भारत निर्वाचन आयोग ह छत्तीसगढ़ समेत पांच राज्य के मुख्य सचिव मन ल चिट्ठी लिखके निर्वाचन ले जुड़े तइयारी ल तेज करे के निर्देस दिन हें। चिट्ठी म आयोग डाहर ले केहे गेहे कि कोनो घलो अधिकारी अउ कर्मचारी अपन गृहजिला म लंबा बेरा तक पदस्थ झन रहय, जउन कोनो तरह ले निर्वाचन कारज ले जुड़े हें।
बतादन कि छत्तीसगढ़ विधानसभा के कार्यकाल तीन जनवरी बछर दू हजार चैबीस के खतम होवत हे। अइसने मध्यप्रदेस, राजस्थान, मिजोरम अउ तेलंगाना विधानसभा के कार्यकाल घलो जनवरी बछर दू हजार चौबीस के खतम होवत हे।
राज्यपाल वार्षिक सम्मेलन
राज्यपाल विश्वभूषण हरिचंदन ह किहीन हे कि चिकित्सा के क्षेत्र म शिक्षा अउ शोध ल विशेषज्ञ मन प्रोत्साहित करंय, जेखर ले रोगी मन ल सही उपचार मिल सकय। आज रायपुर म छत्तीसगढ़ ओबेसिटी डायबिटीज एंड एंडोक्राइन सोसाइटी के पहिली वार्षिक सम्मेलन के उद्घाटन के मउका मन ओमन किहीन कि कतकोन बीमारी के उपचार बर विशेषज्ञ के कमी के सेती मरीज मन ल परेसानी होथे। चिकित्सा के क्षेत्र म शोध कारज ल बढ़ावा दे ले बीमारी मन के चिन्हारी के संग ओकर उपचार घलो बेरा म हो सकही। राज्यपाल ह ऐखर ले जुड़े जन -जागरूकता कार्यक्रम आयोजित करे के गोठ घलो किहीन।
राष्ट्रीय रामायण महोत्सव – समापन-01
रायगढ़ के रामलीला मैदान म आयोजित तीन दिवसीय राष्ट्रीय रामायण महोत्सव काली संपन्न होइस। मुख्यमंत्री भूपेश बघेल समापन कार्यक्रम के संगे केलो नदी के तट म आयोजित महाआरती म घलो सामिल होईन। ए मउका म ओमन किहीन कि, प्रभु श्रीराम हमर अंतस म हें, हमर जिनगी म हें। मुख्यमंत्री ह किहीन कि तीन दिन तक चलइया ए कार्यक्रम म रायगढ़ ह राममयगढ़ होगिस। ए कार्यक्रम प्रदेस के संगे पड़ोसी राज्य के लोगन घलो बढ़ -चढ़के हिस्सा लिन। ए महोत्सव के आयोजन राष्ट्रीय रामायण महोत्सव के रूप म करे गे रिहिस, फेर कंबोडिया अउ इंडोनेशिया के रामायण दल के आए ले एखर स्वरूप ह अंतर्राष्ट्रीय होगिस।
कार्यक्रम म श्री बघेल ह घोषणा करीन कि प्रदेस के सबो नदिया-नरवा के संरक्षण बर अलग से प्राधिकरण बनाए जाही। फेरहाल इंद्रावती अउ अरपा नदी के संरक्षण बर प्राधिकरण गठित करे गे हें।
राष्ट्रीय रामायण महोत्सव के बेरा दू ठन विश्व रिकार्ड घलो बनिस हे। पहिली अरण्यकांड के सबले जादा तीन दिन तक सात सौ छप्पन मिनट सरलग मंचन करे के रिकॉर्ड बनिस। अरण्यकांड के मंचन करे बर छत्तीसगढ़ समेत तेरह राज्य अउ दू विदेसी दल के तीन सौ पछहत्तर कलाकार मन भाग लिन। एखर बर राज्य के संस्कृति विभाग ल ‘‘मोस्ट स्टेज आर्टिस्ट परफॉमेंस ऑन अरण्यकांड‘‘ के रिकॉर्ड प्रदान करे गिस। उहें, दूसर वर्ल्ड रिकॉर्ड जिला प्रशासन ल दस हजार ले जादा लोगन के सामूहिक हनुमान चालीसा पाठ करे बर दे गिस।
राष्ट्रीय रामायण महोत्सव -समापन -02
रामायण महोत्सव के बेरा अरण्यकांड प्रतियोगिता म कर्नाटक के रामायण मंडली ह पहिली पुरस्कार पाइस। उहें, असम ल दूसरा अउ झारखंड के रामायण मंडली ल तीसरा पुरस्कार प्रदान करे गिस। समापन समारोह म कंबोडिया, इंडोनेशिया समेत सबो राज्य अउ जूरी के सदस्य मन ल सम्मानित करे गिस। महोत्सव के आखरी दिन काली, कवि कुमार विश्वास, कलाकार दिलीप षडं़गी अउ मैथिली ठाकुर अपन प्रस्तुति देइन।
माओवादी-मौत
माओवादी गतिविधि म करीबन पांच दसक ले सक्रिय डेढ़ करोड़ रूपिया के इनामी माओवादी आनंद उर्फ कटकम सुदर्शन के हार्ट अटैक ले मउत होगिस। माओवादी मनके केंद्रीय कमेटी के डहार ले जारी प्रेस नोट म बताय गेहे कि कटकम सुदर्शन की मउत बीते इक्तीस मई के होइस। मृतक माओवादी छत्तीसगढ़, आन्ध्र प्रदेस, तेलंगाना अउ महाराष्ट्र समेत कतकोन राज्य म माओवादी
गतिविधि म सामिल रिहिस।
कबीर जयंती
आज कबीर जयंती हे। ए मउका म प्रदेसभर म आने-आने कार्यक्रम के आयोजन करे जावत हें। राजधानी रायपुर म आज कबीर पंथ के लोगन मन रैली निकालिन। उहें, आने-आने जगह म भंडारा के घलो आयोजन करे गिस।
मुख्यमंत्री भूपेश बघेल ह कबीर जयंती के मउका म प्रदेसवासी मन ल बधाई व सुभकामना देइन हें। अपन संदेस म श्री बघेल ह किहिन कि संत कबीर के जीवन दर्शन सदा प्रासंगिक हें। ओमन ह दोहा के माध्यम ले परेम, सद्भावना अउ सामाजिक समानता के संदेस देइन हें।
ट्रेन हादसा-हेल्पलाइन नंबर
दक्षिण पूर्व रेलवे के खड़गपुर रेलमंडल म होय रेल हादसा म प्रभावित यात्री मन के परिजन ल आवश्यक जानकारी अउ मदद बर दक्षिण पूर्व मध्य रेलवे के रायपुर मंडल ह हेल्पलाइन नंबर -शून्य सात सात एक-दू दू पांच दू पांच शून्य शून्य जारी करे हे। घटना ले जुड़े जानकारी बर देय गे नंबर म संपर्क कर सकत हें। अइसने ढंग ले दुरूग, बिलासपुर अउ रायगढ़ स्टेसन म घलो हेल्पलाइन नंबर – एक शून्य सात दू डॉयल कर जानकारी ले सकत हें।
बतादन कि बालासोर म कोरोमंडल एक्सप्रेस मालगाड़ी ले टकराए के बाद पलटगे रिहीस। इही जगह बेंगलुरू- हावड़ा सुपरफास्ट ट्रेन घलो पटरी ले
उतरगे रिहीस हे। ए हादसा म दू सौ पचहत्तर यात्री मनके मउत होगे हे। उहें, एक हजार ले जादा यात्री मन घायल होगिन हें।
हज यात्री-शिविर
छत्तीसगढ़ राज्य हज कमेटी के डाहर ले रायपुर म आज हज यात्री मनके टीकाकरण अउ स्वास्थ्य परीक्षण शिविर लगाए गिस। शिविर म करीबन छः सौ बियानबे हज यात्री मनके स्वास्थ्य परीक्षण करे गिस। जेमा पांच सौ ले जादा बीमारी ले बचाय बर टीका लगाय गिस। राज्य हज कमेटी के सचिव साजिद मेमन ह बताइन कि रायपुर समेत तिर-तखार के जिला के हज यात्री मन बर प्रशिक्षण अउ टीकाकरण कारज पूरा होगे हे। अब प्रदेसभर के हाजी अवइया बारह अउ तेरह जून के रायपुर ले नागपुर बर रवाना होहीं। एखर बाद प्रदेस के सबो हज यात्री मुंबई इंबारकेशन प्वॉइंट ले जद्दाह बर रवाना होहीं।
रामगढ़ महोत्सव
सरगुजा जिला के उदयपुर म आज ले दू दिवसीय रामगढ़ महोत्सव के सुरूआत होइस। संस्कृति मंत्री अमरजीत भगत ह कार्यक्रम के शुभारंभ करीन। ए मउका म संस्कृति मंत्री ह किहिन कि भगवान श्रीराम ह जेन रद्दा ले गुजरे रिहीन वो जगह मन ल राज्य सरकार ह संजोय अउ संवारे के कारज करत हे। कार्यक्रम म संस्कृति मंत्री ह शोधकर्ता अउ कवि मन ल सम्मानित करीन।
दुर्घटना
बीजापुर जिला म बीते रतिहा ज्ञानगुड़ी के तिर दू ठन गाड़ी के भिड़े ले स्कूटी सवार दू झन के मउत होगे। घटना के बाद कार सवार मउका ले फरार होगिस। उहें, घटना के देर बाद पहुंचिस पुलिस ह घायल मन ल अस्पताल पहुंचाइस। घटना ले गुस्साए लोगन मन फरार युवक के गिरफ्तारी के मांग करत प्रदर्शन करीन।
उहें, जशपुर जिला के कुनकुरी थाना क्ष्ेत्र म घलो तेज रफ्तार कार ह फटफटी समेत कतकोन गाड़ी ल टक्कर मार दिस। हादसा म तीन लोगन गंभीर रूप ले घायल होगिन। जउन ल अस्पताल म भर्ती कराय गेहे।
अउ अब थोरकुन समाचार सार म-
– प्रदेस म शराबबंदी के मांग ल लेके भारतीय जनता महिला मोर्चा के कार्यकर्ता मन जांजगीर चांपा जिला म धरना प्रदर्शन करीन।
– राष्ट्रीय स्वयंसेवक संघ महानगर ईकाई ह आज बाल स्वयंसेवक मनके प्रकटोत्सव मनात हे।
– त्रिस्तरीय पंचायत अउ नगरीय निकाय के आम अउ उपनिर्वाचन बर राज्य निर्वाचन आयोग ह नवा रायपुर म कंट्रोल रूम स्थापित करे हे।
– राज्य के अनुसूचित जाति अउ अन्य पिछड़ा वर्ग के छात्र मन ले कक्षा नवमी म प्रवेश बर ऑनलाइन आवेदन बर बारह जून तक आमंत्रित करे गेहे।
– जांजगीर-चांपा जिला म एनसीसी कैडेट मन नुक्कड़-नाटक के जरिया ले प्लास्टिक मुक्त भारत के संदेस दीन।
अउ
– मनेन्द्रगढ़-भरतपुर-चिरमिरी जिला के भरतपुर जनपद उपाध्यक्ष के गिरफ्तारी के बाद विरोध प्रदर्शन, भाजपा कार्यकर्ता मन आज जनकपुर ल राखीन बंद।