रायगढ़ के रामलीला मैदान म आयोजित तीन दिवसीय राष्ट्रीय रामायण महोत्सव आज ले सुरू होगे हे। मुख्यमंत्री भूपेश बघेल ह आज मंझनिया ए महोत्सव के शुभारंभ करीन। ए मउका म सब्बो आमंत्रित कलाकार मन ल रामचिरत मानस के प्रति भेंट करे के संग राजकीय गमछा ले उखर स्वागत करे गीस। ए रामायण महोत्सव म बारह राज्य ले दू सौ सत्तर कलाकार भाग लेवत हे। उहें, छत्तीसगढ़ के घलो सत्तर कलाकार ए महोत्सव म अपन प्रस्तुति देही। आज कार्यक्रम के शुभारंभ अवसर म सब्बो प्रतिभागी मंडल ह आकर्षक मार्चपास्ट करीन। एमा कंबोडिया अउ इंडोनेशिया के कलाकार घलो विसेस रूप ले सामिल होइन। ए आयोजन म सबो मंडली रामचरित मानस के अरण्य कांड उपर केन्द्रित प्रस्तुति देही। एला ध्यान म रखत हुए मंच ल घलो अरण्य कांड के पृष्ठ भूमि उपर सजाए गेहे। एखर अलावा हर दिन हनुमान चालीसा के पाठ घलो होही। संगेसंग केलो नदी के आरती घलो करे जाही। आज महोत्सव के उद्घाटन समारोह के बाद गायिका शन्मुख प्रिया अउ शरद शर्मा अपन प्रस्तुति दिन।
एखर पहिली मुख्यमंत्री ह रायगढ़ जिला कार्यलय परिसर म राष्ट्रपति महात्मा गांधी के प्रतिमा म श्रध्दा सुमन अर्पित करीन। ओमन ह कलेक्ट्रेट परिसर म छत्तीसगढ़ महतारी के प्रतिमा के अनावरण करीन। संगेसंग करीब चार सौ पैंसठ करोड़ रूपिया के आने-आने विकास कार्य के लोकार्पण अउ शिलान्यास घलो करीन। एमा धरमजयगढ़ अउ पुसौर म हमर लैब के संग जिला ग्रंथालय अउ जिला अस्पताल म धनवंतरी जेनेरीक दवा केन्द्र के लोकार्पण सामिल हे। अपन प्रवास के दउरान मुख्यमंत्री म ह जिला परिवहन कार्यालय के नवा भवन निर्माण के भूमि पूजन घलो करीन। प्रतियोगी परीक्षा के तइयारी करत युवा मन के मार्गदर्शन बर घरघोड़ा स्थित मुख्यमंत्री युवा केन्द्र म सुविधा के विस्तार करे गेहे।
भाजपा -प्रवेश
आज छत्तीसगढ़ के कतकोन जाने माने हस्ती के संग करीबन साढ़े चार सौ लोगन ह भारतीय जनता पार्टी म प्रवेस करीन। एमा जाने -माने पंथी कलाकार पद्मश्री राधेश्याम बारले, छत्तीसगढ़ी फिल्म अभिनेता पद्मश्री अनुज शर्मा, पूर्व आईएएस अधिकारी आर.पी.एस. त्यागी, हाईकोर्ट के वकील निशांत श्रीवास्तव, पटेल समाज के प्रमुख राजेन्द्र नायक, विजय कुमार ध्रुव अउ रायपुर के निर्दलीय पार्षद अमर बंसल सहित कला, व्यवसाय, कृषि अउ समाज सेवा के संग आने-आने क्षेत्र के लोगन मन सामिल हे। ए सब्बो झन प्रदेस भाजपा अध्यक्ष अरूण साव, पार्टी के राष्ट्रीय उपाध्यक्ष अउ प्रदेस के पूर्व मुख्यमंत्री डॉक्टर रमन सिंह, प्रदेस के संगठन महामंत्री पवन साय के संग आने पदाधिकारी के मौजूदगी म भाजपा के सदस्यता ग्रहण करीन।
ए मउका म प्रदेस भाजपा अध्यक्ष श्रीसाव ह कहिन की अतना गणमान्य लोगन मनके पार्टी म प्रवेश करना छत्तीसगढ़ म भाजपा बर शुभ संकेत के शुरूआत हे। ओमन ह कहिन कि एखर ले साबित होवत हे कि राज्य के जनमानस भाजपा के रिती-नीति, कार्यक्रम अउ बिचार धार ले प्रभावित होवत हे।
केंद्रीय मंत्री अश्विनी चौबे-दौरा
केंद्रीय पर्यावरण, वन अउ उपभोक्ता मामला के राज्यमंत्री अश्विनी कुमार चौबे ह आज अपन छत्तीसगढ़ प्रवास के बेरा बिलासपुर म भारतीय खाद्य निगम के काम के समीक्षा करीन। बइठक के दउरान केंद्रीय मंत्री ह छत्तीसगढ़ म प्रधानमंत्री गरीब कल्याण अन्न योजना अउ आने कल्याकारी योजना के तहत भारत सरकार डहार ले करे गे आवंटन के सौ प्रतिशत उठाव अउ वितरण सुनिश्चित करे बर भारतीय खाद्य निगम के प्रयास के सराहना करीन।
ए बइठका म बताय गेहे कि छत्तीसगढ़ म पाछू बछर एक अप्रैल ले सार्वजनिक वितरण प्रणाली के माध्यम ले केवल पोषण युक्त चावल के ही वितरण करे जात हे। संगेसंग उठाव अउ वितरण म पारदर्शिता लाये अउ भारतीय खाद्य निगम तीर उपलब्ध खाद्यान्न के आंकड़ा ल सटिक आधार म उपलब्ध कराय बर ऑनलाईन प्रणाली घलो लागू करे गेहे।
केंद्रीय राज्यमंत्री अपन बिलासपुर प्रवास के दउरान यूथ-20 कंसल्टेशन जलवायु परिवर्तन अउ डिजास्टर रिस्क रिडक्शन कार्यक्रम म घलो मुख्य अतिथि के रूप म सामिल होइन।
पंचायत उपचुनाव
प्रदेस म त्रिस्तरीय पंचायत उपचुनाव के प्रक्रिया काली ले सुरू होवत हे। एखर तहत काली अधिसूचना प्रकासन के संग नामांकन दाखिल करे के प्रक्रिया घलो सुरू हो जाही। छत्तीसढ़ राज्य निर्वाचन आयोग ह ए उपचुनाव बर कार्यक्रम जारी कर देहे। एखर अनुसार काली बिहनिया साढ़े दस बजे चुनाव के अधिसूचना प्रकासित करे जाही। नामांकन दाखिल करे के प्रक्रिया नौ जून के मंझनिया तीन बजे तक जारी रही। दस जून के बिहनिया साढ़े दस बजे ले नामांकन पत्र के जांच करे जाही। उहें, बारह जून तक अभ्यर्थी अपन नाम वापस ले सकही एखर बाद पात्र अभ्यर्थी मन के सूची जारी करे के संग ओमन ल चुनाव चिन्ह आवंटित करे जाही। जरूरी होय म सत्ताइस जून के मतदान होही मतदान पूरा होय के बाद मतदान केन्द्र मन म घलो वोट के गिनती करे जाही। निर्वाचन कार्यालय डाहर ले बताए गेहे की यदि जरूरी होइस त तहसील या विकासखंड मुख्यालय म अठ्ाइस जून के मतगणना होही। तीस जून के चुनाव के परिणाम घोषित करे जाही।
जानबा के मुताबिक रायपुर जिला के अंर्तगत खरोरा नगर पंचायत म वार्ड क्रमांक -13 के पार्षद पद बर उपचुनाव होही। उहें, रायपुर जिला के अभनपुर विकास खंड म गिरौला अउ जौदी के संग तिल्दा विकास ख्ांड म भूमिया म सरपंच पद बर उपचुनाव कराय जाही। प्रदेस के आने जिला मन म घलो पंच सरपंच के खाली पद के चुनाव होना हे।
इंस्पेटर/एसडीओ-एफआईआर
कांकेर जिला के परलकोट जलाशय ले अपन मोबाइल फोन निकाले बर करीब इक्कीस लाख लीटर पानी बहवइया खाद्य निरीक्षक राजेश विश्वास के संग जल संसाधन विभाग के एसडीओ रामलाल धीवर अउ उप अभियंता छोटेलाल
धु्रव के खिलाफ एफआईआर दर्ज करे गेहे। नायब तहसीलदार सुनील कुमार ध्रुव के रिपोर्ट म पखांजूर थाना म ए तीनों अधिकारी मन के खिलाफ प्राथमिकी दर्ज कराय गेहे।
जानबा के मुताबिक ए घटना के जानकारी मिलत ही खाद्य निरीक्षक अउ एसडीओ ल निलंबित कर दे गे रिहीस। उहें, खाद्य निरीक्षक ल तीरपन हजार जुर्माना अदा करे के नोटिस घलो जारी कर दे गे रिहीस।
रेलवे – हेल्पलाइन नंबर
भारतीय रेलवे डाहर ले कतकोन प्रकार के यात्री सेवा के संग यात्रा के दउरान अवइया समस्या के समाधान बर अब एक ही हेल्प लाइन नंबर म सब्बो सेवा उपलब्ध कराय जावत हे। हेल्प लाइन नंबर- एक सौ उनचालीस म हर दिन बड़ संख्या म यात्री अपन आने-आने समस्या के जानकारी दर्ज करात हे। अउ उखर समाधान पावत हे। ए हेल्प लाइन नंबर के कारण अब लोगन मन ल सामान्य सुविधा बर लंबा कतार म परेसान होना नइ पढ़ही। भारतीय रेलवे ह यात्री मन के सुविधा बर ए हेल्प लाइन नंबर म सब्बो सेवा ल एक्के संग जोड़ देहे।
दक्षिण पूर्व मध्य रेलवे बिलासपुर डाहर ले घलो यात्री मन ल ए नवा हेल्पलाइन सेवा बर लगातार जागरूक करे जात हे। ऐखर तहत सब्बो रेलवे स्टेशन मन म नियमित रूप ले उद्घोषणा के माध्यम ले यात्री मन ल हेल्प लाइन नंबर – एक सौ उनचालीस के माध्यम ले मिलइया नवा सुविधा के जानकारी दे जावत हे। खास सुविधा के तहत कोई भी यात्री एक ही नंबर म कॉल करके भारतीय रेलवे ले जुड़े कोना भी जानकारी पा सकत हे। ये नंबर सप्ताह के सब्बो दिन चौबीस घण्टा उपलब्ध रही। ए नंबर म कॉल करे ले यात्री मन ल सुरक्षा अउ चिकित्सा सहायता के संग दुर्घटना या ट्रेन ले जुड़े पूछताछ के संग आने – आने जानकारी मिल सकत हे।