मुख्यमंत्री भूपेश बघेल ह आज अंबिकापुर के महामाया एयरपोर्ट के निरीक्षण करीन। ए मउका म मुख्यमंत्री ह बतईन कि सरगुजा म महामाया एयरपोर्ट ह बड़का विमान मन ल उतारे बर तैयार होगे हे। करीबन अड़तालीस करोड़ रूपिया के लागत ले बने अट्ठारह सौ मीटर एयर स्ट्रिप ले ए ह बन पाय हे। तीन सौ चौहत्तर एकड़ म फैले ए एयरपोर्ट म अवइया बेरा म बड़ अकन बड़का विमान ल उतारे बर एयरपोर्ट के विस्तार खातिर कार्ययोजना बनाय के निरदेस दे गेहे। ए एयरपोर्ट म प्राईवेट विमान घलो उतरही अउ बड़का विमान मनके लैंडिंग ले सरगुजा म पर्यटन जोरदरहा बाड़ही।
मुख्यमंत्री ह यहू बतईन कि तीन दिन बाद डीजीसीए के टीम ह इहां निरीक्षण बर अवइया हे। एखर बाद लाइसेंस बर आवेदन करे जाही। तहां पाछु अंबिकापुर ले दिल्ली, बनारस अउ रईपुर के फ्लाइट सुरू करे के सुझाव विमानन मंत्रालय ल दे जाही।
ईडी-छापा
मनी लॉन्ड्रिंग मामला म प्रवर्तन निदेशालय-ईडी ह कारोबारी अनवर ढेबर ल हिरासत म लेहे। जेखर बाद उनला बिसेस न्यायाधीश अजय सिंह राजपुत के अदालत म पेस करे गीस। ईडी के टीम ह दू दिन पहिली नोटिस जारी करके रईपुर महापौर एजाज ढेबर अउ उंखर भाई अनवर ढेबर ल ईडी दफ्तर बलाय रिहीस। फेर, अनवर ढेबर ईडी दफ्तर नइ पहुंचीन। उहें, एजाज ढेबर ले पूछताछ करे गे रिहीस। इही बीच, आज एजाज ढेबर ल नोटिस देके दुबारा ईडी दफ्तर बलाय गीस, जिहां उंखर ले पूछताछ करे जात हे।
इहां ए बतादन कि आयकर विभाग के बाद ईडी के टीम ह थोरिक दिन पहिली एजाज ढेबर अउ अनवर ढेबर इहां छापा मारे रिहीस। एजाज ढेबर ह पत्रकारवार्ता म ए जानकारी दीन कि उंखर घर म ईडी के टीम ह नोटिस लेके आय रिहीस अउ उंखर भाई घर बिन नोटिस के जांच करे गीस।
नीट-परीक्षा
अंडर ग्रैजुएट मेडिकल पढ़ई म प्रवेस बर काली देस के चार सौ निन्यानवे ठिन सहर मन म राष्ट्रीय पात्रता प्रवेस परीक्षा-नीट राखे गेहे। ए परीक्षा ल देस के बाहिर चौदह ठिन सहर म घलो राखे गेहे। ए परीक्षा ह मंझनिया दू बजे ले सुरू होके संझा पांच बजके बीस मिनट तक चलही।
डब्ल्यूएचओ-कोविड
विश्व स्वास्थ्य संगठन-डब्ल्यूएचओ ह कोविड-नाइंटीन वैश्विक स्वास्थ्य आपातकाल के सिराय के घोसना कर देहे। डब्ल्यूएचओ के ए बयान ह महामारी सिराय सोझ एक ठिन बड़का कदम हरय। डब्ल्यूएचओ के अंतर्राष्ट्रीय स्वास्थ्य विनियम आपातकाल समिति ह काली कोविड महामारी उपर गोठबात करे हे।
विस चुनाव-तैयारी
छत्तीसगढ़ म अवइया विधानसभा चुनाव ल लेके तियारी सुरू होगे हे। राज्य के मुख्य निर्वाचन पदाधिकारी रीना बाबा साहेब कंगाले ह कई ठिन जिला मन म तियारी के हालचाल जाने बर तेरह झिन अधिकारी मनके ड्यूटी लगाय हे। ए अधिकारी मन पन्द्रह मई तक जिला मन म निर्वाचन संबंधी तैयारी के समीक्षा करही। उहें, मुख्य निर्वाचन पदाधिकारी ह घलो कोनों-कोनों जिला के दउरा करही।
इहां ए बतादन कि प्रदेस म ए बछर विधानसभा चुनाव अक्टूबर ले दिसंबर भीतरी हो सकत हे।
मालगाड़ी-डिरेल
दंतेवाड़ा जिला म केके रेललाइन म बचेली अउ भांसी बीच मालगाड़ी के दू ठिन डिब्बा पटरी ले खाल्हे उतर गे। एखर चलत ए रेल रद्दा म थोरिक देर बर रेल अवई-जवई उपर असर पड़े रिहीस। बताय गेहे कि ए घटना ह टेक्निकल कारण ले होय हे, फेर एखर ले कोनो किसम के जनजानि नइ होय हे।
माओवादी-गिरफ्तार
मोहला-मानपुर-अंबागढ़ चौकी जिला पुलिस ह एक झिन माओवादी ल गिरफ्तार करे हे। एखर तीर ले बारह बोर के एक ठिन बंदूक, चार नग कारतूस समेत आने माओवादी जिनीस बरामद करे गेहे।
मिले जानकारी मुताबिक डिस्ट्रिक्ट रिजर्व गार्ड-डीआरजी के टीम ह गश्ती बर निकले रिहीस, तभे कोडेकुर्से अउ खुर्सेकला के जंगल ले ए माओवादी ल छेक के पकड़े गीस। एखर उपर कई ठिन थाना जगह म अपराध पंजीबद्ध हवय।
रूरल इंडस्ट्रियल पार्क
प्रदेस के रूरल इंडस्ट्रियल पार्क ल वाई-फाई सहुलियत ले लैस करे जाही, जेखर ले ए पार्क ह आर्थिक गतिविधि के सक्रिय केन्द्र रूप म बाड़ सकय। मुख्यमंत्री भूपेश बघेल ह रईपुर म राखे गे बइठका म गौठान मन म बनाय जावत रूरल इंडस्ट्रियल पार्क अउ छत्तीसगढ़ सामाजिक-आर्थिक सर्वेक्षण के प्रगति बारे म समीक्षा दउरान ए जानकारी दीन। मुख्यमंत्री ह किहीन कि हरेक विकासखंड म गोबर पेंट बनाय के कम ले कम एक ठिन इकाई के स्थापना सोज जोरदरहा काम करय।
बइठका म अधिकारी मन बतईन कि सामाजिक-आर्थिक सर्वेक्षण के काम ल एक ले तीस अप्रैल तक पूरा करे गीस। अद्यतनीकरण के काम पूरा होय बाद पन्द्रह मई तक ले गांव मन म बिसेस ग्राम सभा राख के दावा-आपत्ति ले जाही।
कार्नियल दृष्टिहीनता मुक्त
छत्तीसगढ़ ल बछर दू हजार पच्चीस तक कार्नियल दृष्टिहीनता मुक्त राज्य बनाय के लक्ष्य निर्धारित करे गेहे। स्वास्थ्य सेवा के संचालक भीम सिंह ह वरिष्ठ विभागीय अधिकारी मनके संग राष्ट्रीय अंधत्व अउ अल्पदृष्टि नियंत्रण कार्यक्रम के समीक्षा के दउरान ए जानकारी दीन। ओमन बइठका म राज्य म नेत्र सेवा मनके क्षेत्र म सफलतापूर्वक सेवा देके अउ सत-प्रतिसत उपलब्धि म राज्य नोडल अधिकारी अउ जम्मों जिला के नोडल अधिकारी मनके बड़ई करत ओमन ल चालू वित्तीय बछर म अउ जादा ऑपरेसन करे बर प्रोत्साहित करीन। बइठका म नेत्र सेवा के गुणवत्ता बढ़ाय अउ सिविर म ऑपरेसन नइ करे के निरदेस दीन।
कांग्रेस सचिव-दौरा
अखिल भारतीय कांग्रेस कमेटी के सचिव अउ प्रदेस प्रभारी डॉक्टर चंदन यादव ह काली ले चार दिन के दउरा म छत्तीसगढ़ आवत हे। ओमन काली बिहनिया विमान ले रईपुर पहुंचही अउ इहां ले अंबिकापुर जाही। अपन दउरा बेरा श्री यादव ह अंबिकापुर अउ रईपुर म राखे गे पार्टी के बइठका अउ आने-आने कारीकरम म सामिल होही।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक ले होही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘बेमेतरा‘‘ जिला के गतिविधि बारे म जानकारी दे जाही।
हल्बी-साप्ताहिक समाचार बुलेटिन
काली इतवार के ‘‘हल्बी‘‘ म साप्ताहिक समाचार बुलेटिन प्रसारित होही। करीबन पन्द्रह मिनट बेरा वाले ए साप्ताहिक समाचार बुलेटिन ल बिहनिया साढ़े सात बजे ले आकाशवाणी केन्द्र, जगदलपुर ले प्रसारित करे जाही। एला बस्तर संभाग म सुने जा सकही।
अउ अब थोरकुन समाचार सार म-
– जांजगीर-चांपा जिला के वरिष्ठ पत्रकार कुंजबिहारी साहू के सुरता म ज्ञानदीप स्कूल म ‘‘कैरियर मागदर्शन‘‘ कार्यक्रम राखे गीस। कार्यक्रम म पूर्व आईएएस अधिकारी ओ.पी. चौधरी ह पढ़ईया लइका मन के कैरियर बारे म मार्गदर्शन दीन।
– महासमुंद जिला म पुलिस ह गांजा तस्करी के मामला म पांच झिन आरोपी मन ल गिरफ्तार करके उंखर मन तीर ले करीबन ढाई कुंटल गांजा जब्ती करे हे, जेखर कीमत तिरसठ लाख रूपिया के आसपास बताय गेहे।
अउ
– महासमुंद जिलाच के सरायपाली थाना क्षेत्र म पुलिस ह नकली नोट ल बाजार म खपइया एक झिन आरोपी ल गिरफ्तार करे हे। एखर तीर ले पांच-पांच सौ के पच्चीस हजार रूपिया के नकली नोट बरामद करे गेहे।