प्रधानमंत्री नरेन्द्र मोदी ह आज नई दिल्ली के प्रगति मैदान म अंतर्राष्ट्रीय संग्रहालय प्रदर्शनी के उद्घाटन करीन। ए मउका म श्री मोदी ह किहीन कि सरकार देस के समृद्ध, सांस्कृतिक विरासत ल संरक्षित करे के दिसा म सरलग प्रयास करत हे। ओमन किहीन कि एखर तहत ग्रामीण क्षेत्र मन म स्थानीय संग्रहालय बनाय उपर बिसेस ध्यान दे जात हे।
प्रधानमंत्री-किसान संगठन
प्रधानमंत्री नरेन्द्र मोदी के ‘‘सहकार से समृद्धि‘‘ के दृष्टिकोण ल साकार करे बर सहकारी क्षेत्र म ग्यारह सौ नवा किसान उत्पादक संगठन बनाय के निर्णय ले गेहे। ए कार्यक्रम के तहत हरेक किसान संगठन ल तैंतीस लाख रूपिया के वित्तीय सहायता दे जाथे। एखर अलावा समूह आधारित व्यावसायिक संगठन मन म पच्चीस लाख रूपिया प्रति संगठन के आधार म वित्तीय सहायता देवाय जाथे। ए पहल ले किसान मन ल बाजार ले जाड़े के संघरा उंखर उपज बर लाभकारी मूल्य घलो सुनिश्चित करे जा सकही।
ईडी-कार्रवाई
प्रदेस म करीबन दू हजार करोड़ रूपिया के कथित सराब घोटाला मामला म गिरफ्तार कारोबारी अनवर ढेबर, आबाकारी विभाग के विशेष सचिव अरूण पति त्रिपाठी, नितेश पुरोहित अउ त्रिलोक सिंह ढिल्लन के रिमांड अवधि चार दिन अउ बढ़ा दे गेहे। प्रर्वतन निदेशालय-ईडी ह चारो आरोपी मन ल आज रईपुर म विशेष न्यायाधीश अजय सिंह राजपूत के अदालत म पेस करीन। ईडी ह ए चारों आरोपी मन ले जांच अउ पूछताछ बर फेर रिमांड के मांग करीन, जेला विशेष अदालत ह मंजूर कर लीन।
गुरूचरण सिंह होरा-इस्तीफा
छत्तीसगढ़ ओलंपिक संघ के महासचिव गुरूचरण सिंह होरा के इस्तीफा मजूंर कर ले गेहे। उंखर जगह म भिलाई के विधायक देवेन्द्र यादव ल राज्य ओलंपिक संघ के नवा महासचिव बनाय गेहे। प्रदेस के खेल विभाग डहार ले एखर जानकारी भारतीय ओलंपिक संघ के अध्यक्ष पी.टी. उषा ल दे दे गेहे। खेल विभाग डहार ले भारतीय ओलंपिक संघ ल लिखे गे पत्र के अनुसार श्री होरा ह पाछु बछर बीस सितंबर के अपन पद ले इस्तीफा दे रिहीन, जेला पाछु नौ मई के मंजूर कर ले गीस।
सीएम-धमतरी
मुख्यमंत्री भूपेश बघेल ह काली भेंट-मुलाकात कार्यक्रम के दौरान धमतरी जिला के लोहरसी म आने-आने सामाजिक संगठन अउ प्रतिनिधिमंडल मन ले मुलाकात करीन। ए मउका म मुख्यमंत्री ह धमतरी म मिनी स्टेडियम बनाय के घोसना करीन। ओमन आने-आने सामाजिक संगठन के मांग म सामुदायिक भवन अउ छात्रावास बनाय बर जरूरी रासि घलो मंजूर करीन। श्री बघेल अपन प्रवास के दउरान लोहरसी के ग्रामीण औद्योगिक परिक्षेत्र म वन औषधि केन्द्र बनाय के निरदेस दीन।
विस चुनाव-तैयारी
प्रदेस म अवइया विधानसभा चुनाव बर प्रशासनिक तैयारी सुरू होगे हे। एखर तहत विभिन्न जिला मन म जिला निर्वाचन अधिकारी मन डहार ले मतदान सामग्री के वितरण अउ वापसी ले जुड़े प्रक्रिया पूरा करे जात हे। इही कड़ी म रायपुर के जिला निर्वाचन अधिकारी डॉक्टर सर्वेश्वर नरेन्द्र भुरे अउ वरिष्ठ पुलिस अधीक्षक प्रशांत अग्रवाल ह सेजबहार स्थित शासकीय अभियांत्रिकीय महाविद्यालय के निरीक्षण करीन, जिहां मतदान सामग्री के वितरण अउ वापसी के व्यवस्था करे गेहे।
उहें, राजनांदगांव के अतिरिक्त मुख्य निर्वाचन पदाधिकारी शिखा राजपूत तिवारी ह चुनावी तैयारी के सिलसिला म अधिकारी मनके बइठका लीन। ओमन अवइया विधानसभा चुनाव म पहिली घांव वोट डालने वाला युवा मतदाता अउ नवविवाहित महिला मनके संग दिव्यांग अउ तृतीय लिंग वाला मतदाता मनके नाव जोड़े बर बिसेस जागरूकता कार्यक्रम चलाय के निरदेस दीन।
इही बीच, कोरिया के जिला मुख्यालय बैकुंठपुर म काली मतदाता मन ल जागरूक करे के उद्देश्य ले स्वीक कार्यक्रम आयोजित करे गीस। कार्यक्रम म जिला स्वीप नोडल अधिकारी के.के. गुप्ता ह प्रतिभागी मन ल मतदान के महत्व के बारे म विस्तार ले जानकारी दीन। ओमन जिला के हरेक गांव म महिला मतदाता मन ल प्रेरित करे के सेती सखी सम्मेलन आयोजित करे के निरदेस घलो दीन।
याशी जैन-माउंट ल्होत्से
रायगढ़ के पर्वतारोही याशी जैन ह विश्व के सबले ऊंचा चोटी माउंट एवरेस्ट म कदम रखे के छब्बीस घंटा बादे विश्व के चौथा सबले ऊंचा चोटी माउंट ल्होत्से ल घलो फतह कर लेहे। एखर ऊंचाई आठ हजार पांच सौ सोलह मीटर हरय। अइसना करके ओमन एक नवा राष्ट्रीय कीर्तिमान बनाय हे।
बतादन कि माउंट एवरेस्ट म झंडा गाड़े के बाद बहुत कम अंतराम म माउंट ल्होत्से चोटी तक पहुंचने वाला याशी जैन भारत के सबले युवा पर्वतारोही बन गेहे।
आवासीय विद्यालय-प्रवेश
छत्तीसगढ़ म आदिम जाति विकास विभाग डहार ले संचालित प्रयास आवासीय विद्यालय मन म नवमीं कक्षा म प्रवेस बर परीक्षा परिणाम घोषित कर दे गेहे। प्रवेस परीक्षा सूची म पात्र विद्यार्थी मनके जिलेवार सूची विभागीय वेबसाइट म उपलब्ध करा दे गेहे। विद्यार्थी अपन रोल नंबर के अनुसार परीक्षा परिणाम देख सकत हे। आवासीय विद्यालय मन म प्रवेस खातिर परीक्षा पाछु तीस अप्रैल के ले गे रिहीस। बतादन कि प्रवेस परीक्षा के माध्यम ले बारह सौ अस्सी सीट म मेरिट सूची के आधार म प्रवेस दे जाही।
हज-प्रशिक्षण
ए बछर होवइया हज यात्रा बर जगदलपुर म प्रसिक्षण कार्यक्रम के आयोजन करे गीस। एक दिन के ए कार्यक्रम म बस्तर अउ सुकमा जिला ले हज म जवइया मन बर यात्रा बर जरूरी तैयारी के संघरा सावधानी के बारे म घलो विस्तार ले जानकारी दे गीस। सिविर म राज्य हज कमेटी के सदस्य हाजी अब्दुल रज्जाक खान ह जम्मों अभ्यर्थी मन ल अंतर्राष्ट्रीय नियम मन ल घलो बतईन। ए मउका म हज कमेटी कोति ले प्रशिक्षण किट घलो बांटे गीस।
जमीन कब्जा-एफआईआर
सरगुजा जिला के बतौली विकासखंड के एक सौ तीस एकड़ ले जादा सासकीय जमीन ल अपन नाव म दर्ज कराय जाय के मामला म पच्चीस ले जादा लोगन मन उपर एफ.आई.आर. दर्ज करे गेहे। ए संबंध म सरगुजा के कलेक्टर कुंदन कुमार ह एसडीएम डहार ले जांच कराय के निरदेस दे रिहीन। एसडीएम के जांच रिपोर्ट म ए बात आगू आय रिहीन कि जउन मनखे मन सासकीय जमीन ल अपन नाव म चढ़ाय हे ओमन मन करा जमीन के अधिकार के संबंध म कोनों प्रमाणिक दस्तावेज नइ पाय गीस।
सरगुजा कमिश्नर-मिलेट कैफे
कोरिया के जिला मुख्यालय बैकुंठपुर म संचालित मिलेट्स कैफे आजकल अपन नवाचार के सेती आकर्षण के केन्द्र बने हे। इहां महिला समूह के सदस्य मन डहार ले कोदो, कुटकी अउ रागी ले बने व्यंजन अउ मिठाई लोगन मन ल बहुत पसंद आवत हे। सरगुजा के संभाग आयुक्त डॉक्टर संजय अलंग ह काली बैकुंठपुर कलेक्ट्रेट परिसर म पहुंच के ए मिलेट्स कैफे के अवलोकन करीन। ओमन ए कैफे के संचालन बर महिला समूह के सदस्य मनके सराहना घलो करीन।
गोटुल रच्चा समिति-विदेश भ्रमण
आदिवासी संस्कृति के संघरा कृषि अउ वनोपज संग्रहण के नवाचार ल जाने बर कांकेर जिला के गोटुल रच्चा समिति के सदस्य मन हाले म इंडोनेशिया के भ्रमण करीन। इंडोनेशिया ले लहुटे के बाद ए सदस्य मन रईपुर म मुख्यमंत्री भूपेश बघेल ले भेंट करके अपन यात्रा के अनुभव साझा करीन।
बतादन कि अंतागढ़ गोटुल रच्चा समिति के तेरह सदस्य मन आठ ले अट्ठारह मई तक इंडोनेशिया के भ्रमण म रिहीन। उहां ओमन आदिवासी संस्कृति के अलावा कृषि अउ वनोपज ले जुड़े जानकारी लीन।
छाया-चित्र प्रदर्शनी
प्रदेस के लोगन मन ल राज्य के पुरावैभव ले परिचित कराय बर रईपुर के घासीदास संग्रहालय के कला-विथिका म आज ले दू दिन के छाया-चित्र प्रदर्सनी सुरू होगे हे। ए प्रदर्सनी म पुरातात्विक बिसय ले जुड़े दुर्लभ चित्र प्रदर्सित करे गेहे। ए चित्र लगभग चालीस से एक सौ पचास साल जुन्ना हवय। ए प्रदर्सनी म छत्तीसगढ़ के मूर्त सांस्कृतिक धरोहर के एकदम जुन्ना अउ ए बेरा के चित्र ल सामिल करे गेहे।