प्रदेस म आज ले बेरोजगारी भत्ता योजना के सुरूवात होगे हे। मुख्यमंत्री भूपेश बघेल ह रईपुर म ए योजना के सुभारंभ करीन। ए मउका म ओमन चार पात्र युवा मन ल बेरोजगारी भत्ता स्वीकृति के आदेस दीन। मुख्यमंत्री ह कहिन कि बेरोजगारी भत्ता दे बर ओमन ह विधानसभा सत्र के दउरान घोसना करे रिहीन अउ आज वित्तीय बछर के पहिली दिन ओला लागू कर दे गेहे। ओमन ह कहिन कि एक अप्रैल ले बेरोजगारी भत्ता बर पंजीयन के प्रक्रिया सुरू होगे हे। अप्रैल माह के कोनों भी दिन बेरोजगारी भत्ता बर पंजीयन करे अउ पात्र होय म एक अप्रैल ले बेरोजगारी भत्ता दे जाही। श्री बघेल ह कहिन कि युवा हमेसा बेरोजगार न रहे, एखर बर ओमन ल रोजगारमूलक प्रसिक्षण देके योजना घलो बनाय गेहे। बेरोजगारी भत्ता योजना के तहत पात्र युवा मनके बैंक खाता म हर महीना पच्चीस सौ रूपिया भेजे जाही।
बेरोजगारी भत्ता बर आवेदक मन ल छत्तीसगढ़ के मूल निवासी होय के संग उंखर उम्र अट्ठारह ले पैंतीस बछर के बीच होना चाही। आवेदक ल मान्यता प्राप्त बोर्ड ले बारहवीं कक्षा पास होय के संग प्रदेस के कोनों भी जिला रोजगार अउ स्वरोजगार मार्गदर्शन केन्द्र म दू बछर पुराना पंजीयन होना जरूरी हे। उहें, आवेदक के परिवार के एक बछर के आय ढाई लाख रूपिया ले जादा नइ होना चाही।
सामाजिक/आर्थिक सर्वेक्षण
प्रदेस म सामाजिक-आर्थिक सर्वेक्षण के काम आज ले सुरू होगे हे। मुख्यमंत्री भूपेश बघेल ह रईपुर म आयोजित कार्यक्रम म सर्वेक्षण के सुभारंभ करीन। ए मउका म ओमन ह सर्वेक्षण दल ल हरी झंडी दिखाके आने-आने जिला मन बर रवाना करीन। सर्वेक्षण के ए काम प्रदेसभर म तीन अप्रैल तक चलही। ए दउरान सर्वेक्षण दल ग्रामीण क्षेत्र म घर-घर जाके मोबाइल एप्लीकेशन के माध्यम ले सर्वे के काम करही। ए सर्वेक्षण के उद्देश्य केन्द्र अउ राज्य सरकार के जनकल्याणकारी योजना ल लोगन के जीवन स्तर म होने वाला प्रभाव के आंकलन करना हे।
डाकघर बचत योजना-ब्याज
केन्द्र सरकार ह डाकघर बचत योजना बर ए बछर अप्रैल ले जून के तिमाही बर ब्याज दर ल बढ़ाय हे। केन्द्रीय वित्त मंत्रालय के आर्थिक मामला के विभाग ह बतईन कि राष्ट्रीय बचत प्रमाण पत्र-एनएससी म सबले जादा ब्याज दर बढ़ाय गेहे। ए 7 प्रतिसत ले बाढ़के 7.7 प्रतिशत होगे हे। सुकन्या समृद्धि बचत योजना के ब्याज दर अब 8 प्रतिसत होगे हे, जेन पहिली 7.6 प्रतिसत रिहीस। पीपीएफ अउ बचत जमा योजना के ब्याज दर 7.1 अउ 4 प्रतिसत होगे हे। वरिष्ठ नागरिक मन ल बचत योजना के 8 प्रतिसत के जगह 8.2 प्रतिसत ब्याज मिलही। किसान विकास पत्र के ब्याज दर 7.2 प्रतिसत ले बाढ़के 7.5 प्रतिसत होगे हे। किसान विकास पत्र के परिपक्वता अवधि 120 महीना ले घटके 115 महीना कर दे गेहे।
माओवादी-समाचार
बीजापुर जिला म आज सुरक्षा बल अउ माओवादी मनके बीच होय मुठभेड़ म पुलिस ह दू से तीन माओवादी मनके घायल होय के दावा करे हे।
जिला के अतिरिक्त पुलिस अधीक्षक ह बतईन कि गंगालूर थाना क्षेत्र ले डीआरजी, सीआरपीएफ अउ एसटीएफ संयुक्त टीम सर्चिंग अभियान बर निकले रिहीस। इही दउरान सावनार अउ तोड़का के जंगल म माओवादी मन ह बीजीएल ले पुलिस बल उपर हमला कर दीन। इंखर बाद जवान मन ह घलो जवाबी कार्रवाई करीन, जेखर बाद माओवादी मन जंगल के फायदा उठाके उहां ले भाग गीन। ए घटना के बाद पुलिस ह इलाका म सर्चिंग बढ़ा देहे।
इही बीच, दंतेवाड़ा जिला म माओवादी मन ह नारायणपुर ले बैलाडीला तक चलइया एक यात्री बस म आग लगा दीन। जानबा के मुताबिक मालेवाही अउ बोदली के बीच माओवादी मन ह बस ल रोकीन अउ यात्री मन ल नीचे उतारके बस म आगी लगा दीन। सबो यात्री सुरक्षित बताय जात हे।
उहें, नारायणपुर जिला म कुकड़ाझोर ले आकाबेड़ा के बीच माओवादी मन ह एक निजी कंपनी के केबल जलाके रद्दा ल रोकीन। माओवादी संगठन ह रद्दा म उपसरपंच के हत्या के जिम्मेदारी लेके संबंध म बैनर-पोस्टर घलो लगाय हे।
अस्पताल-प्रमाण पत्र
केन्द्रीय स्वास्थ्य मंत्रालय ह प्रदेस के तीन सासकीय अस्पताल ल राष्ट्रीय गुणवत्ता आश्वासन मानक प्रमाण पत्र प्रदान करीन। एमा सरगुजा जिला के सीतापुर सामुदायिक स्वास्थ्य केन्द्र, महासमुंद के कोमाखान प्राथमिक स्वास्थ्य केन्द्र अउ कोरबा जिला के गोपालपुर शहरी प्राथमिक स्वास्थ्य केन्द्र सामिल हे।
जानबा के मुताबिक केन्द्रीय स्वास्थ्य मंत्रालय के टीम ह पाछु फरवरी माह म ए तीनों अस्पताल के निरीक्षण करके उहां के मरीज मन बर उपलब्ध करइया सुविधा के गुणवत्ता के परीक्षण करे रिहीन। टीम ह ए संबंध म मरीज मन ले फीडबैक घलो ले रिहीन। मरीज मन ल अच्छा स्वास्थ्य अउ सुविधा उपलब्ध कराय बर ए अस्पताल ल राष्ट्रीय गुणवत्ता आश्वासन मानक प्रमाण पत्र दे गेहे।
हज यात्री-चयन
हज यात्रा बर ए बछर छत्तीसगढ़ ले 649 लोगन के चयन करे गेहे। ए जानकारी छत्तीसगढ़ राज्य हज कमेटी के चेयरमैन मोहम्मद असलम खान ह दीन। ओमन बतईन कि राज्य म कुल 649 सीट के आवंटन सेंट्रल हज कमेटी ह रेंडम डिजिटल सिलेक्शन के आधार म करे हे। एमा 327 पुरूष अउ 322 माईलोगिन सामिल हे। चयनित हज यात्री मनके सूची हज कमेटी ऑफ इंडिया अउ राज्य हज कमेटी के वेबसाइट म उपलब्ध हे।
मुख्यमंत्री-पर्वतारोही मुलाकात
मुख्यमंत्री भूपेश बघेल ले काली रईपुर म रायगढ़ जिला के पर्वतारोही याशी जैन ह मुलाकात करीन। ए दउरान याशी ह मुख्यमंत्री ल बतईन कि ओ ह माउंट एवरेस्ट के चढ़ाई बर जवइया पन्द्रह सदस्यीय टीम म छत्तीसगढ़ के अकेल्ला सदस्य हे। माउंट एवरेस्ट फतह करे बर निकले उंखर टीम के ए अभियान एक अप्रैल ले सुरू होके पैंतालीस दिन तक चलही। मुख्यमंत्री ह याशी जैन के उत्साहवर्धन करत ओला बधाई दीन अउ प्रोत्साहन राशि के रूप म पांच लाख रूपिया देके घोसना करीन। ए मउका म मुख्यमंत्री ह याशी डहार ले माउंट एवरेस्ट फतह करे के बाद फहराय जाने वाला भारतीय राष्ट्रीय ध्वज अउ ‘गढ़बो नवा छत्तीसगढ़‘ ध्वज के विमोचन करीन।
आरडीए-चेयरमैन बयान
रायपुर विकास प्राधिकरण-आरडीए के अध्यक्ष सुभाष धुप्पड़ ह कहिन कि फ्लैट्स, प्लॉट, दुकान अउ आने-आने संपत्ति के बिक्री बर कोनों भी एजेंट अउ ब्रोकर के नियुक्ति नइ करे गेहे। यदि कोनों एजेंट, कोई भी मनखे ल उंखर इच्छा के अनुसार फ्लैट दिलाय के आश्वासन देथे त ए बात गलत हे। श्री धुप्पड़ ह कहिन कि जेन लोगन ल फ्लैट, प्लॉट अउ दुकान खरीदना हे ओमन सीधा रायपुर विकास प्राधिकरण के मार्केटिंग साखा ले मिल सकत हे।
जानबा के मुताबिक रायपुर विकास प्राधिकरण डहार ले ई.डब्ल्यू.एस. फ्लैट्स के आवंटन लॉटरी ले अउ आने फ्लैट्स, प्लॉट, दुकान, हॉल के आवंटन निविदा के माध्यम ले करे जाथे।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘गरियाबंद‘‘ जिला के बारे म जानकारी दे जाही।
हल्बी-साप्ताहिक समाचार बुलेटिन
काली इतवार के ‘‘हल्बी‘‘ म साप्ताहिक समाचार बुलेटिन प्रसारित करे जाही। करीब 15 मिनट अवधि के ए साप्ताहिक समाचार बुलेटिन बिहनिया साढ़े 7 बजे ले आकाशवाणी केन्द्र, जगदलपुर ले प्रसारित करे जाही। एला बस्तर संभाग म सुने जा सकही।
अउ अब थोरकुन समाचार सार म-
– मुख्यमंत्री भूपेश बघेल ह जननेता बिसाहू दास महंत अउ लोक नाचा के जनक दाऊ दुलार सिंह मंदराजी के जयंती म ओमन ल नमन करीन।
– मुख्यमंत्री ह आज रईपुर के चौबे कॉलोनी स्थित महाराष्ट्र मंडल के नवा भवन के लोकार्पण करीन।
अउ
– धमतरी जिला के दोनर गांव म गाज गिरे ले खेत म काम करत किसान के मउत होगे।