार समाज के सबो वर्ग समेत अनुसूचित जाति वर्ग ल शैक्षणिक सामाजिक अउ आर्थिक रूप ले सशक्त बनाय बर हरसंभव कोसिस करत हे ।ओमन ह कहिन कि परिषद कोति ले अनुसूचित जाति वर्ग के उत्थान बर परामर्श दे जाही।
बइठका म मुख्यमंत्री ह विभागीय अधिकारी मन ल अभियान चलाके छात्रावास के निरीक्षण अउ साफ सफई ल सुनिश्चित करे के निर्देश घलो दीन हे। संगेसंग अनुसूचित जाति वर्ग के बहुलता वाले संभाग म प्राथमिकता के आधार म छात्रावास के उन्नयन अउ सीट के संख्या बढ़ाय बर घलो कीहिन हे। मुख्यमंत्री ह राज्य सरकार कोति ले जाति प्रमाण पत्र ल बनाये के प्रक्रिया म करे गे सरलीकरण के प्रावधान के प्रचार प्रसार करे के घलो निर्देश दीन हे।
उंहे मुख्यमंत्री के अध्यक्षता म छत्तीसगढ़ अन्य पिछड़ा वर्ग के सलाहकार परिषद के घलो पहिली बइठका होइस। बइठका म मुख्यमंत्री ह कहिन कि अन्य पिछड़ा वर्ग म शामिल सबो वर्ग ल शासन डहार ले संचालित योजना के जादा ले जादा फायदा उठाना चाही।
ईद-उल-अजहा के तिहार काली छत्तीसगढ़ समेत देशभर म मनाये जाही। त्याग अउ बलिदान के ए तिहार म मुस्लिम समुदाय के मनखे मन कोति ले ईदगाह अउ मस्जिद म नमाज अदा करे जाही। एखर बर रायपुर अउ दुर्ग समेत प्रदेशभर के कतकोन ईदगाह अउ मस्जिद म विशेष बेवस्था करे गेहे।
प्रदेश म पाछू कुछ दिन ले सरलग होवत बारिश ले नदिया नाला के पानी ह बाढ़ गेहे। दुर्ग जिला म शिवनाथ नदी के जलस्तर ह छै फीट उपर बोहावत हे। जिला प्रशासन के संगेसंग एनडीआरएफ के टीम ह स्थिति उपर नजर राखे हे।
उंहे कोरबा जिला म तेज बरसा के सेती पाली विकासखंड के पोड़ी पाली रद्दा म गुंजन नाला म बनत अस्थायी रद्दा के बोहाय ले अठारा ठिन गांव के रद्दा बंद होगे हे।
एति बिलासपुर के अरपा-भैंसाझार बैराज परियोजना के जल ग्रहण क्षेत्र म जलभराव म बढ़ोत्तरी होय के सेती आज बैराज ले अरपा नदी म तिरपन क्यूसेक पानी छोड़े गीस ।
इही बीच मौसम विभाग ह अवइया चौबीस घंटा के बेरा म प्रदेश के कुछु जगा म हल्का ले मध्यम बरसा होय अउ गरज चमक के संग आकासीय बिजली गिरे के संभावना जताय हे। मौसम विभाग के अनुसार एक ठिन निम्न दाब के क्षेत्र उत्तर पूर्व मध्यप्रदेश के उपर हवय अउ उपरी हवा के चक्रीय चक्रवाती घेरा बने हुए हे। उंहे एक ठिन द्रोणिका ह राजस्थान ले बंगाल के खाड़ी कोति जात हे। जेखर असर ले प्रदेशभर म बरसा के गतिविधि म कमी आय के संगेसंग काली ले अधिकतम तापमान म बढ़ोत्तरी घलो संभावित हे।
उन्नीसवां राज्य स्तरीय जूनियर अउ छठवां कैडेट ताइक्वांडो प्रतियोगिता के आयोजन रायगढ़ म सत्ताईस अउ अठाईस जून के होइस, जेमा प्रदेशभर ले कतकोन जिला के ढाई सौ ले जादा खिलाड़ी मन हिस्सा लीन। प्रतियोगिता म चयनित खिलाड़ी मन ल ताइक्वांडो फेडरेशन ऑफ इंडिया डहार ले आयोजित राष्ट्रीय प्रतियोगिता म प्रतिनिधित्व करे के मउका मिलही।
– राष्ट्रीय सांख्यिकी कार्यालय डहार ले काली उनतीस जून के रायपुर के पंडित रविशंकर शुक्ल विश्वविद्यालय के कला संकाय सभागृह म सतरहवां सांख्यिकी दिवस के आयोजन करे जाही।
– बरसा ल देखत हुए बस्तर के कांकेर घाटी राष्ट्रीय उद्यान के अंदर अवइया कोटमसर गुफा, कैलाशगुफा अउ आने सबो गुफा वाले जगा ले छब्बीस जून ले इकतीस अक्टूबर तक पर्यटक मन बर बंद कर दे गेहे।
– नगर पालिका उपचुनई के तहत तीस जून के बीहनिया नौ बजे ले प्रदेश के सात ठिन जिला के आठ नगरीय निकाय के रिक्त आठ पार्षद पद बर वोट के गिनती करे जाही।
– जांजगीर-चांपा जिला रोजगार कार्यालय म तीस जून के बीहनिया ग्यारा बजे ले प्लेसमेंट कैंप के आयोजन करे जाही।