भेंट मुलाकात कार्यक्रम के तहत आज मुख्यमंत्री भूपेश बघेल दुरूग ग्रामीण विधानसभा के पुरई गांव पहुंचीन। ए दउरान ओमन ग्राम नगपुरा म नवा कालेज, रसमड़ा म आईटीआई, अंजोरा म प्राथमिक स्वास्थ्य केन्द्र अउ पुरई म खेल अकादमी खोले के घोसना करीन हे। एखर अलावा मुख्यमंत्री ह ग्राम खोपली अउ मुंडेरा म नवा हायर सेकेंडरी स्कूल खोले के घलो ऐलान करीन हे अउ मुख्यमंत्री ह पांच ठिन गांव म पशु दवाखाना खोले के घोसना करीन। उहें, मुख्यमंत्री ह 70 करोड़ रूपिया के आने-आने विकास कारज के लोकार्पण अउ भूमिपूजन करे के संग हितग्राही मन ल जरूरी सामान बांटीन।
एखर ले पहिली, मुख्यमंत्री ह ग्राम तिरगा म महात्मा गांधी अउ पूर्व विधायक स्वर्गीय प्यारेलाल बेल चंदन के प्रतिमा के अनावरण करीन।
ओति, मुख्यमंत्री ह ग्राम निकुम म स्वर्गीय रामचंद्र देशमुख प्रदेश स्तरीय नाचा-गम्मत महोत्सव म सामिल होईन। ए मउका म ओमन नाचा समिति मन ल दस-दस प्रोत्साहन रासि देके घोसना करीन हे।
पहाड़ी कोरवा-आत्महत्या
जशपुर जिला म पहाड़ी कोरवा समुदाय के 4 लोगन फांसी लगाके आत्महत्या कर लीन हे। ए सबो झन एके परिवार के रिहीन। मृतक मन म पति-पत्नी अउ दू झन लइका सामिल हे।
मिले जानकारी ले बगीचा थाना क्षेत्र के सम्हार बहार गांव के झूमरा डूमर बस्ती म विशेष पिछड़ी जनजाति पहाड़ी कोरवा परिवार के 4 झन के सव एक ठन रूख म लटके मिलीस। घटना के सूचना मिलत हे एडिशनल एसपी अउ बगीचा थाना प्रभारी मउका म पहुंच के जांच-पड़ताल सुरू कर देहे। फिरहाल जांच के बाद ही आत्महत्या के कारण के खुलासा हो सकही।
सामाजिक/आर्थिक-सर्वेक्षण
छत्तीसगढ़ म सामाजिक-आर्थिक सर्वेक्षण 2023 सुरू होगे हे। राज्य के सबो जिला म सर्वेक्षण दल मोबाइल एप्लीकेशन के माध्यम ले आंकड़ा संग्रहण के कारज सुरू कर देहे।
सर्वेक्षण म ऑनलाइन अउ ऑफलाइन दूनो तरीका ले जानकारी संजोय जात हे। सर्वे के बेरा रोजगार जइसन – कृषि कारज, स्वरोजगार, सरकारी-निजी नौकरी, मजदूरी अउ बेरोजगारी के जानकारी लेके मोबाइल एप्लीकेशन म एंट्री करे जावत हे। सर्वेक्षण के कारज अवइया 30 अप्रैल तक चलही।
अरूण साव-प्रेसवार्ता
भारतीय जनता पार्टी के प्रदेस अध्यक्ष अरूण साव ह राज्य के कांग्रेस सरकार उपर आरोप लगईन हे। ओमन किहीन कि राज्य के कांग्रेस सरकार ह भ्रष्टाचारी मन ल बचाय म लगे हे। आज रायपुर म एक पत्रकारवार्ता म श्री साव ह मुख्यमंत्री के उपसचिव सौम्या चौरसिया अउ आईएएस समीर विश्नोई के खिलाफ अब तक कोनों कार्रवाई नइ करे जाय उपर सवाल उठइन। ओमन किहीन कि अइसन का मजबूरी हे, जेखर सेती आरोपी मन उपर कार्रवाई नइ करे जावत हे ? श्री साव ह मुख्यमंत्री ले ईडी, आईटी अउ सीबीआई के कार्रवाई ले जेल म बंद आरोपी मनके खिलाफ राज्य सरकार डहार ले का कार्रवाई करे जावत हे, एखर जानकारी मांगे हे।
कांग्रेस-बैठक
कांग्रेस के प्रदेश प्रभारी कुमारी सैलजा ह आज रईपुर म आयोग, निगम, मंडल म नियुक्त कांग्रेस नेता मनके बैठक लीन। बैठक म ओमन किहीन कि पार्टी ह देसभर म भारत सत्याग्रह चलावत हे, जेमा पार्टी के सबो पदाधिकारी अउ कार्यकर्ता मन ल भाग लेना हे। ओमन किहीन कि पार्टी के रीति-रिवाज ल आम जनता तक पहुंचाना कार्यकर्ता मनके दायित्व हे। बैठक म प्रदेस कांग्रेस अध्यक्ष मोहन मरकाम घलो मौजूद रिहीन।
ईडी-कोर्ट निर्देश
प्रवर्तन निदेशालय के कथित कोयला घोटाला अउ अवैध वसूली के आरोप म गिरफ्तार करे गे आरोपी मन ल, अब पेसी के बेरा कोर्ट म सोझे हाजिरी देना होही। रायपुर के विशेष अदालत ह वीडियो कान्फ्रेंसिंग के जरिया ले केन्द्रीय जेल ले पेसी म हाजिर होय के व्यवस्था ल खतम कर देहे।
प्रवर्तन निदेशालय के बिसेस लोक अभियोजक डॉक्टर सौरभ पांडेय ह बतईन कि बिशेष अदालत ह स्पष्ट करे हे कि अवइया पेसी म प्रकरण के सबो आरोपी मन ल सोझे हाजिर रेहे बर पड़ही।
उहें, प्रवर्तन निदेशालय के टीम ह ए मामला म रायपुर जेल म बंद आरोपी मन ले अवइया 10 ले 13 अप्रैल तक पूछताछ करही।
एसईसीएल-डिजिटल वार रूम
कोल फील्ड कंपनी एसईसीएल के सीएमडी डॉक्टर प्रेमसागर मिश्रा ह बिलासपुर म कोयला खदान बर डिजिटल वार रूप के सुभारंभ करीन। ए वार रूम के स्थापना ‘‘प्रोजेक्ट डिजी कोल‘‘ के निगरानी अउ सहायता बर करे गेहे। डिजी कोल परियोजना उन्नत डिजिटल समाधान के उपयोग करके कोल इंडिया अउ ओखर ले जुड़े कंपनी मनके खनन कार्य ल भविष्य बर तैयार करे म मदद करही।
राज्य के प्रथम महिला सुप्रभा हरिचंदन ह उत्कल दिवस के मउका म आज रायपुर के जगन्नाथ मंदिर परिसर म आयोजित निःशुल्क स्वास्थ्य शिविर के सुभारंभ करीन। ए मउका म श्रीमती सुप्रभा हरिचंदन ह शिविर म सेवा देवइया डॉक्टर मन ल प्रमाण-पत्र अउ स्मृति चिन्ह देके सम्मानित करीन। ए बेरा ओमन भगवान जगन्नाथ के पूजा-अर्चना करीन अउ लोगन मन ल उत्कल दिवस के बधाई दीन।
हज यात्रा
हज कमेटी ऑफ इंडिया ह एसो हज यात्रा बर चयनित छत्तीसगढ़ के आवेदक मन ले यात्रा के पहिली किश्त के राशि 21 हजार 800 रूपिया, 7 अप्रैल तक जमा करे के निरदेस दीन हे। उहें, पहिली किश्त के राशि जमा करके रसीद, मेडिकल प्रमाण पत्र, फोटो के संग फारम ल अवइया 10 अप्रैल तक हज कमेटी रायपुर म जमा करे बर केहे हे। फारम के प्रारूप हज कमेटी के वेबसाइट म उपलब्ध हे।
वन अग्नि-सुरक्षा प्रबंध
प्रदेस म रूख-राई ल आगी ले बचाय खातिर प्रधान मुख्य वन संरक्षक कार्यालय डहार ले टोल फ्री नंबर जारी करे गेहे, जेखर नंबर – 1 8 0 0 2 3 3 7 0 0 0… हे। ए नंबर म कोनों घलो मनखे आगी ले जुड़े घटना के जानकारी दे सकत हे। अइसने ढंग ले प्रदेस के सबो वन मंडल म नियंत्रण कार्यालय बनाय गेहे, जिहां ले आगजनी के घटना के निगरानी करे जावत हे।
बीडी महंत-जन्म शताब्दी
अविभाजित मध्यप्रदेश के पूर्व मंत्री स्वर्गीय बिसाहू दास महंत के जन्म शताब्दी के मउका म काली जांजगीर म कार्यक्रम के आयोजन करे गीस, जिहां विधनसभा अध्यक्ष डॉक्टर चरणदास महंत, मंत्री जयसिंह अग्रवाल समेत कतकोन नेता सामिल होइन अउ स्वर्गीय बिसाहू दास महंत के प्रतिमा उपर माल्यार्पण कर नमन करीन। कार्यक्रम म स्वर्गीय महंत के कारज ल सुरता करत साहित्यकार, पत्रकार अउ गुरूजन मनके सम्मान करे गीस। उहें, ए मउका म नौका विहार अउ कबीर कुटीर के घलो लोकार्पण करीन।
माओवादी-समाचार
सुकमा जिला म सुरक्षा बल के टीम ह एक महिला समेत दू झिन माओवादी ल गिरफ्तार कर लेहे। इंखर उपर कतकोन आपराधिक मामला म सामिल रेहे के आरोप हे। एसएसपी किरण चौहान ह बतईन कि कोबरा बटालियन के टीम ह तलाशी अभियान म निकले रिहीस। इही बेरा किस्टाराम इलाका ले दूनों माओवादी ल गिरफ्तार करे गीस। ए माओवादी मन थोरके दिन पहिली यात्री गाड़ी म आगी लगा के लूटपाट घलो करे रिहीन।
ठगी-आरोपी गिरफ्तार
दुरूग जिला म रोजगार के नांव म महिला मन ले ठगइया मुख्य आरोपी अउ ओखर संगवारी ल बिहार के पटना ले गिरफ्तार करे गीस। दूनों झिन आरोपी मन रोजगार देके नांव 5 हजार ले जादा महिला मन ले दू करोड़ रूपिया के ठगी करे रिहीन। पुलिस ह दूनों आरोपी ल गिरफ्तार करके दुरूग लानत हे।
ओति, जांजगीर-चांपा जिला के अकलतरा पुलिस ह घलो नौकरी देवाय के नांव म ठगइया एक झिन आरोपी ल गिरफ्तार करे हे।
अउ अब थोरकुन समाचार सार म-
– जिला रोजगार अउ स्व-रोजगार मार्गदर्शन केन्द्र, रायपुर डहार ले प्रदेस के सिक्षित बेरोजगार युवा मन बर काली तीन अप्रैल के रोजगार कार्यालय परिसर म प्लेंसमेंट कैम्प के आयोजन करे जाही।
– बालोद जिला के ग्राम भरदा के तीर ट्रक के टक्कर ले दोपहिया वाहन सवार एक सिक्षिका के मउत होगीस।
– सक्ती जिला म मालखरौदा थाना के सिंघरा गांव म एक ट्रैक्टर पलटे ले चालक के मउका म ही मउत होगे।
अउ
– धमतरी पुलिस ह नगरी-सिहावा रद्दा म गांजा के संग तीन लोगन ल गिरफ्तार करे हे। आरोपी मन ले करीब छह लाख रूपिया के गांजा जब्त करे गीस।