केन्द्रीय स्वास्थ्य मंत्री डॉक्टर मनसुख मांडविया ह आज राज्य अउ केन्द्रसासित प्रदेस के स्वास्थ्य मंत्री मन करा बइठका करीन। देस म बाढ़त कोविड संक्रमण के सेती ए बइठका बुलाय गीस। नई दिल्ली ले ऑनलाइन होय ए बइठका म केन्द्रीय स्वास्थ्य मंत्री ह कोरोना ले बचाव अउ प्रबंधन खातिर पाछु बेरा जइसे ए बेरा भी केन्द्र अउ राज्य मन ल सामुहिक भाव ले काम करे बर किहीन। ओमन राज्य मन ल सतर्क रेहे बर अउ कोविड प्रबंधन के तियारी करे बर किहीन। स्वास्थ्य मंत्री ह सबो अस्पताल म ए महीना के दस अउ ग्यारह तारीख के मॉकड्रिल करे बर घलो किहीन।
ऐति, छत्तीसगढ़ म घलो कोरोना संक्रमण के मामला बाढ़े लगे हे। काली राज्य म एक हजार छह सौ सड़सठ सैम्पल मनके जांच म एक सौ दू मरीज कोरोना संक्रमित पाय गीन। अइसने, प्रदेस म पॉजिटिविटी दर छह दशमलव एक दू प्रतिसत होगे हे। सबले जादा पच्चीस मरीज रईपुर जिला ले मिलीन। उहें, कोंडागांव म सत्रह अउ राजनांदगांव म बारह अउ धमतरी म ग्यारह संक्रमित मरीज मनके पुष्टि होईस। वर्तमान म तीन सौ तेईस मरीज मनके इलाज प्रदेस के आने-आने अस्पताल अउ होम आइसोलेशन म चलत हे।
मुख्यमंत्री-भेंट मुलाकात
भेंट-मुलाकात कार्यक्रम के तहत मुख्यमंत्री भूपेश बघेल आज दुरूग शहरी विधानसभा क्षेत्र के ग्राम गंजमंडी पहुंचीन। इहां ओमन नागरिक मन ले भेंट करके ओमन चर्चा करीन। एखरे संग आने-आने विकास कार्य के घोसना करीन। ए मउका म मुख्यमंत्री ह नगर निगग दुरूग के कार्यालय भवन के निर्माण, पाइप लाइन विस्तार के संघरा जेल तिराहा ले मिनी माता चउक तक फोरलेन सड़क बनाय के घोसना करीन। श्री बघेल ह किहीन कि विधानसभा क्षेत्र के आने-आने वार्ड म बैडमिंटन कोर्ट अउ खेल मैदान मनके उन्नयन कराय जाही। ओमन लाल बहादुर शास्त्री शाला भवन बनाय के संगेसंग बोरसी अउ पटरीपार म आत्मानंद स्कूल खोले जाय के घलो घोसना करीन।
अपन भेंट मुलाकात कार्यक्रम के दौरान मुख्यमंत्री ह दुरूग के दीपक नगर स्थित स्वामी आत्मानंद शासकीय अंग्रेजी माध्यम स्कूल के नवा भवन के लोकार्पण करीन।
भेंट मुलाकात कार्यक्रम के दउरान मुख्यमंत्री ह आज दुरूग शहरी क्षेत्र बर करीबन चालीस करोड़ रूपिया के विकास कार्य के सौगात दीन। ए मउका म ओमन शिवनाथ रिवर फ्रंट विकास काम बर ग्यारह करोड़ रूपिया देके घोसना करीन।
हज यात्री-चिकित्सा प्रमाण पत्र
प्रदेश म हज यात्री मनके चिकित्सा प्रमाण पत्र बर सासकीय अस्पताल मन म बिसेस सिविर लगाय जाही। छत्तीसगढ़ राज्य हज कमेटी के चेयरमैन मोहम्मद असलम खान ह बतईन कि हज-दू हजार तेईस बर जारी दिसा-निरदेस के अनुसार ए साल हज यात्री मनके मेडिकल स्क्रीनिंग अउ फिटनेस सर्टिफिकेट केवल सासकीय मेडिकल ऑफिसर कोति ले जारी करे जाही। एला देखत प्रदेस के जम्मों जिला कलेक्टर अउ मुख्य चिकित्सा अउ स्वास्थ्य अधिकारी ल चिट्ठी भेजके जम्मों सासकीय चिकित्सालय मन म बिसेस सिविर आयोजित करे के आग्रह करे गेहे, जेखर ले जम्मों हज यात्री मनके मेडिकल सर्टिफिकेट तय बेरा म मिल सकय।
किसान-बीज विक्रय दर
छत्तीसगढ़ म अनाज, दलहन-तिलहन के आधार अउ प्रमाणित बीज मनके विक्रय दर के निर्धारण कर दे गेहे। एखर अनुमोदन राज्य स्तरीय बीज विक्रय दर निर्धारण समिति के बइठका म करे गीस। ए दर भारत सरकार अउ राज्य सरकार डहार ले संचालित आने-आने योजना मन म प्रावधान के अनुसार उत्पादन, वितरण के अनुदान राशि ल घटाके निर्धारित करे गेहे।
छत्तीसगढ़ राज्य बीज अउ कृषि विकास निगम लिमिटेड ले मिले जानकारी अनुसार खरीफ सीजन दू हजार तेईस म किसान मन बर मोटा धान के विक्रय दर दू हजार आठ सौ रूपिया प्रति कुंटल तय करे गेहे। उहें, पतला धान के कीमत तीन हजार, सुगंधित धान के तीन हजार चार सौ रूपिया प्रति कुंटल निर्धारित करे गेहे। अइसने, कोदो बर छह हजार रूपिया, रागी बर चार हजार छह सौ रूपिया प्रति कुंटल निर्धारित करे गेहे। एखरे संग दलहन अउ तिलहन फसल के बीज बर घलो दर के निर्धारण करे गीस।
केलो नदी-संरक्षण
रायगढ़ जिला म ‘‘केलो है तो कल है‘‘ अभियान के सुरूवात करे गेहे। लैलूंगा विधायक चक्रधर सिंह सिदार अउ जिला कलेक्टर तारण प्रकाश सिन्हा ह ए अभियान के सुरूवात करीन। ए परियोजना के तहत केलो नदी के संरक्षण के काम करे जाही। अभियान के सुभारंभ रायगढ़ जिला म केलो नदी के उद्गम स्थान लुडेग पहाड़ ले करे गीस। अभियान के पहिली चरण म ए नदी के सुरूवाती पच्चीस किलोमीटर म संवर्धन के काम करे जाही। ए काम म तटवर्ती गांव के लोगन मन ले घलो सहयोग देके आग्रह करे गेहे।
ट्रेन-परिचालन
खड़गपुर रेलमंडल म रेल रोको आंदोलन के सेती दक्षिण पूर्व मध्य रेलवे ले होके चलने वाला कुछेक गाड़ी मनके परिचालन आज ले नौ अप्रैल तक प्रभावित रइही। एमा कुछ ट्रेन मन ल रद्द कर दे गेहे। उहें, कुछ ट्रेन मन ल बदले रस्ता ले चलाय जावत हे। जेन गाड़ी मन ल रद्द करे गेहे, ओमा पुणे-हावड़ा, कुर्ला-सालीमार, पोरबंदर-शालीमार, जबलपुर-सांतरागाछी, सांतरागाछी-कुर्ला, पुणे-हावड़ा दुरंतो एक्सप्रेस, अहमदाबाद-हावड़ा अउ उदयपुर-शालीमार एक्सप्रेस सामिल हे। उहें, कुर्ला-पुरी एक्सप्रेस, सी.एस.एम.टी. हावड़ा, एलटीट-शालीमार अउ राजेन्द्रनगर-बिलासपुर एक्सप्रेस घलो रद्द रइही।
माओवादी-समाचार
सुकमा जिला के कुकानार इलाका ले सुरक्षा बल ह एक-एक लाख रूपिया के दू झिन इनामी माओवादी मन ल गिरफ्तार करे म सफलता पाय हे। एमन उपर कई ठिन वारदात सामिल रेहे के आरोप हे अउ एमन करा ले बड़का मात्रा म विस्फोटक सामग्री घलो बरामद करे गेहे।
ऐति, नारायणपुर जिला के छोटेडोंगर थाना क्षेत्र के परमपाल बंहकेर के जंगल म सुरक्षा बल मन एक ठिन आईईडी बरामद करे हे।
मिले जानकारी अनुसार जवान मन ल नुकसान पहुंचाय के उद्देश्य ले माओवादी मन कोति ले आईईडी लगाय के सूचना मिले रिहीस। ए सूचना म थाना छोटेडोंगर ले डिस्ट्रिक्ट रिजर्व गार्ड-डीआरजी अउ बम निरोधक दस्ता-बीडीएस के टीम परमपाल के जंगल कोति रवाना होईस। बीडीएस के टीम ह सर्चिंग के दउरान तीन किलो वजनी एक ठिन आईईडी बरामद करीस, जेला मउकाच म निष्क्रिय कर दे गीस।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत प्रधानमंत्री नरेन्द्र मोदी के ‘‘मन की बात‘‘ कार्यक्रम म रेडियो श्रोता संघ के अध्यक्ष अशोक बजाज ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली आठ अप्रैल के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
राष्ट्रीय पेंशन प्रणाली-एनपीएस
केन्द्रीय वित्त मंत्रालय ह राष्ट्रीय पेंशन प्रणाली-एन.पी.एस. के अंतर्गत सरकारी कर्मचारी मनके पेंशन व्यवस्था के समीक्षा बर समिति के गठन कर देहे। मंत्रालय ह काली एक अधिसूचना म समिति कर्मचारी मनके जरूरत के समाधान तलाशे बर किहीन। चार सदस्य के समिति के अध्यक्षता केन्द्रीय वित्त सचिव टी.वी. सोमनाथन करही।
गुड फ्राइडे
आज गुड फ्राइडे हरय। प्रधानमंत्री नरेन्द्र मोदी ह एक ट्वीट संदेस म प्रभु यीशु के बलिदान ल सुरता करत आसा व्यक्त करीन हे कि उंखर जीवन ह लोगन मन ल प्रेरित करत रिही।
प्रभु ईसा मसीह के बलिदान दिवस म राजधानी रईपुर समेत छत्तीसगढ़ के आने-आने गिरिजा घर मन म बिसेस प्रार्थना सभा आयोजित करे गीस। इही कड़ी म दुरूग-भिलाई म ईसाई समुदाय के लोगन मन गुड फ्राइडे म रैली निकालीस।
अउ अब थोरकुन समाचार सार म-
– कोंडागांव म विधानसभा उपाध्यक्ष संतराम नेताम ह सात युवा मन ल बेरोजगारी पात्रता प्रमाण-पत्र प्रदान करीन हे। बतादन कि ए दिन म युवा मन ल बेरोजगारी भत्ता दे बर ऑनलाइन पंजीयन करे जात हे।
– नेता प्रतिपक्ष नारायण चंदेल के बेटा पलाश चंदेल ल जाजंगीर पुलिस ह दुष्कर्म मामला म गिरफ्तार करे हे। हाईकोर्ट ले अग्रिम जमानत मिले के बाद ओमन ल थाना ले ही बॉण्ड पत्र भरवाके रिहा कर दे गीस।
– कांकेर म आज बिहनिया एक निर्माणाधीन भवन म छिपे भालू के हमला ले उहां काम करइया एक झिन मजदूर गंभीर रूप ले घायल होगे हे।
– मुंगेली म जिला पुलिस डहार ले सार्वजनिक स्थान अउ साप्ताहिक बाजार मन म सामर्थ्य हौसले का जागरूकता अभियान चलाय जात हे। एखर माध्यम ले नोनी अउ महिला मन ल गुट टच-बैड टच के अलावा साइबर अपराध अउ यातायात संबधी जानकारी दे जात हे।
अउ
– जांजगीर के कचहरी चउक म चार सूत्रीय मांग ल लेके संयुक्त बिहान के महिला मन कोति ले अनिश्चितकालीन हड़ताल करे जावत हे।