प्रदेस के सिक्षित बेरोजगार मन ल अवइया एक अप्रैल ले पच्चीस सौ रूपिया हर महीना के दर ले बेरोजगारी भत्ता दे जाही। ए संबंध म कौशल विकास, तकनीकी सिक्षा अउ रोजगार विभाग ह आदेस जारी कर देहे। संचालक, रोजगार अउ प्रसिक्षण ह बतईन कि बेरोजगारी भत्ता ले बर आवेदक मन ल छत्तीसगढ़ के मूल निवासी होना जरूरी हवय। सिक्षित बेरोजगार मनके उमर अट्ठारह ले पैंतीस बछर के बीच होना चाही। संगेसंग मान्यता प्राप्त बोर्ड ले बारहवीं परीक्षा पास होना चाही। आवेदक के पंजीयन जिला रोजगार अउ स्व-रोजगार मार्गदर्सन केन्द्र म होना जरूरी हे। उहें, आवेदन के परिवार के वार्षिक आय ढाई लाख रूपिया ले जादा नइ होना चाही। पात्र सिक्षित युवा मन ल एक बछर बर बेरोजगारी भत्ता दे जाही। यदि ए बेरा म ओला नौकरी नइ मिल पात हे, त ए बेरा म एक बछर अउ बढ़ा दे जाही। कोनो भी प्रकरण म ए अवधि ह दू बछर ले जादा नइ होही।
विस-समाचार
छत्तीसगढ़ विधानसभा आज वन मंत्री मोहम्मद अकबर ह वन परिक्षेत्र बेलगहना, आमागुड़ा अउ भालुमुड़ा म बछर दू हजार इक्कीस म डीजल के भुगतान म देरी करे जाय के मामला म पांच झिन वन अधिकारी अउ करमचारी ल निलंबित कर देहे। प्रश्नकाल के बेरा म भाजपा विधायक धरमलाल कौशिक ह इही बात ल लेके सवाल करे रिहीन, जेखर जवाब म वन मंत्री ह बतईन कि जांच म वन क्षेत्रपाल विजय कुमार साहू, उप वन क्षेत्रपाल सेवक राम बैगा, वनपाल मोहम्मद शमीम, वन रक्षक हित कुमार ध्रुव अउ मुलेश कुमार जोशी ल दोसी पाय गेहे। ओमन ह सदन म ए पांचो सासकीय सेवक मन ल निलंबित करे के जानकारी दीन।
सदन म आज प्रश्नकाल के बेरा पूर्व मुख्यमंत्री डॉक्टर रमन सिंह ह रायगढ़ के गारेपलमा कोल ब्लॉक म कोल परिवहन के बारे म जानकारी चाहीन। ओमन ह कहिन कि परिवहन बर दोगुना कीमत म निविदा दे गेहे। एखर जवाब म मुख्यमंत्री भूपेश बघेल ह कहिन कि परिवहन बर एसईसीएल खदान के भीतर जउन दर निर्धारित हे। उही दर म सरकार ह निविदा परिवहन बर देहे। ए दर बछर दू हजार सत्रह ले लागू रिहीस। एखर उपर डॉक्टर सिंह ह सवाल करीन कि यदि एसईसीएल ह मापदंड तय करे हे, त प्रति मीटरिक टन दू हजार दस रूपिया के दर ले जादा वसूली काबर करे जात हे। अइसन म परिवहन के बेरा करोड़ों रूपिया के घोटाला करे गेहे। डॉक्टर सिंह ह ए टेंडर ल निरस्त करे के मांग करीन। संगेसंग विधानसभा कमेटी ले जांच बर घलो किहीन। अपन जवाब म मुख्यमंत्री श्री बघेल ह कहिन कि निविदा म आठ ठिन कंपनी सामिल हवय, जेमा ले दू ठिन पात्र पाय गेहे अउ एक ल ठेका दे गेहे। विपक्षी सदस्य मन ह मुख्यमंत्री के जवाब ले संतुष्ट नइ होईन अउ सदन म हल्ला करत हुए बाहिर निकल गीन। एखर बाद सदन के कार्यवाही ल दस मिनट बर स्थगित कर दे गीस।
भाजपा जांच दल
बस्तर के भेजरीपदर म दू समुदाय के बीच होय विवाद के मामला म भाजपा डहार ले बनाये गे जांच समिति के सदस्य मन आज भेजरीपदर पहुंचीन। ए मउका म समिति के छै झिन सदस्य ननकीराम कंवर, दिनेश कश्यप, किरणदेव, बैदूराम कश्यप, राजाराम तोड़ेम अउ शिवनारायण पांडेय अउ पूर्व मंत्री केदार कश्यप ह गांव वाले मन ले भेंट करके घटना के बारे म जानकारी लीन। समिति के सदस्य मन ह पीड़ित आदिवासी मन ल न्याय दिलाय के भरोसा दीन। पूर्व मंत्री ननकीराम कंवर ह पत्रकार मनले गोठबात करत कीहिन कि जांच समिति ह अपन प्रतिवेदन भाजपा प्रदेश इकाई ल सौंपही संगेसंग विधानसभा म घलो ए मामला ल उठाये जाही।
विश्व जल दिवस
आज विश्व जल दिवस हरय। संयुक्त राष्ट्र के अनुसार ए ह वार्षिक आयोजन हवय, जेला बछर उन्नीस सौ तिरानवे म सुरू करे गे रिहीस। ए दिन वैश्विक जल संकट के बारे म जागरूकता फैलाथे अउ जल संरक्षण संबंधित महत्व ल दर्साथे। एसो के बिसय हे – जल और स्वच्छता संकट के समाधान से तेजी से परिवर्तन लाना।
प्रधानमंत्री नरेन्द्र मोदी के नेतृत्व म केन्द्र सरकार जल जीवन मिशन, अटल भूजल योजना, प्रधानमंत्री कृषि सिंचाई योजना, नमामि गंगे, नेशनल अक्विफायर मैपिंग अउ प्रबंधन कार्यक्रम जइसे कतकोन योजना अउ कार्यक्रम ल कार्यान्वित करत हे। एखर उद्देश्य जल संरक्षण अउ भूजल स्तर ल बढ़ाना हे।
दुर्घटना-जवान मौत
बस्तर जिला म आज होय एक ठिन रद्दा दुर्घटना म छत्तीसगढ़ सशस्त्र बल-सीएएफ के दू झिन जवान के मउत होगे। उहें, एक झिन आने जवान ह गंभीर रूप ले घायल होगे, जेला हेलीकॉप्टर ले रईपुर लाय गेहे।
जानबा के अनुसार सीएएफ के एक झिन जवान के तबीयत खराब होय के बाद दू झिन आने जवान मन ओला मोटर साइकिल ले इलाज बर किलेपाल के अस्पताल म ले जात रिहीन। इही बेरा कोडे़नार थाना क्षेत्र म राष्ट्रीय राजमार्ग क्रमांक-एक सौ तिरसठ म चारपहिया गाड़ी ह उंखर मोटर साइकिल ल टक्कर मार दीस, जेखर ले एक झिन जवान के मउका म ही मउत होगे रिहीस। उहें, एक झिन आने जवान ह इलाज के बेरा दम तोड़ दीन। ए सबो जवान मन बास्तानार के सीएएफ कैम्प म पदस्थ रिहीन।
एक भारत-श्रेष्ठ भारत
एक भारत-श्रेष्ठ भारत कार्यक्रम के चलत गुजरात ले आय पन्द्रह सदस्य मनके पुलिस दल ह दू ले इक्कीस मार्च तक बिलासपुर संभाग के आने-आने जगह गीन। ए बेरा म ओमन ह बिलासपुर रेंज के पुलिस महानिरीक्षक अउ पुलिस अधीक्षक मन ले भेंट करीन। दल के सदस्य मन ह जांजगीर-चांपा, सक्ती, सारंगढ़-बिलाईगढ़, रायगढ़, कोरबा, गौरेला-पेण्ड्रा-मरवाही अउ मुंगेली के कतकोन जिला पुलिस कार्यालय अउ थाना के निरीक्षण करत हुए पुलिस के कामबूता के बारे म जानकारी लीन। संगेसंग ओमन ह पुरातात्विक, धार्मिक अउ पर्यटन स्थल घलो गीन। त उहें, ए प्रसिक्षण कार्यक्रम के बेरा जवान मन ल छत्तीसगढ़ सशस्त्र बल, बिलासपुर रेल मंडल, सेंट्रल जेल, होम गार्ड कैम्प, छत्तीसगढ़ उच्च न्यायालय, एनटीपीसी सीपत अउ आने उपक्रम के जानकारी दे गीस।
चैत्र-नवरात्र
मां दुर्गा के उपासना के परब चैत्र नवरात्रि ह आज ले सुरू होगे हे। बिहनिया ले ही देवी दाई के मंदिर अउ कतकोन शक्तिपीठ म दर्सन बर लोगन मनके भीड़ देखे बर मिलत हे। मंदिर म मनोकामना ज्योति कलस घलो राखे गेहे। संगेसंग मंदिर ल रंगा-बिरंगा लाइट ले सजाय गेहे। ए परब के चलत डोंगरगढ़ के बम्लेश्वरी दाई के मंदिर, रतनपुर के मां महामाया, चन्द्रपुर के मां चन्द्रहासिनी अउ दंतेवाड़ा के दंतेश्वरी मंदिर म जवइया श्रद्धालु अउ पैदल जाय वाले यात्री मन बर बिसेस व्यवस्था करे गेहे। नवरात्रि के पहिली दिन दंतेश्वरी दाई के पूरा विधि-विधान ले पूरा करे गीस। त उहें, डोंगरगढ़ म लगे वाले मड़ई मेला म लोगन मनके सुविधा बर पुलिस प्रशासन ह एक हजार जवान मनके तैनाती करे गेहे।
आज ले हिन्दू नव वर्ष घलो सुरू होगे हे। एला विक्रम सवंत या फेर नव संवत्सर घलो कहिथे। ए चैत्र शुक्ल प्रतिपदा ले सुरू हो जथे। देस के कतकोन जघा म नवा बछर ल आने-आने नाम ले जाने जाथे। मुख्यमंत्री भूपेश बघेल, विधानसभा अध्यक्ष डॉक्टर चरणदास महंत, भाजपा प्रदेस अध्यक्ष अरूण साव अउ नेता प्रतिपक्ष नारायण चंदेल ह प्रदेसवासी मन ल चैत्र नवरात्रि, हिन्दू नववर्ष अउ चेट्रीचण्ड्र के बधाई दीन हे।
चेट्रीचण्ड्र-अवकाश
प्रदेस म चेट्रीचण्ड्र महोत्सव म काली तेईस मार्च के राज्य के सबो नगर निगम अउ नगर पालिका क्षेत्र म सामान्य छुट्टी रइही। एखर बारे म सामान्य प्रसासन विभाग ह अधिसूचना जारी कर देहे। उहें, काली राज्य के सबो बैंक, आने सरकारी वित्तीय संस्था, कोषालय, उप कोषालय अउ सहकारी बैंक आदि खुला रइही। उहें, नवा रईपुर के सबो सरकारी कार्यालय म कामबूता होही। एखर अलावा ग्रामीण क्षेत्र म घलो सरकारी दफ्तर खुले रइही।
उहें, स्कूल सिक्षा विभाग ह एक ठिन आदेस म केहे हे कि जउन स्कूल म काली पहिली ले परीक्षा तय हे, ओ ह वइसने रइही। बाकी मन बर काली छुट्टी होही।