ओडिशा के बालेश्वर जिला म कोरोमंडल एक्सप्रेस दुर्घटना म अब तक दू सौ इकसठ लोगन के मउत होगे। उहें, लगभग नौ सौ लोगन के गंभीर रूप ले घायल होय के आसंका हे। ए दुर्घटना काली संझा सात बजे होइस। जब शालीमार-हावड़ा कोरोमंडल एक्सप्रेस बहनागा स्टेसन म एक ठिन मालगाड़ी ले टकराय के बाद पलट गे। एखर कुछ मिनट बाद ही इही जगह म बंगलुरू-हावड़ा सुपरफास्ट ट्रेन घलो पटरी ले उतर गे। हादसा के बाद दुर्घटनास्थल म बचाव अउ राहत कार्य जारी हे।
इही बीच, प्रधानमंत्री नरेन्द्र मोदी ह बालासोर ट्रेन हादसा के स्थिति के जायजा ले बर आज दुर्घटनास्थल पहुंचीन। ओमन कटक के एस.सी.बी. अस्पताल के दउरा करीन अउ हादसा म घायल लोगन मन ले मुलाकत करीन।
इही बीच, रेल मंत्री अश्विनी वैष्णव ह दुर्घटना के उच्च स्तरीय जांच के आदेस देहे। राष्ट्रपति द्रौपदी मुर्मु, प्रधानमंत्री नरेन्द्र मोदी अउ गृह मंत्री अमित शाह ह दुर्घटना म दुख जताय हे अउ घायल मनके जल्दी स्वस्थ होय के कामना करे हे।
उहें, छत्तीसगढ़ के मुख्यमंत्री भूपेश बघेल ह आज बिहनिया ओडिशा के मुख्यमंत्री नवीन पटनायक ले दूरभाष म चर्चा करीन अउ ट्रेन हादसा म दुख जतात मृत लोगन के परिजन के प्रति अपन संवेदना जतईन। मुख्यमंत्री श्री बघेल ह श्री पटनायक ले कहिन कि छत्तीसगढ़ कोति ले ओडिशा ल हरसंभव मदद दे जाही। श्री बघेल ह घायल मनके जल्दी स्वास्थ्य लाभ कामना करे हे।
उहें, भाजपा के प्रदेस अध्यक्ष अरूण साव ह घलो ट्रेन हादसा म मृत लोगन के प्रति अपन संवेदना जतइन अउ कहिन कि भाजपा ह सोक म बुड़े परिवार के संग हे। इही बीच, प्रदेस भाजपा ह आज के अपन सबो कार्यक्रम ल रद्द कर देहे।
राष्ट्रीय रामायण महोत्सव
रायगढ़ नगर म आयोजित तीन दिवसीय राष्ट्रीय रामायण महोत्सव के तीसरा अउ आखिरी दिन आज देस-विदेस ले आय आने-आने मंडली मन ह आकर्षक प्रस्तुति दीन। केरल ले आए कलाकार मन ह पारंपरिक वेशभूषा म रामकथा ले जुड़े प्रसंग सूर्पनखा प्रसंग अउ रावण वध के संग भगवान राम के सुंदर अभिव्यक्ति दीन। उहें, उत्तरप्रदेश ले आय रामायण मंडली ह अरण्यकांड उपर प्रस्तुति दीन। अंतिम दिन आज संझा केलो नदी तीर म महाआरती अउ दीपदान के कारीकरम होही। एखर बाद कवि कुमार विश्वास रामकथा कइही। अउ प्रसिद्ध गायिका मैथिली ठाकुर के भजन मनके प्रस्तुति होही।
राष्ट्रीय रामायण महोत्सव म कंबोडिया अउ इंडोनेशिया संग देस के बारह राज्य के मंडली मन म रामायण के आने-आने प्रसंग उपर प्रस्तुति देवत हे।
योग दिवस-साइकिल रैली
नौवां अंतर्राष्ट्रीय योग दिवस के मउका म केन्द्रीय रिजर्व पुलिस बल-सीआरपीएफ डहार ले देसभर के अलग-अलग जघा मन म योग सिविर आयोजित करे जात हे। इही कड़ी म आज जगदलपुर स्थित दंतेश्वरी मंदिर परिसर ले साइकिल रैली निकाले गीस। एमा सीआरपीएफ के उप पुलिस महानिरीक्षक हरजिंदर सिंह, सीआरपीएफ के उप कमांडेंट अमरजीत गुप्ता, कमान अधिकारी दिनेश कुमार सिंह अउ विधायक रेखचंद जैन संग पुलिस जवान अउ आम नागरिक सामिल होइन।
खबर के मुताबिक योग दिवस के मउका म सीआरपीएफ डहार ले सत्ताईस मई ले देसभर म योग सिविर के आयोजन करे जात हे, जउन इक्कीस जून तक चलही।
राष्ट्रीय साइकिल दिवस
आज राष्ट्रीय साइकिल दिवस हरय। ए मउका म राजधानी रईपुर संग प्रदेस के आने-आने जघा मन म साइकिल रैली निकाले गीस। दुरूग जिला के रिसाली म आयोजित साइकिल रैली म गृह मंत्री ताम्रध्वज साहू सामिल होइन। ए मउका म ओमन ह लोगन ले आह्वान करे हे कि स्वस्थ रेहे अउ पर्यावरण ल संरक्षित करे बर साइकिल के उपयोग कम दूरी म अवई-जवई बर करय। ए रैली म लइका, युवा अउ सियान बड़का संख्या म सामिल होइन।
माओवादी समाचार
सुकमा जिला म आज होय मुठभेड़ म पुलिस ह तीन ले चार झिन माओवादी के घायल होय के दावा करे हे। जिला के पुलिस अधीक्षक किरण चौहान ह बतईन कि रेगड़गट्टा इलाका ले डिस्ट्रिक्ट रिजर्व गार्ड-डीआरजी के टीम ह सर्चिंग अभियान बर निकले रिहीस। इही दउरान भेज्जी अउ एर्राबोर के जंगल म घात लगाके के बइठे माओवादी मन ह पुलिस उपर फायरिंग सुरू कर दीस। जवान मन डहार ले करे गे जवाबी कार्रवाई म तीन ले चार झिन माओवादी के घायल होय के खबर हे। एखर बाद माओवादी मन अपन घायल साथी ल लेके जंगल कोति भाग गीन।
उहें, इही जिला के भेज्जी इलाका म तीन माओवादी मन ह पुलिस के आगू आत्मसमर्पण कर दीन। ए माओवादी मन ह पुलिस डहार ले चलाय जात पुना नर्कोम अभियान के तहत सीआरपीएफ के दू सौ उन्नीसवीं बटालियन अउ डीआरजी के जवान मनके आगू आत्मसमर्पण करीन। एखर मन उपर आने-आने माओवादी घटना म सामिल रेहे के आरोप हे।
भाजपा-बैठक
भारतीय जनता पार्टी पिछड़ा मोर्चा के प्रदेस पदाधिकारी अउ जिला अध्यक्ष मनके बइठका प्रदेस कार्यालय कुशाभाऊ ठाकरे परिसर म आयोजित करे गीस। बइठका म पार्टी के प्रदेस अध्यक्ष अरूण साव ह कार्यकर्ता मन ले कहिन कि अवइया विधानसभा चुनाव ल देखत एकजुट होके काम करय। ओमन ह केन्द्र के एनडीए सरकार डहार ले नौ बछर के दउरान करे गे काम ल जन-जन तक पहुंचाय बर किहीन। बइठका ल प्रदेस संगठन महामंत्री पवन साय अउ भाजपा पिछड़ा मोर्चा के प्रदेस अध्यक्ष भरत वर्मा ह घलो संबोधित करीन।
उहें, रईपुर म आयोजित भारतीय जनता पार्टी अनुसूचित जनजाति मोर्चा प्रदेस कार्यसमिति के बइठका अवइया कारीकरम के रूप रेखा तय करे गीस। बइठका म प्रदेस अध्यक्ष अरूण साव ह कहिन कि पार्टी डहार ले आदिवासी महानायक शहीद वीरनारायण सिंह, शहीद गुंडाधुर, शहीद गेंदसिंह जइसन महान बलिदानी मनके त्याग ल सुरता करत पुरखौती सम्मान यात्रा निकाले जाही। एखर माध्यम ले भाजपा कार्यकर्ता गांव-गांव जाके लोगन ल पार्टी के रीति-नीति ले अवगत कराही।
स्वच्छता अभियान
मिशन लाईफ पर्यावरण म पर्यावरण संरक्षण अउ स्वच्छता के संदेस दे बर कोंडागांव जिला के बांधा तरिया म स्वच्छता अभियान के सुरूवात करे गेहे। ए अभियान म जिला कलेक्टर घलो सामिल होइन अउ ओमन ह लोगन के संग मिलके तालाब के तीर म साफ-सफई करीन। ए दउरान ओमन ह लोगन ले पानी के स्त्रोत के तीर ल साफ-सुथरा राखे के अपील करीन। ए अभियान म अधिकारी अउ करमचारी के संगेसंग एनएसएस, एनसीसी कैडेट अउ भूतपूर्व सैनिक मन ह भाग लीन।
निर्वाचन आयोग-बैठक
छत्तीसगढ़ राज्य निर्वाचन आयोग डहार ले त्रिस्तरीय पंचायत अउ नगरीय निकाय म आम अउ उप निर्वाचन बर कारीकरम जारी कर दे गेहे। ए बारे म काली आयुक्त ठाकुर रामसिंह अउ सचिव मोहम्मद कैसर अब्दुल हक ह वीडियो कान्फ्रेंसिंग के माध्यम ले जम्मों रिटर्निंग अधिकारी अउ सहायक रिटर्निंग अधिकारी मनके बइठका लेके ओमन ल जरूरी निरदेस दीन।
खबर के मुताबिक त्रिस्तरीय पंचायत अउ नगरीय निकाय के आम अउ उप चुनाव बर काली ले नामांकन पत्र दाखिल करे के प्रक्रिया सुरू होगे हे, जउन ह नौ जून तक चलही।
कांकेर-हत्या
कांकेर जिला के बिहावापारा म पाछु रतिहा अज्ञात लोगन मन ह घर म सोवत पति-पत्नी उपर हमला कर दीन। ए हमला म पति के मउत होगे। उहें, पत्नी गंभीर रूप ले घायल होगे हे, जेला रईपुर रेफर करे गेहे।
हल्बी-सप्ताहिक समाचार बुलेटिन
काली इतवार के हल्बी अउ गोण्डी बोली म सप्ताहिक समाचार बुलेटिन प्रसारित करे जाही। ए दूनों बुलेटिन आकाशवाणी केन्द्र, जगदलपुर ले प्रसारित करे जाही। एला बस्तर संभाग म सुने जा सकही। हल्बी म सप्ताहिक समाचार बुलेटिन बिहनिया साढ़े सात बजे ले अउ गोण्डी म सप्ताहिक समाचार बुलेटिन संझा साढ़े छह बजे ले प्रसारित होही।
जिले की चिट्ठी
आकाशवाणी रायपुर के प्रादेशिक समाचार एकांश डहार ले जिले की चिट्ठी कार्यक्रम के प्रसारण आज 4 जून के संझा छै बजके पांच मिनट ले छै बजके दस मिनट तक ले होही । ए कार्यक्रम ल छत्तीसगढ़ के जम्मों आकाशवाणी केंद्र मन ह एके संग रिले करही। ए बखत के अंक म ‘‘दंतेवाड़ा‘‘ जिला के गतिविधि बारे म जानकारी दे जाही।