शाला प्रवेश उत्सव
प्रदेस म आज ले नवा शिक्षा सत्र अउ शाला प्रवेश उत्सव के शुरूआत होगे हे। मुख्यमंत्री भूपेश बघेल ह आज रायपुर के प्रोफेसर जे.एन. पांडेय स्कूल म राखे गे एक समारोह म लईका मन ल तिलक लगाके मिठई खवइन। ए बेरा म मुख्यमंत्री ह स्कूल पढ़ईया लइका मन ल स्कूल डरेस, किताब अउ बस्ता घलो बांटिन। ओमन कीहिन कि आज के बेरा म स्कूल मन म शिक्षा के वातावरण बनाना जरूरी हे। लईका मन ल पढ़ई के संग खेलकूद अउ अनुशासन के धियान घलो देना हे।
मुख्यमंत्री ह कहिन कि स्वामी आत्मानंद स्कूल के खुले ले राज्य म शिक्षा कोति लोगन के रूचि बाढ़े हे। समारोह म मुख्यमंत्री ह ऐतिहासिक प्रोफेसर जे.एन. पांडेय स्कूल के जीर्णोद्धार बर पांच करोड़ रूपिया के रकम मंजूर करीन। ओमन बताइन कि प्रदेश के स्कूल मन म जीर्णोद्धार अउ मरम्मत खातिर बजट म बारा सौ करोड़ रूपिया के रकम मंजूर करे गे रीहिस।
ये बेरा म मुख्यमंत्री ह बालवाड़ी योजना के दूसर चरण म वचुअर्ल रूप ले चार हजार तीन सौ अठारा बालवाड़ी के शुरूआत करीन। राज्य म बालवाड़ी ले पांच ले छै बछर के लइका मनके बुनियादी शिक्षा कोति जागरूक करे के प्रयास करे जात हे। खबर के मुताबिक प्रदेश म शाला प्रवेश उत्सव अवइया पंद्रह जुलाई तक मनाये जाही।
केंद्र सरकार 9 साल
केंद्र सरकार के नौ बछर पूरा होय म मुंगेली म पत्र सूचना कार्यालय रायपुर कोति ले वार्तालाप कार्यक्रम राखे गीस। कार्यक्रम के मुख्य अतिथि बिलासपुर सांसद अरूण साव रीहिन उंहे कार्यक्रम के अगवई विधायक पुन्नूलाल मोहिले ह करीन। ये दउरान भाजपा सांसद अरूण साव ह कहिन कि केंद्र सरकार के नौ बछर सेवा सुशासन अउ गरीब कल्याण के रहे हे। कार्यक्रम म भारतीय पोस्ट कोति ले नौ बछर म केंद्र सरकार कोति ले शुरू करे गे आने आने योजना अउ ओला चलाय के जानकारी दे गीस।
भारतीय खाद्य निगम के अधिकारी मन ह प्राकृतिक आपदा के स्थिति म केंद्र सरकार कोति ले मिलइया खाद्यान्न सहायता के जानकारी दीन। अधिकारी मन बताइन कि केंद्र सरकार कोति ले कुपोषण मुक्त भारत बनाय के उद्देश्य ले गरीब अउ कुपोषित लोगन मन ल पीडीएस ले चांउर दे जावत हे। पत्रकार कल्याण कोष के संबंध म क्षेत्रीय प्रचारक ह बताइन कि पत्रकार कल्याण योजना म मउत होय म पीड़ित परिवार ल पांच लाख के आर्थिक सहायता के प्रावधान हरय उंहे विकलांगता म दू लाख रूपिया के आर्थिक सहायता दे जात हे। स्वास्थ्य सुविधा के लाभ उठाय बर संस्था के आईडी आधार कार्ड, बैंक पास बुक जइसन दस्तावेज जमा कराय बर पड़ही। एखर बर संबंधित संस्था के रजिस्ट्रेशन होना जरूरी हे।
कार्यक्रम म सुवागत भाषण पत्र सूचना कार्यालय रायपुर के उपनिदेशक रमेश जयभाये ह दीन। आभार प्रदर्शन क्षेत्रीय प्रचारक बिलासपुर के डॅाक्टर प्रेमसिंह वर्मा ह करीन।
पंचायत उप चुनाव
प्रदेश म नगर पालिका अउ त्रि-स्तरीय पंचायत मन म एक सौ अंठानबे खाली पद बर काली सत्ताईस जून के वोट डारे जाही। ये उपचुनाव म पांच सौ पचपन प्रत्याशी के भाग्य के फैसला होही। नगर पालिका म पार्षद के आठ पद बर अठारा अउ त्रिस्तरीय पंचायत के एक सौ अंठानबे पद बर पांच सौ सैंतीस प्रत्याशी चुनाव मैदान म हवय। नगर पालिका परिषद चांपा, नगर पंचायत खरोरा अउ तुमगांव, नगर निगम दुर्ग, नगर पालिका अहिवारा अउ बेमेतरा, नगर पंचायत अंबागढ़ चौकी, नगर पालिका कोंडागांव, पार्षद के खाली एक-एक पद बर काली बीहनिया आठ बजे ले संझा पांच बजे तक वोट डारे जाही। मत के गिनती अउ चुनाव के नतीजा के घोषणा तीस जून के होही।
अइसने त्रिस्तरीय पंचायत के खाली पद बर काली बीहनिया सात बजे ले मंझनियां तीन बजे तक मतदान होही। नतीजा तीस जून के आही। मतदाता वोट डारे बर मतदाता परिचय पत्र के संगेसंग आधार कार्ड, पैन कार्ड, ड्राइविंग लाइसेंस समेत अठारा किसम के दस्तावेज के उपयोग कर सकत हे।
अंतर्राष्ट्रीय नशा निवारण दिवस
आज अंतर्राष्ट्रीय नशा अउ मादक द्रव्य तस्करी निषेध दिवस मनाये जात हे। ये बेरा म अपन संदेश म केंद्रीय गृह मंत्री अमित शाह ह कहिन कि सरकार के संकल्प हवय कि भारत म नशीला जीनिस के व्यापार नइ होन देवन अउ न ही भारत ले मादक जीनिस ल विश्व म कहूं बाहिर जावन दन।
ये मउका म छत्तीसगढ़ म घलो नशा के खिलाफ जनमत बनाये खातिर सबो जिला म आने आने विभाग के मदद ले प्रचार प्रसार अउ जन जागरूकता बर अभियान चलाये गीस। संगेसंग भारत माता वाहिनी ले पंचायत म नशामुक्ति बर कार्यक्रम राखे गीस।
मानसून
छत्तीसगढ़ म मानसून सक्रिय होगे हे। मौसम विभाग ह अवइया चौबीस घंटा म बेमेतरा, बिलासपुर, दुर्ग, कबीरधाम, मुंगेली जिला के एक दू जगा म भारी बरसा के चेतावनी दे गेहे। मौसम विभाग ले मिले जानकारी के मुताबिक अभी निम्न दाब के क्षेत्र उत्तर ओडिशा अउ ओखर ले लगे दक्षिण झारखंड अउ उत्तरीय छत्तीसगढ़ के उपर बने हवय। जेखर प्रभाव ले छत्तीसगढ़ म काली कतकेन जगा म गरज-चमक संग छींटा बौछार के संभावना हे। संगेसंग भारी बरसा के क्षेत्र मुख्य रूप ले बिलासपुर अउ दुर्ग संभाग के जिला म रेहे के संभावना हवय।
उंहे पाछू चौबीस घंटा म के दउरान प्रदेश म रायपुर, महासमुंद, बिलासपुर, मुंगेली, सुकमा, बलौदाबाजार, गरियाबंद, बलरामपुर समेत कतकेन जिला म रूक रूक के बरसा होय के समाचार मिले हे। रायगढ़ म होय बरसा के सेती कतकोन कालोनी अउ मोहल्ला म पानी भरगे। भारी बारिस ल देखत कलेक्टर तारण प्रकाश सिन्हा ह जिला प्रशासन ल अलर्ट करे हे। ओमन जउन पंचायत म बाढ़ के स्थिति बनत हे उंहा विशेष सावधानी राखे के निर्देश दीन हे।
एति कोरिया जिला के बुड़हार म बरसा के सेती दीवार ढहे ले ओमा एक मनखे के दबे ले मउत होगे। राजनांदगांव जिला म सरलग होवत बरसा के सेती नंदिया नरवा के जलस्तर बाढ़ गेहे।
आईईडी बरामद
कोंडागांव नारायणपुर रद्दा म केंद्रीय रिजर्व पुलिस बल सीआरपीएफ अउ जिला पुलिस बल ह संयुक्त तलाशी अभियान के बेरा पांच किलो के बम बरामद करे हे, जेला माओवादी मन ह जवान मन ल नकसान पहुंचाय खातिर गुना गांव तीर लगाय रीहिन। बरामद होय आईईडी ल सुरक्षा बल ह मउकाच म नष्ट कर दीस।
गोंचा महापर्व
जगदलपुर म काली प्रसिद्ध बस्तर गोंचा महापर्व धूमधाम ले मनाये गीस। परंपरा के मुताबिक गुंडिचा मंदिर, जनकपुरी, सिरहासार भवन म भगवान जगन्नाथ स्वामी के विधि विधान ले छप्पन भोग लगाके विशेष आरती करे गीस। ये कार्यक्रम म मुख्यमंत्री भूपेश बघेल वचुअर्ल रूप म सामिल होइन। मुख्यमंत्री ह भगवान जगन्नाथ ले प्रदेसवासी मनके सुख समृद्धि अउ खुशहाली के मानता मानीन। ए बेरा म मुख्यमंत्री ह कहिन कि गोंचा परब छत्तीसगढ़ के महापरब हे। बस्तर के दसहरा अउ गोंचा परब बहुते सुघ्घर हे, जउन आने आने संस्कृति के मेल हवय।
खबर के मुताबिक गांचा महापरब चार जून ले सुरू होय हे अउ एखर कतकोन रसम अठाईस जून तक चलही।
अउ अब थोरकुन समाचार सार म-
– रायपुर जिला के धरसीवां तहसील म राजस्व संबंधी प्रकरण के निपटान बर काली शिविर लगाये गीस। ए शिविर म एक सौ इकतीस प्रकरण के तुरते निपटान करे गीस। संगेसंग आय अउ निवास प्रमाण पत्र संबंधी आवेदन उपर शिविर म ही प्रमाण पत्र बनाके दे गीस।
– राजधानी रायपुर म काली बोरियाखुर्द इलाका म एक फटफटी अंते तंते होके खड़े टरक ले टकरा गीस। ए हादसा म फटफटी सवार दू झिन मनखे के मउकाच म मउत होगे।
अउ
– कोरबा जिला के उरगा थाना क्षेत्र के कोथारी रेलवे फाटक के तीर काली रतिहा मालगाड़ी के चपेट म आय ले एक झिन मनखे के मउकाच म मउत होगे।