छत्तीसगढ़ माध्यमिक शिक्षा मंडल डहार ले आयोजित दसवीं अउ बारहवीं बोर्ड परीक्षा मनके नतीजा आज घोषित कर दे गेहे। दसवीं बोर्ड परीक्षा म पचहत्तर दशमलव शून्य पांच अउ बारहवीं बोर्ड परीक्षा म नवासी दशमलव नौ छै प्रतिशत विद्यार्थी उत्तीर्ण होय हे।
स्कूल शिक्षा मंत्री डॅाक्टर प्रेमसाय सिंह टेकाम ह मंडल के सभागृह म हाईस्कूल परीक्षा अउ हायर सेकण्डरी परीक्षा दू हजार तेईस के परिणाम जारी करे हे। आज जारी प्राविण्य सूची के अनुसार बारहवीं के परीक्षा म रायगढ़ जिला के विधि भोसले पहिली स्थान म हे। विधि ह अंठानवे दशमलव दू शून्य प्रतिशत अंक प्राप्त करे हे। जाजंगीर चांपा जिला के विवेक अग्रवाल ह संतानबे दशमलव चार शून्य प्रतिशत अंक पाके दूसरा स्थान अउ दुर्ग जिला के रितेश कुमार ह छियानबे दशमलव आठ शून्य प्रतिशत अंक पाके तीसरा स्थान प्राप्त करे हे।
मंडल डहार ले घोषित दसवीं बोर्ड परीक्षा म जशपुर जिला के राहुल यादव ह अंठानबे दशमलव आठ-तीन प्रतिशत अंक पाके पहिला स्थान प्राप्त करे हे। उंहे जशपुर जिला के सिकंदर यादव ह अंठानबे दशमलव छै-सात प्रतिशत अंक के संग दूसर स्थान पाय हे। उंहे इही जिला के पिंकी यादव अउ सूरज पैकरा ह अंठानबे दशमलव एक-सात प्रतिशत अंक पाके तीसरा स्थान प्राप्त करे हे। परिणाम घोषित करे के संग दसवीं अउ बारहवीं परीक्षा के प्रावधिक प्राविण्य सूची घलो जारी कर देहे। बारहवीं के प्राविण्य सूची म तीस अउ दसवीं के प्राविण्य सूची म अड़तालिस विद्यार्थी मनके नाम शामिल हे।
एसो बारहवीं बोर्ड के टॉप टेन सूची म स्वामी आत्मानंद स्कूल के पांच विद्यार्थी अउ दसवीं बोर्ड के टॉप टेन सूची म इही स्कूल के दस विद्यार्थी मन ह अपन स्थान बनाय हे। मुख्यमंत्री ह विद्यार्थी मनके शानदार प्रदर्शन बर खुशी जताय हे। एक ट्वीट म ओमन कहिन कि बोर्ड परीक्षा के मेरिट लिस्ट के टॉप टेन म अवइया विद्यार्थी मनल ए बछर घलो हेलिकॉप्टर राइड कराय जाही।
दसवीं/बारहवीं-परिणाम-02
एसो दसवीं बोर्ड परीक्षा म नवासी दशमलव एक-छै प्रतिशत नोनी अउ सत्तर दशमलव दू-छै प्रतिशत बाबू मन सफल रहे हे। उंहे बारहवीं बोर्ड के परीक्षा म तिरासी दशमलव छै-चार प्रतिशत बालिका अउ पचहत्तर दशमलव तीन-छै प्रतिशत बालक उत्तीर्ण रहे हे।
परिणाम जारी करे के बाद स्कूल शिक्षा मंत्री ह सफल विद्यार्थी मन ल अपन शुभकामना देहे। संगेसंग ओमन ह असफल विद्यार्थी मनले कीहिन कि ओमन फेर ले मेहनत करयं त ओमन ल सफलता जरूर मिलही।
राज्यपाल विश्वभूषण हरिचंदन अउ मुख्यमंत्री भूपेश बघेल ह दसवीं अउ बारहवीं के परीक्षा म सफल विद्यार्थी मन ल अपन शुभकामना देहे। संगेसंग ओमन ह परीक्षा म असफल विद्यार्थी मन ल बिना निराश होय धैर्य अउ मेहनत के संग सरलग प्रयास करे बर कहिन।
दसवीं अउ बारहवीं परीक्षा के परिणाम मंडल के वेबसाइट म उपलब्ध हे। मंडल के वेबसाइट – डब्लू डब्लू डब्लू डॅाट सीजीबीएसई डॅाट एनआईसी डॅाट इन अउ रिजल्ट डॅाट सीजी डॅाट एनआईसी डॅाट इन म विद्यार्थी मन अपन परिणाम देख सकत हे।
ईडी-रिमांड
प्रवर्तन निदेशालय-ईडी के टीम ह मनी लॉन्ड्रिंग के मामला म आज एक अउ कारोबारी नितेश पुरोहित ल गिरप्तार करे हे। ईडी के टीम ह पहिली गिरप्तार करे गे अनवर ढेबर के संग कारेबारी नितेश पुरोहित ल विशेष अदालत म पेस करीन। आज अनवर ढेबर के रिमांड अवधि बढ़ाय के मांग के संग ही नितेश पुरोहित ल घलो रिमांड म देके मांग ईडी के टीम ह करे हे।
भाजपा प्रदर्शन
दू हजार करोड़ रूपिया के कथित शराब घोटाला के विरोध म आज बीजापुर जिला के नवा बस स्टेण्ड म भारतीय जनता महिला मोर्चा, युवा मोर्चा अउ अनुसूचित जनजाति मोर्चा के पदाधिकारी मन ह धरना प्रदर्शन करीन। धरना प्रदर्शन म शामिल पूर्व मंत्री महेश गागड़ा ह राज्य सरकार उपर शराब बंदी के नाम म लोगन ले धोखाधड़ी करे के आरोप लगाय हे। ओमन कहिन कि अवइया चुनाव म जनता एखर हिसाब लेही।
माओवादी गिरप्तार
बीजापुर जिला म सुरक्षा बल ह आज चार माओवादी मन ल गिरप्तार करे हे। मिले जानकारी के अनुसार डीआरजी अउ सीएएफ के जवान इलाका के आडेड अउ मुचलेर के जंगल म सर्चिंग बर निकले रीहिन। इही दउरान ए माओवादी मन ल गिरप्तार करे गीस। इंखर मन उपर आईईडी लगाये अउ आने माओवादी घटना म सामिल होय के आरोप हे। ए चार माओवादी मन ल आज बीजापुर के सत्र न्यायालय म पेस करे गीस।
दुर्घटना
कोरबा जिला के मदनपुर गांव के तीर आज बीहनिया होय एक ठिन सड़क हादसा म एक झिन सब इंस्पेक्टर उंखर पत्नी अउ दू लईका के मउत होगे।
पुलिस ले मिले जानकारी के अनुसार सब इंस्पेक्टर अउ उंखर परिवार अंबिकापुर ले कटघोरा कोति जात रीहिस, तभे बांगो थाना क्षेत्र के मोरगा चौकी के तीर उंखर कार अउ आगू ले आवत ट्रक म भिड़त होगे। जेखर ले कार के सामने के हिस्सा क्षतिग्रस्त होगे अउ ओमा सवार सब इंस्पेक्टर उंखर पत्नी अउ दू लईका के मउका म ही मउत होगे। बताय जात हे कि सब इंस्पेक्टर मनोज तिर्की जशपुर जिला के बगीचा थाना क्षेत्र के सरबकोम्बो के रहइया रीहिन। अभी ओमन ह बस्तर के पुलिस लाइन म पदस्थ रीहिन।
मुख्यमंत्री भूपेश बघेल ह सड़क हादसा म सब इंस्पेक्टर उंखर पत्नी अउ लईका मनके मउत उपर दुख जताय हे अउ परिजन के प्रति संवेदना जताय हे।
एति राजनांदगांव जिला के धनेली गांव के तीर ट्रक के चपेट म आय ले मोटर सायकिल सवार एक झिन युवक के मउत होगे।
ओति बालोद जिला के पिनकापार म मालवाहक अउ कार के बीच होय भिडंत म मालवाहक म सवार अठारा ग्रामीण मन घायल होगे हे। जेमा ले तीन के हालत गंभीर बताय जात हे। ए घटना आज ओ बखत होइस जब छुरिया ब्लॉक के ग्राम टिपानगढ़ ले करीबन अठाईस लोगन मन मालवाहक म सवार होके राजनांदगांव जिला के सिंघोला गांव जाय बर निकले रीहिन।
भालू हमला
बीजापुर जिला के नडपल्ली जंगल म तेंदूपत्ता तोड़इया एक झिन गांव वाले उपर भालू ह हमला कर दीस। ए हमला म युवक घायल होगे हे, ओला उसूर के अस्पताल म भर्ती कराय गेहे।
उंहे बालोद जिला के वर परिक्षेत्र नर्रा म तेंदूपत्ता तोड़इया एक झिन युवक उपर भालू ह हमला करीस, जेला ग्रामीण मनके मदद ले जिला अस्पताल म भर्ती कराय गेहे।
एक स्टेशन एक उत्पाद
भारतीय रेलवे म एक स्टेशन एक उत्पाद योजना के विस्तार करे जात हे। इही कड़ी म रेलवे कोति ले चौदा रेलवे स्टेशन बिलासपुर, उसलापुर, रायगढ़, चांपा, जांजगीर-नैला, सक्ती, अकलतरा, कोरबा, अनुपपुर, पेंड्रारेड, विश्रामपुर, शहडोल, कोतमा अउ अंबिकापुर म एक स्टेशन एक उत्पाद के स्टॉल लगाये जात हे। जेमा आठ स्टेशन म स्टॉल चलाय जात हे। उंहे आने स्टेशन बर आवेदन मंगाय गेहे। बांचे सोला स्टेशन म जल्दीच स्टॉल लगाये जाही।
खबर के मुताबिक एक स्टेशन एक उत्पाद के उद्देश्य केंद्र सरकार के लोकल विजन बर वोकल ल बढ़ावा देना स्थानीय उत्पाद बर बाजार उपलब्ध कराना हे। एखर तहत मिलेट्स ले बने उत्पाद घलो ए स्टॉल म उपलब्ध कराय जात हे।
ऑनलाईन प्रशिक्षण-सक्षम
केंद्रीय स्वास्थ्य मंत्रालय ह प्रशिक्षण के ऑनलाईन प्रणाली सक्षम शुरू करे हे। एखर उद्देश्य स्वास्थ्य प्रबंधन बर उन्नत जानकारी ल बढ़ावा देना हरय। सक्षम प्लेटफार्म के तहत देश के सबो स्वास्थ्य पेशेवर ल ऑनलाईन प्रशिक्षण अउ चिकित्सा उपलब्ध कराय जाथे। स्वास्थ्य सचिव राजेश भूषण ह एखर शुभारंभ करीन।
ए पाठ्यक्रम बर विभाग के वेबसाईट म पंजीकरण कराय जा सकथे अउ प्रशिक्षण पाय के बाद प्रमाण पत्र ले जा सकथे। राष्ट्रीय स्वास्थ्य अउ परिवार कल्याण संस्थान ह ये प्लेटफार्म विकसित करे हे।