राष्ट्रपति द्रौपदी मुर्मू ह आज नई दिल्ली म राष्ट्रीय पंचायत पुरस्कार सप्ताह के उद्घाटन करीन। ए मउका म ओमन ह पंचायत मन ल प्रोत्साहित करे बर राष्ट्रीय पंचायत पुरस्कार दीन। कार्यक्रम म राष्ट्रपति ह किहीन कि गांव ह पूरा भारत के विकास के बुनियादी इकाई हे अउ सबले पहिली गांव मन ल विकसित करे के जरूरत हे। ओमन किहीन कि ग्रामीन मन ल अपन गांव ल अपन सुविधा के अनुसार विकसित करे के अधिकार होना चाही।
भेंट मुलाकात
मुख्यमंत्री भूपेश बघेल ह भेंट मुलाकात कार्यक्रम म आज रईपुर के उत्तर विधानसभा क्षेत्र बर एक सौ सत्रह करोड़ इकसठ लाख रूपिया ले जादा के आने-आने विकास काम के लोकार्पण अउ भूमिपूजन करीन।
श्री बघेल ह पचास करोड़ रूपिया के लागत ले रईपुर सहर म पांच ठन सड़क के सौंदर्यीकरण काम के सिलान्यास करीन। एमा जीई रोड, वीआईपी रोड, बलौदाबाजार रोड, स्टेसन रोड अउ पचपेड़ी नाका रोड के सौंदर्यीकरण करे जाही। उहें, मुख्यमंत्री ह दस करोड़ रूपिया के लागत ले कलेक्ट्रेट मल्टी लेवल पार्किंग म पास सौ सीटर बी.पी.ओ. सेंटर के आधारसिला राखीन। ए मउका म ओमन ह किहीन कि एखर स्थापना ले रईपुर के युवा मन बर उन्नत अउ आधुनिक सुविधा के माध्यम ले रोजगार के नवा रस्ता खुलही। एखर ले कॉल सेंटर कस्टमर सपोर्ट, सेल्स एंड मार्केटिंग, डाटा एंट्री, टेक्निकल सपोर्ट, बैंक एंड ऑफिस फ्रंट वर्क, सोशल मीडिया हैंडलिंग अउ डाटा एनालिसिस जइसन आउट सोर्सिंग व्यवसाय ले युवा मन ह जुड़ सकही।
भेंट-मुलाकात कार्यक्रम के दौरान मुख्यमंत्री ह रईपुर सहर बर चौरासी ठन नवा सफाई गाड़ी के लोकार्पण करीन।
सेना भर्ती-परीक्षा
भारतीय सेना म भर्ती बर ऑनलाइन परीक्षा आज ले सुरू होगे हे। ए परीक्षा छब्बीस अप्रैल तक चलही अउ हर दिन तीन पाली म होही। उम्मीदवार मन ह अपन प्रवेस पत्र भारतीय सेना के वेबसाइट ले डाउनलोड कर सकत हे। राज्य म ऑनलाइन परीक्षा बर तीन ठन केन्द्र – रईपुर, भिलाई अउ बिलासपुर म बनाय गे हवय। भिलाई के सिरसाकला के पार्थिव कॉलेज ऑफ इंजीनियरिंग एंड मैनेजमेंट, बिलासपुर के बोंडरी के लक्ष्मीचंद इंस्टीट्यूट ऑफ टेक्नोलॉजी अउ रईपुर के सरोना के पार्थिवी प्रो प्रोवाइन कामर्शियल काम्पलेक्स ल परीक्षा केन्द्र बनाय गे हवय।
हज यात्रा
ए बछर हज यात्रा बर चुने गे आवेदक मन ल यात्रा के दूसरा किश्त चौबीस अप्रैल तक जमा करना होही। ए जानकारी राज्य हज कमेटी के अध्यक्ष मोहम्मद असलम खान ह दीन हे। ओमन बतईन कि दूसरा किश्त के राशि जमा करे के प्रक्रिया आज ले सुरू होगे हे। ए बारे म अउ जादा जानकारी बर रईपुर के राज्य हज कमेटी ले संपर्क करे जा सकत हे।
मुख्यमंत्री-प्रधानमंत्री पत्र
मुख्यमंत्री भूपेश बघेल ह प्रधानमंत्री नरेन्द्र मोदी ल चिट्ठी लिखके छत्तीसगढ़ विधानसभा म पाछु बछर दिसंबर महीना म राज्य के आने-आने वर्ग के लोगन ल जनसंख्या के आधार म आरक्षण दे बर पारित आरक्षण के संसोधित प्रावधान ल संविधान के नौवां सूची म सामिल करे के आग्रह करे हे।
खबर के मुताबिक राज्य विधानसभा म पारित आरक्षण संसोधन विधेयक म अनुसूचित जाति ल तेरह, अनुसूचित जनजाति ल बत्तीस, अन्य पिछड़ा वर्ग ल सत्ताईस अउ ई.डब्ल्यू.एस. ल चार प्रतिसत आरक्षण देके प्रावधान करे हे। मुख्यमंत्री ह चिट्ठी म लिखे हे कि राज्य के विशेष परिस्थिति ल ध्यान म राखत आरक्षण के संसोधित प्रावधान ल नौवां सूची म सामिल कराय जाय ले ही वंचित अउ पिछड़ा वर्ग के लोगन ल न्याय मिल सकही।
हाईकोर्ट-सौम्या चौरसिया
छत्तीसगढ़ उच्च न्यायालय ह मुख्यमंत्री सचिवालय के निलंबित उप सचिव सौम्या चौरसिया के जमानत याचिका मामला म आज सुनवाइ पूरा करीस। कोर्ट ह अपन फैसला ल सुरक्षित राखे हे। ए मामला म सौम्या चौरसिया डहार ले अदालत म अधिवक्ता कपिल सिब्बल अउ हर्षवर्धन परगहनिया ह पैरवी करीन।
बिरनपुर-घटना
बेमेतरा जिला के बिरनपुर गांव म पाछु दिन म दू झन के हत्या के मामला म पुलिस ह आठ झिन आरोपी मन ल गिरफ्तार करे हे। जिला के पुलिस अधीक्षक आई.कल्याण एलेसेला ह आज एक ठन प्रेसवार्ता म ए बात के जानकारी दीस। जइसे कि खबर दे जा चुके हे कि पाछु दू अप्रैल के दू झन लोगन के सव मिले रिहीस हे।
भाजपा नेता-हत्या
मुंगेली जिला के लोरमी क्षेत्र ले लापता युवक के सव ह आज गोल्हापारा म मिले हे। बताय जात हवय कि मृतक शत्रुहन साहू ह भारतीय जनता पार्टी ले जुड़े रिहीस अउ ओ ह चिल्फी के पूर्व सरपंच रिहीस। मृतक के सिर म धारदार हथियार ले वार करे गेहे। पुलिस ह आसंका जताय हे कि कोनों अउ जगह म हत्या करे के बाद सव ल सड़क के किनारे फेंक दे गीस। पुलिस ह मामला के जांच सुरू कर देहे।
कृषि विवि-दीक्षांत समारोह
इंदिरा गांधी कृषि विश्वविद्यालय रईपुर के नौवां दीक्षांत समारोह काली अट्ठारह अप्रैल के होही। समारोह के अध्यक्षता राज्यपाल विश्वभूषण हरिचंदन करही। उहें, मुख्य अतिथि के रूप म मुख्यमंत्री भूपेश बघेल मौजूद रइही। दीक्षांत समारोह बर विशिष्ट अतिथि कृषि मंत्री रविन्द्र चौबे होही। समारोह म भारतीय कृषि अनुसंधान परिषद नई दिल्ली के पूर्व महानिदेशक डॉक्टर त्रिलोकचंद महापात्रा दीक्षांत उद्बोधन दीही। दीक्षांत समारोह म बछर दू हजार पन्द्रह-सोलह ले बछर दू हजार इक्कीस-बाईस तक करीबन छह हजार विद्यार्थी मन ल डिग्री दे जाही। समारोह के दउरान बैसठ स्वर्ण, एक सौ चालीस रजत अउ तेईस ठन कांस्य पदक दे जाही।
राज्य पुलिस अकादमी-दीक्षांत समारोह
रईपुर के चंदखुरी के नेताजी सुभाषचंद्र बोस राज्य पुलिस अकादमी म प्रशिक्षण लेवत उप पुलिस अधीक्षक मनके बारहवां सत्र के दीक्षांत परेड समारोह काली अट्ठारह अप्रैल के आयोजित करे जाही। समारोह म मुख्यमंत्री भूपेश बघेल सामिल होही। ए मउका म मुख्यमंत्री ह राज्य पुलिस अकादमी परिसर म नेताजी सुभाषचंद ्रबोस के प्रतिमा के अनावरण अउ नवा बने बैरक के लोकार्पण करही।
अउ अब थोरकुन समाचार सार म-
– राजनांदगांव जिला के कोहका के तीर आज बिहनिया बस अउ ट्रैक्टर के बीच होय भिंड़त ले बस ड्राइवर अउ कंडेक्टर के मउत होगे अउ दूसर चार झन घायल होगे हवय।
– महासमुंद जिला म कोडार काष्ठागार तीर घलो पाछु रतिहा बस अउ टेक्ट्रर के बीच टक्कर होय ले सात झिन मनखे घायल होगे हवय।
– सक्ती जिला के दतौद गांव म नहाय के दउरान तालाब म डूबे ले नौ बछर के एक झन लइका के मउत होगे। उहें, जांजगीर-चांपा जिला के नरियरा गांव म घलो तालाब म डूबे ले बारह बछर के एक झन लइका के मउत होगे।
– जांजगीर-चांपा जिला म नवागढ़ क्षेत्र के भठली गांव के एनीकट तीर पिकनिक मनाय बर गे एक झन लइका जंगली सुअर के हमला म गंभीर रूप ले घायल होगे हवय।
– सक्ती जिला के बाराद्वार रेलवे स्टेसन म खड़े मालगाड़ी ले चावल चोरी करे के मामला म रेलवे पुलिस ह सात झन आरोपी मन ल गिरफ्तार करे हे।
– जांजगीर-चांपा जिला के बम्हनीडीह म विधिक जागरूकता शिविर के आयोजन करे गीस।
– दुरूग जिला म पुलगांव थाना क्षेत्र म अवइया चुंद्रखुरी के एक ठिन निजी राईस मिल म लगे आगी ल करीबन छह घंटा बाद बुझाय जा सकीस। ए मिल म रतिहा कुन आगी लगे रिहीस। करीबन पन्द्रह ठन आग बुझाय वाले गाड़ी के मदद ले आज बिहनिया आग म काबू पाय जा सकीस।