प्रदेश म चरचरावत घाम अउ लू जइसन स्थिति ल देखत राज्य सरकार ह स्कूल मन म गर्मी के छुट्टी के बेरा ल सोला जून ले बढ़ाके पच्चीस जून तक कर देहे। स्कूल शिक्षा विभाग डहार ले जारी आदेश के मुताबिक अब स्कूल छब्बीस जून के खुलही। प्रदेश म ए बेरा जोरदरहा गर्मी पड़त हे, जेला देखत राज्य सरकार ह लइका मनके सुरक्षा बर गर्मी के छुट्टी के बेरा ल बढ़ाय के निर्देश दे हवय।
केंद्र सरकार ह राज्य मनले थोक विक्रेता, फुटकर व्यापारी अउ बड़का श्रृंखला विक्रेता के संगेसंग प्रोसेसर्स मनले गहूं के भंडारण के जानबा लेबर केहे हे। जेखर ले कोनो प्रकार के गलत ढंग ले काम काज झन हो पाय। गंहू के भाव मन म कमी लाय अउ बाजार म गंहू बने ढंग ले मिल पाय एखर बर खाद्य अउ सार्वजनिक वितरण मंत्रालय के सचिव संजीव चोपड़ा ह काली वीडियो कॉन्फ्रेंिसंग के माध्यम ले राज्य मनके खाद्य सचिव के संग बइठका करीन।
तेंदूपत्ता संग्रहण पारिश्रमिक
प्रदेश म तेंदूपत्ता सकलइया मन ल चार सौ चौबीस करोड़ ग्यारा लाख रूपिया के प्रोत्साहन मेहताना दे जाही। ए बारे म वन विभाग ह आदेश जारी कर देहे – राज्य लघु वनोपज संघ के प्रबंध संचालक अनिल कुमार राय ह बताइन कि बछर दू हजार इक्कीस म फायदा म रहे सात सौ तैंतीस समिति मनके करीबन साढ़े नौ लाख तेंदूपत्ता सकलइया मन ल एक सौ तिरसठ करोड़ बैंसठ लाख रूपिया के प्रोत्साहन राशि दे जाही।
उंहे पाछू साल फायदा म रहे छै सौ इकसठ समिति मनके आठ लाख इकसठ हजार ले जादा तेंदूपत्ता सकलइया मन ल दू सौ साठ करोड़ उनचास लाख रूपिया के प्रोत्साहन राशि बांटे जाही।
नेशनल परीक्षा एजेंसी ह मेडिकल स्नातक प्रवेश परीक्षा – नीट यूजी के परिणाम जारी कर देहे। प्रवेश परीक्षा पास करइया सबले जादा परीक्षार्थी उत्तर प्रदेश के हरय। जेखर बाद महाराष्ट्र अउ राजस्थान के छात्र मन ह पास होय हे। राष्ट्रीय परीक्षा एजेंसी – एनटीए ह पाछू सात मई के प्रवेश परीक्षा कराय रीहिस।
प्रधानमंत्री नरेंद्र मोदी ह ए महीना के अठारा तारीख के मन की बात कार्यक्रम म देश के लोगन मन संग अपन विचार साझा करहीं। एक ठिन ट्वीट संदेस म प्रधानमंत्री ह ए कार्यक्रम बर लोगन मनले सुझाव मंागे हे। कार्यक्रम बर अपन सुझाव नमो ऐप अउ माई जीओव्ही म भेज सकथे। संगेसंग टेलीफोन नंबर एक आठ शून्य शून्य एक एक सात आठ शून्य शून्य म घलो अपन सुझाव दे सकथे। या एक नौ दू दू म मिस्ड कॉल देके घलो एसएमएस के माध्यम ले मिले लिंक ले सुझाव भेज सकथे।
आज विश्व रक्तदाता दिवस हरय। ये दिन ल हर साल अइसन मनखे मन ल आभार व्यक्त करे बर मनाये जाथे, जउन मन रक्तदान करथे। एसो के विश्व रक्तदाता दिवस अभियान के नारा हे – रक्त दो, प्लाज्मा दो, जीवन साझा करो। प्रदेश म घलो विश्व रक्तदाता दिवस के मउका म कतकेान कार्यक्रम राखके लोगन मन ल रक्तदान बर आगू लाय के प्रयास करे गेहे।
बस्तर जिला के परचनपाल म छत्तीसगढ़ बालिका बटालियन एनसीसी डहार ले रक्त्दान शिविर के आयोजन करे गीस। शिविर म जगदलपुर स्थित झाड़ा सिरहा शासकीय इंजीनियरिंग महाविद्यालय के चालीस कैडेट अउ कोंडागांव के शासकीय गुण्डाधुर पीजी महाविद्यालय के पच्चीस कैडेट मन ह रक्तदान करीन। ए मउका म छत्तीसगढ़ बालिका बटालियन एनसीसी के कमान अधिकारी कर्नल संजय चावला, ग्रुप कमंाडर ब्रिगेडियर वी.एस. चौहान, एनसीसी केयर टेकर प्राचार्य अउ शिक्षक मन आय रीहिन।
मलेरिया मुक्त अभियान
प्रदेस म काली ले मलेरिया मुक्त अभियान के संगेसंग सघन कुष्ठ खोज अभियान अउ राष्ट्रीय नेत्र ज्योति अभियान सुरू होहीं। मलेरिया मुक्त अभियान के आठवां चरण म प्रदेस के तेईस ठिन जिला म एखर जांच करे जाही। ए दउरान स्वास्थ्य विभाग के टीम कोति ले करीबन बाइस लाख लोगन मन के जांच करे जाही । उंहे प्रदेस के जम्मों तैंतीस ठिन जिला म सघन कुष्ठ खोज अभियान अउ राष्ट्रीय नेत्र ज्योति अभियान ल संघरा चलाय जाही। ए बेरा म कुष्ठ रोगी मनके पहिचान करत हुए जांच अउ ओखर ईलाज करे जाही।
महामारी नियंत्रण के संचालक डॉक्टर सुभाष मिश्रा ह बताइन कि दस जुलाई तक चलइया मलेरिया मुक्त अभियान बर प्रदेस भर म दू हजार आठ सौ चउवन ठिन टीम के गठन करे गेहे। ओमन ह बताइन कि बस्तर संभाग के सबों सात जिला के संगेसंग प्रदेस के तेईस ठिन जिला मन म पच्चीस दिन तक ए अभियान चलाय जाही।
युवा संगम
एक भारत-श्रेष्ठ भारत योजना के तहत छत्तीसगढ़ अउ नागालैंड के बीच युवा संगम कार्यक्रम के आयोजन करे जात हे । जेमा एनआईटी रायपुर के छात्र मन ह काली नागालैंड जाही त उंहे ए कार्यक्रम के तहत नागालैंड के युवा मन ह काली छत्तीसगढ़ के दउरा करही।
छत्तीसगढ़ के अपन पांच दिन के प्रवास के दउरान ये युवा मन ह भिलाई स्टील प्लांट, सिरपुर, संग्रहालय के दौरा करही। ये दल उन्नीस जून के राजयपाल ले मिलही।
जांजगीर-चंापा जिला म भुंइया के पानी के समस्या ल कम करे, पानी बचाय अउ पानी के बने ढंग ले उपयोग करे बर हमर पानी अभियान चलाय जात हे। अभियान के तहत गांव-गांव म लोगन मनके सामूहिक भागीदारी ले तरिया, कुंआ अउ बनाये गे रिचार्ज वाले जगा के साफ सफाई करे जात हे।
आठ जून ले शुरू होय ये अभियान ह पंद्रह जून तक चलही अउ संगेसंग ग्यारा जून ले हर घर रिचार्ज स्ट्रक्चर बनाये के काम घलो शुरू करे गेहे जउन ह इक्कीस जून तक चलही। ये अभियान के तहत गांव मन म पानी बचाय बर रिचार्ज पिट घलो बनाये जात हे।
नारायणपुर-जाति प्रमाण पत्र
नारायणपुर जिला म ओरछा विकासखंड के अबूझमाड़ के पहिली ले बारहवीं कक्षा तक के जम्मों छात्र-छात्रा मन ल जाति प्रमाण पत्र देके काम शुरू होगे हे। आबकारी मंत्री अउ जिला के प्रभारी मंत्री कवासी लखमा अउ विधायक चंदन कश्यप ह स्कूली लईका मन ल काली जाति प्रमाण पत्र बांटिन।
जानबा के मुताबिक मुख्यमंत्री के निर्देश उपर नवा शिक्षा सत्र शुरू होय के पहिली जिला प्रशासन ह जाति प्रमाण पत्र जारी करे के काम शुरू कर देहे।
केंद्र सरकार अउ श्रम मंत्रालय मॉडल कैरियर सेंटर जबलपुर अउ विशेष रोजगार कार्यालय ह मिलके दिव्यांगजन मन बर उपयुक्तता प्रमाण पत्र शिविर के आयोजन करही। बीस अउ इक्कीस जून के बीहनिया दस बजे ये शिविर ह रायपुर के सिविल लाइन स्थित पुराना पुलिस मुख्यालय परिसर म होही।
विशेष रोजगार कार्यालय रायपुर के उप संचालक डॅाक्टर शशि अतुलकर ह बताइन कि दिव्यांगजन मन ल व्यावसायिक पाठ्यक्रम प्रवेश परीक्षा मन म पास होय के बाद कॉलेज मन म प्रवेश अउ नौकरी मिले के बेरा पात्रता प्रमाण पत्र के जरूरत होथे, जेला बनवाय बर ओमन ल जबलपुर के श्रम अउ रोजगार मंत्रालय के ऑफिस म जाना पड़थे। इही परसानी ल देखत दिव्यांगजन मनके सुविधा बर ए शिविर ल रायपुर म राखे गेहे ।
ए शिविर म छत्तीसगढ़ के दिव्यांगजन मन भाग ले सकथे। प्रदेश के दिव्यांगजन मन अठारा जून के पहिली अपन पंजीयन करा सकथे।
रायगढ़ राज परिवार के स्वर्गीय महाराजा चक्रधर सिंह के बेटा अउ अविभाजित मध्यप्रदेश म केबिनेट मंत्री रहे कुंवर भानुप्रताप सिंह के आज रायपुर के एक ठिन प्रायवेट अस्पताल म निधन होगे। ओमन नब्बे साल के रीहिन। मुख्यमंत्री भूपेश बघेल ह ओखर निधन उपर दुख व्यक्त करे हे।
अउ अब थोरकुन समाचार सार म-
– रायपुर संभाग के नवा आयुक्त डॅाक्टर संजय अलंग ह आज अपन कामकाज संभालीन। डॅाक्टर अलंग ह एखर पहिली बिलासपुर संभाग के आयुक्त रीहिन। ओमन दू हजार चार बैच के भारतीय प्रशासनिक सेवा के अधिकारी हरय।
– रायपुर जिला के शासकीय बालकखेल परिसर गोगांव म नवा शैक्षणिक सत्र म अन्य पिछड़ा वर्ग के छठवीं ले आठवीं कक्षा तक के छात्र मन बर भर्ती प्रक्रिया शुरू होगे हे। अर्जी करे के आखरी तारीख अठाईस जून राखे गेहे ।
अउ
– धमतरी जिला के वन परिक्षेत्र केरेगांव म चीतल के शिकार करे के मामला म वन विभाग के दस झिन गांव के लोगन मन ल पकड़े गेहे।