राज्य के सबो राष्ट्रीय राजमार्ग म अब ई-डिटेक्शन सिस्टम शुरू करे जात हे। एखर चलत बिना फिटनेस अउ बिना टैक्स वाले गाड़ी के टोल प्लाजा ले आय-जाय म उंखर खुद ब खुद चालान कट जाही। संगेसंग बिना दस्तावेज के चलइया गाड़ी उपर घलो कार्रवाई होही। ए सबो परेसानी ले बचे बर गाड़ी चलइया मन ल अब सबो दस्तावेज तैयार रखना जरूरी होही। परिवहन विभाग ह राष्ट्रीय राजमार्ग म चलइया अइसे गाड़ी के पता लगाय बर एनआईसी ओडिशा के सहयोग ले ई-डिटेक्शन पोर्टल विकसित करे हे, जेखर उद्देश्य राष्ट्रीय राजमार्ग म आय जाय वाले गाड़ी के जानकारी इकट्ठा करना हे।
पहिली चरण म राष्ट्रीय राजमार्ग म टोल नाका ल ई-डिटेक्शन पोर्टल ले जोड़े गेहे। बाद म खनन अउ औद्योगिक क्षेत्र ले घलो ए.एन.पी.आर कैमरा के मदद ले जानकारी ले जाही।
भर्ती प्रक्रिया
उच्चतम न्यायालय डहार ले अंठावन प्रतिशत आरक्षण म देगे फैसला के बाद मुख्यमंत्री भूपेश बघेल ह सबो विभाग ल भर्ती प्रक्रिया म तेजी लाय के निर्देश दे रीहिन। जेखर बाद सामान्य प्रशासन विभाग ह सबो विभाग अध्यक्ष ल आदेश जारी करत विभाग ले कहिन हे कि ओमन ह नियुक्ति अउ चयन प्रक्रिया ल तुरते शुरू करे।
जानबा के अनुसार छत्तीसगढ़ म अंठावन प्रतिशत आरक्षण के मामला म उच्च न्यायालय ह हाईकोर्ट के फैसला म रोक लगा देहे। एखर ले राज्य म अंठावन प्रतिशत आरक्षण म लगे रोक हट गेहे अउ एखर बाद शासकीय पद म भर्ती बर रद्दा खुल गेहे।
छत्तीसगढ़ यंग साइंटिस्ट कांग्रेस
मुख्यमंत्री भूपेश बघेल किहीन हे कि वैज्ञानिक सोच के बिना मनखे के आगू बढ़ पाना संभव नइ हे। मुख्यमंत्री ह आज रईपुर म होवइया दू दिन के अट्ठारहवां छत्तीसगढ़ यंग साइंटिस्ट कांग्रेस के सुभारंभ करीन। ए बेरा म ओमन ह कहिन कि जनप्रतिनिधि अउ वैज्ञानिक अगर जुल मिलके कामबुता करय त देस के हरेक समस्या के हल आसानी से हो सकत हे। ओमन कहिन कि राज्य सरकार ह हर क्षेत्र म नवाचार ल अपन योजना अउ कतकोन कारीकरम म सामिल करे हे। श्री बघेल ह युवा वैज्ञानिक मन ले कहिन कि हमन मौसम म होवत बदलाव के बारे म सोध करना चाही अउ एखर बर जरूरी विकल्प के खोज घलो करना होही। ओमन ह कहिन कि अभी के समस्या ल जुन्ना सोध के आधार म खोजे ले नवा सोध ल समाज म नइ आही। एखर बर सोध के नवा-नवा तरीका युवा वैज्ञानिक मन ल सोचना चाही।
ए कारीकरम म पंडित रविशंकर शुक्ल विश्वविद्यालय के कुलपति प्राफेसर सच्चिदानंद शुक्ल, छत्तीसगढ़ यंग साइंटिस्ट कांग्रेस के अध्यक्ष प्रोफेसर कल्लोल के. घोष समेत देसभर ले आय युवा वैज्ञानिक मन सामिल होइन।
निर्वाचन आयोग परामर्श
निर्वाचन आयोग ह सबो राष्ट्रीय अउ राज्य स्तर के राजनैतिक दल अउ ओखर प्रचारक मनले चुनई प्रचार अभियान के बेरा संयम बरते अउ चुनई माहौल ल खराब झन करे के परामर्श जारी करीन हे। कर्नाटक विधानसभा चुनाव प्रचार के बेरा चुनई भाषण ल देखत एला जारी करे हे। परामर्श म निर्वाचन आयोग ह कहिन हे कि सबो राजनैतिक दल अउ पक्ष बर चुनई आचार संहिता अउ मर्यादा के पालन करना जरूरी हे। भारतीय जनता पार्टी ह निर्वाचन आयोग के परामर्श के स्वागत करीन हे।
केंद्रीय सूचना सचिव
केंद्रीय सूचना अउ प्रसारण सचिव अपूर्व चंद्रा ह कहिन हे कि सरकार जल्दीच स्कूल के पाठ्यक्रम म एनिमेशन, गेमिंग अउ वीएफएक्स के विसय ल शुरू करही । ओमन ह आज मुंबई म फिक्की फ्रेम के उद्घाटन सत्र म कहिन कि भारत ल एनिमेशन, गेमिंग अउ वीएफएक्स के क्षेत्र म विश्व स्तर म आय के जरूरत हवय।
श्री चंद्रा ह भरोसा दीन कि सरकार ह एखर बर जरूरी मदद घलो करही। ओमन ह बताइन कि प्रसार भारती के कायाकल्प करे जात हे अउ नवा विसय अउ धारावाहिक ह महीना भर म शुरू करे जाही। ओमन कहिन कि फीचर अउ क्षेत्रीय फिल्म ह घलो प्रसार भारती म सामिल करे जात हे। ओमन ह निर्माता अउ निर्देशक मनले अपील करीन हे कि ओमन ह राजस्व भागीदारी मॉडल के आधार म प्रसार भारती के संग सहयोग करय।
गौरव पर्यटन ट्रेन
रेल मंत्रालय ह देश के कतकोन जगह ले केन्द्र सरकार डहार ले चलाय जात ‘‘देखो अपना देश‘‘ अउ एक भारत-श्रेष्ठ भारत‘‘ के पर्यटन अवधारणा ल बढ़ावा देके उद्देश्य ले भारत गौरव पर्यटन ट्रेन के संचालन सुरू करे हे। ए थीम आधारित ट्रेन के परिकल्पना घरेलू पर्यटक मन ल देस के समृद्ध, सांस्कृतिक अउ धार्मिक विरासत ले अवगत कराय बर करे गेहे।
छत्तीसगढ़ अउ महाराष्ट्र के तीर्थ यात्री मन ल इंडियन रेलवे केटरिंग एंड टूरिज्म कारपोर्रेशन लिमिटेड-आई.आर.सी.टी.सी. डहार ले भारत गौरव पर्यटन ट्रेन के संचालन पच्चीस मई ले करे जाही। ए ट्रेन ह बिलासपुर सहर ले ‘‘दक्षिण दर्शन शुभ यात्रा‘‘ बर रवाना होही। ए ट्रेन ह छत्तीसगढ़ के बिलासपुर, भाटापारा, तिल्दा-नेवरा, रईपुर, दुरूग, राजनांदगांव अउ महाराष्ट्र के गोंदिया, तिरोड़ा, भंडारा रोड, नागपुर, सेवाग्राम अउ बल्लारशाह स्टेशन ले होवत हुए जाही। जिहां ले यात्री मन ए ट्रेन म सवार हो सकही। जानबा के अनुसार आठ दिन के ए यात्रा म रामेश्वरम, मदुरई, तिरूपति अउ श्रीसैलम – मल्लिकार्जुन ज्योर्तिलिंग के मंदिर अउ दर्शनीय स्थल ल घुमाय जाही। एखर बर हरेक यात्री ल पन्द्रह हजार पांच सौ रूपिया के खरचा आही। ए बेरा म कोरोना संबंधित दिशा-निरदेस के पालन करना जरूरी होही। इच्छुक लोगन मन आई.आर.सी.टी.सी. के वेबासाइट म ऑनलाइन अउ अधिकृत एजेंट ले बुकिंग करा सकत हे। संगेसंग बिलासपुर रेलवे स्टेसन के मोबाइन नंबर आठ- दो आठ सात नौ तीन दो दो चार दो अउ रायपुर रेलवे स्टेसन के मोबाइल नंबर – नौ तीन नौ शून्य एक-एक दू सात पांच नौ म संपर्क करे जा सकत हे।
वृक्षमाला अभियान
केंद्रीय ग्रामीण विकास मंत्रालय डहार ले महात्मा गांधी राष्ट्रीय ग्रामीण रोजगार गारंटी योजना-मनरेगा के चलत वृक्षमाला अभियान चलाये जात हे। एखर चलत नदिया के तीर ल बचाय के काम करे जात हे। इही कड़ी म कोंडागांव जिला के एक सौ चौंतीस ठिन ग्राम पंचायत म दीवार लेखन, चित्रकला अउ रैली के आयोजन करे गीस। ए अभियान के चलत लोगन मन ल नदिया के तीर म पेड़ लगाये बर घलो प्रेरित करे जात हे।
विश्व प्रेस स्वतंत्रता दिवस
आज विश्व प्रेस स्वतंत्रता दिवस हरय। प्रेस के स्वतंत्रता के महत्व अउ समाज म उंखर भूमिका म जोर दे खातिर हर बछर तीन मई के ए दिन ल मनाये जाथे। एसो विश्व प्रेस स्वतंत्रता के विसय हे- अन्य सभी मानवाधिकारों के संचालक के रूप में अभिव्यक्ति की स्वतंत्रता।
मुख्यमंत्री भूपेश बघेल ह ए मउका म मीडिया संस्थान प्रतिनिधि अउ पत्रकार मन ल बधाई अउ शुभकामना दीन हे। ओमन कीहिन हे कि छत्तीसगढ़ ह पहिली अइसे राज्य हे जिहां पत्रकार मन ल सुरक्षा देबर कानून बनाय जाय के पहल करे गेहे।
अउ अब थोरकुन समाचार सार म-
– स्वतंत्रता संग्राम सेनानी अउ पूर्व सांसद स्वर्गीय केयूर भूषण के आज पुण्यतिथि हवय। ए बेरा म मुख्यमंत्री भूपेश बघेल ह ओमन ल सुरता करत कीहिन कि छत्तीसगढ़ राज्य निर्माण बर ओमन ह भरपूर कोसिस करीन।
– बालोद जिला म आज होय रद्दा दुर्घटना म सीआरपीएफ के एक झिन जवान के मउत होगे। ए जवान ह गरियाबंद जिला के सढोली गांव के रहइया बताय जात हे जउन कि श्रीनगर के बड़गांव म पदस्थ रीहिन अउ छुट्टी मनाये बर घर आय रीहिन।
– रायपुर जिला के तिल्दा नेवरा के एक निजी कंपनी म काम के बेरा ऊंचाई ले गिरे के सेती एक झिन मजदूर के मउत होगे, उंहे एक झिन आने मनखे ह घायल होगे।
– गरियाबंद जिला के चिखली गांव म तेंदुआ के हमला ले एक झिन माइलोगिन ह घायल होगे। जेला तीर के अस्पताल म भर्ती कराय गेहे। ए माइलोगिन ह जंगल म लकड़ी बीने बर गे रीहिस।