प्रदेस म लगभग साढ़े बारह हजार सिक्षक मनके पद म भर्ती बर ऑनलाइन आवेदन के प्रक्रिया आज ले सुरू होगे हे। आवेदन के आखिरी तारीख तेईस मई निर्धारित करे गेहे। उहें, चौबीस ले छब्बीस मई तक त्रुटि सुधार करे जा सकही। दू जून के प्रवेस पत्र वेबसाइट म अपलोड कर दे जाही। परीक्षा के तिथि दस जून संभावित हे। परीक्षा दू पाली म होही। पहली पाली म सिक्षक अउ दूसरइया पाली म सहायक सिक्षक मनके परीक्षा होही। व्यावसायिक परीक्षा मंडल-व्यापमं ह परीक्षा बर तीस केन्द्र निर्धारित करे हे।
पीएमश्री स्कूल
पीएमश्री स्कूल योजना बर राजनांदगांव, मोहला-मानपुर-चौकी अउ खैरागढ़-छुईखदान-गंडई जिला के पन्द्रह सरकारी स्कूल के चयन होय हे। चयनित स्कूल म सबो सुविधा उपलब्ध होही। एखर मॉनिटरिंग पीएम पोर्टल ले करे जाही।
स्कूल शिक्षा विभाग के अधिकारी मन ह बतईन कि चयनित स्कूल के दौरा करके जल्दी ही मसौदा तैयारा करे जाही। योजना म सामिल हरेक स्कूल ल पौने दू करोड़ रूपिया ले जादा के रासि दे जाही। एमा एक करोड़ चौबीस लाख रूपिया केन्द्र अउ तिरसठ लाख रूपिया राज्य सरकार वहन करही। पीएमश्री स्कूल म कक्षा छठवीं ले बारहवीं तक के विद्यार्थी मन पढ़ई करही। स्कूल म नवीनतम तकनीक, स्मार्ट क्लास, खेल अउ आधुनिक इंफ्रास्ट्रक्चर म बिसेस ध्यान दे जाही। एखर अलावा, कौशल प्रयोगशाला, कम्प्यूटर अउ साईंस लैब के घलो स्थापना करे जाही।
ईडी-कार्रवाई
प्रवर्तन निदेशालय-ईडी ह प्रदेस म सराब घोटाला म दू हजार करोड़ के भ्रष्टाचार अउ मनी लॉन्ड्रिंग होय के दावा करे हे। प्रेस ल जारी एक विज्ञप्ति म ईडी ह किहीन हे कि धन शोधन निवारण अधिनियम के प्रावधान के तहत काली घोटाला के कथित मास्टर माइंड कारोबारी अनवर ढेबर ल गिरफ्तार करे हे। ईडी ह किहीन कि ए मामला म पाछु मार्च महीना म कई ठिन जघा म तलासी लीन अउ कई झिन मनखे के बयान दर्ज करे गीस। ए दउरान इकट्ठा करे गे सबूत ले बछर दू हजार उन्नीस अउ दू हजार बाईस के बीच दू हजार करोड़ रूपिया के भ्रष्टाचार अउ मनी लॉन्ड्रिंग के संकेत मिले हे। ईडी ह यहू घलो किहीन हे कि अनवर ढेबर के अगुवई म एक संगठित आपराधिक सिंडिकेट राज्य म काम करत हे। ओमन किहीन कि एमा कुछ राजनीतिक अउ बड़का नौकरशाह घलो सामिल हे। ईडी ह किहीन कि फिलहाल जांच जारी हे अउ ए सिलसिला म कई गिरफ्तारी घलो हो सकत हे।
ट्रेन परिचालन
रेलवे प्रसासन ह दंतेवाड़ा अउ किरंदुल के बीच चलइया यात्री ट्रेन के परिचालन म 12 मई तक रोक लगा देहे। हालांकि, ए दउरान किरंदुल ले विशाखापट्टनम तक मालगाड़ी के आना-जाना चालू रइही।
जानकारी के अनुसार ईस्ट कोस्ट रेलमंडल ह माओवादी मन डहार ले चलाय जात टी.सी.ओ.सी. सप्ताह के सेती ट्रेन के परिचालन म रोक लगाय के निर्णय लेहे। उहें, एक दिन पहिली दंतेवाड़ा-किरंदुल के बीच मालगाड़ी के एक डिब्बा पटरी ले उतर गे रिहीस, जेखर सेती घलो ट्रेन मनके आवाजही प्रभावित होय हे।
रेलवे-आधुनिकीकरण
दक्षिण पूर्व मध्य रेलवे के रईपुर रेलमंडल म रईपुर-आर.वी.एच. के बीच दोहरीकरण अउ रईपुर स्टेसन यार्ड के आधुनिकीकरण के काम तेजी ले करे जात हे। ए काम अवइया दस मई तक पूरा होय के संभावना हे। रईपुर रेलमंडल के अधोसंरचना विकास के काम पूरा होय ले यात्री मन ल कतकोन सुविधा मिलही।
रईपुर रेलमंडल ले मिले जानकारी के मुताबिक रईपुर स्टेसन म दुर्ग छोर के तरफ बनत फुट ओव्हरब्रिज के काम पूरा होय ले यात्री मन ल स्टेसन म एक प्लेटफॉर्म ले दूसर प्लेटफॉर्म म आय-जाय बर रैम्प के सुविधा मिलही। उहें, रईपुर ले टिटलागढ़ के बीच दोहरीकरण के काम पूरा होय ले ट्रेन के परिचालन म सहायता मिलही।
राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली के निरदेस म प्रदेस म अवइया तेरह मई के राष्ट्रीय लोक अदालत के आयोजन करे जाही। एमा बैंक, बीमा, फाइनेंस, बीएसएनएल, विद्युत विभाग समेत नगर पालिका अउ आने-आने राजीनामा योग्य प्रकरण म पक्षकार मनके आपसी सहमति ले जुड़े मामला के निराकरण करे जाही। ए राष्ट्रीय लोक अदालत पक्षकार मनके भौतिक अउ वर्चुअल दूनों ही माध्यम ले उंखर उपस्थिति म निराकृत करे जाही।
नीट-परीक्षा
मेडिकल पाठ्यक्रम प्रवेस बर राष्ट्रीय प्रवेस सह पात्रता परीक्षा-नीट आज आयोजित करे गीस। ए परीक्षा देस के आने-आने सहर के अलग-अलग केन्द्र अउ देस के बाहर चौदह सहर म होइस।
छत्तीसगढ़ म घलो आज करीब डेढ़ लाख विद्यार्थी मन ह नीट के परीक्षा दीन। एखर बर राजधानी रईपुर समेत प्रदेस के तेरह जिला म केन्द्र बनाय गे रिहीस। ए परीक्षा म सफल होवइया विद्यार्थी मन प्रदेस के तेरह मेडिकल कालेज म प्रवेस ले सकही। ए कॉलेज मन म एमबीबीएस के लगभग दू हजार सीट हवय।
माओवादी-मुठभेड़
सुकमा जिला के सीमा ले लगे तेलंगाना के चेरला इलाका म सुरक्षा बल के संग होय मुठभेड़ म दू झिन माओवादी मारे गेहे। घटनास्थल ले मृत माओवादी के सव के संग एक एसएलआर रायफल घलो बरामद करे गेहे।
हमर संवाददाता ले मिले जानकारी के मुताबिक तेलंगाना अउ छत्तीसगढ़ के सीमा म ग्रेहाउंड के जवान तलासी अभियान म निकले रिहीन। इही बेरा कोत्तागुड़म जिला के चेरला इलाका म पहिली ले ताक लगाय बइठे माओवादी मन सुरक्षा बल उपर फायरिंग सुरू कर दीन। जवान मन डहार ले करे गे जवाबी कार्रवाई म माओवादी के एलओएस कमांडर समेत दू झिन माओवादी मारे गीस।
भाजपा-बयान
नेता प्रतिपक्ष नारायण चंदेल ह मुख्यमंत्री भूपेश बघेल ल चिट्ठी लिखके प्रदेस म बे-मौसम बरसात के सेती किसान मनके फसल ल होय नुकसान के मुआवजा देके मांग करे हे। श्री चंदेल ह अपन चिट्ठी म लिखे हे कि प्रदेस म असमय होय बदली-बारिस के सेती किसान मनके रबी फसल के अलावा सब्जी अउ फल घलो बर्बाद होय हे। अकेल्ला जांजगीर-चांपा जिला म पच्चीस हजार एकड़ म लगे फसल बर्बाद होगे हे। उहें, पूरा प्रदेस म लाखों एकड़ म लगे फसल बर्बाद होय के कगार म हे। एखर ले किसान मन ल बहुत नुकसान उठाना पड़त हे। ओमन किहीन कि अभी तक राज्य सरकार के तरफ ले ए फसल मनके नुकसान के कृषि अउ राजस्व विभाग डहार ले सर्वें घलो सुरू नइ करे गेहे। ओमन अपन चिट्ठी म किहीन हे कि जल्दी ले जल्दी सर्वें सुरू करके किसान मन ल होय नुकसान के मुआवजा दे जाय।
भाजपा-पीएससी
प्रदेस भाजपा महामंत्री विजय शर्मा ह राज्य लोक सेवा आयोग-पीएससी के साक्षात्कार के परिणाम घोसित करे के मांग करे हे। ओमन किहीन कि बछर दू हजार इक्कीस म होय परीक्षा के बाद तीस सितंबर दू हजार बाईस के एक सौ इकहत्तर पद बर पांच सौ नौ परीक्षार्थी मन ह साक्षात्कार दे रिहीन। फेर, इंटरव्यू के रिजल्ट अभी तक घोषित नइ करे गेहे। ओमन किहीन कि अब सुप्रीम कोर्ट डहार ले आरक्षण मामला म अंतरिम आदेस आय के बाद सरकार ल पीएससी इंटरव्यू के रिजल्ट घलो घोसित कर देना चाही।
उहें, पार्टी प्रवक्ता देवलाल दुग्गा ह किहीन हे कि तेंदूपत्ता संग्राहक परिवार के मेधावी विद्यार्थी मन ल बछर दू हजार उन्नीस-बीस ले छात्रवृत्ति नइ मिले हे। ओमन सरकार ले तुरते विद्यार्थी मन ल छात्रवृत्ति दे जाय के मांग करे हे।
कोंडागांव-ओपन बैडमिंटन प्रतियोगिता
राज्य स्तरीय ओपन बैंडमिंटन प्रतियोगिता के अब ले थोरकिन देर बाद समापन होही। कोंडागांव जिला मुख्यालय म चलत तीन दिन के ए प्रतियोगिता म राज्यभर के एक सौ अड़तीस खिलाड़ी भाग लेवत हे। एमा कांकेर, बिलासपुर, धमतरी, दंतेवाड़ा, नारायणपुर, दुर्ग, जगदलपुर अउ सुकमा जिला के प्रतिभागी सामिल हवय। ए प्रतियोगिता चार वर्ग म आयोजित करे जात हे।
प्रतियोगिता के पहिली दिन अंडर-नाइंटीन म चौबीस खिलाड़ी मन ह भाग लीन। एमा गर्ल्स ओपन वर्ग म दस महिला खिलाड़ी घलो सामिल रिहीन। जिला के बाहर ले आए खिलाड़ी मन बर जिला प्रसासन डहार ले आवास, भोजन अउ यातायात के समुचित व्यवस्था करे गेहे।