प्रधानमंत्री नरेन्द्र मोदी काली वीडियो कॉन्फ्रेंसिंग के माध्यम ले लगभग इकहत्तर हजार युवक मन ल नियुक्ति पत्र वितरित करही। ए अवसर म प्रधानमंत्री ह नवनियुक्त युवा मन ल संबोधित घलो करही। ए रोजगार मेला देसभर के पैंतालीस स्थान मन म आयोजित होही।
गौरतलब हे कि केन्द्र सरकार के विभाग के संगेसंग राज्य सरकार अउ केन्द्रसासित प्रदेश म ए भर्ती करे जात हे। देशभर ले चुने गे ए युवा मन ल अलग-अलग पद म नियुक्त करे जाही। नवनियुक्त युवा मन ल कर्मयोगी प्रारंभ के माध्यम ले प्रशिक्षण प्राप्त करे के अवसर घलो मिलही।
रायपुर म ये रोजगार मेला भारतीय डाक विभाग डहार ले डब्ल्यू.आर.एस. कॉलोनी के कम्युनिटी हॉल म आयोजित करे जाही। केन्द्रीय जनजाति कार्य राज्यमंत्री रेणुका सिंह ह ये कार्यक्रम म मुख्य अतिथि के रूप म उपस्थित रइही। ए मेला म केन्द्र सरकार के अलग-अलग विभाग म चुने गे उम्मीदवार मन ल नियुक्ति पत्र दे जाही।
भेंट-मुलाकात
मुख्यमंत्री भूपेश बघेल ह आज भेंट मुलाकात कार्यक्रम के दौरान बलौदाबाजार जिला के भाटापारा विधानसभा क्षेत्र म एक सौ अट्ठाईस करोड़ चौव्वन लाख रूपिया ले जादा के अलग-अलग विकास कार्य के लोकार्पण अउ भूमिपूजन करीन। ग्राम कडार म आयोजित ए कार्यक्रम म मुख्यमंत्री ह करही मेकरी म स्वामी आत्मानंद अंग्रेजी स्कूल खोले, भाटापारा म सर्व सुविधा युक्त मंडी अउ इंडोर स्टेडियम के निर्माण करे, निपनिया म थाना खोले अउ बिटकुली म जिला सहकारी बैंक सुरू करे सहित कई ठिन घोसना करीन।
मुख्य निर्वाचन पदाधिकारी-अंबिकापुर
प्रदेस म आगामी विधानसभा चुनाव ल लेके प्रशासनिक तैयारी सुरू होगे हे। इही कड़ी म मुख्य निर्वाचन पदाधिकारी रीना बाबा साहेब कंगाले ह आज अंबिकापुर के कलेक्ट्रेट म आयोजित बइठका म निर्वाचन के तैयारी के समीक्षा करीन। एखर पहिली, काली ओमन अंबिकापुर म मतदान केन्द्र अउ ई.वी.एम. वेयर हाउस के निरीक्षण करीन। ए दौरान ओमन मतदान केन्द्र मन म सबो आवश्यक व्यवस्था सुनिश्चित करे के निरदेस दीन। मुख्य निर्वाचन पदाधिकारी ह नवा मतदाता मनके नाम मतदाता सूची म जोड़े जाय के जानकारी लीन। ओमन अट्ठारह बछर पूरा कर चुके महिला मनके नाम मतदाता सूची म दर्ज कराय के काम ल प्राथमिकता के संग करे बर किहीन।
ईडी-कार्रवाई
प्रदेस म करीब दू हजार करोड़ रूपिया के कथित शराब घोटाला मामला म गिरफ्तार कारोबारी अनवर ढेबर, आबकारी विभाग के विशेष सचिव ए.पी. त्रिपाठी, नितेश पुरोहित अउ त्रिलोक सिंह ढिल्लन के रिमांड अवधि चार दिन अउ बढ़ा दे गेहे। प्रवर्तन निदेशालय-ईडी ह चारो आरोपी मन ल आज रायपुर म विशेष न्यायाधीश अजय सिंह राजपुत के अदालत म पेस करीन। ईडी ह ए चारो आरोपी मन ले जांच अउ पूछताछ बर फेर रिमांड के मांग करीन, जेला विशेष अदालत ह मंजूर कर लेहे।
गौरतलब हे कि अनवर ढेबर के तीसरइया घव रिमांड मंजूर कर ले गेहे।
छात्रावास अधीक्षक-भर्ती
प्रदेस म आदिम जाति अउ अनसूचित जाति विकास विभाग डहार ले छात्रावास अधीक्षक श्रेणी-‘द‘ के पांच सौ पद बर भर्ती करे जाही। एखर बर छत्तीसगढ़ लोक सेवा आयोग डहार ले विज्ञापन जारी कर दे गेहे। इच्छुक उम्मीदवार आयोग के वेबसाइट म बीस मई ले बीस जून तक ऑनलाइन आवेदन कर सकत हे। ए पद बर उम्मीदवार मनके उमर इक्कीस बछर ले कम अउ पैंतीस बछर ले जादा नइ होना चाही। लेकिन छत्तीसगढ़ राज्य के स्थानीय निवासी मन ल अधिकतम आयु सीमा म पांच बछर के छूट दे जाही। ए संबंध म विभाग के वेबसाइट ले अधिक जानकारी प्राप्त करे जा सकत हे।
भाजपा-अभियान
भारतीय जनता पार्टी ह आगामी बीस मई ले प्रदेश स्तर म ‘‘चलबो गोठान-खोलबो पोल‘‘ अभियान सुरू करत हे। भाजपा के प्रदेस अध्यक्ष अरूण साव ह रईपुर म पत्रकार मन ले बातचीत करत हुए ए जानकारी दीन। ओमन बतईन कि ये अभियान के तहत हर मंडल म भाजपा नेता जाहीं अउ कम से कम दस गौठान के दौरा कर ग्रामीण मन से मिलही। ए अभियान के तहत एक फीडबैक फार्म ‘‘जनता का पंचनामा‘‘ नाम से तैयार करे गेहे। एखर माध्यम ले गौठान ले संबंधित दस ठन सवाल हर जगह पूछे जाही।
श्री साव ह आरोप लगईन कि छत्तीसगढ़ म कांग्रेस सरकार ह तेरह सौ करोड़ रूपिया के गौठान घोटाला करे हे। ये गौठान घोटाला चारा घोटाला ले घलो बड़े हे। ओमन किहीन कि गोबर खरीदी के नाम म हर महीना करोड़ो रूपिया के भुगतान सरकार डहार ले करे जात हे, फेर ये पइसा कहा जाथे, एखर कोई पता नइ हे।
दुर्घटना
बलौदाबाजार-रायपुर राष्ट्रीय राजमार्ग म बीते रतिहा पिकअप वाहन अउ ट्रक के बीच होय टक्कर म पांच महिला सहित छह झिन के मउत होगे। ए हादसा म बीस ले जादा लोगन मन घायल होगे हे, जेन ल इलाज बर बलौदाबाजार के जिला अस्पताल म भर्ती कराय गेहे। उहें, गंभीर रूप ले घायल चार झन ल इलाज बर रायपुर लाय गेहे। ए सबो झन परसदा-कनकी गांव म छट्टी कार्यक्रम म सामिल होय के बाद पिकअप वाहन ले लटुवा गांव बर निकले रिहीन। तभे देर रात रायपुर-बलौदाबाजार मुख्य मार्ग म गोड़ा पुलिया करा सामान ले भरे ट्रक ह पिकअप ल जोरदार टक्कर मार दीस। ए हादसा म एक बालक अउ चार झन महिला के मउत होगे। मामला के सूचना मिलते ही पुलिस मउका म पहुंच के घायल मन ल जिला अस्पताल म भर्ती करइन।
मुख्यमंत्री भूपेश बघेल ह ए हादसा म गहरा दुख व्यक्त करत हुए मृतक मनके परिजन ल हरसंभव सहायता अउ घायल मन ल बेहतर ले बेहतर सुविधा उपलब्ध कराय के निरदेस देहे।
इही बीच, बलौदाबाजार कलेक्टर चंदन कुमार अउ पुलिस अधीक्षक दीपक झा ह आज जिला अस्पताल पहुंच के घायल मनके हालचाल जानीन। कलेक्टर ह सबो जिलावासी मन ले अपील करे हे कि ओमन बारात, सगाई अउ छट्टी जइसे कार्यक्रम म आय-जाय बर मालवाहन गाड़ी के जगह निर्धारित सवारी गाड़ी के ही उपयोग करय अउ यातायात नियम के पालन जरूर करय।
ऐति, दुर्ग जिला म कार अउ मोटर साइकिल के बीच होय टक्कर म दू झिन युवक मनके मउत होगे। अंजोरा चौकी प्रभारी उप निरीक्षक पवन देवांगन ह बतईन कि ए हादसा शिवनाथ फ्लाईओवर करा बीते रतिहा होय हे। मृतक दूनों युवक भिलाई के रहइया रिहीन।
शराब-मौत
जांजगीर-चांपा जिला के रोगदा गांव म कथित रूप ले देशी शराब पीये ले तीन झन के मउत होगे। मृतक म सेना के एक झन जवान घलो सामिल हे। घटना के सूचना मिले म एडिशनल एसपी अनिल सोनी, जांजगीर एसडीएम नंदनी कमलेश साहू अउ एसडीओपी चंद्रशेखर परमा मउका म पहुंचीन। प्रभावित परिवार के परिजन मन ह ए मामला के निष्पक्ष जांच कराय अउ मुआवजा दे जाय के मांग करे हे।
उहें, फारेंसिक विज्ञान प्रयोगशाला के टीम आज रोगदा गांव पहुंचीन अउ साक्ष्य इकट्ठा करीन। इही बीच, पुलिस ह सराब बिक्री करइया दुकानदार ल हिरासत म लेके दुकान ल सील कर देहे।
ओति, नेता प्रतिपक्ष नारायण चंदेल ह रोगदा गांव पहुंचीन अउ ओमन ए मामला के निष्पक्ष जांच, दोसी मन उपर कार्रवाई अउ पीड़ित परिवार ल पचास-पचास लाख रूपिया मुआवजा देके मांग करे हे। ओमन ए घटना बर छत्तीसगढ़ सरकार के नीति ल जिम्मेदार ठहरावत हुए प्रदेस म पूर्ण सराब बंदी के मांग करीन हे।
मुख्यमंत्री-नर्स दिवस
रायपुर के पंडित जवाहरलाल नेहरू मेडिकल कॉलेज म काली अंतर्राष्ट्रीय नर्सेस दिवस कार्यक्रम के आयोजन करे गीस। छत्तीसगढ़ नर्सिंग ऑफिसर्स एसोसिएशन डहार ले आयोजित ये कार्यक्रम म मुख्यमंत्री भूपेश बघेल ह कोविड काल के दौरान नर्स मन डहार ले करे गे सेवा ल याद करत हुए किहीन कि जेन विपरीत परस्थिति म डॉक्टर अउ नर्स मन अपन सेवा देहे, ओखर तुलना नइ करे जा सकय।