प्रधानमंत्री नरेन्द्र मोदी ह आज राष्ट्रीय जनतांत्रिक गठबंधन सरकार के नौ बछर पूरा होय के मउका म भारतीय जनता पार्टी के महीना भर तक चलइया महासंपर्क अभियान के महारैली के माध्यम ले राजस्थान के अजमेर ले शुभारंभ करीन। प्रदेश भाजपा अध्यक्ष अरूण साव ह पत्रकार वार्ता म बताइन कि छत्तीसगढ़ म घलो महासंपर्क अभियान सुरू होगे हे। जेमा हरएक लोकसभा क्षेत्र मन म विशिष्ट परिवार जइसे शहीद परिवार, प्रमुख खिलाड़ी, कलाकार, उद्योगपति के संगेसंग समाज के प्रभावशाली लोगन मनले मिलके घरोघर संपर्क अभियान चलाये जाही।
श्री साव ह बताइन कि पार्टी ह नौ साल के उपलब्धि ल लेके एक ठिन वेबसाइट घलो लांच करे हे।
भाजपा चौपाल
भारतीय जनता पार्टी ह काली राजनांदगांव जिला के हरएक विधानसभा क्षेत्र के सहकारी समिति मन म चौपाल लगाय के फैसला लेहे। एखर शुरूआत राजनांदगांव विधानसभा क्षेत्र के गांव भानपुरी अउ भेड़ीकला ले होही। ए कार्यक्रम म पूर्व मुख्यमंत्री डॅाक्टर रमन सिंह ह किसान मनले मिलही। चौपाल के उद्देस्य किसान मनले जुड़े केंद्र सरकार के योजना ल आम लोगन तक पहुंचाना हे अउ संगेसंग राज्य सरकार के किसान विरोधी नीति ल घलो जानबा देवाना हे।
बेरोजगारी भत्ता-राशि अंतरण
मुख्यमंत्री भूपेश बघेल ह आज रायपुर के अपन निवास कार्यालय म राखे गे कार्यक्रम म बेरोजगारी भत्ता के दूसर किस्त जारी करीन। जेमा एक लाख पांच हजार ले जादा हितग्राही मनके खाता म बत्तीस करोड़ पैंतीस लाख रूपिया ले जादा के पइसा ऑनलाईन भेजे गीस।
ए मउका म मुख्यमंत्री ह कहिन कि युवा मन ल बेरोजगारी भत्ता ले मदद मिलत हे, फेर बेरोजगारी भत्ता देले जादा खुसी तब होही जब युवा मनके हाथ म रोजगार होही। मुख्यमंत्री ह कहिन कि सरकारी नौकरी म भर्ती बर सरलग विज्ञापन दे जात हे।
राष्ट्रीय रामायण महोत्सव
रायगढ़ म काली ले तीन दिन तक चलइया राष्ट्रीय रामायण महोत्सव शुरू होवइया हे। मुख्यमंत्री ह काली एखर शुभारंभ करहीं। रामायण महोत्सव के थीम अरण्य कांड उपर आधारित हे अउ मंच ल घलो अरण्य कांड के थीम उपर सजाय गेहे। काली ले शुरू होवइया रामायण महोत्सव म कंबोडिया अउ इंडोनेशिया के संगेसंग देस के बारह ठिन राज्य के रामायण मण्डली मन ह रामायण के आने -आने प्रसंग उपर अपन प्रस्तुति देहि।
एखर अलावा रोजेच हनुमान चालिसा, रामायण मंडली मनके प्रस्तुति अउ केलो नदी के आरती के होही। कार्यक्रम के पहली दिन प्रतिभागी मनके दल ह मार्च पास्ट करही अउ संझा गायिका शन्मुख प्रिया अउ शरद शर्मा अपन कार्यक्रम के प्रस्तुती दीही। दूसर दिन प्रसिद्ध गायक बाबा रघुवंशी अउ भजन गायक लखबीर सिंह लक्खा के कार्यक्रम होही। महोत्सव के आखरी दिन कवि कुमार विश्वास रामकथा ल सुघ्घर ढंग ले पेस करे के संगेसंग प्रसिद्ध गायिका मैथिली ठाकुर के भजन प्रस्तुती होही।
विश्व तंबाकू निषेध दिवस
आज विश्व तंबाकू निषेध दिवस मनाये जात हे। एसो के विसय हे-हमें भोजन की आवश्यकता है, न कि तंबाकू की- विश्व स्वास्थ्य संगठन के मुताबिक बछर दू हजार तेईस के वैश्विक अभियान के उद्देश्य, दूसर फसल उत्पादन के बारे म जागरूकता अउ किसान मन बर एला बेचे के मउका बढ़ाना के संगेसंग किसान मन ल जरूरी पोषक वाले फसल उपजाय बर प्रोत्साहित करना हे। ए मउका म केंद्रीय स्वास्थ्य मंत्रालय ह ओटीटी प्लेटफार्म उपर तंबाकू रोधी चेतावनी देबर नवा नियम अधिसूचित करे हे।
एति प्रदेश म घलो विश्व तंबाकू निषेध दिवस के मउका म कतकोन कार्यक्रम चलत हे। प्रजापिता ब्रम्हकुमारी ईश्वरीय विश्वविद्यालय डहार ले राजधानी रायपुर के अंतर्राष्ट्रीय बस टर्मिनल भाटागांव अउ रायपुर रेलवे स्टेशन के मुख्य द्वार म नशामुक्ति आध्यात्मिक प्रदर्शनी लगाय गेहे। त उंहे सरकार स्तर म घलो कतकोन कार्यक्रम होवत हे। तंबाकू नियंत्रण कार्यक्रम के राज्य नोडल अधिकारी डॅाक्टर कमलेश जैन ह बताइन कि तंबाकू के बाढ़त प्रयोग ल रोके बर शासन कोति ले कड़ा कदम उठाय जात हे।
ओमन बताइन कि तंबाकू खाय ले फेफड़ा, लिवर अउ मुंह के कैंसर होय के संभावना रइथे। ओति जांजगीर चांपा म जनजागरूकता कार्यक्रम के तहत रैली निकाल के लोगन मन ल तंबाकू नियंत्रण बर जानबा दीन।
एक भारत श्रेष्ठ भारत
केंद्र सरकार के महत्वाकांक्षी योजना एक भारत-श्रेष्ठ भारत के तहत गुजरात के राजकोट ले आय पुलिसकर्मी मनके टीम ह आज जांजगीर-चांपा जिला के ग्राम बहेराडीह स्थित किसान स्कूल के दउरा करीन। किसान स्कूल के संचालक दीनदयाल यादव अउ नवाचारी किसान रामाधार देवांगन ह गुजरात के टीम ल सरंक्षित बीज, जैविक खाद, अक्षय चक्र, कृषि मॉडल, गोबर गैस सिस्टम अउ निमसार बनाय के बारे म जानबा दीन। गुजरात के टीम के सदस्य मन ह कहिन कि देश के पहिली किसान स्कूल ह आने राज्य मन बर मिसाल हरय।
पर्यावरण संरक्षण-शपथ
छत्तीसगढ़ पर्यावरण संरक्षण मंडल कोति ले लाईफ स्टाईल फॉर इन्वायरमेंट कार्यक्रम के आयोजन करे जात हे। जेमा काली पांच लाख लोगन मन ह पर्यावरण ल बचाय बर सपथ लेही। ए कार्यक्रम म सामिल होय बर प्रतिभागी मन ह व्हाटसप नंबर- सात चार एक पांच सात आठ एक सात-सात छह म काली एक जून के बिहनिया आठ बजे ले संझा चार बजे तक पर्यावरण संरक्षण के सपथ ले जुड़े सामूहिक या व्यक्तिगत वीडियो अउ फोटू भेज सकत हे। ए कार्यक्रम के उद्देस्य लोगन मन ल पर्यावरण संरक्षण बर जागरूक करना हवयं । छत्तीसगढ़ पर्यावरण संरक्षण मंडल ह लोगन मन ले ए सपथ महाअभियान म सामिल होय के अपील करे हे।
प्रशिक्षु अधिकारी मुलाकात
मुख्यमंत्री ह आज रायपुर म भारतीय प्रशासनिक सेवा के प्रशिक्षण लेवइया अधिकारी मनले मिलिन। ए मउका म अपर मुख्य सचिव अउ छत्तीसगढ़ प्रशासन अकादमी निमोरा के महानिदेशक रेणु जी. पिल्ले ह मुख्यमंत्री ल बताइन कि भारतीय प्रशासनिक सेवा के तीन झिन अधिकारी नम्रता चौबे, प्रखर चंद्राकर, अउ युवराज मरमट ल छत्तीसगढ़ कैडर दे गेहे।
ए अधिकारी मन ल बावन हप्ता के प्रशिक्षण देके बाद जिला मन म पदस्थ करे गेहे। नम्रता चौबे ल बलौदाबजार-भाटापारा जिला म सहायक कलेक्टर के रूप म त उंहे प्रखर चंद्राकर ल कांकेर अउ युवराज मरमट ल रायगढ़ के सहायक कलेक्टर बनाय गेहे।
माउस डियर
बस्तर स्थित कांगेर घाटी राष्ट्रीय उद्यान म दुर्लभ प्रजाति के माउस डियर के फोटू ह कैमरा ट्रैप म आय हे। देश म पाये जाय हिरण मनके बारह प्रजाति म माउस डियर ह विश्व म सबले छोटे हिरण समूह के प्रजाति म एक हरय।
कांगेर घाटी राष्ट्रीय उद्यान के निदेशक धम्मशील गणवीर ह बताइन कि उद्यान प्रबंधन डहार ले सरलग वन्यजीव मन ल ठीकठाक राखे के दिशा म काम करे ले दुर्लभ प्रजाति मनके रहई ह इंहा सुरक्षित हवय। ओमन बताइन कि हालेच म राष्ट्रीय उद्यान म छत्तीसगढ़ के राजकीय पक्षी पहाड़ी मैना के गुरतुर बोली ह घलो इंहा सुनई दीस।
अउ अब थोरकुन समाचार सार म-
– मुख्यमंत्री ह काली रायगढ़ म प्रतियोगी परीक्षा के तियारी बर वाई-फाई कैम्पस, डिजिटल क्लासरूम, ई-लाइब्रेरी अउ कैंटिन के सुविधा वाले हाईटेक जिला पुस्तकालय के लोकार्पण करही।
– भाजपा ह पाछू सतरा दिन ले आंदोलन करत पटवारी मनके हड़ताल ल समर्थन देके घोषणा करे हे।
– सुकमा जिला के माओवाद प्रभावित कोंटा ब्लॉक के कोलाईगुड़ा अउ करिगुंडम वाले जगा म फोर जी मोबाइल नेटवर्क सुविधा शुरू होगे हे।
– हेमचंद यादव विश्वविद्यालय दुर्ग म अवइया सत्र म स्नातक स्तर के प्रथम वर्ष के कक्षा बीए, बीकॉम, बीएससी, बीसीए, बीबीए, बी.लिब अउ डीसीए म प्रवेश बर काली एक जून ले ऑनलाईन पोर्टल सुरू होही।
अउ
– सक्ति जिला के हसौद थाना म पदस्थ एक झिन माइलोगिन के संगेसंग तीन झिन आरक्षक मन ल गलत व्यवहार करे के आरोप म लाईन अटैच कर दे गेहे।