केन्द्रीय गृह अउ सहकारिता मंत्री अमित शाह ह किहीन हे कि छत्तीसगढ़ के बस्तर क्षेत्र म माओवादी मनके खिलाफ लड़ाई अब जीत के आखिरी चरण म हवय। ओमन किहीन कि माओवादी मनके प्रभाव ल कम करे म सीआरपीएफ ह महत्वपूर्ण भूमिका निभाय हे। केन्द्रीय मंत्री आज छत्तीसगढ़ म बस्तर संभाग के मुख्यालय जगदलपुर म सीआरपीएफ के चौरासीवां स्थापना दिवस समारोह म बोलत रिहीन। ओमन किहीन कि सीआरपीएफ के जवान मन ह आदिवासी मनके विकास बर अपन आप ल जोखिम म डालीन।
आयोजन के दउरान केन्द्रीय गृह मंत्री ह आकाशवाणी डहार ले प्रसारित करे जाने वाला ‘‘हल्बी‘‘ बोली म साप्ताहिक समाचार बुलेटिन के वर्चुअल सुरूवात करीन। आकाशवाणी के प्रयास के तारीफ करत श्री शाह ह किहीन कि आज बस्तर के बोली हल्बी म प्रसार भारती के समाचार सेवा के सुरूवात होय ले ए क्षेत्र के लोगन अब स्थानीय भाखा म घलो देस-दुनिया के समाचार ल जान सकही। ए समाचार सेवा प्रधानमंत्री नरेन्द्र मोदी के स्थानीय बोली बर प्रोत्साहन के नीति ल देखाथे। एखर ले न सिरिफ स्थानीय भासा मजबूत होथे, फेर बस्तर के लोगन ल उंखर भासा म घलो समाचार मिलथे।
ए मउका म प्रसार भारती के मुख्य कार्यकारी अधिकारी गौरव द्विवेदी घलो मौजूद रिहीन। मीडिया ले गोठबात करत ओमन किहीन कि दूर-दराज के ग्रामीण इलाका म लोगन तक समाचार अउ दूसर सूचना पहुंचाय म स्थानीय भाखा अउ बोली सबले कारगर साबित होथे।
पन्द्रह मिनट के साप्ताहिक समाचार बुलेटिन आकाशवाणी के जगदलपुर केन्द्र ले हर इतवार के बिहनिया साढ़े सात बजे प्रसारित करे जाही।
अमित शाह-जगदलपुर-02
एखर पहिली, केन्द्रीय मंत्री ह शहीद स्मारक म माल्यार्पण करीन अउ फेर जगदलपुर तीर करनपुर म केन्द्रीय रिजर्व पुलिस बल परिसर म परेड के निरीक्षण करीन। ए मउका म केन्द्रीय मंत्री ह समारोह म बल के जवान मन ल वीरता पदक अउ आने-आने श्रेणी म सर्वश्रेष्ठ प्रतिष्ठान बर ट्रॉफी दीन।
केन्द्रीय मंत्री अमित शाह ह आज अपन छत्तीसगढ़ प्रवास के दउरान माओवाद प्रभावित इलाका के पोटकपल्ली कैम्प के दौरा करीन। ए दउरान ओमन ह सीआरपीएफ, डीआरजी अउ एसटीएफ के जवान मन ले भेंट करीन।
छत्तीसगढ़ हाईकोर्ट-न्यायाधीश
इलाहाबाद हाईकोर्ट के न्यायाधीश रमेश सिन्हा ल छत्तीसगढ़ हाईकोर्ट के मुख्य न्यायाधीश नियुक्त करे गेहे। न्यायाधीश रमेश सिन्हा के नाव के अनुसंसा सुप्रीम कोर्ट के कॉलेजियम ह करे रिहीस। छत्तीसगढ़ हाईकोर्ट म पूर्णकालिक नियुक्ति के पहिली जस्टिस गौतम भादुड़ी ल कार्यवाहक मुख्य न्यायाधीश नियुक्त करे गे रिहीस। केन्द्रीय विधि न्याय मंत्रालय डहार ले जारी आदेस म छत्तीसगढ़ हाईकोर्ट म न्यायाधीश रेहे प्रीतिंकर दिवाकर ल इलाहाबाद हाईकोर्ट के मुख्य न्यायाधीश बनाय गे हवय।
मुख्यमंत्री-लोकार्पण
मुख्यमंत्री भूपेश बघेल ह आज मुंगेली जिला के सरगांव म राखे गे ‘‘भरोसे का सम्मान‘‘ कार्यक्रम म सामिल होइन। ए मउका म ओमन ह किसान न्याय योजना के चौथा किश्त के रूप म तेईस लाख तेईस हजार किसान मनके खाता म एक हजार सात सौ तिरानवे करोड़ रूपिया के रासि ऑनलाइन जारी करीन। मुख्यमंत्री ह सरगांव म नगरीय भूमिहीन मजदूर न्याय योजना के सुरूवात करीन। ए मउका म ओमन ह ग्रामीण भूमिहीन कृषि मजदूर मनके खाता म करीब एक सौ पचास करोड़ रूपिया के सहायता रासि जारी करीन। ए मजदूर मन ल हर बछर सात हजार रूपिया के मदद दे जाथे। श्री बघेल ह गोधन न्याय योजना म छह करोड़ चौंतीस लाख रूपिया के रासि के भुगतान घलो संबंधित हितग्राही मनके खाता म करीन। ए मउका म मुख्यमंत्री ह जिला म सात सौ इकतीस करोड़ चौव्वन लाख रूपिया के आने-आने विकास काम के लोकार्पण अउ भूमिपूजन करीन।
कारीकरम म मुख्यमंत्री ह बेरोजगारी भत्ता योजना के वेब पोर्टल के लोकार्पण करीन। उहें, छत्तीसगढ़ सामाजिक, आर्थिक सर्वेक्षण के एप्लीकेशन ल घलो लांच करीन। ए मउका म मुख्यमंत्री ह किहीन कि गांव म उद्योग खोले बर राज्य सरकार ह सुविधा देवत हे, जेखर ले जरूरतमंद मन ल रोजगार मिलही।
राज्यपाल-मुलाकात
राज्यपाल विश्वभूषण हरिचंदन ह केहे हे कि छत्तीसगढ़ बाल कल्याण परिषद लइका मनके कल्याण बर सरलग काम करयं। राज्यपाल ह आज राजभवन म राज्य बाल कल्याण परिषद के उपाध्यक्ष चंद्रेश शाह के अगुवई म प्रतिनिधिमंडल ले सौजन्य मुलाकात करके ओमन ल परिषद के उद्देश्य अउ काम के बारे म जानकारी दीन। परिषद के सचिव ह राज्यपाल ह बतईन कि रईपुर म स्पीच थैरेपी केन्द्र दू बछर ले चलाय जावत हे, जिहां कमती फीस म मुकबधिर लइका मनके इलाज करे जात हे। एखरे संग परिषद डहार ले लइका मन बर दो-दो ठन संरक्षण गृह घलो चलत हे।
अरूण साव-प्रेसवार्ता
भारतीय जनता पार्टी के प्रदेस अध्यक्ष अरूण साव ह किहीन हे कि कांग्रेस नेता राहुल गांधी ह पिछड़ा वर्ग के अपमान बर माफी नइ मांगीन, तेखरे सेती सूरत के एक ठन अदालत ह ओमन ल दोसी ठहरावत दू बछर के सजा सुनाय रिहीन। आज रईपुर म पत्रकार मन ले गोठबात करत श्री साव ह किहीन कि राहुल गांधी के संसद सदस्यता खतम होय म भारतीय जनता पार्टी या केन्द्र सरकार के कोई भूमिका नइ हे। लोकसभा सचिवालय ह अदालत के फइसला के पालन करत सदस्यता खतम करे के अधिसूचना जारी करे हे। अइसन पहिली घलो कुछेक राजनीतिक लोगन संग होय हवय, जउन मन ल दू बछर ले जादा के सजा अदालत ह सुनाय रिहीस। श्री साव ह किहीन कि छत्तीसगढ़ म कांग्रेस नेता मन ह हिंसा करत हे, जउन ह ठीक नइ हे। ओमन राज्य सरकार ले किहीन कि कांग्रेसी मन ल कानून व्यवस्था के तहत अपन नियंत्रण म राखय।
प्रधानमंत्री उज्जवला योजना-सब्सिडी
केन्द्रीय आर्थिक मामला के मंत्रिमंडलीय समिति ह प्रधानमंत्री उज्जवला योजना म प्रति एलपीजी सिलेंडर दू सौ रूपिया के सब्सिडी ल एक बछर बर बढ़ा दे हवय। एक मार्च दू हजार तेईस के स्थिति के अनुसार प्रधानमंत्री उज्जवला योजना के लाभार्थी मनके कुल संख्या नौ करोड़ उनसठ लाख हे। केन्द्रीय सूचना अउ प्रसारण मंत्री अनुराग सिंह ठाकुर ह काली नई दिल्ली म किहीन कि एक बछर म बारह सिलेंडर तक दू सौ रूपिया तक के सब्सिडी मिलही।
केन्द्र-महंगाई भत्ता
केन्द्र सरकार ह अपन कर्मचारी अउ पेंसनधारक मनके महंगाई भत्ता ल चार प्रतिसत बढ़ा दे हवय। अइसने, केन्द्रीय कर्मी अउ पेंसनभोगी मनके महंगाई भत्ता अब बाढ़के बयालीस प्रतिसत होगे हवय। एखर फायदा ए बछर एक जनवरी ले केन्द्र सरकार के सैंतालीस लाख कर्मी अउ उनहत्तर लाख ले जादा पेंसनभोगी मन ल मिलही। केन्द्रीय सूचना अउ प्रसारण मंत्री अनुराग सिंह ठाकुर ह काली नई दिल्ली म संवाददाता मन ले किहीन कि ए फइसला ले हर बछर बारह हजार आठ सौ पन्द्रह करोड़ रूपिया ले जादा के उपरहा खरचा होही।
डीजी-बिलासपुर जेल
प्रदेस के पुलिस महानिदेशक जेल संजय पिल्ले ह आज बिलासपुर के सेंट्रल जेल पहुंचीन। उहां ओमन ह जेल अस्पताल, रसोई घर अउ वीडियो कॉन्फ्रेंसिंग रूम के व्यवस्था ल देखनी अउ दूसर काजकाज के जानकारी लीन। ओमन ह जेल अधीक्षक खोमेश मंडावी अउ दूसर अधिकारी मन ले जेल के कामकाज ल सुधारे बर किहीन।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म कोंडागांव जिला के बारे म जानकारी दे जाही।