केन्दीय राज्यमंत्री गिरीराज सिंह काली ले दस जून तक चार दिवसीय प्रवास म बस्तर आही। ओमन कई ठन कार्यक्रम म सामिल होही अउ आठ जून के जगदलपुर म जनसभा ल संबोधित करही।
भाजपा के प्रदेश महामंत्री केदार कश्यप ह आज जगदलपुर म पत्रकारवार्ता म बताइन कि प्रधानमंत्री नरेंद्र मोदी के अगवई म केंद्र सरकार के नौ बछर पूरा होय के मउका म देशभर म तीस मई ले तीस जून तक महाजनसंपर्क अभियान चलाये जात हे। ए दउरान भाजपा के जनकल्याणकारी योजना ल जनता तक पहुंचाय जाही।
ओमन बताइन कि जून महीना के आखरी हप्ता म देशभर म हरएक मतदान केंद्र म भाजपा ह घरोघर जाके संपर्क अभियान चलाही।
मुख्यमंत्री कोंडागांव
मुख्यमंत्री भूपेश बघेल आज अपन एक दिन के दउरा म कोंडागांव जिला के गांव बेड़मा पहुचीन। ए दउरान ओमन दू सौ तेरा करोड़ रूपिया ले जादा के पांच सौ सत्ताईस ठन विकास काम के लोकार्पण अउ भूमिपूजन करीन।
ए मउका म मुख्यमंत्री ह डॅाक्टर तुमचो दुआर योजना के सुरूआत करीन। ए पायलट प्रोजेक्ट के तहत जिला के बड़ेराजपुर अउ फरसगांव विकासखंड के दूर दराज के गांव मन म स्वास्थ्य सुविधा टेलीमेडिसिन के माध्यम ले देवाय जाही। एखर बर एक ठन कॉल सेंटर घलो बनाय गेहे। ए कॉल सेंटर म चौबीसो घंटा कर्मचारी मनके ड्यूटी लगाय जाही।
कार्यक्रम म श्री बघेल ह एनीमिया मुक्त कोंडागांव अभियान के तहत एनीमिया बीमारी ले मुक्त होय शैक्षणिक संस्थान मन ल सम्मानित घलो करीन। ओमन बेड़मा गांव के पांच सौ पंद्रह झन युवा मन ल नियुक्ति पत्र सौंपीन।
कोंडागांव प्रवास के दउरान मुख्यमंत्री श्री बघेल ह शासकीय दंडकारण्य महाविद्यालय केशकाल ल पीजी कॉलेज के दर्जा देके संगेसंग डड़सेना कलार समाज मन बर केशकाल म सामुदायिक भवन बनाय के मंजूरी घलो दीन। श्री बघेल ह बहीगांव म पुलिस चौकी बनाय, विश्रामपुरी म विश्रामगृह अउ बेड़मा म सामुदायिक भवन बनाय के घोषणा करीन हे।
नौसेना टॉरपीडो
भारतीय नौसेना ह भारत म बनाये भारी वजन के टॉरपीडो के उपयोग करके पानी के भीतर लक्ष्य ल भेदे के सफल परीक्षण करे हे। नौसेना के प्रवक्ता ह बताइन कि देश म बने ए टॉरपीडो के सफल परीक्षण ह नौसेना अउ रक्षा अनुसंधान के संगेसंग विकास संगठन बर एक ठन बहुत बड़े उपलब्धि हरय।
भाजपा-महासंपर्क अभियान
केंद्र सरकार के नौ बछर पूरा होय के मउका म भारतीय जनता पार्टी डहार ले ए बेरा महासंपर्क अभियान चलाये जात हे। ए कड़ी म राजनांदगांव जिला म राखे गे महासंपर्क अभियान म ओडिशा भाजपा के पूर्व प्रदेश अध्यक्ष समीर मोहंती ह सामिल होइन। ए मउका म कार्यकर्ता मन ल ओमन केंद्र सरकार के योजना के जानकारी हितग्राही मन तक पहुंचाये बर कीहिन।
उंहे पत्रकार मनले गोठबात करत कीहिन कि केंद्र सरकार डहार ले चलाये जात योजना मनके फायदा ल प्रदेस के जनता ल नही मिल पात हे। श्री मोहंती ह आरोप लगाइन कि राज्य म कांग्रेस सरकार के नीति के सेती प्रधानमंत्री आवास योजना के फायदा हितग्राही मन ल नइ मिल पात हे।
केंद्रीय मंत्री नौ वर्ष
केन्द्रीय मत्स्य, पशुपालन अउ डेयरी विकास मंत्री पुरषोत्तम रूपाला ह कहिन हे कि किसान मनके हित अउ पशुधन के स्वास्थ्य म सुधार ल बने ढंग ले करे म पाछू नौ बछर ले केंद्र सरकार डहार ले सरलग प्रयास करे जात हे।
ओमन नई दिल्ली म एक ठन कार्यक्रम म बोलत कीहिन कि केंद्र सरकार डहार ले ग्रामीण अर्थव्यवस्था ल बढ़ाय बर बहुत बढ़िया काम करे हे।
शैलेन्द्र ध्रुव निधन
गरियाबंद जिला म एक दिन बर कलेक्टर बनाए गे शैलेन्द्र धु्रव के निधन होगे। शैलेन्द्र ह प्रोजेरिया नावके लाइलाज बीमारी ले पीड़ित रीहिस, जेखर सेती नान्हेपन म उखर शरीर ह सियान मन जइसे दिखत रीहिस हे। शैलेन्द्र के निधन म मुख्यमंत्री भूपेश बघेल ह दुख जताय हे।
खबर के मुताबिक शैलेन्द्र ह कलेक्टर बने के इच्छा जताय रीहिस, जेखर बाद मुख्यमंत्री के निर्देश म ओला दू बछर पहिली गरियाबंद जिला म एक दिन बर कलेक्टर बनाय गे रीहिस हे।
प्रदेश प्रभारी/सह प्रभारी छत्तीसगढ़
अखिल भारतीय कांग्रेस कमेटी के प्रदेश इकाई डहार ले काली बिलासपुर म संभागीय सम्मेलन के कार्यक्रम करे गीस। उंहे आठ जून के दुर्ग म संभागीय सम्मेलन के आयोजन करे जाही।
ए सम्मेलन म भाग ले बर अखिल भारतीय कांग्रेस कमेटी के सचिव अउ छत्तीसगढ़ प्रभारी सप्तगिरी शंकर उल्का ह काली सात जून के जगदलपुर के दउरा म आही। ए दउरान ओमन ह कार्यकर्ता मनके एक ठन बइठका लीही अउ ओखर बाद ओमन रायपुर आही। श्री उल्का ह आठ जून के दुर्ग प्रवास म रीही। ए दउरान ओमन दुर्ग संभागीय सम्मेलन म भाग लीहीं।
उंहे सह प्रभारी विजय जांगिड़ काली बिलासपुर म आयोजित संभागीय सम्मेलन म भाग लीहीं। एखर अलावा श्री जांगिड़ ह आठ जून के दुर्ग म आयोजित संभागीय सम्मेलन म भाग लीहीं।
भाजपा बैठक
ओडिशा के बालासोर म होय रेल दुर्घटना म जउन परिवार मन अपन रिश्तेदार के बारे म जानकारी नइ ले पाय हे, उंखर मन बर भारतीय रेलवे ह ओडिशा सरकार के मदद ले पता लगाय के पहल करे हे। ए दुर्घटना म प्रभावित यात्री मनके परिवार के सदस्य, रिश्तेदार, अउ संगी साथी, मृतक मनके फोटू के लिंक, आने-आने अस्पताल मन म भर्ती यात्री मनके सूची अउ अज्ञात शव के बारे म देगे विवरण के उपयोग करके पता लगा सकही।
ए रेल दुर्घटना म प्रभावित यात्री मनके परिवार अउ रिश्तेदार मन बर हेल्पलाइन नंबर – एक सौ उनतालीस ह चौबीसों घंटा काम करत हे। संगेसंग बीएमसी हेल्पलाइन नंबर – एक आठ शून्य शून्य तीन चार पांच शून्य शून्य छै एक ह चौबीसों घंटा अउ सातों दिन काम करत हे।
पंचायत निकाय चुनाव
प्रदेश म त्रि-स्तरीय पंचायत अउ नगरीय निकाय के आम अउ उपचुनाव बर नामांकन पत्र दाखिल करे के काम चलत हे। पाछू दू जून ले शुरू होय नामांकन पत्र दाखिल करे के काम ल नौ जून तक करे जाही। राज्य के आठ ठन जिला मनके नौ नगर पालिका के नौ ठिन वार्ड मन म नगरीय निकाय अउ राज्य क तैंतीस ठन जिला म सात सौ तिरसठ ठन खाली होय पद मन बर त्रिस्तरीय पंचायत के तहत चुनाव करे जाही।
इही बीच, राजनांदगांव के जिला निर्वाचन अधिकारी डोमन सिंह ह त्रिस्तरीय पंचायत चुनाव ल स्वतंत्र, निष्पक्ष अउ शांतिपूर्वक ढंग ले कराय बर संबंधित गांव मन म आमसभा, रैली अउ जुलूस के आयोजन उपर प्रतिबंध लगा देहे। आदेश म केहे गेहे कि चुनाव क्षेत्र म बिना अनुमति के सार्वजनिक सभा, रैली अउ जुलूस म कोनो प्रकार के शस्त्र, हथियार, लाठी लेके चलना या ओखर प्रदर्शन करे उपर पूरा तरीका ले प्रतिबंध लगाय गेहे।
हॉकी प्रतियोगिता
जांजगीर म राखे गे हॉकी प्रतियोगिता के फाइनल मैच ल मेजर ध्यानचंद हॉकी क्ल्ब ह जीत लीन। विजेता टीम ह जिला हॉकी एकेडमी टीम ल एक के मुकाबला म तीन गोल ले हरा दीन। उंहे बालिका वर्ग म जांजगीर ग्रीन ह जांजगीर ब्लू टीम ल तीन-शून्य के अंतर ले हरा दीन। प्रतियोगिता के समापन मउका म विजेता अउ उपविजेता टीम ल सम्मानित करे गीस। खबर के मुताबिक तीन दिवसीय ए प्रतियोगिता म कुल आठ ठन टीम ह भाग ले रीहिन।
एति राजनांदगांव म राखे गे सूर्यमुखी देवी स्मृति अखिल भारतीय टी-ट्वेंटी क्रिकेट प्रतियोगिता के फाइनल मैच ल छत्तीसगढ़ स्टेट क्रिकेट संघ ह जीत लीन। विजेता टीम ह ओडिशा क्रिकेट एसोसिएशन ल तीन विकेट ले हरा दीन। प्रतियोगिता के समापन मउका म विजेता टीम ल पांच लाख रूपिया अउ उपविजेता टीम ल तीन लाख रूपिया के पुरस्कार दे गीस।
अउ अब थोरकुन समाचार सार म-
– इंदिरा गांधी राष्ट्रीय मुक्त विश्वविद्यालय के रायपुर के क्षेत्रीय केन्द्र म अवइया शिक्षण सत्र म भर्ती बर ऑनलाइन पंजीयन के प्रक्रिया शुरू हो गेहे, जउन ह तीस जून तक चलही।
– राज्य म अनुसूचित जाति अउ आने पिछड़ा वर्ग के विद्यार्थी मनले कक्षा नवमीं म भर्ती बर ऑनलाइन आवेदन बारा जून तक मंगाय गेहे।
अउ
– सक्ती जिला म मोहंदीकला के तीर तीन झन अनजान आरोपी मन डहार ले एक किराना व्यापारी ले बीस लाख रूपिया के लूट के मामला ह आगू आय हे।