छत्तीसगढ़ बंद-1
बेमेतरा जिला के बीरनपुर गांव म होय सांप्रदायिक हिंसा के विरोध म हिंदू संगठन मनके राज्यव्यापी बंद के आज मिलाजुला असर रीहिस। कहूं ले कोनो प्रकार के अप्रिय घटना होय के समाचार नइ मिले हे। आज बीहनिया शहर के दुकान, पेट्रोल पंप, अउ आने आने व्यावसायिक प्रतिष्ठान मन बंद रीहिस। बंद म जरूरी सेवा अउ शिक्षण संस्थान प्रभावित नइ होय हे। कतकोन जगा म गाड़ी मनके अवई जवई ल रोक देगे रीहिस।
राजधानी रायपुर म बीहनिया ले विश्व हिंदू परिषद अउ बजरंग दल के कार्यकर्ता मन ह बंद करवाय बर निकले रीहिन। भाठागांव के नवा बस स्टैण्ड म कोनो कोनो प्रदर्शनकारी मन ह एक ठिन बस उपर पथराव करीन। जेखर बाद सुरक्षा व्यवस्था बढ़ा दे गीस। प्रदर्शनकारी मन ह रायपुर, बेमेतरा, बिलासपुर, जशपुर मुंगेली, जांजगीर-चांपा, कोरिया, कोंडागांव अउ जगदलपुर के कतकोन जगा म पैदल अउ मोटर सायकिल ले मार्च निकालिन अउ दुकान मन ल बंद राखे के अपील करीन।
राज्यव्यापी बंद ल भाजपा ह घलो समर्थन देहे। रायपुर के जयस्तंभ चौक म प्रदर्शनकारी मन ह करीबन एक घंटा तक चक्का जाम करीन। त उंहे भिलाई म राष्ट्रीय राजमार्ग म प्रदर्शन करे गीस। बेमेतरा म बजरंग दल अउ विश्व हिंदू परिषद के कार्यकर्ता मन ह रैली निकाल के जम्मों दुकान मन ल बंद कराइन। विहिप के कार्यकर्ता मन ह रायपुर-जगदलपुर राष्ट्रीय राजमार्ग तीस म चक्का जाम करीन। जेखर ले बस मनके अवई जवई प्रभावित होइस। े
एति मुंगेली म बंद के दउरान विहिप कार्यकर्ता मन ह अपन मांग के बारे म एडीएम ल ज्ञापन सौंपीन। उंहे अंबिकापुर म बंद के पूरा असर देखे गीस।
बेमेतरा जिला मुख्यालय म विहिप अउ भाजपा कार्यकर्ता मन ह चक्का जाम कर दीन। जेखर सेती दूनो कोति ले गाड़ी मनके लंबा कतार लग गे। ए चक्का जाम म पूर्व विधायक अवधेश चंदेल ह घलो शामिल होइन। रायगढ़ म एसएसपी सदानंद ह बताइन कि बंद के दउरान स्थिति ह नियंत्रण म रीहिस।
उंहे बेमेतरा जिला के बीरनपुर गांव म आज घलो बड़ संख्या म पुलिस बल तैनात करे गे रीहिस। बीरनपुर म धारा 144 लागू हे। जिला प्रशासन ह गांव म शांति व्यवस्था बनाय बर समाज के प्रमुख संगठन मनले बइठका लीन। कलेक्टर पदुम सिंह एल्मा ह जम्मों लोगन मनले जिला म शांति व्यवस्था बनाये के अपील करे हे।
इही जिला के गांव चचानमेटा म प्रदर्शनकारी मन ह एक ठिन घर म आगी लगा दीन। ए दउरान सिलेण्डर के फटे ले अफरा तफरी मच गे।
उंहे आज बीरनपुर म मृतक के परिवार वाले मनले मिले बर गे भारतीय जनता पार्टी के प्रदेश अध्यक्ष अरूण साव ल साजा पुलिस ह पहिलीच रोक दीन। जेखर बाद प्रदेश अध्यक्ष के संगेसंग भाजपा के कतकोन कार्यकर्ता मन ह धरना म बइठ गे। प्रदर्शनकारी मन ह गांव के तीर पहुंच गेहे। इही दउरान पथराव घलो करे गीस। जेमा कोनो कोनो मीडियाकर्मी मन घायल होगे हे। मउका म पुलिस बल ह तैनात हवय।
जशपुर जिला के बगीचा विकासखंड म पहाड़ी कोरवा परिवार के चार सदस्य मन डहार ले सामूहिक आत्महत्या करे के मामला म भारतीय जनता पार्टी के प्रतिनिधि मंडल मन ह आज राज्यपाल विश्वभूषण हरिचंदन ले मिलिन। प्रतिनिधि मंडल ह ए राज्यपाल ल जांच रिपोर्ट के संग एक ठिन ज्ञापन घलो सौंपिन, जेमा भाजपा ह ए मामला के उच्च स्तरीय जांच कराय के मांग करे हे। प्रतिनिधि मंडल म नेता प्रतिपक्ष नारायण चंदेल पूर्व मुख्यमंत्री डॅाक्टर रमनसिंह प्रदेश अध्यक्ष अरूण साव, सांसद सुनील सोनी के संगेसंग कतकोन पूर्व मंत्री अउ विधायक मन शामिल होइन।
जानबा के मुताबिक जशपुर जिला के झुमरीडूमर गांव म पाछू दू अप्रैल के पहाड़ी कोरवा दंपत्ति ह अपन दू झिन लईका के संग आत्महत्या कर ले रीहिन। जेखर बाद भाजपा ह ए मामला के जांच बर छै सदस्यीय जांच समिति बनाय रीहिन।
दक्षिण पूर्व रेलवे के खड़गपुर रेलमंडल म चले रेल रोको आंदोलन सिरा गेहे। जेखर सेती दक्षिण पूर्व मध्य रेलवे डहार ले रद्द करे गे यात्री गाड़ी मनके अवई जवई आज ले शुरू कर देहे। एमा हावड़ा पुणे आजाद हिंद एक्सप्रेस, हावड़ा अहमदाबाद शालीमार एलटीटी, दुरंतो, सूरत मालदा, गीतांजली अउ हावड़ा सीएसएमटी एक्सप्रेस शामिल हे।
कोविड के तैयारी के समीक्षा बर आज जम्मों सरकारी अउ प्रायवेट अस्पताल मन म राष्ट्रव्यापी मॉकड्रिल करे गीस। कोविड मामला म बढ़ोत्तरी के सेती ये अभ्यास काली घलो चलही। मॉकड्रिल के दउरान अस्प्ताल मन म कोविड के रोकथाम अउ प्रबंधन बर दवा आईसीयू बेड अउ मेडिकल ऑक्सीजन के संगेसंग जम्मों जरूरी सेवा के व्यवस्था करे जात हे। केंद्र स्वास्थ्य मंत्री मनसुख मंडाविया ह नई दिल्ली म राम मनोहर लोहिया अस्प्ताल के दौरा करीन।
एति राजधानी रायपुर म कलेक्टर सर्वेश्वर नरेंद्र भूरे के अगवई म रायपुर जिला अस्पताल म मॉकड्रिल करे गीस। प्रशासन ह एखर बर करीबन एक हजार बिस्तर के व्यवस्था करे रीहिन। जिला अस्पताल के डॅाक्टर मनके मुताबिक ओमन कोरोना बीमारी ले लड़े बर पूरा तियार हे। जिला म कोविड संक्रमण के बाढ़त मामला ल देखत कलेक्टर ह आज अधिकारी मनले एक ठिन बइठका लीन। बइठका म कोरोना जांच के संख्या बढ़ाय अउ वैक्सीनेशन उपर घलो विशेष ध्यान देके बात कीहिन। कलेक्टर ह जम्मों लोगन मनले कोविड प्रोटोकॉल के पालन करे के अपील करे हे।
उंहे पाछू चौबीस घंटा के दउरान देश म कोविड के कुल पांच हजार आठ सौ अस्सी नवा मामला आगू आय हे। ए बेरा करीबन पैंतीस हजार एक सौ निन्यानबे मरीज मनके इलाज चलत हे।
एति छत्तीसगढ़ म काली बावन झिन नवा कोरोना संक्रमित मरीज मनके पहिचान होइस। अठाईस मरीज मनके ठीक होय के बाद राज्य म अब कोरोना के सक्रिय मरीज मनके संख्या बाढ़के करीबन चार सौ छियासठ होगे हे।
उंहे मोहला-मानपुर अंबागढ़ चौकी जिला के मोहला के दू ठिन सरकारी कन्या छात्रावास म चौदा झिन छात्रा मन ह कोरोना संक्रमित पाय गीस। जिला स्वास्थ्य अधिकारी ह ए छात्रा मन ल होम आइसोलेशन म राखे हे।
सेना भर्ती बर रजिस्ट्रेशन करइया उम्मीदवार मन बर ऑनलाईन परीक्षा के तारीख घोषित कर देहे। आने आने श्रेणी बर ऑनलाईन परीक्षा सतरा ले छब्बीस अप्रैल के होही। परीक्षा ह तीन पाली म होही। उम्मीदवार मन अपन प्रवेश पत्र भारतीय सेना के वेबसाइट ले डाउनलोड कर सकथे।
छत्तीसगढ़ म ऑनलाईन परीक्षा बर तीन केंद्र रायपुर, भिलाई अउ बिलासपुर म बनाय गेहे। भिलाई के सिरसाकला स्थित पार्थिवी कॉलेज ऑफ इंजीनियरिंग एंड मैनेजमेंट, बिलासपुर के बांडरी स्थित लक्ष्मीचंद इंस्टीट्यूट ऑफ टेक्नॉलाजी अउ रायपुर के सरोना के पार्थिवी प्रो प्रोवाइन कमर्शियल कॉम्पलेक्स ल परीक्षा केंद्र बनाय गेहे।
प्रदेश म स्कूल शिक्षा विभाग के प्रयास हे कि सरकारी स्कूल मन म एसो पंद्रह जून ले नया सत्र शुरू होतेच लईका मन ल पुस्तक, ड्रेस अउ सायकिल बांट दे जाय।
विभागीय सचिव डॅाक्टर एस. भारतीदासन ह कहिन कि पुस्तक अउ ड्रेस के देरी ले बंटे ले पढ़ई लिखई प्रभावित होथे। विभाग के प्रयास हे कि स्कूल मन म दाखिला के संग पढ़ई घलो शुरू हो जाय। ए बार पचपन लाख तिरासी हजार ले जादा पढ़ईया लईका मन ल पुस्तक दे जाही। त उंहे सात लाख नवासी हजार ले जादा लईका मन ल ड्रेस बांटे जाही। एखर बर छिहत्तर करोड़ पचास लाख रूपिया के बजट राखे गेहे। उंहे एक लाख चौंसठ हजार ले जादा सायकिल बांटे बर तिहत्तर करोड़ चौरासी लाख रूपिया के बजट पारित करे गेहे।
– जगदलपुर म काली केंद्रीय रिजर्व पुलिस बल ह शौर्य दिवस मनाइन। केंद्रीय रिजर्व पुलिस बल के इतिहास म नौ अप्रैल के दिन ल अदम्य साहस अउ शौर्य बर सुरता करे जाथे।
– नारायणपुर स्थित रामकृष्ण मिशन आश्रम म आनंद मेला राखे गीस। मेला म खेल अउ सांस्कृतिक कार्यक्रम के प्रतियोगिता होइस। एसो मेला म नारायणपुर, आकाबेड़ा, कुंदला, इरकभट्टी, कच्चापाल, कुतुल अउ मॅां सारदा विद्यामंदिर ओरछा के लईका मन सामिल होइन।