ट्रेन हादसा
दक्षिण पूर्व मध्य रेलवे म बिलासपुर-कटनी रेलखंड म आज बीहनिया सिंहपुर स्टेशन के तीर कोयला ले भरे मालगाड़ी ह एक ठिन आने गाड़ी ल सिग्नल ओवरशूट करके टक्कर मार दीस। ए हादसा म एक झिन मालगाड़ी चालक के मउत अउ पांच आने लोगन के घायल होय के खबर हे।
रेल हादसा के सेती ए मार्ग म अप एंड डाउन अउ मीडिल तीनो लाइन म ट्रेन मनके परिचालन प्रभावित होय हे। बिरसिंहपुर स्टेशन म निजामुद्दीन दुर्ग एक्सप्रेस के लगभग पंद्रह सौ यात्री मन ल पंद्रह बस के माध्यम ले उंखर गंतव्य तक पहुंचाय जात हे। एमा लगभग पांच सौ यात्री बिलासपुर के हे। अइसने इंदौर-बिलासपुर नर्मदा एक्सप्रेस के यात्री मन ल शहडोल स्टेशन ले बस म उंखर गतंव्य तक पहुंचाय जात हे। एखरे संग सबो यात्री मन बर पानी अउ खाना के पैकेट दे जात हे। ए रद्दा के सबो स्टेशन मन म यात्री सहायता केंद्र डहार ले यात्री मन ल सहायता पहुंचाय जात हे। संगेसंग रेलवे हेल्पलाइन नंबर- एक शून्य सात दू जारी करे गेहे।
इही बीच दुर्ग-भोपाल अमरकंटक एक्सप्रेस दुर्ग-उधमपुर एक्सप्रेस अउ दुर्ग-छपरा सारनाथ एक्सप्रेस लगभग बारह ले जादा यात्री ट्रेन मन ल रद्द कर दे गेहे। उंहे कुछएक ट्रेन ल परिवर्तित रद्दा ले चलाये जात हे।
छत्तीसगढ़ी पर्व सम्मान निधि योजना
प्रदेश के सामुदायिक विकासखंड के ग्रामीण क्षेत्र के तीज, तिहार, संस्कृति अउ परंपरा ल संरक्षित करे के उद्देश्य ले मुख्यमंत्री छत्तीसगढ़ी पर्व सम्मान निधि योजना शुरू करे जाही।
मुख्यमंत्री भूपेश बघेल काली बीस अप्रैल के ए योजना के शुरूआत करही। ए योजना के तहत गैर अनुसूचित क्षेत्र मनके सबो ग्राम पंचायत ल दू किस्त म दस हजार रूपिया के राशि दे जाही। प्रदेश म इकसठ विकासखंड ह सामुदायिक क्षेत्र के अंतर्गत आथे। ये राशि सिरिफ सामुदायिक विकासखंड के छै हजार एक सौ ग्यारा ग्राम पंचायत मन ल दे जाही। योजना के क्रियान्वयन बर ग्राम पंचायत स्तरीय शासी निकाय समिति के गठन करे जाही।
खबर के मुताबिक एखर पहिली बस्तर संभाग मुख्यालय जगदलपुर म बीते तेरा अप्रैल के आयोजित कार्यक्रम म मुख्यमंत्री आदिवासी परब सम्मान निधि योजना के शुरूआत करे गे रीहिस।
मुख्यमंत्री भेंट मुलाकात
राजधानी रायपुर स्थित नालंदा परिसर म मिलेट कैफे के शुरूआत हो गेहे। अब नालंदा परिसर म प्रतियोगी परीक्षा के तियारी बर अवइया विद्यार्थी समेत रायपुर वासी मन ल घलो रागी, कोदो-कुटकी, ज्वार, संवा जइसन मिलेट्स ले बने व्यंजन के स्वाद मिल सकही। रायपुर पश्चिम विधानसभा क्षेत्र म भेंट मुलाकात के दउरान मुख्यमंत्री भूपेश बघेल ह ए कैफे के शुरूआत करीन। ए मउका म मुख्यमंत्री ह कहिन कि अब नालंदा परिसर म पढ़इया छात्र-छात्रा मन ल पोषक मिलेट्स के आहार मिलही।
उंहे मुख्यमंत्री ह भेंट-मुलाकात कार्यक्रम के तहत रायपुर के हीरापुर जरवाय म सी एंड डी प्लांट के घलो लोकार्पण करे गीस। ए सीएंडडी प्लांट के निर्माण मलबा के उचित प्रबंधन बर करे गेहे।
वर्ड पॉवर चैंपियनशिप
राज्य फाइनल वर्ड पॉवर चैंपियनशिप प्रतियोगिता के आयोजन रायपुर म करे गीस। कक्षा चौथी के विजेता रायगढ़ के नंदनी चौहान अउ कक्षा पांचवीं के विजेता धमतरी के मयंक कुमार निषाद रीहिस। उंहे प्रतियोगिता म रायपुर के उपासना साहू अउ दुर्ग के गरिमा साहू उप विजेता बनीन। ए प्रतियोगिता के शीर्ष दू खिलाड़ी मन ल मुंबई म अवइया अठाईस अप्रैल के राष्ट्रीय स्तर के प्रतियोगिता म छत्तीसगढ़ के प्रतिनिधित्व करे के मउका मिलही।
मन की बात-विशेष श्रृखंला
अब सुनव आकाशवाणी के लोकप्रिय कार्यक्रम प्रधानमंत्री के मन की बात म आधारित विशेष श्रृंखला- आज के कड़ी के विषय हरय- छात्रों से अपने स्कूल कॉलेज के लिए कुछ करने की अपील
(मैं पूर्व विद्यार्थियों से आग्रह करना चाहूंगा कि उन्होंने जिन संस्था में पढ़ाई की है वहां से अपने बॉन्डिंग को और अधिक मजबूत करते रहें। चाहे वह स्कूल हो, कॉलेज हो या यूनिवर्सिटी। मेरा संस्थानों से भी आग्रह है कि एल्युमिनाई एंगेजमेंट के नये और इनोवेटिव तरीकों पर काम करें। क्रिएटिव प्लेटफॉर्म डेवेलप करें ताकि एल्यूमिनाई की सक्रिय भागीदारी हो सके। बड़े कॉलेज और यूनिवर्सिटीज ही नहीं हमारे गांवों के स्कूल्स का भी स्ट्रॉंग वायब्रंट एक्टिव एल्युमिनाई नेटवर्क हो।)मन की बात-राजभवन प्रसारण
प्रधानमंत्री नरेंद्र मोदी के रेडियो कार्यक्रम मन की बात के सौवां कड़ी के प्रसारण जम्मों देश के राजभवन म विशेष रूप ले करे जाही। छत्तीसगढ़ राजभवन म घलो विश्वभूषण हरिचंदन के अध्यक्षता म ए कार्यक्रम के आयोजन करे जाही। राज्यपाल के सचिव अमृत खलखो ह एखर विस्तृत रूपरेखा तैयार करे अउ समन्वय के संबंध म आज राजभवन म बइठका लीन। बइठका म बताये गीस कि ए संबंध म राज्य स्तरीय समिति के गठन किया जाना हे। एखरे संग राजभवन म मन की बात के प्रसारण बर व्यवस्था के संबंध म चर्चा होइस। कार्यक्रम म क्षेत्र प्रचार निदेशालय भारत सरकार डहार ले मन की बात के पाछू कार्यक्रम के संबंध म एक ठिन विशेष फोटू प्रदर्शनी घलो लगाय जाही।
अउ अब पेस हे मौसम के हाल –
प्रदेश म ए बेरा भीषण गर्मी पड़त हे। कतकोन जगा मन म अधिकतम तापमान चौवांलिस डिग्री सेल्सियस के तीर पहुंच गेहे अउ लू के स्थिति बनत हे। मौसम विभाग के मुताबिक उत्तर पश्चिम कोति ले आवत गरम हवा अउ मौसम शुष्क होय के सेती प्रदेश के तापमान म सरलग बढ़ोत्तर होवत हे। बीते चौबीस घंटा के दउरान दुर्ग म अधिकतम तापमान चौवांलिस, रायपुर अउ बिलासपुर म तिरांलिस डिग्री सेल्सियस दर्ज करे गेहे। त अवइया कुछ दिन म तापमान म अउ बढ़ोत्तरी हो सकत हे।
उंहे अवइया चौबीस घंटा के दउरान कुछएक जगा मन म गरज-चमक के संग छींटा पड़े अउ एक-दू जगा म अंधड़ अउ बिजली गिरे के संभावना घलो हे।
अउ अब थोरकुन समाचार सार म-
– उच्च शिक्षा मंत्री उमेश पटेल के गाड़ी ल ओखर काफिला के संग चलत सुरक्षा गाड़ी ह बिलासपुर के सरगांव के तीर टक्कर मार दीस। एखर ले उंखर वाहन अनियंत्रित होके डिवाइडर ले टकरा गीस। ए हादसा म मंत्री ल मामूली चोट आय हे। प्राथमिक उपचार के बाद ओमन ल अस्पताल ले छुट्टी दे दे गेहे।
– छत्तीसगढ़ योग आयोग के अध्यक्ष ज्ञानेश शर्मा ह कुरूद म तैंतीसवां निशुल्क नियमित योगाभ्यास केंद्र के शुभारंभ करीन। पुराना कृषि उपज मंडी परिसर म ए योगाभ्यास केंद्र के संचालन रोज बीहनिया छै बजे ले साढ़े सात बजे तक करे जाही।